Siḏna Ƹisa ikkar-d zi ȓmewṯ
28
1 Wami iƹḏu nhar n ssebṯ, ɣar ȓefjar ḏi nhar n ȓḥad ṯusa-d Maryam ṯamagdaliṯ ḏ Maryam nneɣnit ḥima aḏ ẓrent anḍeȓ.
2 Ƹlaɣafla ṯenhezz ṯmurṯ ij unhezzi ḏ ameqqran ȓaḥeqqac ṯehwa-d zeg ujenna ij n lmalaʼika n Arebbi, ṯekkes azru nni x ṯewwarṯ ṯeqqim xas.
3 Ṯtwaḍhar amecnaw ȓbarq, arruḍ nnes netta ḏ acemȓaȓ amecnaw aḏfeȓ.
4 Ggwḏen zzayes iƹessasen n unḍeȓ, terjjijin ḏewȓen am imettinen.
5 Ṯendeq-d lmalaʼika n Arebbi ṯenna-asent i ṯemɣarin nni: "War teggwḏent ca, ssneɣ belli ṯrezzunt x Ƹisa itwaṣellben.
6 War ḏa iǧi ca, ikkar-d zi ȓmewṯ ƹlaḥsab mammec inna. Araḥent-id aḏ teẓrent amcan mani tuɣa iǧa.
7 Ruḥent ḏeɣya ɣar imeḥḍaren nnes inint: Ikkar-d zi ȓmewṯ. Aḏ iraḥ ɣar ṯmurṯ n Ljalil akenniw iraja ḏinni. Ḏinni iy ṯ ɣa ṯeẓrem. Aqa nniɣ-awem-t."
8 Uyurent ḏeɣya zeg unḍeȓ nni, ggwḏent walakin farḥent aṭṭas. Tazzȓent aḏ siwḍent ȓexbar ɣar imeḥḍaren n Ƹisa.
9 Ssenni iȓqa-ṯent Ƹisa, inna-asent: "Ssalam." Qarrbent ɣares, ṭṭfent ḏeg iḍaren nnes sejjḏent-as.
10 Ȓxeddnnit inna-asent Ƹisa: "War teggwḏent ca. Ruḥent siwḍent ȓexbar i ayṯma inint-asen aḏ raḥen ɣar ṯmurṯ n Ljalil ḏinni iy ḏayi ɣa ẓren."
11 Wami ruḥent niṯenti, ȓebƹaḍ n ȓƹaskar itƹessasen x unḍeȓ ḏewȓen ɣar ṯendint siwḍen ȓexbar i arruyas n ȓefquha x marra min iweqƹen.
12 Munen arruyas n ȓefquha ak imeqqranen n wuḏayen. Wami mcawaren jarasen, ucin-asen i ȓƹaskar nni ij n lƹadad n tmenyaṯ.
13 Nnan-asen: "Aḏ tinim i yiwḏan belli usin-d imeḥḍaren nnes s ǧiȓeṯ, ucaren ddat nnes wami tuɣa neṭṭeṣ.
14 U meȓa yarra-d ȓexbar lḥakem, a nemsefhem akiḏes, akenniw nesbeƹƹeḏ x lmuckil-a."
15 Kkaren kessin tmenyaṯ nni ȓƹaskar, ggin ƹlaḥsab mammec ṯen weṣṣan. Amenni intacar wawaȓ jar wuḏayen ɣar ȓexxu.
Ȓuṣiyeṯ n Siḏna Ƹisa ṯaneggarut
16 Ruḥen ḥiṭac nni imeḥḍaren ɣar ṯmurṯ n Ljalil ɣar uḏrar nni ƹlaḥsab mammec ṯen iweṣṣa Ƹisa.
17 Wami ṯ ẓrin, sejjḏen-as, maca ȓebƹaḍ cekken.
18 Iqarreb ɣarsen Ƹisa, issiweȓ akisen inna-asen:
"Ṯemmuc-ayi marra ssulṭa ḏeg ujenna ḏ ṯmurṯ.
19 Iwa ruḥem ɣar yiwḏan n marra ȓegnus, arrem-ṯen ḏ imeḥḍaren inu.
Ṭehharem-ṯen s waman s yisem n Baba ḏ Mmis ḏ Arruḥ iqeddsen.
20 Sȓemḏem-asen aḏ ggen marra minzi kenniw weṣṣiɣ.
Aqa nec akiwem iȓiɣ ȓebda aȓ ɣa ikemmeȓ zman!"