Lƹadaṯ iy war d yusin ca zi Arebbi
7
1 Ȓḥizeb n ifarrisiyen ḏ can imseȓmaḏen n ccariƹa zi Lquds munen x Ƹisa.
2 Ẓrin can imeḥḍaren nnes tetten aɣrum bȓa ma aḏ sirḏen ifassen, iƹni bȓa ma aḏ ggen ȓuḍu nni.
3 Minzi ifarrisiyen ḏ marra uḏayen, meȓa war sirḏen ifassen nsen war tetten ca. Ṭṭfen ḏi lƹadaṯ n ȓejḏuḏ nsen.
4 Meȓmi ma d ḏewwȓen zi ssuq, meȓa war sirḏen war tetten ca. Ḏfaren aṭṭas n ȓeḥwayej nneɣnit ȓemḏen-ṯen, teṭṭfen-ṯen u ṣafi, amecnaw asireḏ n ȓkisan ḏ iɣarrafen ḏ ȓeqcuƹ n nneḥḥas ḏ ṯassuṯ.
5 Sseqsan-ṯ ifarrisiyen ḏ can imseȓmaḏen n ccariƹa: "Mayemmi imeḥḍaren nnec war teggen lƹadaṯ n ȓejḏuḏ nneɣ? War siriḏen ifassen nsen qbeȓ iy ɣa ccen aɣrum."
6 Inna-asen: "A lmunafiqin! Inna ȓḥaqq nnabi Icaƹya wami xawem issiweȓ ḏeg yij n zman:
Ccaƹb-a itweqqar-ayi s wawaȓ waha,
maca uȓ nnes iggwej xafi.
7 Iwḏan-a ƹebbḏen-ayi ḏi ȓxawi,
ȓaḥeqqac sɣaran ṯimesȓayin
iǧan ḏ ȓuṣiyaṯ n bnaḏem.
8 Minzi ṯejjim ȓuṣiyeṯ n Arebbi, ṯeṭṭfem ḏi lƹada n yiwḏan."
9 Inna-asen ƹaweḏ: "Mliḥ! Tbeṭṭȓem ȓuṣiyeṯ n Arebbi ḥima aḏ qqiment lƹadaṯ nwem!
10 Minzi Musa inna: Weqqar babac ḏ yemmac. Aqa wen ɣa yukkaren babas niɣ ḏ yemmas, itxeṣṣa aḏ immeṯ.
11-12 Maca kenniw ṯeqqarem belli war iǧi bu labud i yiwḏan aḏ weqqaren niɣ aḏ ƹawnen lwalidin. Tmenyaṯ iy ɣa ucen i lwalidin aṯent ucen i ṯemziḏa.
13 Ammu ṯbeddȓem ȓmaƹna n wawaȓ n Arebbi ḥima aḏ teggem mammec ḏawem iƹjeb ȓḥaȓ s lƹadaṯ nwem iy ṯȓemḏem. Teggem aṭṭas n ȓeḥwayej amecnaw manaya."
14 Ƹaweḏ iȓaɣa-d Ƹisa x ȓɣaci, inna-asen: "Ṣennṭeṯ ɣari marra iḏwem, fehmem:
15 Ma ḏin can ṯmesȓayṯ itaḏfen ḏi bnaḏem zi barra ig iǧan ḥram xas? Walu. Lƹaks, min d iteffɣen zi bnaḏem aqa manayenni ig iǧan ḥram x bnaḏem.
16 [Ṣennṭeṯ mliḥ, ay yinni itsȓan!]"
17 Wami ijja ȓɣaci, yuḏef ɣar ṯeddarṯ. Sseqsan-ṯ imeḥḍaren x ȓmaƹna-ya min ixes aḏ yini?
18 Inna-asen: "Ȓa ḏ kenniw war ṯefhimem? Ma war ṯessinem belli marra min itaḏfen ḏi bnaḏem zi barra war iǧi bu ḥram x bnaḏem?
19 Minzi war itiḏef bu ɣar wuȓ nnes, maca itraḥ ɣar uƹeddis, iteffeɣ zi ddat." (S manaya yarra Ƹisa marra lmakla ḥalal.)
20 Inna-asen: "Maca min d iteffɣen zeg uqemmum netta iǧan ḥram x bnaḏem.
21 Maɣar? Ȓaḥeqqac zi ḏaxeȓ, zeg wuȓ n bnaḏem iy zi d tekkant lʼafkar ṯiƹeffanin, bnaḏem aḏ ifseḏ, aḏ yacar, aḏ ineɣ,
22 aḏ izna, aḏ iḍmeƹ, aḏ igg ccerr, aḏ yini ȓbaṭeȓ, ixarwiḍen, ȓeqbaḥeṯ, ṯiṭṭawin n yiwḏan, ttakebbur, ṯibuhȓiya.
23 Marra ṯimesȓayin-a ṯiƹeffanin teffɣent-id zi ḏaxeȓ n bnaḏem, ǧant ḥram xas."
Lʼiman n ṯemɣarṯ n Ayṯ-Kanƹan
24 Ikkar yuyur ssenni Ƹisa, iruḥ ɣar jwayeh n ṯendint n Ṣur, yuḏef deg yij n ṯeddarṯ. Irezzu war itessen ḥadd belli aqa-ṯ ḏin, maca iwḏan arrin-d ȓexbar.
25 Ȓxeddnni ij n ṯemɣarṯ yeǧis ḏayes jjen. Wami d ṯarra ȓexbar, ṯusa-d ɣar Ƹisa ṯewḍa-yas ɣar iḍaren nnes.
26 Ṯamɣarṯ nni ḏ ṯayunanect, lʼaṣel nnes zi Surya Finiqya. Ṯettar zzayes aṭṭas ḥima aḏ isufeɣ jjen zeg yeǧis.
27 Inna-as Ƹisa: "Ḏ amezwaru ejj iḥenjiren aḏ jjawnen. War iƹeddeȓ aḏ imeysi uɣrum n iḥenjiren aḏ imenḍer i iqzinen."
28 Ṯarra xas ṯemɣarṯ nni ṯenna-as: "A Siḏi, uȓa ḏ iqzinen swadday i ṭabȓa tetten min iweṭṭan zeg iḥenjiren."
29 Inna-as: "Ƹlaḥaseb awar-a iy ṯenniḏ, ruḥ aqa jjen iffeɣ zeg yeǧim."
30 Wami ṯeḏweȓ ɣar ṯeddarṯ nnes, ṯufa yeǧis ṯezzeȓ ḏi ṯassuṯ nnes, iffeɣ zzayes jjen.
Siḏna Ƹisa isgenfa ij n uḏehcur
31 Iffeɣ Ƹisa ƹaweḏ zi jwayh n Ṣur, ikka x ṯmurṯ n Ṣayda, iruḥ ɣar ȓebḥar n Ljalil ḏ iqlim nni umi qqaren Dikaplis.
32 Uwin-as-d ij n uḏehcur ḏ azeynun, ttaren zzayes axas isers fus nnes.
33 Isbeƹƹed-iṯ Ƹisa x ȓɣaci ɣar ij n jjiha, igga iḍuḍan nnes ḏeg imejjunen n uryaz nni. Wami issusef Ƹisa, iḥaḏa-yas iȓes nnes.
34 Iysi ṯiṭṭawin nnes ɣar ujenna, yarra nnefs inna: "Ifataḥ!" (Awaȓ-a ixes aḏ yini nurzem.)
35 Ȓxeddnnit genfan imejjunen nnes, iḍȓeq iȓes nnes, ibḏa issawaȓ nican.
36 Iweṣṣa-ṯen inna-asen war tƹawaḏeṯ uȓa i ijjen min iweqƹen. Maca meȓmi ma iweṣṣa-ṯen ktar, txebbaren zzayes ktar.
37 Tƹejjben aṭṭas nnan: "Marra min itegg ḏ aṣebḥan. Itarra iḏehcuren tesȓan, izeynunen ssawaȓen."