Siḏna Ƹisa isgenfa ij n unecruf
2
1 Menbaƹd i can wussan, iḏweȓ-d Ƹisa ƹaweḏ ɣar Kafernaḥum, sȓin belli aqa-ṯ ḏi ṯeddarṯ.
2 Munen aṭṭas n ȓɣaci, aȓ wami war iqqim uȓa ḏ ij n umcan waxxa zzaṯ i ṯewwarṯ. Issawaȓ akisen s wawar n Arebbi.
3 Usin-d can yiwḏan, uwin-as-d ij n unecruf ysin-ṯ arbeƹa iḏsen ḏi ṯassuṯ nnes.
4 War zmiren aṯ siḏfen ɣares minzi ḏin aṭṭas n ȓɣaci. Qeȓƹen sqef cwayt rezmen-ṯ, sehwan anecruf nni ḏi ṯassuṯ nnes ɣar umcan mani iǧa Ƹisa.
5 Wami iẓra Ƹisa lʼiman nsen, inna-as i unecruf nni: "A mmi, twaɣfarent-ac ȓmuƹṣiyaṯ iy ṯeggiḏ."
6 Can imseȓmaḏen n ccariƹa iy iqqimen ḏinni qqaren ḏi nnefs nsen:
7 "Mammec issawaȓ bnaḏem-a ammu? Iqqar awaȓ war iḥȓin x Arebbi. Ug izemmren aḏ iɣfar ȓmuƹṣiyaṯ ɣir Arebbi waḥḏes!"
8 Ȓxeddnni issen Ƹisa zi arruḥ nnes min tfekkaren ḏeg wuȓ nsen, inna-asen: "Mayemmi tfekkarem ammu ḏeg wuȓ nwem?
9 Min isehȓen aṭṭas as yini i unecruf: Twaɣfarent-ac ȓmuƹṣiyaṯ iy ṯeggiḏ? Niɣ as yini: Kkar ysi ṯassuṯ nnec uyur?
10 Xseɣ aḏ tessnem belli Mmis n bnaḏem ɣares ṯizemmar x ṯmurṯ ḥima aḏ iɣfar ȓmuƹṣiyaṯ." Uca inna-as i unecruf nni:
11 "Aḏac iniɣ, kkar, ysi ṯassuṯ nnec, raḥ aḏ trewwḥeḏ ɣar ṯeddarṯ nnec!"
12 Ȓxeddnni ikkar, iysi ṯassuṯ nnes, iffeɣ zzaṯ i yiwḏan marra. Kuȓci ḏehcen, ḥemḏen Arebbi nnan: "Ƹemmarṣ war neẓri manaya iwqeƹ qbeȓ."
Siḏna Ƹisa itȓaɣa-d i Lawi
13 Iffeɣ Ƹisa ƹaweḏ ɣar ṭṭarf n ȓebḥar, usin-d ɣares marra ȓɣaci iseȓmaḏ-asen.
14 Wami iggur ssenni, iẓra Lawi mmis n Ḥalfa iqqim ḏeg umcan mani jemmƹen ḍḍariba. Inna-as Ƹisa: "Ḏfar-ayi-d." Ikkar, iḏfar-iṯ.
15 Iqqim Ƹisa ḏi ṯeddarṯ n Lawi, itett netta ḏ imeḥḍaren nnes. Aṭṭas n yinni ijemmƹen ḍḍariba ḏ yinni iƹṣan qqimen tetten akiḏes ȓaḥeqqac niṯni aṭṭas iy ṯ iteḏfaren.
16 Can imseȓmaḏen n ccariƹa zi ȓḥizeb n ifarrisiyen ẓrin Ƹisa itett akeḏ yinni ijemmƹen ḍḍaribaa ḏ imeddukaȓ nsen war iḥȓin, nnan i imeḥḍaren nnes: "Mayemmi itett akeḏ yinni ijemmƹen ḍḍariba ḏ yinni iƹṣan?"
17 Isȓa-yasen Ƹisa, inna-asen: "Iwḏan iǧan mliḥ war teḥḏijin bu uḍbib, teḥḏajan-ṯ imehȓac. War d usiɣ aḏ ȓaɣiɣ yinni iǧan nican. Usiɣ-d ɣar yinni iƹṣan."
Aseqsi x uẓummi
18 Imeḥḍaren n Yaḥya ḏ imeḥḍaren n ȓḥizeb n ifarrisiyen ẓummen. Usin-d ɣar Ƹisa, nnan-as: "Mayemmi imeḥḍaren n Yaḥya ḏ imeḥḍaren n ȓḥizeb n ifarrisiyen tẓumman, imeḥḍaren nnec war tẓummin ca?"
19 Inna-asen Ƹisa: "Ma zemmren imedukkaȓ n muȓay aḏ ẓummen ḏi ȓfarḥ nnes? Maḥend muȓay akiḏsen war zemmren aḏ ẓummen.
20 Maca aḏ d asen wussan aḏ imeysi muȓay zi ȓwesṭ nsen. Ȓxeddnnit aḏ ẓummen ḏi nhar nni.
21 War iǧi ḥadd itreqqaƹ arruḍ ḏ abaȓi s yij n ṯreqqiƹṯ n ttub ḏ jḏiḏ. Maɣar? Ȓaḥeqqac ṯareqqiƹṯ nni n jḏiḏ aḏ tnejmeƹ uca aḏ d tekkes zeg warruḍ nni ḏ abaȓi. Ȓxeddnnit aḏ imɣar ucarrig!
22 Ḥetta ḏ aman n uḍiȓ ḏ jḏiḏ war xeǧqen ḏeg yiȓemawen iqḏimen, ḥima war dduqquzen aḏ zeǧƹen waman n uḍiȓ aḏ ḍeyyƹen yiȓemawen nni. Maca aman n uḍiȓ ḏ jḏiḏ xeǧqen ḏeg yiȓemawen ḏ jḏiḏ."
Min iǧan ḥalal ḏi nhar n ssebṯ
23 Ij n nhar n ssebṯ, iƹḏu Ƹisa ḏeg ubriḏ ḏi ȓwesṭ n imendi. Imeḥḍaren nnes gguren tekksen ṯiyḏerin.
24 Nnan-as ȓebƹaḍ zi ȓḥizeb n ifarrisiyen: "Xzar! Mayemmi imeḥḍaren nnec teggen min iǧan ḥram ḏi nhar n ssebṯ?"
25 Ijaweb-iṯen Ƹisa: "Ma war ṯeɣrim ca min igga Dawud wami iḥḏaj, iǧuz netta ḏ yinni akiḏes?
26 Yuḏef ɣar ṯemziḏa n Arebbi ḏi zman n Abyaṯar arrayes n ȓefquha, iysi aɣrum nni iy iǧan ḏ ṣṣeḏqeṯ, icci-ṯ, yuca-yasen i yinni akiḏes, waxxa manaya war iǧi ca ḥalal ɣir i ȓefquha waha."