Ȓmewṯ n Yahuḏa Isxaryuṭi
27
1 Wami iṣbaḥ ȓḥaȓ, marra arruyas n ȓefquha ḏ imeqqranen n wuḏayen mcawaren jarasen ḥima aḏ nɣen Ƹisa.
2 Cedden-ṯ uwin-ṯ aṯ sellmen i lḥakem arrumani umi qqaren Bilaṭus.
3 Yahuḏa, iƹni wenni ig izzenzen Ƹisa, wami iẓra belli Ƹisa itwaḥakem, uca indem yarra-asen ṯȓaṯin nni n ṯpeyyasin n nnuqarṯ i arruyas n ȓefquha ḏ imeqqranen n wuḏayen.
4 Inna-asen: "Ƹṣiɣ wami sellmeɣ ijjen i ȓmewṯ netta war iggi minxef!"
Nnan-as niṯni: "Wenni ḏ cɣeȓ nnec! Neccin, min ḏaneɣ iruḥen?"
5 Inḍer tmenyaṯ nni ḏi ṯemziḏa ṯameqqrant; iffeɣ ssenni, iruḥ ijeyyef ixef nnes.
6 Jemƹen tmenyaṯ nni arruyas n ȓefquha, nnan: "Tmenyaṯ-a ḏ ttaman n iḏammen n bnaḏem. Ccariƹa nneɣ war ḏaneɣ ṯsemmeḥ aṯent nsers ḏi ṣṣenduq n ṯemziḏa."
7 Mcawaren jarasen, sɣin zzaysent ṯamurṯ nni umi qqaren "Iyer n wenni itṣenaƹen ȓeqcuƹ"a ḥima aḏayes ggen imeḍȓan i lbarrani.
8 S manayenni iy ḏas qqaren "Iyer iḏammen" ar ȓexxu ƹaḏ.
9 Amenni ikemmeȓ wawaȓ n nnabi Irmiya ig inna ḏeg yij n zman: "Ysin ṯȓaṯin nni n ṯpeyyasin, ttaman iy x tafqen axas xeǧsen yiwḏan n Ayṯ-Israʼil.
10 Sɣin zzaysent ṯamurṯ n wenni itṣenaƹen ȓeqcuƹ amecnaw mammec ḏayi iweṣṣa Siḏi Arebbi."
Tawin Siḏna Ƹisa ɣar lḥakem Bilaṭus
11 Ibedd Ƹisa zzaṯ i lḥakem nni arrumani. Isseqsa-ṯ lḥakem inna-as: "Cek, ma ḏ azeǧiḏ n wuḏayen?"
Inna-as Ƹisa: "Ḏ cek iy ṯ innan."
12 Wami tceṯcan zzayes arruyas n ȓefquha ḏ imeqqranen n wuḏayen, war xasen yarri ca.
13 Inna-as Bilaṭus: "Ma war tesȓiḏ ca marra min xak tceṯcan?"
14 War xasen yarri Ƹisa bu wawaȓ. Itƹejjeb lḥakem nni aṭṭas.
15 Ḏi mkuȓ Ȓƹiḏ Ameqqran isemmeḥ lḥakem ij umeḥbus zeg wenni iy xsen ȓɣaci.
16 Ḏi ȓweqṯ nni ɣarsen ij umeḥbus maƹruf qqaren-as Barrabas.
17 Wami munen yiwḏan, isseqsa-ṯen lḥakem Bilaṭus, inna-asen: "Wi ṯexsem aḏawem d rxuɣ, ma Barrabas niɣ Ƹisa umi qqaren Lmasiḥ?"
18 Tuɣa issen Bilaṭus belli sellmen-as Ƹisa ȓaḥeqqac ḥesḏen-ṯ.
19 Wami iqqim lḥakem Bilaṭus x ȓkursi n ȓeḥkam, ṯessekk-d ɣares ṯemɣarṯ nnes, ṯenna-as: "Beƹƹeḏ-as i uryaz nni iṣfan, ȓaḥeqqac ƹeddbeɣ aṭṭas ǧiȓeṯ-a ḏi ṯerjiṯ x ȓesbab nnes."
20 Maca arruyas n ȓefquha ḏ imeqqranen n wuḏayen qeȓben azeǧif i ȓɣaci ḥima aḏasen-d isufeɣ Barrabas, Ƹisa aḏ immeṯ.
21 Isseqsa-ṯen lḥakem inna-asen: "Manwen ṯexsem zi ṯnayen-a aḏas rxuɣ?
Nnan-as: "Barrabas."
22 Inna-asen Bilaṭus: "Iwa min ḏas ɣa ggeɣ i Ƹisa umi qqaren Lmasiḥ?"
Nnan-as marra: "Ṣelleb-iṯ!"
23 Inna-asen Bilaṭus: "Maɣar? Man ṯuƹuffna ig igga wanita?"
Maca rennin snekkaren ṯɣuyyiṯ s jjehḏ qqaren: "Ṣelleb-iṯ!"
24 Wami yufa Bilaṭus belli war iqḍi walu ṯerni ȓfawḍa, iysi aman isireḏ ifassen nnes zzaṯ i ȓɣaci nni, inna-asen: "Aqa nec tberriɣ azeǧif inu zeg iḏammenb n uryaz-a! Manaya aqa-ṯ x yiri nwem!"
25 Arrin xas marra iḏsen nnan-as: "Iḏammen nnes x yiri nneɣ ḏ ṯarwa nneɣ!"
26 Ssenni irxu-yasen-d i Barrabas, Ƹisa uwṯin-ṯ s usɣun; isellem-iṯ Bilaṭus ḥima aṯ ṣellben.
27 Uwin-ṯ ȓƹaskar n lḥakem ɣar ȓemraḥ n ȓeqṣar n lḥakem, smunen-d marra ȓƹaskar nneɣnit.
28 Kksen-as arruḍ nnes, ggin-as aseȓham ḏ azeggwaɣ.
29 Muḏen ij n ttaj n isennanen, ggin-as-ṯ x uzeǧif nnes. Ggin-as ɣanim ḏeg ufus afusi, wḍan-as ɣar ifadden tbuṣaren xas. Qqaren-as ssalam, ay azeǧiḏ n wuḏayen.
30 Ssusufen xas, ysin ɣanim nni ccaṯen-ṯ zzayes ɣar uzeǧif.
Tawin Siḏna Ƹisa ḥima aṯ ṣellben
31 Wami xas kemmȓen abuṣar, kksen-as aseȓham nni, ggin-as arruḍ nnes uwin-ṯ aṯ ṣellben.
32 Ffɣen, ufin ȓƹaskar ij n uryaz qqaren-as Simƹan zi ṯendint n Lqurina, ggin xas s bezzez aḏ irbu ṣṣalib n Ƹisa.
33 Uwḍen ɣar ij n umcan qqaren-as "Gulguṭa" (ȓmaƹna n yisem-a: Amcan n Jumjuma).c
34 Ucin-as aman uḍiȓ xellṭen ḏayes ij n dwa ḏ amerzag. Wami ṯen iqqas, yugi aṯen isew.
35 Wami ṯ ṣellben, ggin lqurƹa x warruḍ nnes ferqen-ṯ jarasen.
36 Qqimen ḏinni ḥḍan-ṯ.
37 Ɣar uzeǧif nnes ggin-as ij n ṯeȓwiḥet ṯura ḏayes ttuhma: "Wa ḏ Ƹisa, azeǧiḏ n wuḏayen."
38 Ṣellben akis ṯnayen iceffaren, ijjen x ufusi ijjen x uẓeȓmaḍ nnes.
39 Iwḏan iy ssenni tekkan tukkaren-ṯ thezzan xas azeǧif.
40 Qqaren-as: "Ma ḏ cek ig iheddmen ṯamziḏa ṯameqqrant ṯbenniḏ-t ḏi ṯeȓt-iyyam? Nejja ixef nnec. Cek meȓa ḏ Mmis n Arebbi, hwa-d zi ṣṣalib!"
41 Uȓa ḏ arruyas n ȓefquha akeḏ imseȓmaḏen n Ccariƹa ḏ imeqqranen n wuḏayen tbuṣaren xas qqaren:
42 "Isenjem inneɣnit, maca war izemmer aḏ isenjem ixef nnes! Hwa-d, ay azeǧiḏ n Ayṯ-Israʼil ȓexxu zi ṣṣalib, ḥima azzayek namen.
43 Itwekkeȓ x Arebbi, meȓa irḍa xas Arebbi aṯ isenjem ȓexxu! Ȓaḥeqqac inna: Nec ḏ Mmis n Arebbi."
44 Amenni ƹaweḏ zawaren-ṯ iceffaren nni iy kis ṣellben.
Siḏna Ƹisa immuṯ
45 Ɣar uzyen nhar, ṯehwa-d ṯaǧest x ṯmurṯ amen tekmeȓ aȓ wami ḏ ṯȓaṯa uƹecci.
46 Ɣar jwayeh nni n ṯȓaṯa isɣuy Ƹisa s jjehḏ inna: "Ili, Ili, lma sbaqṯani?" Ȓmaƹna n wawaȓ-a: "Ya Arebbi, ya Arebbi, maɣar ḏayi ṯejjiḏ?"d
47 Sȓin-as ȓebƹaḍ zeg yin iḥḍaren ḏinni nnan: "Aqa itȓaɣa i nnabi Ilyas."
48 Ȓxeddnnit iruḥ itazzeȓ ijjen zzaysen, iysi ij spunxa isuff-it s waman uḍiȓ ḏ isemmamen, iggi-t x yij n uɣanim yuca-as aḏ isew.
49 Inneɣnit nnan: "Ejj-iṯ, a nẓer ma d yas nnabi Ilyas aṯ isenjem!"
50 Isɣuy Ƹisa ƹaweḏ ij n ṯɣuyyiṯ ṯejheḏ, isellem buḥbeȓ nnes.
51 Ȓxeddnnit iqqars arwaq n ṯemziḏa ṯameqqrant x ṯnayen, zeg ujenna aȓ ṯmurṯ. Ṯenhezz ṯmurṯ, izra nferqen x ṯnayen.
52 Nurzmen imeḍȓan kkaren-d aṭṭas n ȓmuminin immuṯen,
53 ffɣen-d zeg imeḍȓan. Wami d ikkar Ƹisa zi ȓmewṯ, uḏfen ɣar ṯendint n Lquds twaḍharen-d i waṭṭas n yiwḏan.
54 Aƹaskari nni ameqqran n arrumanus ḏ yinni akiḏes iḥeṭṭan Ƹisa ẓrin zzinzal ḏ min iweqƹen, ggwḏen aṭṭas nnan: "Ḏi lḥaqiqa wanita ḏ Mmis n Arebbi!"
55 Ḏin aṭṭas n ṯemɣarin xezzarent-id zi ȓaggwaj. Niṯenti tuɣa ḏfarent-ṯ, tsexxarent xas wami tuɣa iǧa ḏi ṯmurṯ n Ljalil.
56 Ḏaysent Maryam ṯamagdaliṯ, ḏ Maryam yemmas n Yaƹqub amezyan ḏ Yusef, ḏ icten nneɣnit nettaṯ ḏ yemmas n ṯarwa n Zabdi.
Neṭṭȓen Siḏna Ƹisa
57 Wami d yiweḍ uƹecci, yusa-d ij ttajar qqaren-as Yusef, zi dcar n Arimatya. Netta s yixef nnes ḏ ameḥḍar n Ƹisa.
58 Iruḥ ɣar Bilaṭus ittar-as ddat n Ƹisa, uca iweṣṣa Bilaṭus aḏas-t isellem.
59 Isehwa-t-id Yusef, ikeffen-it s ȓecfen inqan.
60 Isers-it ḏeg unḍeȓ nnes ḏ jḏiḏ. Tuɣa iɣez-iṯ zi qbeȓ netta ḏeg uzru am yifri. Yarra ij n uzru ḏ ameqqran x uqemmum n unḍeȓ yuyur.
61 Maryam ṯamagdaliṯ ḏ Maryam nneɣnit qqiment zzaṯ i unḍeȓ.
Iƹessasen x unḍeȓ
62 Ṯiwecca nnes, iƹni nhar n ssebṯ, ruḥen arruyas n ȓefquha ḏ ȓḥizeb n ifarrisiyen munen ɣar lḥakem Bilaṭus.
63 Nnan-as: "Neƹqeȓ a siḏi, belli wami tuɣa iddar uɣeddar nni inna: Menbaƹd i ṯeȓt-iyyam, aḏ d kkareɣ.
64 Iwa weṣṣa aḏ ggen ȓƹasseṯ x unḍeȓ nnes ḥetta aȓ wis ṯeȓt-iyyam, ḥima war d tisen imeḥḍaren nnes aṯ acaren aḏ inin i ccaƹb belli ikkar-d zi ȓmewṯ. Ssenni aḏ yiȓi uɣḏar aneggar ktar zeg umezwar."