Siḏna Ƹisa isgenfa ij n uryaz ḏi nhar n ssebṯ n lƹibada
3
1 Yuḏef Ƹisa ƹaweḏ ɣar ṯemziḏa n wuḏayen yufa ḏinni ij n uryaz fus nnes immuṯ.
2 Tlaḥaḍen xas ma aṯ isgenfa niɣ lla ḏi nhar n ssebṯ n lƹibada, ḥima aṯ tahmen.
3 Inna i uryaz ɣar iǧa fus immuṯ: "Bedd ḏi ȓwesṭ."
4 Isseqsa-ṯen Ƹisa: "Ma ḥalal ḏi nhar n lƹibada a negg ȓxir niɣ a negg ccerr? A nsenjem nnefs niɣ aṯ nneɣ?" Maca niṯni sqaren.
5 Ixzar ɣarsen s uɣḍab, ixeyyeq ȓaḥeqqac uȓ nsen iqseḥ. Inna i uryaz nni: "Sarreḥ fus nnec." Isarreḥ-iṯ, iḏweȓ ufus nnes igenfa.
6 Ȓxeddnni ffɣen ȓḥizeb n ifarrisiyen, munen akeḏ yiwḏan zi ȓḥizeb n uzeǧiḏ Hirudus, fekkaren ḏi mammec ɣa ggen aḏ nɣen Ƹisa.
Aṭṭas n yiwḏan ḏeffaren Siḏna Ƹisa
7 Iffeɣ Ƹisa ak imeḥḍaren nnes ɣar ȓebḥar, iḏfar-iṯ ij n lƹadad ḏ ameqqran n yiwḏan zi ṯmurṯ n Ljalil, ḏ ṯmurṯ n Yahuḏiya,
8 ḏ Lquds, ḏ ṯmurṯ n Idumya, ḏ ujemmaḍ-in i yiɣzar n Lʼurdun, ƹaweḏ zi jwayeh n Ṣur ḏ Ṣayda. Usin-d ɣares aṭṭas n ȓɣaci wami d arrin ȓexbar i marra min igga.
9 Inna-asen Ƹisa i imeḥḍaren nnes: Swejḏem-ayi ij n ṯɣarrabut ḥima war xafi temzaḥimen ȓɣaci.
10 Isgenfa aṭṭas n yiwḏan, aȓ wami marra yinni ḏi iǧa ȓeḥriq mzaḥamen xas, rezzun aṯ ḥaḏan.
11 Jnun iƹeffanen wami ṯ ẓrin, wḍan ɣar iḍaren nnes sɣuyiwen qqaren: "Cek ḏ Mmis n Arebbi."
12 Iweṣṣa-ṯen aṭṭas inna-asen: "War txebbarem ḥadd xafi."
Siḏna Ƹisa ixḍar ṯenƹac n arrusul
13 Igaƹƹeḏ ɣar uḏrar, iȓaɣa-d x yinni ixes, uca usin-d ɣares.
14 Ixḍar zzaysen ṯenƹac, iggi-ṯen ḏ arrusul ḥima akis iȓin, aṯen issekk aḏ ḥeddṯen,
15 aɣarsen ṯiȓi ṯizemmar ḥima aḏ sufɣen jnun.
16 Ṯenƹac-a ig igga niṯni Simƹan, isemma-yas Buṭrus,
17 ḏ Yaƹqub ḏ Yuḥanna ṯarwa n Zabdi, isemma-yasen Bunarges (manaya ixes aḏ yini ṯarwa n wajjaj),
18 ḏ Andrawus, ḏ Filibbas, ḏ Bartulumay, ḏ Matta, ḏ Tuma, ḏ Yaƹqub mmis n Ḥalfa, ḏ Taddi, ḏ Simƹan iy tuɣa iddafaƹen x ṯmurṯ nnes,
19 ḏ Yahuḏa Isxaryuṭi wenni izzenzen Ƹisa.
Siḏna Ƹisa itwajah yinni iǧan ḍed nnes
20 Irewweḥ-d ɣar ṯeddarṯ, imun ƹaweḏ ȓɣaci aȓ wami war izemmer Ƹisa ḏ imeḥḍaren nnes aḏ ccen uȓa ḏ aɣrum.
21 Wami sȓin ȓeḥbab nnes x manaya, usin-d ḥima aṯ awin akiḏsen, nnan iruḥ-as ȓaƹqeȓ.
22 Imseȓmaḏen n ccariƹa iy d yusin zi Lquds nnan: "Ḏayes Bƹalzabul, arrayes n jnun. Isufuɣ jnun minzi Bƹalzabul yuca-yas jjehḏ-a."
23 Iȓaɣa-d xasen, issiweȓ akisen s ȓemƹani, inna: "Mammec izemmer Cciṭan aḏ isufeɣ Cciṭan?
24 Lmemlaka iy ḏi tmenɣan ayṯbab nnes ijjen akeḏ unneɣnit war ṯzemmer aḏ teqqim.
25 Ṯaddarṯ iy ḏi tmenɣan ayṯbab nnes ijjen akeḏ unneɣnit war tzemmer aḏ teqqim.
26 Meȓa Cciṭan ikkar aḏ iqḍa x Cciṭan, war itdumi ca, aḏ ifna.
27 War izemmer ḥadd aḏ ihjem x ṯeddarṯ n can ijjen ijheḏ bac aḏ yacar agȓa nnes illa meȓa icedd-iṯ ḏ amezwaru, uca aḏas yawi marra min ɣares ḏi ṯeddarṯ.
28 Aqa tesȓam ȓḥaqq: Aḏ twaɣfarent marra ȓmuƹṣiyaṯ iy teggen yiwḏan, ḏ marra awaȓ war iḥȓin iy qqaren x Arebbi.
29 Maca wenni ɣa yinin can wawaȓ war iḥȓin x Arruḥ iqeddsen, war ḏas iɣeffar lla ḏi ddunect u lla ḏi lʼaxira."
30 Minzi qqaren qa Ƹisa ḏayes ij n jjen ḏ aƹeffan.
31 Ṯusa-d ɣares yemmas ḏ ayṯmas, bedden barra i ṯeddarṯ, ssekken ɣares, ȓaɣan-d xas.
32 Ȓɣaci qqimen nnḍen-as, nnan-as: "Aqa ḏin yemmac ḏ ayṯmac ḏ suyṯmac ḏi barra, rezzun xak."
33 Indeq-d, inna-asen: "Min ƹnan yemma ḏ ayṯma?"
34 Ixzar ɣar yinni iqqimen nnḍen-as, uca inna: "Aqa yemma ḏ ayṯma.
35 Wen iteggen s min ixes Arebbi netta ḏ uma ḏ učma ḏ yemma."