Ȓmaƹna n wenni izerrƹen
4
1 Ƹaweḏ ibḏa iseȓmaḏ x ṭṭarf n ȓebḥar. Imun-d xas aṭṭas n ȓɣaci, uca inya iqqim ḏeg yij n ṯɣarrabut ḏeg waman, iwḏan qqimen marra ḏi ȓbarr x ṭṭarf n ȓebḥar.
2 Iseȓmaḏ-asen aṭṭas n ṯmesȓayin s ȓemƹani. Inna-asen ḏeg useȓmaḏ nnes:
3 "Ṣennṭeṯ, iffeɣ ufeǧaḥ ḥima aḏ izreƹ.
4 Wami izerreƹ, ṯewḍa-yas can zzarriƹeṯ x ṭṭarf n ubriḏ, usin-d ijḍaḍ ccin-t.
5 Can zzarriƹeṯ nneɣnit ṯewḍa-yas x yizra war ḏin bu caȓ aṭṭas. Ḏeɣya ṯeɣmi-d ȓaḥeqqac war ṯuḏif ca ḏi ȓaǧeɣ n ṯmurṯ.
6 Maca wami ṯsummer ṯfuct, iḥreq uca yuzeɣ ȓaḥeqqac izewran nnes war uḏifen ɣar ȓaǧeɣ n ṯmurṯ.
7 Can zzarriƹeṯ nneɣnit ṯewḍa jar isennanen. Ɣmin-d akis isennanen jeyyfen-t, uca war ṯeggi bu ṯiyḏerin.
8 Maca can zzarriƹeṯ nneɣnit ṯewḍa x ṯmurṯ ṯaṣebḥant, ṯsufeɣ-d ṯiyḏerin, gaƹƹḏent-id, meɣrent. Ȓebƹaḍ ggint ṯȓaṯin, ȓebƹaḍ settin, ȓebƹaḍ miyya."
9 Uca inna: "Ṣennṭeṯ mliḥ, ay yinni itsȓan."
Asfhem n ȓmaƹna n wenni izerrƹen
10 Wami Ƹisa iqqim waḥḏes, sseqsan-ṯ yinni ḏas innḍen akeḏ ṯenƹac n imeḥḍaren x ȓemƹani-ya.
11 Inna-asen: "Itwasmeḥ i kenniw aḏ tessnem min inuffren ḏi ȓmulk n Arebbi. I yinni zi barra marra tas-asen-d s ȓemƹani waha,
12 ḥima aḏ xzaren maca war twiȓin,
aḏ sȓen maca war fehmen war tubin ca,
war ḏasen twaɣfarent ȓmuƹṣiyaṯ nsen."
13 Inna-asen: "Ma war ṯefhimem ȓmaƹna-ya? Mammec ɣa ṯfehmem marra ȓemƹani?
14 Afeǧaḥ izerreƹ awaȓ n Arebbi.
15 Zzarriƹeṯ nni ig iwḍan x ubriḏ nettaṯ am yiwḏan iy tesȓan i wawaȓ n Arebbi, ȓxeddnni itraḥ Cciṭan itekkes awaȓ nni itwazerƹen ḏaysen.
16 Zzarriƹeṯ nni ig iwḍan x yizra nettaṯ am yiwḏan iy tesȓan i wawaȓ n Arebbi, ȓxeddnni qebȓen-ṯ s ȓefraḥeṯ.
17 Wami war uwṯin bu izewran mliḥ, ḏeɣya tneqȓaƹen. Xmi d tasen ȓemḥayen ḏ uƹeddeb x ȓesbab n wawaȓ n Arebbi, ḏeɣya teffɣen abriḏ.
18 Zzarriƹeṯ nni ig iwḍan jar isennanen nettaṯ am yiwḏan iy tesȓan i wawaȓ n Arebbi,
19 ḏaysen amnus n ddunect, texsen agȓa, ḏaysen ccehweṯ n ṯmesȓayin nneɣnit, uca itwajeyyef wawaȓ n Arebbi, war ineffeƹ ca.
20 Maca zzarriƹeṯ nni ig iwḍan ḏi ṯmurṯ ṯeṣbaḥ nettaṯ am yiwḏan iy tesȓan i wawaȓ n Arebbi, qebȓen-ṯ, neffƹen. Ȓebƹaḍ tmernin ṯȓaṯin, ȓebƹaḍ zzaysen tmernin settin, ȓebƹaḍ tmernin miyya."
Ȓmaƹna n ȓqendiȓ
21 Inna-asen: "Uȓa ḏ ijjen war d itiwi ȓqendiȓ ḥima axas iqȓeb can uqnuc, niɣ aṯ igg swadday i qama. Lƹaks, aṯ igg x ȓmarfaƹ.
22 Marra min inuffren aḏ d iḍhar. Marra min itwasnuffren aḏ itwafḍeḥ.
23 Ṣennṭeṯ mliḥ, a yinni itsȓan."
24 Inna-asen: "Arrem-d ȓbaȓ nwem i min tesȓam. Ȓaƹbar iy ṯsexḏamem ḏ wenni iy kiḏwem ɣa isexḏem Arebbi, u ƹaḏ ktar.
25 Minzi wenni iǧan ɣares itmerni-yas, maca wen war ɣar iǧi ca, itmeysi-yas uȓa min ɣares."
Ȓmaƹna n zzarriƹeṯ itemɣuren
26 Inna: "Ȓmulk n Arebbi amecnaw ij n bnaḏem izerreƹ zzarriƹeṯ x ṯmurṯ.
27 Iteṭṭeṣ s ǧiȓeṯ itfaq-d ɣar ṣbaḥ itaf zzarriƹeṯ tgaƹƹaḏ temɣur. Netta war issin mammec itewqiƹ manaya.
28 Minzi ṯamurṯ ticc ṯiḥebba nnes nniṯ. Ḏ amezwaru ṯɣemmi-d. Umbaƹd ṯḏewweȓ ḏ ṯiyḏerin. Umbaƹd ṯiyḏerin nni tƹemmarent s ṯḥebba.
29 Maca ɣir aḏ iwjeḏ imendi, ȓxeddnni aḏ iffeɣ aḏ imjar minzi ȓweqṯ n umjar ṯiweḍ-d."
Ȓmaƹna n bugarḏar
30 Inna: "Min ḏi itcabbah ȓmulk n Arebbi? Niɣ s minzi ɣa ṯ nmeṯṯel?
31 Ȓmulk n Arebbi amecnaw ij n zarriƹeṯ n yij n nnuƹ n arbiƹ qqaren-as bugarḏar. Xmi ṯ zerƹen ḏi ṯmurṯ, itiȓi ḏ amezyan qaƹ ḏi marra ṯiḥebba iǧan x ṯmurṯ.
32 Maca xmi ṯ zerƹen, aḏ imɣar, aḏ iḏweȓ ktar zi marra arbiƹ, aḏ igg ȓefruƹ ḏ imeqqranen. Uȓa ḏ ijḍaḍ teggen ḏayes ȓaƹwac nsen ḏi ṯiȓi nnes."
33 Issawaȓ Ƹisa akeḏ ȓɣaci s waṭṭas n ȓemƹani am yina, ƹlaḥsab min zemmren aḏ fehmen.
34 War kisen issiwiȓ ɣir s ȓemƹani. Maca isefhem i imeḥḍaren nnes marra xmi kisen itiȓi waḥeḏsen.
Siḏna Ƹisa ihedden ȓebḥar
35 Ḏi nhar nni, wami d yiweḍ uƹecci, inna-asen i imeḥḍaren nnes: "Yallah a nezwam ɣar ujemmaḍ-in."
36 Wami semḥen ḏi ȓɣaci, iraḥ Ƹisa akisen ḏi ṯɣarrabut nni iy ḏi iǧa ƹaḏ. Akisen ḏinni ṯiɣarruba nneɣnit.
37 Ikkar-d ij n arriḥ ijheḏ aṭṭas ḏi ȓebḥar, ȓemwaj ccaṯent ṯaɣarrabut nni aȓ wami ṯqarreb aḏ tƹemmar s waman.
38 Netta iǧa ɣar pupaa n ṯɣarrabut iṭṭeṣ isummeṯ ij n ṯsunta.b Sfaqen-ṯ nnan-as: "A Lmuƹallim, ma war c ithimi ca manaya? Aqa-aneɣ netmetta!"
39 Ikkar isbedd arriḥ, inna i ȓebḥar: "Sqar, qḍeƹ ȓḥiss!" Uca ibedd arriḥ irsa ȓḥaȓ.
40 Inna-asen: "Mayemmi teggwḏem qaƹ ammu? Ma ƹaḏ war ḏaywem bu lʼiman?"
41 Ggwḏen aṭṭas, nnan i wayawya: "Min iƹna wanita? Uȓa ḏ arriḥ ḏ ȓebḥar tṭaƹan-as!"