Lƹalamaṯ n ȓfana n ddunect
24
1 Iffeɣ Ƹisa zi ṯemziḏa ṯameqqrant ibeƹƹeḏ cwayt ssenni. Qarrben-d ɣares imeḥḍaren nnes ḥima aḏas seḍharen ȓebni n ṯemziḏa ṯameqqrant.
2 Inna-asen Ƹisa: "Twaȓam qaƹ manaya? Aqa tesȓam ȓḥaqq: War ḏa itɣimi ij n uzru x unneɣnit, marra aḏ inehḏem."
3 Wami iqqim ḏeg uḏrar n zzitun, qarrben-d ɣares imeḥḍaren nnes waḥeḏsen nnan-as: "Ini-yaneɣ, meȓmi ɣa iwqeƹ manaya? Min ṯeƹna lƹalama nni xmi d ɣa ṯaseḏ cek, ḏ ȓefna n zman?"
4 Indeq-d Ƹisa, inna-asen: "Ḥḍam ixef nwem ḥima war kenniw ixeddeƹ ḥadd.
5 Aṭṭas iy d ɣa yasen s yisem inu aḏ inin qa nec ḏ Lmasiḥ! Aḏ xeḏƹen aṭṭas n yiwḏan.
6 Xmi ɣa ṯesȓim x lḥuȓub ḏ ȓexbar n ȓḥarb war teggwḏem ca. Labud zi manaya, maca ƹaḏ war ṯfenni ddunect.
7 Ȓgens aḏ ihjem x ȓgens, lmemlaka x lmemlaka. Aḏ iwqeƹ zzinzal ḏeg waṭṭas n imucan, aḏ yiȓi jjuƹ.
8 Marra manaya aḏ yiȓi amecnaw amezwaru n ȓeḥriq n ṯemɣarṯ iy ɣa yarwen.
9 Ssenni akenniw sellmen yiwḏan ḥima akenniw ƹeddben, akenniw nɣen. Marra dduwal akenniw ƹiffen ƹlaḥsab isem inu.
10 Aṭṭas iy ɣa ikfaren zeg yinni iy yumnen. Aḏ zzenzen ayawya, aḏ ƹiffen ayawya.
11 Aḏ d ḍharen aṭṭas n yiwḏan aḏ arren ixef nsen ḏ lʼanbiya, aḏ xeḏƹen aṭṭas n yiwḏan.
12 Aḏ tenqes ȓemḥibbeṯ jar yiwḏan minzi aḏ ikṯar ccerr.
13 Maca wenni ɣa iṣbaren aȓ uneggar aḏ injem.
14 Lʼinjil n ȓmulk n Arebbi axas ḥeddṯen yiwḏan ḏi marra ṯimura n ddunect ḥima aɣarsen ṯiȓi chaḏeṯ xafi. Ȓxeddnnit iy d ɣa yas ȓefna.
15 Xmi ɣa ṯeẓrem "min iǧan ḏ aƹeffan aṭṭas iheddmen," itbedda ḏeg umcan iqeddsen, iƹni mixef issiweȓ nnabi Danyal (Fhem, a wenni iɣrin manaya!).
16 Ȓxeddnnit ixeṣṣa yinni iǧan ḏi ṯmurṯ n Yahuḏiya aḏ rewȓen ɣar iḏurar.
17 Wenni iy ɣa yiȓin x ṯzeqqa nnes ixeṣṣa war ihekkwi ɣar ṯeddarṯ ḥima aḏ iysi can ȓḥajeṭ.
18 Wenni iǧan ḏeg umarjeƹ ixeṣṣa war iteƹqib ca ɣar ṯeddarṯ aḏ iysi čammir nnes.
19 Ya tamara x ṯemɣarin iy ɣa yiȓin s iƹeddisen ḏeg wussan nni, ḏ ṯinni nneɣnit isuṭuḍen!
20 Ttareṯ i Arebbi bac war tiȓi ca ṯarewȓa nwem ḏi ȓmecta niɣ ḏi nhar n lƹibada.
21 Ḏi ȓweqṯ nni aḏ tiȓi ij n tamara ḏ ṯameqqrant iy war iweqiƹen ƹemmarṣ zeg wami ṯeǧa ddunect aȓ ȓexxu, u ƹemmarṣ aḏ tewqeƹ ƹaweḏ.
22 Mȓi Siḏi Arebbi war isenqes ȓiyyam n tamara nni, aḏ tiȓi war inejjem uȓa ḏ ijjen. X ȓesbab n yinni ixḍar Arebbi, isenqes ȓiyyam nni.
23 Ssenni meȓa inna-awem can ḥadd: Xzarem! Aqa-ṯ ḏa Lmasiḥ! Niɣ, Aqa-ṯ ḏiha! War ṯ tamnem ca.
24 Aqa aṭṭas iy d ɣa iḍharen aḏ inin qa nec ḏ Lmasiḥ niɣ nec zi lʼanbiya, maca ḏ ixarriqen. Aḏ ggen lmuƹjizaṯ ṯimeqqranin ḏ ȓaƹjayeb ḥima aḏ xeḏƹen iwḏan. Maƹlik zemmren iȓi xeḏƹen uȓa ḏ yinni ixḍar Arebbi.
25 Xzarem! Aqa ƹeȓmeɣ-awem qbeȓ ma ḏ iwqeƹ manaya.
26 Meȓa nnan-awem: Xzarem, aqa-ṯ ḏi ȓexȓa! War traḥem ḏinni. Niɣ meȓa nnan: Xzarem, aqa-ṯ ɣar ḏaxeȓ ḏeg ixammen! War ṯen tamnem ca.
27 Aqa xmi d ɣa yas Mmis n bnaḏem aḏ yiȓi amecnaw assam iy d iteffɣen zi ccarq itegg ṯfawṯ ḏi lɣarb.
28 Mani ɣa iȓin imurḍas, tmunen ḏinni ibaɣeriwen.
29 Menbaƹd i tamara n ȓiyyam nni, ȓxeddnnit ṯfuct aḏ teḏwer ḏ ṯaǧest, ṯaziri war ticc bu ṯfawṯ. Yiṯran aḏ d wḍan zeg ujenna, yinni ijehḏen ḏeg ujenna aṯen isenhezz Arebbi.a
30 Uca aḏ tmeḍhar lƹalama n Mmis n bnaḏem ḏeg ujenna, ȓxeddnnit iy ɣa ḥeznent marra ṯiqebbaȓ n ṯmurṯ. Aḏ ẓrent Mmis n bnaḏem xmi d ɣa ihwa ḏeg useynu n ujenna s lƹaḍama ḏ jjehḏ nnes imɣaren.
31 Aḏ iṣuḍ ij n zzammar ḏ ameqqran, aḏ d issekk Arebbi lmalaʼikaṯ nnes ɣar arbeƹa imucan n ṯmurṯ manis d itekk arriḥ: ccarq ḏ lɣarb ḏ ljanub ḏ ccamal. Aḏ d ismun yinni ixḍar zi ȓaḥedd n ujenna aȓ ȓaḥedd nnes nneɣnit.
32 Ȓemḏem ȓmaƹna zi ṯcejjarṯ n ṯazarṯ. Ɣir aḏ meɣren ȓefruƹ nnes aḏ tegg ṯifray, ṯessnem belli anebḏu iqarreb-d.
33 Amenni, uȓa ḏ kenniw, xmi ɣa ṯeẓrem marra manayenni iy ɣa iweqƹen, ṯessnem belli yuḏes-d, aqa-ṯ zzaṯ i ṯewwarṯ.
34 Aqa tesȓam ȓḥaqq: War tmettin yiwḏan n ȓweqṯ-a aȓ ɣa iwqeƹ marra manaya.
35 Aḏ ikkes ujenna ḏ ṯmurṯ, maca awaȓ inu war itekkes ƹemmarṣ.
36 Maca nhar nni niɣ ṯsaƹat nni, war t issin uȓa ḏ ijjen, lla lmalaʼikaṯ ḏeg ujenna, lla Mmis. Baba waḥḏes iy issnen.
37 Amecnaw min iweqƹen ḏi ȓyamaṯ n Nuḥ, ammen iy ɣa iwqeƹ xmi d ɣa iḏwer Mmis n bnaḏem.
38 Yiwḏan ḏi ȓweqṯ nni qbeȓ i ṭṭufan,b tuɣa tetten, sessen, meǧcen iryazen ḏ ṯemɣarin, ḥetta aȓ nhar wami yuḏef Nuḥ ḏeg uɣarrabu.
39 War fṭinen aȓ wami d yusa ṭṭufan isɣareq-iṯen marra. Ammu iy ɣa iwqeƹ xmi d ɣa iḏwer Mmis n bnaḏem.
40 Aḏ iȓin ṯnayen iryazen ḏeg umarjeƹ, aḏ imeysi ijjen aḏ iqqim unneɣnit.
41 Aḏ iȓint ṯnayen n ṯemɣarin ḥerrint ṯiḥebba ḏi ṯsirṯ, aḏ tmeysi icten aḏ teqqim ṯenneɣnit.
42 X manaya, iȓim ƹlabal! War ṯessinem meȓmi iy d ɣa iḏweȓ Siḏiṯwem.
43 Ixeṣṣa-awem aḏ tessnem manaya: Mȓi issen bab n ṯeddarṯ ṯsaƹat iy ḏi d ɣa yas uceffar, iȓi iqqim ifaq ḥima war ṯ itijji aḏ d yaḏef ṯaddarṯ nnes.
44 X manaya, swejḏem ixef nwem minzi Mmis n bnaḏem aḏ d yas ḏi ṯsaƹat war trijim ca.
Iȓim ṯewjḏem xmi d ɣa iḏweȓ Siḏiṯwem
45 Manwen iǧan ḏ axeddam ḏ amiɣis, ḏayes ȓaman? Ḏ wenni ig itkellaf siḏes aḏasen yuc i ixeddamen nnes maccac ḏi ȓweqṯ.
46 Ssaƹḏ n uxeddam nni, xmi ɣa iḏweȓ siḏes aṯ yaf ixeddem.
47 Aqa tesȓam ȓḥaqq: Axeddam nni aṯ ikellef siḏes x marra agȓa nnes.
48 Maca meȓa axeddam nni ḏ aƹeffan, aḏ inwa belli siḏes aḏ iƹḍeȓ war d itis ca,
49 aḏ ibḏa iccaṯ ixeddamen, aḏ icc aḏ isew aḏ yiȓi ak iskayriyen.
50 Uca aḏ d yas siḏes n uxeddam nni ḏeg yij n nhar war ṯ inwi ca, ḏeg yij n ṯsaƹat war t issin ca.
51 Aṯ iqess ḏ iwezwizen, aṯ ijj ḏeg umcan n lmunafiqin, ḏinni iy ɣa iȓin imeṭṭawen ḏ uɣeẓẓaẓ n ṯeɣmas.