Ȓmaƹna n ƹecra n ṯeƹzriyin
25
1 Ȓmulk ujenna amecnaw ƹecra n ṯeƹzriyin ig iysin ȓeqnaḏeȓ, ffɣent aḏ ȓeqqant muȓay.
2 Xemsa iḏsent ḏ ṯifɣaȓ, xemsa iḏsent ḏ ṯimiɣisin.
3 Ṯifɣaȓ wami ysint ȓeqnaḏeȓ, war ysint bu zzect ḏ zziyada.
4 Ṯimiɣisin niṯenti ysint akisent zziyada n zzect ḏi ṯzeyyaṯin.
5 Iƹḍeȓ muȓay war d yusi, uḥȓent ṭṭṣent marra iḏsent.
6 Ɣar ȓwesṭ n ǧiȓeṯ, sȓint i uȓaɣi: Aqa muȓay yusa-d, ffɣent aṯ teȓqant!
7 Kkarent ṯeƹzriyin nni serɣent ȓeqnaḏeȓ.
8 Ṯifɣaȓ nnant i ṯimiɣisin: Ucent-aneɣ cwayt n zzect, ȓaḥeqqac ȓeqnaḏeȓ nneɣ ƹȓayen aḏ xsin.
9 Arrint xasent ṯimiɣisin, nnant-asent: Lla, minzi war ḏaneɣ itqeddi i neccin ḏ kennint. Ruḥent ɣar ṯḥanet sɣent-id min ɣa ṯeḥḏajent.
10 Wami ruḥent ṯefɣaȓ aḏ sɣent zzect, ixḍeȓ-d muȓay. Uḏfent akis ṯinni iswejḏen ɣar ȓfarḥ, ṯbelleƹ ṯewwarṯ.
11 Umbaƹd usint-id ṯinneɣnit, nnant-as s jjehḏ: A siḏi a siḏi, rzem-aneɣ ṯawwarṯ!
12 Yarra xasent muȓay, inna-asent: Aqa tesȓant ȓḥaqq: War kennint ssineɣ.
13 X manayenni, iȓim ƹlabal ȓaḥeqqac war ṯessinem uȓa ḏ nhar nni uȓa ḏ ṯsaƹat nni.
Ȓmaƹna n ṯȓaṯa ixeddamen
14 Iwa, ij n uryaz ixes aḏ isafer. Iȓaɣa-d i ixeddamen nnes ikellef-iṯen x wagȓa nnes.
15 Yuca-asen ƹlaḥsab min umi zemmren. Yuca-as i yijjen xemsa aȓef n ȓuznaṯ n nnuqarṯ. Yuca-as i unneɣnit aȓefayen. Yuca-as aȓef i unneɣnit, ssenni isafer.
16 Ȓxeddnnit iruḥ wenni umi yuca xemsa aȓef n ȓuznaṯ igga zzaysent ttijara, yuwi-d xemsa aȓef nneɣnit.
17 Amenni igga ȓa ḏ wenni umi yuca aȓefayen, yuwi-d aȓefayen nneɣnit.
18 Maca wenni umi yuca aȓef n ȓuznaṯ, iruḥ iɣza ḏi ṯmurṯ isnuffer tmenyaṯ n siḏes.
19 Wami ṯeƹḏu xarebbi n ȓweqṯ, iḏwer-d siḏiṯsen itegg akiḏsen ȓeḥsab.
20 Iqarreb-d wenni umi yuca xemsa aȓef n ȓuznaṯ, irni-yas akiḏsent xemsa aȓef nneɣnit. Inna-as: A siḏi, ṯuciḏ-ayi cek xemsa aȓef n ȓuznaṯ, aqa uwiɣ-d xemsa aȓef nneɣnit.
21 Inna-as siḏes: Ṯeggiḏ mliḥ, ay axeddam aṣebḥan, cek ḏayek ȓaman. Ḏayek ȓaman x ḏrus, ȓexxu ac kellfeɣ x waṭṭas. Aḏef aḏ tfarḥeḏ ak siḏec.
22 Iqarreb-d uxeddam nni umi yuca aȓefayen n ȓuznaṯ, inna-as: A siḏi, ṯuciḏ-ayi cek aȓefayen n ȓuznaṯ, aqa uwiɣ-d aȓefayen nneɣnit.
23 Inna-as siḏes: Ṯeggiḏ mliḥ, ay axeddam aṣebḥan, cek ḏayek ȓaman. Ḏayek ȓaman x ḏrus, ȓexxu ac kellfeɣ x waṭṭas. Aḏef aḏ tfarḥeḏ ak siḏec.
24 Iqarreb-d wenni umi yuca aȓef n ȓuznaṯ, inna-as: Nec ssneɣ cek ḏ ij n bnaḏem ṯeqsḥeḏ. Ṯmejjareḏ mani war ṯzerrƹeḏ ca, ṯkessiḏ min war teẓẓuḏ ca.
25 Ggwḏeɣ zzayek, ruḥeɣ snuffreɣ tmenyaṯ nnec ḏi ṯmurṯ, u aqa-c tmenyaṯ nnec.
26 Indeq-d siḏes, inna-as: Ay axeddam aƹeffan, ay afenyan! Iwa ṯessneḏ belli nec mejjareɣ mani war zerrƹeɣ, kessiɣ min war teẓẓuɣ.
27 Mayemmi war ṯejjiḏ tmenyaṯ inu ɣar iṣarrafen, nec aḏ d aseɣ aḏ ysiɣ tmenyaṯ inu ḏ ȓefḍeȓ akisent?
28 Uca inna-asen i ixeddamen nnes: Kksem-as aȓef n ȓuznaṯ nni, rnim-ṯent i wenni ɣar iǧa ƹecra aȓef.
29 Wah, wenni iǧan ɣares itmerni-yas, aɣares yiȓi aṭṭas. Wen war ɣar iǧi ca, itmeysi-yas uȓa ḏ min ɣares.
30 Axeddam-a iy ḏi war iǧi nfaƹ, neḍrem-ṯ barra ɣar ṯaǧest. Ḏinni iy ɣa iȓin imeṭṭawen ḏ uɣeẓẓaẓ n ṯeɣmas.
Yewm Lḥisab ḏ Lƹiqab
31 Xmi d ɣa yas Mmis n bnaḏem s lƹaḍama nnes, akis marra lmalaʼikaṯ nnes, aḏ iqqim x lƹarc n lƹaḍama nnes.
32 Aḏ njemƹen marra iwḏan zzaṯ nnes, aḏ iƹzeȓ iwḏan ijjen zeg unneɣnit amecnaw mammec wenni irewwsen ȓebhayem iteƹzaȓ iḥuȓiyen zi ṯɣatin.
33 Iḥuȓiyen aṯen igg x ufusi nnes, ṯiɣatin aṯent igg x uẓeȓmaḍ nnes.
34 Uca aḏasen yini uzeǧiḏ i yinni iǧan x ufusi nnes: Araḥem-d kenniw a yinni iy ḏi igga Baba lbaraka, warṯem ȓmulk iy ḏawem isewjeḏ zeg wami ṯeǧa ddunect.
35 Ȓaḥeqqac tuɣa ǧuzeɣ ṯseccem-ayi. Tuɣa ffuḏeɣ ṯsesswem-ayi. Tuɣa-ayi ḏ aɣrib ṯsezḏɣem-ayi.
36 Tuɣa-ayi ḏ aƹaryan ṯeggim-ayi arruḍ. Tuɣa heȓceɣ ṯbeddem akiḏi. Tuɣa twaḥebbseɣ ṯeggim-d ɣari zziyara.
37 Aṯ jawben iṣebḥanen nni aḏas inin: A Siḏi, meȓmi c neẓra ṯeǧuzeḏ, nsecc-ic? Niɣ ṯeffuḏeḏ, nsessew-ic?
38 Meȓmi c neẓra ḏ aɣrib, nsezḏeɣ-icek? Niɣ ḏ aƹaryan, negga-ac arruḍ?
39 Meȓmi c neẓra ṯheȓceḏ niɣ ḏ ameḥbus, nusa-d ɣarek?
40 Aḏ d indeq uzeǧiḏ aḏasen yini: Aqa tesȓam ȓḥaqq: Min ṯeggim i yij n wuma ḏ amezyan zeg ayṯma, ṯeggim-ayi-t i nec.
41 Ȓxeddnnit aḏasen yini i yin x uẓeȓmaḍ nnes: Beƹƹḏem xafi, a yinni inƹeȓ Arebbi! Ruḥem ɣar ṯmessi iy war ixessin ƹemmarṣ, iswejḏen i Cciṭan ḏ ccayaṭin nnes!
42 Ȓaḥeqqac tuɣa ǧuzeɣ, war ḏayi ṯseccem. Tuɣa ffuḏeɣ, war ḏayi ṯsesswem.
43 Tuɣa-ayi ḏ aɣrib, war ḏayi ṯsezḏɣem. Tuɣa-ayi ḏ aƹaryan, war ḏayi ṯeggim arruḍ. Tuɣa heȓceɣ twaḥebbseɣ, war ɣari d ṯeggim zziyara!
44 Aṯ jawben uȓa ḏ niṯni aḏas inin: A Siḏi, meȓmi c neẓra ṯeǧuzeḏ niɣ ṯeffuḏeḏ niɣ ḏ aɣrib niɣ ḏ aƹaryan niɣ ṯheȓceḏ niɣ ṯtwaḥebseḏ, neccin war c nƹiwen ca?
45 Aḏ d indeq uzeǧiḏ aḏasen yini: Aqa tesȓam ȓḥaqq: Min war ṯeggim ca i yij n wuma ḏ amezyan zeg ayṯma, war ḏayi t ṯeggim ca i nec.
46 Aḏ raḥen yina ɣar ṯmessi iy war ixessin ƹemmarṣ. Maca inneɣnit iṣebḥanen aḏ raḥen ɣar ṯuḏarṯ n ȓebda."