Tazzȓen x Siḏna Ƹisa zi ṯendint nnes
6
1 Iffeɣ ssenni Ƹisa, iḏweȓ ɣar ṯmurṯ nnes. Ḏfaren-ṯ imeḥḍaren nnes.
2 Ḏi nhar n ssebṯ n lƹibada, ibḏa iseȓmaḏ ḏi ṯemziḏa n wuḏayen. Marra yinni ḏas itsȓan tƹejjben ḏayes nnan: "Manis ḏas d itekk manaya? Min teƹna ȓefhameṯ-a iy ḏas immucen? Mammec weqƹent x ifassen nnes lmuƹjizaṯ-a?
3 Ma war iǧi netta ḏ anejjar mmis n Maryam umas n Yaƹqub ḏ Yusis ḏ Yahuḏa ḏ Simƹan? Ma war ǧint suyṯmas aqa-ṯent akiḏneɣ ḏa?" X manaya war ṯ qbiȓen ca.
4 Inna-asen Ƹisa: "Nnabi meḥtarem mani ma, walakin ḏi dcar nnes ak ȓeḥbab nnes ḏ ṯeddarṯ nnes, lla!"
5 War izemmer aȓ ḏin igg lmuƹjiza illa iḥaḏa s ifassen nnes drus n imehȓac, isgenfa-aṯen.
6 Itƹejjeb ȓaḥeqqac lʼiman nsen ḏ uqlil. Iggur iseȓmaḏ ḏi ȓedcur yuḏsen.
Siḏna Ƹisa issekk arrusul aḏ ḥeddṯen
7 Iȓaɣa-d Ƹisa x ṯenƹac n arrusul, issekk-iṯen ṯnayen ṯnayen. Yuca-asen ssulṭa x jnun iƹeffanen.
8 Iweṣṣa-ṯen inna-asen: "War kiwem tiwim walu ag ubriḏ ɣir aƹekkaz. War tiwim aɣrum uȓa ḏ aqrab uȓa ḏ nneḥḥas ḏi jjib nwem.
9 Ggem ṯisiȓa, war teggem bu ṯnayen ičammiren."
10 Inna-asen: "Mani ma ṯuḏfem ɣar can ṯeddarṯ, qqimem ḏayes aȓ ɣa ṯuyurem ssenni.
11 Meȓa war kenniw qbiȓen ḏi can umcan, niɣ meȓa war xsen aɣarwem sȓen, ffɣem ssenni mesḥem ṯaƹejjact zeg iḍaren nwem am ij n chaḏeṯ xasen."
12 Ruḥen tḥeddaṯen iwḏan ḥima aḏ tuben.
13 Sufɣen aṭṭas n jnun, ḏehnen s zzect aṭṭas n imehȓac, sgenfan-ṯen.
Ȓmewṯ n Siḏna Yaḥya
14 Yiweḍ ȓexbar ɣar uzeǧiḏ Hirudus x Ƹisa, minzi isem nnes iḏweȓ maƹruf. Ḏinni can yiwḏan qqaren: "Wanita ḏ Yaḥya iy d ikkaren zi ȓmewṯ! Suyenni iy ɣares jjehḏ iy zi itegg lmuƹjizaṯ."
15 Ḏinni inneɣni qqaren: "Wanita ḏ nnabi Ilyas."
Ḏinni ƹaweḏ inneɣni qqaren: "Wanita ḏ nnabi amecnaw lʼanbiya iqḏimen."
16 Azeǧiḏ Hirudus wami isȓa manaya, inna: "Wanita ḏ Yaḥya nni umi qesseɣ azeǧif. Ikkar-d zi ȓmewṯ!"
17-18 Qbeȓ i manaya, azeǧiḏ nni Hirudus imȓec ak ij n ṯemɣarṯ qqaren-as Hirudiya. Netta ḏ aȓwes nnes. Hirudiya tuɣa ḏ ṯamɣarṯ n Filibbas. Issekk Hirudus aḏ ṭṭfen Yaḥya wami ḏas iqqar: "Ḥram aḏ tawiḏ ṯamɣarṯ n wumac." Iḥebbes-iṯ ḏi ȓeḥbes.
19 Hirudiya ṯenḍer ḏayes ṯiṭṭawin ṯrezzu aṯ tneɣ maca war ṯzemmer.
20 Mayemmi? Ȓaḥeqqac Hirudus iteggweḏ zi Yaḥya. Issen belli netta ḏ ij n uryaz iǧa nican, iṣfa. Iḥemma-ṯ Hirudus, iteƹjib-as awaȓ ig iqqar, maca isxeyyaq-iṯ.
21 Ṯusa-as-d lfursa i Hirudiya ḏi ȓƹiḏ lmilad n Hirudus, wami igga amensi i imeqqranen nnes ḏ arruyas n ȓƹaskar ḏ imeqqranen n ṯmurṯ n Ljalil.
22 Ṯuḏef-d yeǧis n Hirudiya, ṯecḍeḥ iƹjeb-as ȓḥaȓ i Hirudus ḏ yinni kis iqqimen. Inna uzeǧiḏ i ṯḥenjirṯ nni: "Ttar-ayi min ṯexseḏ, aḏam-ṯ uceɣ."
23 Ijjuǧ-as inna-as: "Min ḏayi ɣa ṯettareḏ, aḏam-ṯ uceɣ, waxxa azyen n lmemlaka inu."
24 Ṯeffeɣ ṯenna-as i yemmas: "Min ḏas ɣa ttareɣ?"
Ṯenna-as yemmas: "Xseɣ azeǧif n Yaḥya."
25 Ȓxeddnni ṯeḏweȓ ḏeɣya ɣar uzeǧiḏ, ṯettar zzayes ṯenna-as: "Xseɣ ȓexxu aḏayi ṯuceḏ x siniyeṯ azeǧif n Yaḥya!"
26 Ixeyyeq uzeǧiḏ aṭṭas, maca igga-as array ȓaḥeqqac ijjuǧ zzaṯ i yinni kis iqqimen.
27 Ȓxeddnnit issekk uzeǧiḏ ɣar ȓeḥbes aƹessas, yumar ḥima aḏ d yawi azeǧif n Yaḥya. Iruḥ uƹessas, iqess azeǧif n Yaḥya ḏi ȓeḥbes.
28 Yuwi-ṯ-iḏ ḏi siniyeṯ, yuca-as-ṯ i ṯḥenjirṯ nni uca ṯaḥenjirṯ nni ṯiwi-ṯ i yemmas.
29 Wami sȓin imeḥḍaren n Yaḥya s manaya, usin-d ysin ddat nnes ggin-t ḏeg unḍeȓ.
Siḏna Ƹisa isecc xemsa aȓef n iryazen
30 Munen arrusul akeḏ Ƹisa, xbaren-ṯ zi marra min ggin ḏ marra min sȓemḏen.
31 Aṭṭas n yiwḏan tasen-d traḥen. Ƹisa ḏ imeḥḍaren nnes war ufin ȓweqṯ waxxa aḏ ccen. X manaya inna-asen: "Araḥem-d waḥeḏwem ɣar ij n umcan ixȓa, ṯreyyḥem cwayt."
32 Ruḥen waḥeḏsen ḏi ṯɣarrabut ɣar ij n umcan ixwa.
33 Ẓrin-ṯen aṭṭas n yiwḏan gguren uca ssnen mani ɣa raḥen. Ffɣen zi marra ṯineddam, tazzȓen marra ḏinni x iḍaren, zwaren-asen ḏinni.
34 Wami d iḍra Ƹisa zi ṯɣarrabut, iẓra ȓɣaci. Qqsen-as minzi iǧan amecnaw iḥuȓiyen war ɣarsen uw ṯen ɣa irewsen, uca ibḏa iseȓmaḏ-asen aṭṭas n ṯmesȓayin.
35 Wami iruḥ ȓḥaȓ, qarrben ɣares imeḥḍaren nnes nnan-as: "Ȓweqṯ ṯeƹḏu, amcan-a ḏ ȓexȓa.
36 Sekk iwḏan ɣar ȓedcur ḏ ṯuḏrin yuḏsen, ad sɣen min ɣa ccen."
37 Yarra xasen Ƹisa inna-asen: "Ucem-asen kenniw min ɣa ccen."
Nnan-as: "Ma a nraḥ a nseɣ aɣrum i marra iwḏan-a s miyyatayen n ṯpeyyasin n nnuqarṯ, aḏasen nuc aḏ ccen?"
38 Inna-asen: "Cḥaȓ ɣarwem n uɣrum? Ruḥem xzarem."
Wami xzaren, nnan-as: "Xemsa n ṯxebbazin ḏ ṯnayen iseȓman."
39 Yumar-iṯen ḥima aḏ sɣimen marra ḏ lfirqaṯ x arbiƹ aziza.
40 Qqimen ḏ lfirqaṯ xemsin xemsin, miyya miyya.
41 Iṭṭef xemsa nni n ṯxebbazin ḏ ṯnayen nni iseȓman, iysi ṯiṭṭawin nnes ɣar ujenna uca ickar Arebbi, irza aɣrum nni yuca-asen-ṯ i imeḥḍaren nnes akeḏ ṯnayen iseȓman nni ḥima aṯen ferqen x yiwḏan nni marra.
42 Ccin jjiwnen marra.
43 Uca ysin ṯenƹac n induṯen ƹemmaren s uɣrum ḏ iseȓman iceṭṭen.
44 Lƹadad n yinni iccin aɣrum niṯni xemsa aȓef n iryazen.
Siḏna Ƹisa iggur x ȓemwaj n ȓebḥar
45 Ȓxeddnnit inna-asen Ƹisa i imeḥḍaren nnes aḏ nyen ḏi ṯɣarrabut aḏ zwan ɣar ujemmaḍ-in ɣar Bayt Ṣayda, u netta imsafaḍ x ȓɣaci.
46 Wami xasen imsafaḍ, iruḥ ɣar uḏrar aḏ iẓẓaǧ.
47 Ɣar uƹecci, ṯaɣarrabut ṯeǧa ḏi ȓweṣt n ȓebḥar, Ƹisa iǧa waḥḏes ḏi ȓbarr.
48 Iẓri-ṯen tqeddafen, tƹeddaben minzi arriḥ itṣuḍ-d zi jjiha nneɣnit. Ƹȓayen iqarreb-d ȓefjar, iruḥ Ƹisa ɣar imeḥḍaren nnes iggur x iḍaren x waman n ȓebḥar, ixes aṯen iƹḏu.
49 Wami ṯ ẓrin iggur x waman, tɣir-asen ḏ ȓexyaȓ uca sɣuyen.
50 Marra ẓrin-ṯ ggwḏen. Maca ḏeɣya inna-asen: "Ahnam! Aqa ḏ nec, war teggwḏem ca!"
51 Inya akiḏsen ḏi ṯɣarrabut, irsa arriḥ. Tƹejjben aṭṭas ḏi nnefs nsen
52 mizi war fhimen lmuƹjiza n uɣrum, tuɣa uȓ nsen itwaqseḥ.
Siḏna Ƹisa isgenfa aṭṭas n yiwḏan ḏi jwayh n Ganisarat
53 Izwa Ƹisa ḏ imeḥḍaren nnes ȓebḥar, uwḍen ɣar ṯmurṯ n Ganisarat, qqnen ḏinni ṯaɣarrabut.
54 Wami ḍrin zi ṯaɣarrabut, ȓxeddnni ayṯbab n ṯmurṯ nni ƹeqȓen Ƹisa.
55 Tazzȓen ḏi marra ṯamurṯ nni, bḏan tawin imehȓac x ṯassuṯ ɣar mani sȓin iǧa netta.
56 Mani ma yuḏef ɣar ibilajen, niɣ ṯineddam, niɣ ȓkampawaṯ, iwḏan srusan imehȓac ḏi ȓeswaq. Ttaren-as aṯen ijj aḏ ḥaḏan ɣir ṭṭarf n warruḍ nnes. Marra yin ṯ iḥaḏan genfan.