Ijjen ḏayes jnun ḏi ṯmurṯ n ijariṯiyen
5
1 Yuweḍ Ƹisa ɣar ujemmaḍ-in n ȓebḥar, ɣar ṯmurṯ n ijariṯiyen.
2 Wami iḍra zi ṯɣarrabut iȓqa-ṯ zeg imeḍȓan ij n uryaz ḏayes jjen ḏ aƹeffan.
3 Izeddeɣ ḏeg imeḍȓan, war izemmer uȓa ḏ ijjen aṯ iqqen waxxa s snaseȓ.
4 Carrfen-ṯ aṭṭas n ṯwaȓaṯin zeg ifassen ḏ iḍaren s snaseȓ ḏ leqtina, maca iqeṭṭew snaseȓ itrezza leqtina. War izemmer uȓa ḏ ijjen aṯ iḥḍa.
5 Itiȓi ȓebda ǧiȓeṯ ḏ nhar ḏeg imeḍȓan ḏ iḏurar, isɣuyiw, ijarreḥ ixef nnes s uzru.
6 Wami iẓra Ƹisa zi ȓeggwaj, yuzzeȓ ɣares isejjeḏ-as.
7 Indeq-d s yij n ṯmijja ṯuƹȓa, inna-as: "A Ƹisa Mmis n Arebbi yuƹȓan, min ṯexseḏ zzayi? Tettareɣ zzayek i Arebbi ḥima war ḏayi tƹeddibeḏ!"
8 Inna manaya minzi Ƹisa inna-as: "A jjen aƹeffan, ffeɣ zeg uryaz-a!"
9 Isseqsa-ṯ Ƹisa: "Mammec ḏac qqaren?"
Inna-as: "Qqaren-ayi Aberru, minzi neccin aṭṭas iḏneɣ."
10 Iḥeccem-iṯ aṭṭas ḥima war ṯen issekki barra i jjiha nni.
11 Ḏinni ij n ṯḥimerṯ ḏ ṯameqqrant n yiȓfan ṯerwes ɣar uḏrar.
12 Ttaren zzayes, nnan-as: "Sekk-aneɣ ɣar yiȓfan ḥima aḏaysen naḏef."
13 Uca ijji-ṯen, ffɣen jnun nni iƹeffanen, uḏfen ḏeg yiȓfan. Ṯehwa ṯḥimerṯ nni x uḏrar ɣar ȓebḥar, ṯeɣreq ḏinni. Tuɣa lƹadad nnes ƹȓayen aȓefayen.
14 Yinni irewsen rewȓen, sufɣen ȓexbar ḏi ṯendint ḏ ȓedcur. Ffɣen-d yiwḏan ḥima aḏ xzaren min iweqƹen.
15 Usin-d ɣar Ƹisa, ufin aryaz nni iy ḏi tuɣa iǧa aberru n jnun, iqqim ireḍ arruḍ, igenfa s ȓaƹqeȓ nnes. Uca ggwḏen aṭṭas.
16 Xbaren-ṯen ȓechuḏ x min iweqƹen i uryaz nni iy ḏi tuɣa ǧan jnun ḏ min iweqƹen i yiȓfan.
17 Uca bḏan tettaren zzayes ḥima axasen ibeƹƹeḏ zi jjiha nsen.
18 Wami tuɣa innay ḏi ṯɣarrabut, ittar zzayes uryaz nni iy ḏi tuɣa ǧan jnun inna-as: "Ejj-ayi akic raḥeɣ."
19 Maca Ƹisa yugi, inna-as: "Ruḥ ɣar ṯeddarṯ nnec ḏ ȓeḥbab nnec, xebbar-iṯen s min ḏac igga Siḏ Arebbi, ḏ mammec cek irḥem."
20 Iruḥ uryaz nni, ibḏa itxebbar ḏi iqlim umi qqaren Dikaplis zi min ḏas igga Ƹisa. Marra ḏehcen.
Siḏna Ƹisa isgenfa yeǧis n Yagrus
21 Wami iḏweȓ Ƹisa ḏi ṯɣarrabut ɣar jjiha nni manis d yusa, imun xas ȓɣaci ḏ ameqqran x cceṭṭ n ȓebḥar.
22 Yusa-d ɣares ijjen zi arruyas n ṯemziḏa n wuḏayen qqaren-as Yagrus. Wami ṯ iẓra iwḍa-yas ɣar iḍaren nnes,
23 iḥeccem-iṯ aṭṭas, inna-as: "Yeǧi ṯamezyant aqa tmetta. Araḥ-d sers xas ifassen nnec ḥima aḏ tgenfa aḏ tekkar."
24 Iruḥ akis, ḏfaren-ṯ aṭṭas n ȓɣaci mzaḥamen xas.
25 Ḏinni ij n ṯemɣarṯ ṯenƹac iseggwusa zeg wami ṯehȓec, tazzeȓ s iḏammen.a
26 Ṯƹeddeb aṭṭas x ifassen n waṭṭas n iḍbiben. Ṯdeyyeƹ marra min ɣares bȓa nfaƹ. Ƹaḏ ktar lḥala nnes ṯerni.
27 Tesȓa x Ƹisa, ṯeḏfar-iṯ jar ȓɣaci, ṯḥaḏa-yas aseȓham nnes.
28 Ṯenna: "Meȓa ɣir ḥaḏiɣ aseȓham nnes aqa aḏ genfiɣ."
29 Uca ṯgenfa ḏeg umcan, ṯessen belli ddat nnes ṯgenfa zi ȓehȓac nni.
30 Isḥess Ƹisa ḏi nnefs nnes belli ij n jjehḏ nnes iffeɣ, itneqȓab ɣar ȓɣaci inna: "Wi ḏayi iḥaḏan arruḍ inu?"
31 Nnan-as imeḥḍaren nnes: "Cek twaȓiḏ cḥaȓ n yiwḏan temzaḥamen xak u ṯeqqareḏ wi ḏayi iḥaḏan?"
32 Maca iqqim ƹaḏ ixezzar ammu ḏ wammu ḥima aḏ iẓer wi iggin manaya.
33 Wami ṯessen ṯemɣarṯ nni min ḏas iweqƹen, ṯusa-d ṯeggweḏ terjjiji, ṯewḍa ɣar iḍaren nnes ṯenna-as marra lḥaqiqa.
34 Inna-as: "A yeǧi, lʼiman nnem isenjem-icem. Ruḥ ḏi ȓehna, genfa zi ȓeḥȓac nnem."
35 Wami ƹaḏ issawaȓ Ƹisa, usin-d zi ṯeddarṯ n arrayes n ṯemziḏa n wuḏayen, nnan-as: "Yeǧic ṯemmuṯ. War tseddaƹ bu lmuƹallim."
36 Isȓa-yasen Ƹisa i min nnan, inna-as i arrayes n ṯemziḏa n wuḏayen: "War teggweḏ ca! Itxeṣṣa aḏ tamneḏ waha."
37 War ijji uȓa ḏ ijjen aṯ iḏfar, ɣir Buṭrus ḏ Yaƹqub ḏ Yuḥanna iǧan ḏ umas n Yaƹqub.
38 Wami yiwḍen ɣar ṯeddarṯ n arrayes n ṯemziḏa n wuḏayen, itwaȓa Ƹisa ḏin lharaj, trun, sɣuyiwen aṭṭas.
39 Wami yuḏef, inna-asen: "Mayemmi ṯesɣuyiwem, ṯetrum? Ṯaḥenjirṯ war ṯemmuṯ ca, aqa ṯeṭṭeṣ waha!"
40 Ḍeḥcen xas, maca netta isufeɣ-iṯen marra ssenni. Yiwi akis ḏinni babas ḏ yemmas n ṯḥenjirṯ ḏ yinni akis, yuḏef mani ṯeǧa ṯḥenjirṯ nni.
41 Iṭṭef-as ḏeg ufus i ṯḥenjirṯ nni, inna-as: Ṭaliṯa qumi, iƹni Kkar a ṯaḥenjirṯ.
42 Ȓxeddnni ṯekkar ṯḥenjirṯ nni, ṯebḏa ṯeggur. Ɣares ṯenƹac ȓesna. Qqimen tƹejjben aṭṭas.
43 Yumar-iṯen ḥima war itessen uȓa ḏ ijjen manaya. Inna-asen ucem-as min ɣa ṯecc.