Ij n ṯemɣarṯ ṯegga aman n lwarḏ i Siḏna Ƹisa
26
1 Wami ikemmeȓ Ƹisa awaȓ nni, inna-asen i imeḥḍaren nnes:
2 "Ṯessnem belli Ȓƹiḏ Ameqqran n wuḏayen iqqim-as yewmayen. Ḏayes iy ɣa itwasellem Mmis n bnaḏem aḏ itwaṣelleb."
3 Ssenni munen arruyas n ȓefquha ḏ imeqqranen n wuḏayen ḏi ṯeddarṯ n arrayes n ȓefquha wenni umi qqaren Qiyafa.
4 Mcawaren jarasen ḥima aḏ ṭṭfen Ƹisa s lḥila aṯ nɣen.
5 Nnan jarasen: "Itxeṣṣa war ṯ nteṭṭef ca ḏi Ȓƹiḏ ḥima ccaƹb war teggen ca ȓfawḍa."
6 Ƹisa aqa-ṯ ḏi Bayt Ƹanya ḏi ṯeddarṯ n Simƹan bu-jḏam.
7 Ṯqarreb ɣares ij n ṯemɣarṯ ɣares ij n ṯzeyyat itwaṣenƹen s lmarmar,a ḏayes aman n lwarḏ iɣȓan s waṭṭas. Ṯferreɣ-as-t x uzeǧif nnes wami iqqim ɣar missa.
8 Wami t ẓrin imeḥḍaren min ṯexḏem, iqess-asen ȓḥaȓ nnan: "Mayemmi qaƹ aḍeyyeƹ-a?"
9 Iȓi menzen s waṭṭas n tmenyaṯ, aḏ mmucent tmenyaṯ nni i ȓmusakin!"
10 Issen Ƹisa manayenni inna-asen: "Mayemmi ṯesxeyyaqem ṯamɣarṯ-a? Aqa min ḏayi ṯegga netta ḏ aṣebḥan.
11 Ȓmusakin aqa-ṯen akiḏwem ȓebda, maca nec war kiḏwem tɣimiɣ ca i ȓebda.
12 Ṯferreɣ-ayi x ddat inu aman-a n lwarḏ ḥima aḏayi ṯsewjeḏ i ṯenḍeȓṯ inu.
13 Aqa tesȓam ȓḥaqq: Mani ma yuweḍ lʼinjil ḏi ddunect amen tekmeȓ, aḏ ƹawḏen x min ṯegga ṯemɣarṯ-a ḥima aḏayes fekkaren yiwḏan."
14 Ȓxeddnnit iruḥ Yahuḏa Isxaryuṭi, u netta zi ṯenƹac n arrusul, ɣar arruyas n ȓefquha.
15 Inna-asen: "Min ḏayi ɣa ṯucem meȓa sellmeɣ-awem-d Ƹisa?" Ḥesben-as ṯȓaṯin n ṯpeyyasin n nnuqarṯ ucin-as-ṯent.
16 Zi ȓweqṯ nni irezzu Yahuḏa lfurṣa mammec ṯ ɣa izzenz.
Amensi n Ȓƹiḏ Ameqqran n wuḏayen
17 Nhar amezwaru zi Ȓƹiḏ n Ṯefḍirṯ qarrben-d imeḥḍaren ɣar Ƹisa, nnan-as: "Mani ṯexseḏ aḏac nsewjeḏ amensi n Ȓƹiḏ?"
18 Inna-asen Ƹisa: "Ruḥem ɣar ṯendint ɣar fȓan inim-as: Qa inna-ac Siḏiṯneɣ: Ṯsaƹat inu ṯiweḍ-d, akiḏec iy ɣa ƹeyyḏeɣ nec ḏ imeḥḍaren inu."
19 Ggin imeḥḍaren minxef ṯen iweṣṣa Ƹisa. Swejḏen amensi n Ȓƹiḏ.
20 Wami d tiweḍ ṯmeddiṯ, iqqim Ƹisa akeḏ ṯenƹac n arrusul nnes ɣar missa.
21 Qqimen tetten, inna-asen Ƹisa: "Aqa tesȓam ȓḥaqq: Ijjen zzaywem aḏayi izzenz."
22 Xeyyqen aṭṭas, tseqsan-ṯ ij ij: "Yac war iǧi bu ḏ nec, a Siḏi?"
23 Indeq-d Ƹisa inna-asen: Wenni iy kiḏi issisnen ḏi ṭṭebṣi, ḏ wenni iy ḏayi ɣa izzenzen.
24 Mmis n bnaḏem aḏas iwqeƹ ƹlaḥsab mamc xas iqqar Lkitab, maca ya ȓefḍiḥeṯ n uryaz-a iy ṯ ɣa izzenzen! Mȓi war d ixȓiq uryaz-a iȓi ḥsen-as."
25 Uca inna-as Yahuḏa iƹni wenni iy ṯ ɣa izzenzen: "Yac war iǧi bu ḏ nec, a Siḏi?"
Inna-as Ƹisa: "Ḏ cek iy ṯ innan."
26 Wami ƹaḏ tetten, iysi aɣrum ickar Arebbi, irza aɣrum nni yuci-ṯ i imeḥḍaren nnes, inna-asen: "Ysim-ṯ ccem-ṯ, wa ig iǧan ḏ ddat inu."
27 Iysi ȓkas ickar Arebbi, yuca-asen-ṯ, inna-asen: "Swem zzayes marra iḏwem.
28 Ȓkas-a ḏ iḏammenb n ȓƹaheḏ, iƹni iḏammen inu iy ɣa azzȓen ƹlaḥsab aṭṭas n yiwḏan ḥima aḏasen iɣfar Arebbi ȓmuƹṣiyaṯ nsen.
29 Aqa qqareɣ-awem: Zi ssa aȓ ṯsawent war sesseɣ ca zeg waman-a uḍiȓ ḥetta aȓ nhar nni iy ṯen ɣa sweɣ akiwem zi jḏiḏ ḏi ȓmulk n Baba."
30 Ɣenjen izȓi n Ȓƹiḏ, ssenni ffɣen ruḥen ɣar uḏrar n zzitun.
Siḏna Ƹisa issawaȓ x unkar n Buṭrus
31 Inna-asen Ƹisa i imeḥḍaren nnes: "Ǧiȓeṯ-a ṯanita aḏayi ṯsemḥem marra iḏwem, minzi iqqar lkitab: Aḏ uwṯeɣ wenni irassen iḥuȓiyen, kuȓ ijjen zi ṯḥimerṯ mani ɣa irweȓ.c
32 Maca xmi d ɣa kkareɣ zi ȓmewṯ, aḏawem zwareɣ ɣar ṯmurṯ n Ljalil."
33 Indeq-d Buṭrus inna-as: "Waxxa ḏayec ɣa semḥen marra, nec war ḏayec semḥeɣ ca ƹemmarṣ."
34 Inna-as Ƹisa: "Aqa tesȓiḏ ȓḥaqq: Ṯa, ǧiȓeṯ-a qbeȓ iy ɣa idden uyaziḍ, aḏayi ṯenkareḏ ṯȓaṯa n ṯwaȓaṯin."
35 Inna-as Buṭrus: "War c nekkareɣ waxxa iy ɣa ssneɣ akic mmṯeɣ." Amenni iy nnan marra imeḥḍaren.
Siḏna Ƹisa itẓaǧa ḏeg Uḏrar n zzitun
36 Yusa-d Ƹisa akeḏ imeḥḍaren nnes ɣar yij n umcan qqaren-as "Gatsimani." Inna-asen: "Qqimem ḏa, nec aḏ raḥeɣ ḏiha aḏ ẓẓaǧeɣ."
37 Yuwi akis Buṭrus ḏ ṯnayen n ṯarwa n Zabdi, uca ixeyyeq inexȓeƹ.
38 Inna-asen: "Uȓ inu ƹȓayen aḏ idduqqez s uḥzan. Qqimem ḏa ṯfaqem akiḏi."
39 Ibeƹƹeḏ xasen cwayt, isejjeḏ ɣar ṯmurṯ, itettar i Arebbi inna: "Meȓa imken a Baba, aḏ tesbeƹƹḏeḏ xafi ȓkas-a n ȓaƹḏab. Maci mamc xseɣ nec, lla! Mamc ixes ȓxaḍar nnec cek."
40 Iḏweȓ ɣar imeḥḍaren-a yufi-ṯen ṭṭṣen, inna-as i Buṭrus: "Ma war ṯzemmrem akiḏi ṯfaqem ij n ṯsaƹat?
41 Iȓim ƹlabal ẓẓaǧem ḥima war tiḏfem ḏi ȓemḥayen. Uȓ n bnaḏem ixes aḏ igg min iǧan ḏ aṣebḥan, maca netta iḍƹef."
42 Ibeƹƹeḏ xasen ṯwaȓa wis ṯnayen, ittar i Arebbi inna: "A Baba, meȓa ȓkas-a n ȓaƹḏab war xafi ṯesbeƹƹḏeḏ, iƹni swiɣ-ṯ, ataf aḏ yiȓi min ixes ȓxaḍar nnec."
43 Iḏwer-d ƹaweḏ ɣarsen, yufi-ṯen ṭṭṣen ȓaḥeqqac iɣȓeb xasen yiḍeṣ.
44 Ibeƹƹeḏ xasen ƹaweḏ, iẓẓuǧ ṯwaȓa wis ṯȓaṯa iqqar amecnaw qbeȓ.
45 Iḏweȓ-d ɣar imeḥḍaren-a, inna-asen: "Ƹaḏ teṭṭṣem, ṯreyyḥem? Aqa ṯuweḍ-d ȓweqṯ iy ḏi ɣa itwasellem Mmis n bnaḏem ɣar ifassen n yinni iƹṣan.
46 Kkarem a nuyurem, wenni iy ḏayi ɣa izzenzen aqa yuḏes-d."
Uḏayen ḏ irumaniyen teṭṭfen Siḏna Ƹisa
47 Yallah Ƹisa issawaȓ yuweḍ-d Yahuḏa, ijjen zi ṯenƹac nni n arrusul nnes. Yuwi-d akis ȓɣaci aṭṭas ysin ȓesyuf ḏ idebbuzen. Ssekken-ṯen-d arruyas n ȓefquha ḏ imeqqranen n wuḏayen.
48 Tuɣa yuca-asen Yahuḏa iy ṯ ɣa izzenzen ij n lƹalama, inna-asen: Wenni xef ɣa seǧmeɣ ḏ wenni iy ṯrezzum, ṭṭfem-ṯ."
49 Ȓxeddnnit iqarreb Yahuḏa ɣar Ƹisa inna-as: "Ssalam a Siḏi." Uca iseǧem xas.
50 Inna-as Ƹisa: "Ay ameddukeȓ, minɣar d ṯusiḏ egg-iṯ." Qarrben-d ɣar Ƹisa ḥerṯen xas, ṭṭfen-ṯ.
51 Ikkar-d yijjen zeg yinni ḏin iǧan ak Ƹisa iswizzeḏ ijbeḏ-d ssif, yuwṯa ismeɣ n arrayes n ȓefquha iqess-as amezzuɣ.
52 Inna-as Ƹisa: "Arr ssif nnec ɣar umcan nnes, ȓaḥeqqac marra yinni ikessin ssif, tmettan s ssif.
53 Ma tɣir-ac war zemmreɣ aḏ ttareɣ i Baba aḏayi d issekk ȓexxu ktar zi ṯenƹac n ljuyuc n lmalaʼikaṯ?
54 Maca mammec iy ɣa ikemmeȓ wawaȓ iy inna Siḏi Arebbi belli manaya itxeṣṣa aḏ iwqeƹ ammu?"
55 Ȓxeddnnit inna-asen Ƹisa i yiwḏan nni: "Ma tɣir-awem qa nec ḏ lmujrim wami ṯeysim ȓesyuf ḏ idebbuzen ḥima aḏayi ṯeṭṭfem? Tuɣa tɣimiɣ mkuȓ nhar ḏi ṯemzida ṯameqqrant, seȓmaḏeɣ war ḏayi ṯeṭṭifem.
56 Maca marra manaya iwqeƹ ḥima aḏ ikemmeȓ min yurin ḏi lkutub n lʼanbiya." Uca semḥen ḏayes marra imeḥḍaren nnes rewȓen.
Siḏna Ƹisa zzaṯ i Lḥukkam n wuḏayen
57 Yin iṭṭfen Ƹisa uwin-ṯ ɣar arrayes n ȓefquha qqaren-as Qiyafa. Munen akis imeqqranen n wuḏayen ḏ imseȓmaḏen n Ccariƹa.
58 Iḏfar-iṯ Buṭrus zi ȓeggwaj, yuḏef ɣar ȓemraḥ n ṯeddarṯ n arrays n ȓefquha. Yuḏef iqqim ḏi ȓemraḥ ak iƹessasen ḥima aḏ iẓer min ḏas ɣa ggen.
59 Arruyas n ȓefquha ḏ marra Jmaƹeṯ n lḥukkam n wuḏayen rezzun uw ɣa icehḏen zzur x Ƹisa ḥima aṯ nɣen.
60 War ufin ca min rezzun waxxa aṭṭas iy xas icehhḏen zzur. Umbaƹd ḥḍaren-d ṯnayen
61 nnan: "Aryaz-a inna: Zemmreɣ aḏ heḏmeɣ ṯamziḏa ṯameqqrant n Arebbi, at bniɣ ḏi ṯeȓtiyyam."
62 Ikkar arrays n ȓefuqah inna-as i Ƹisa: "Ma war ṯeqqireḏ walu min xak cehhḏen yiwḏan-a?"
63 Iqqim Ƹisa isqar. Uca inna-as arrays nni: "Tettareɣ zzayec aḏaneɣ ṯejjaǧeḏ s Arebbi iddaren aḏaneɣ ṯiniḏ: Ma cek ḏ Lmasiḥ, ḏ Mmis n Arebbi?"
64 Inna-as Ƹisa: "Ḏ cek iy ṯ innan. Innama qqareɣ-awem: Zi ssa aȓ ṯsawent aḏ teẓrem Mmis n bnaḏem iqqim x ufusi n Wenni ig izemmren i kuȓci. Aṯ teẓrem ƹaweḏ ihwa-d ak useynu ujenna."
65 Ȓxeddnnit arrays nni n ȓefquha iɣareṣ arruḍ, inna-asen: "Ikfar! Ma ṯesȓim i wawaȓ nnes? War neḥḏij bu ȓechuḏ!
66 Min ḏawem iḍharen?" Nedqen-d nnan: "Isḏaheǧ ȓmewṯ!"
67 Ȓxeddnnit ssusufen-as x uɣembub ccaṯen-ṯ s ȓpunyaṯ. Ȓebƹaḍ zzaysen tseqqaȓen-ṯ,
68 qqaren-as: "Iwa ḥaqq a nnabi, a Lmasiḥ, uw c yuwṯin?"
Buṭrus inekkar Siḏna Ƹisa
69 Buṭrus iqqim ɣar barra ḏi ȓemraḥ. Ṯqarreb-d ɣares ij n ṯxeddant ṯenna-as: "Ȓa ḏ cek tiȓiḏ akeḏ Ƹisa zi ṯmurṯ n Ljalil."
70 Inkar Buṭrus zzaṯ i yiwḏan nni marra inna-as: "War ssineɣ ca minxef ṯessawaȓeḏ!"
71 Iffeɣ Buṭrus iruḥ ṭṭarf n ṯewwarṯ n ȓemraḥ. Ṯeẓri-ṯ ij n ṯxeddant nneɣnit ṯenna-asen i yin iḥḍaren: "Aryaz-a itiȓi akeḏ Ƹisa zi Nnaṣira!"
72 Inkar Buṭrus ƹaweḏ inna-asen: "Aḏawem jjaǧeɣ, aryaz-a war ṯ ssineɣ."
73 Umbaƹd cwayt qarrben-d ɣar Buṭrus yin iḥḍaren nnan-as: "Cek ḏ ijjen zzaysen, war ḏayes bu ccekk. Twaƹeqȓeḏ ɣir ḏeg wawaȓ nnec."
74 Ikkar ibḏa itḥarrem ixef nnes itjaǧa iqqar-asen: "Nec war ssineɣ ca aryaz-a!" Ȓxeddnnit idden uyaziḍ.
75 Ifekkar Buṭrus min inna Ƹisa: Qbeȓ iy ɣa idden uyaziḍ ṯȓaṯa n ṯwaȓaṯin aḏayi ṯenkareḏ." Iffeɣ, itru aṭṭas.