Siḏna Ƹisa isecc arbeƹa aȓef n yiwḏan
8
1 Ḏi ȓyamaṯ nni, munen xasen ƹaweḏ ȓɣaci aṭṭas u niṯni war ɣarsen min ɣa ccen. Iȓaɣa-d Ƹisa i imeḥḍaren nnes inna-asen:
2 "Qqsen-ayi yiwḏan-a, ṯeȓt-iyyam aqa-ṯen akiḏi war ɣarsen min ɣa ccen.
3 Meȓa ssekkeɣ-ṯen ɣar ṯuḏrin nsen amen war ccin aḏ nezfen ḏeg ubriḏ, minzi ca zzaysen usin-d zi ȓeggwaj."
4 Nnan-as imeḥḍaren nnes: "Mani ɣa yaf can ḥadd aɣrum iy zi ɣa isejjiwen iwḏan-a ḏi ȓexȓa-ya?"
5 Isseqsa-ṯen Ƹisa: "Cḥaȓ ɣarwem n uɣrum?"
Arrin xas: "Sebƹa n ṯecnifin."
6 Yumar Ƹisa ȓɣaci aḏ qqimen ḏi ṯmurṯ. Iṭṭef sebƹa nni n ṯecnifin, ickar Arebbi, irzi-ṯent yuci-ṯent i imeḥḍaren nnes aṯent ferqen x ȓɣaci nni. Uca ferqen-ṯent.
7 Ƹaweḏ ɣarsen ȓebƹaḍ n iseȓman ḏ imezyanen. Ƹisa ickar Arebbi, inna-asen: "Ferqem-ṯen ƹaweḏ x ȓɣaci."
8 Ccin jjiwnen, ceṭṭen sebƹa n induṯen ƹemmaren s iȓeqquzen.
9 Tuɣa ḏinni can arbeƹa aȓef n yiwḏan. Uca imsafaḍ xasen.
10 Ȓxeddnnit inya ḏeg yij n ṯɣarrabut akeḏ imeḥḍaren nnes, iruḥ ɣar jwayeh n Dalmanuṯa.
Iwḏan war tefhimen min ƹnant lmuƹjizaṯ n Siḏna Ƹisa
11 Usin-d ɣares ȓḥizeb n ifarrisiyen bḏan tmenɣan akis, ttaren zzayes ij n lmuƹjiza zeg ujenna ḥima aṯ jarrben.
12 Ixeyyeq ḏeg wuȓ nnes, inna-asen: "Mayemmi iwḏan n ȓweqṯ-a tettaren lmuƹjiza? Aqa tesȓam ȓḥaqq: Iwḏan n ȓweqṯ-a war ḏasen itmuci lmuƹjiza qaƹ."
13 Ijji-ṯen, inya ḏi ṯɣarrabut iruḥ ɣar ujemmaḍ-in n ȓebḥar.
14 Ttun imeḥḍaren war kisen d iwyin aɣrum, ɣarsen ɣir ij n ṯecnifṯ ḏi ṯɣarrabut.
15 Iweṣṣa-aṭen Ƹisa inna-asen: "Ɣarwem! Ḥḍam ixef nwem zeg untuna n ȓḥizeb n ifarrisiyen ḏ untun n uzeǧiḏ Hirudus."
16 Ssiwȓen jarasen nnan: "Iqqar manaya ȓaḥeqqac war ɣarneɣ bu uɣrum."
17 Issen Ƹisa min xef tuɣa ssawaȓen, inna-asen: "Mayemmi ṯeqqarem jarawem war ɣarneɣ bu uɣrum? Ma ƹaḏ war ṯessinem? Ma ƹaḏ war ṯefhimem? Uȓ nwem, ma itwaqseḥ niɣ?
18 Ɣarwem ṯiṭṭawin, ma war twiȓim? Ɣarwem imejjunen, ma war tesȓim? Ma war ṯeƹqiȓem?
19 Wami rziɣ xemsa nni n ṯecnifin i xemsa aȓef n yiwḏan, mecḥaȓ n induṯen iy ṯeccurem s iȓeqquzen iceṭṭen?" Nnan-as: "Ṯenƹac."
20 Inna-asen: "Ƹaweḏ wami rziɣ sebƹa nni n ṯecnifin i arbeƹa aȓef n yiwḏan, mecḥaȓ n induṯen iy ṯeccurem s iȓeqquzen iceṭṭen?" Nnan-as: "Sebƹa."
21 Inna-asen: "Ma ƹaḏ war ṯefhimem ca?"
Siḏna Ƹisa isgenfa ij n uḍarɣaȓ ḏi Bayt Ṣayda
22 Wami uwḍen ɣar dcar n Bayt Ṣayda, uwin-as-d ij n uḍarɣaȓ, ttaren zzayes aṯ iḥaḏa.
23 Iṭṭef fus n uḍarɣaȓ yuwi-ṯ barra i dcar nni. Issusef x ṯiṭṭawin nnes, igga ifassen nnes xas, isseqsa-ṯ: "Ma ṯẓerreḏ can ȓḥajeṯ?"
24 Ixzar, inna-as: "Twaȓiɣ iwḏan amecnaw ȓcejjur ig igguren."
25 Igga ƹaweḏ ifassen nnes x ṯiṭṭawin n uḍarɣaȓ nni. Igenfa irzem ṯiṭṭawin, iḏweȓ itwaȓa mliḥ.
26 Issekk-iṯ ɣar ṯeddarṯ nnes, inna-as: "War trewwaḥ ca ɣar dcar n Bayt Ṣayda."
Buṭrus icehheḏ x Lmasiḥ
27 Iruḥ Ƹisa ḏ imeḥḍaren nnes ɣar ȓedcur n ṯendint n Qayṣariya n Filibbas. Ḏeg ubriḏ isseqsa imeḥḍaren nnes: "Min qqaren yiwḏan xafi?"
28 Arrin xas nnan-as: "Ȓebƹaḍ qqaren ḏ Yaḥya, ḥadd nneɣnit iqqar ḏ Ilyas, ḥadd nneɣnit iqqar belli cek ḏ ijjen zi lʼanbiya."
29 Isseqsa-ṯen Ƹisa: "Y kenniw, min ḏayi tarrim nec?"
Indeq-d Buṭrus inna-as: "Cek ḏ Lmasiḥ n Arebbi."
30 Iƹȓem-asen inna-asen: "War xafi qqarem manaya i ḥadd."
Siḏna Ƹisa issawaȓ x ȓmewṯ nnes
31 Ibḏa iseȓmaḏ-asen, inna: "Itxeṣṣa i Mmis n bnaḏem aḏ itwaƹeddeb x waṭṭas n ṯmesȓayin, aṯ ƹiffen imeqqranen n wuḏayen ḏ arruyas n ȓefquha ḏ imseȓmaḏen n ccariƹa. Aṯ nɣen, wis ṯeȓt-iyyam aḏ ikkar zi ȓmewṯ."
32 Issiweȓ akisen nican x manaya. Isbeƹƹeḏ-iṯ Buṭrus waḥḏes, inha-ṯ.
33 Maca Ƹisa ineqȓeb ɣares, ixzar ɣar imeḥḍaren nnes, inha Buṭrus inna-as: "Beƹƹeḏ xafi ɣar ȓeggwaj, a Cciṭan! War tfekkareḏ ca amecnaw Arebbi, tfekkareḏ amecnaw bnaḏem."
34 Iȓaɣa-d x imeḥḍaren nnes ḏ ȓɣaci, inna-asen: "Wenni ixsen aḏayi iḏfar nec, aḏ ismeḥ ḏeg yixef nnes, aḏ ikessi ṣṣalib nnes mix ɣa iƹeddeb, aḏayi iḏfar.
35 Ȓaḥeqqac wen ixsen aḏ irbeḥ ȓaƹmar nnes aṯ ixser. Wen ɣa ixesren ȓaƹmar nnes x ȓesbab inu ḏ ȓesbab n lʼinjil aṯ irbeḥ.
36 Mizi ɣa ṯenfeƹ bnaḏem meȓa irbeḥ ddunect ṯekmeȓ aḏ ixser ȓaƹmar nnes?
37 Min ɣa yuc bnaḏem ḏeg umcan n ȓaƹmar nnes?
38 Wenni xafi ɣa iƹeffren, niɣ aḏ iƹeffer x wawaȓ inu ḏi zman-a aƹeffan ixeddƹen Arebbi, axas iƹeffer Mmis n bnaḏem xmi d ɣa yas s lƹaḍama n babas akeḏ lmalaʼikaṯ iqeddsen.