Marqus 9

1 Inna-asen: "Aqa tesȓam ȓḥaqq: Ȓebƹaḍ zeg yinni iǧan ḏa akiḏi war tmettin aȓ ɣa ẓren ȓmulk n Arebbi yusa-d s jjehḏ."

Siḏna Musa ḏ Siḏna Ilyas ḍharen-d akeḏ Siḏna Ƹisa

2 Ṯeƹḏu sett-iyyam, yiwi Ƹisa akis Buṭrus ḏ Yaƹqub ḏ Yuḥanna indeh-iṯen waḥeḏsen ɣar ij n uḏrar yuƹȓa. Ƹisa, netta iḏweȓ am nnur qibač i ṯiṭṭawin nsen. 3 Iḏweȓ warruḍ nnes ḏ acemȓaȓ ireqq, uȓa ḏ ijjen x ṯmurṯ war izemmer aḏ yarr arruḍ ḏ acemȓaȓ am wenni. 4 Imeḍhar-asen-d ḏinni nnabi Ilyas ḏ nnabi Musa. Twaȓan-ṯen ssawaȓen akeḏ Ƹisa.

5 Indeq-d Buṭrus, inna-as i Ƹisa: "A lmuƹallim, ḏ aṣebḥan akic neqqim ḏanita. Yallah, neccin a negg ṯȓaṯa n iqiḍan, ijjen i cek, ijjen i Musa, unneɣnit i Ilyas." 6 Maca war issin min iqqar minzi niṯni ggwḏen. 7 Yusa-d ij n useynu ihwa-d xasen. Ṯendeq-d ij n ṯmijja zeg useynu ṯenna-asen: "Ḏ wa ḏ mmi iƹizzen, ṣennṭeṯ ɣares." 8 Ḏeɣya xzaren imeḥḍaren ammu ḏ wammu, war ufin ḥadd akiḏsen illa Ƹisa.

9 Wami d hewwan zeg uḏrar iweṣṣa-ṯen Ƹisa inna-asen: "War tƹiwiḏem i ḥadd min ṯeẓrim aȓ d ɣa ikkar Mmis n bnaḏem zi ȓmewṯ." 10 Ggin-as array x manaya. Niṯni ssiwȓen jarasen nnan: Min ixes aḏ yini aḏ d ikkar zi ȓmewṯ?

11 Sseqsan-ṯ imeḥḍaren nnes nnan-as: "Mayemmi imseȓmaḏen n ccariƹa qqaren nnabi Ilyas itxeṣṣa aḏ d yas ḏ amezwaru?"

12 Inna-asen: "Ḏ ṣṣaḥ itxeṣṣa aḏ d yas Ilyas ḏ amezwaru aḏ iƹḏeȓ kuȓci. Walakin, mayemmi iqqar Lkitab belli itxeṣṣa-yas i Mmis n bnaḏem aḏ itwaƹeddeb, aṯ ƹiffen? 13 Aḏawem iniɣ: Aqa Ilyas yusa-d, ggin zzayes min xsen amecnaw mammec xas yura ḏi Lkitab."

Siḏna Ƹisa isgenfa ij n uḥenjir ḏayes jnun

14 Ḏewȓen-d ɣar imeḥḍaren, twaȓan munen-d xasen ȓɣaci ḏ ameqqran ḏ can imseȓmaḏen n ccariƹa tmenɣan akiḏsen. 15 Wami ṯ twaȓan, marra ȓɣaci ḏehcen uzzȓen ɣares ḥima axas seǧmen.

16 Isseqsa-ṯen Ƹisa: "Minxef tmenɣam?"

17 Yarra xas ij n zi ȓɣaci inna-as: "A lmuƹallim, aqa uwiɣ-ac-d mmi, netta ḏayes jjen ḏ azeynun. 18 Mani ma iȓqef-iṯ, iɣeṭṭer-iṯ ɣar ṯmurṯ, isufuɣ kuffu zeg uqemmum nnes, itɣeẓaẓ ṯiɣmas nnes, iḏewweȓ war itenhezzi. Ttareɣ zeg imeḥḍaren nnec ḥima azzayes sufɣen jjen, maca war zmiren ca."

19 Yarra xasen Ƹisa inna-asen: "A iwḏan n ȓweqṯ-a iy ḏi war iǧi lʼiman, mecḥaȓ iy kiwem ɣa qqimeɣ u mecḥaȓ ḏawem ɣa ṣbareɣ? Awim-ayi-d aḥenjir." 20 Uwin-ṯ-id i Ƹisa, ɣir jjen nni iẓra Ƹisa, isrejjiji aḥenjir iwḍa ɣar ṯmurṯ, itrejjiji, itekk-as-d kuffu zeg uqemmum nnes.

21 Ƹisa isseqsa babas: "Mecḥar zeg wami ḏayes manaya?"

Inna-as: "Zeg wami iǧa ḏ amezyan. 22 Aṭṭas n ṯwaȓaṯin ineṭṭer-iṯ ḏi ṯmessi niɣ ḏeg waman ḥima aṯ ineɣ. Maca meȓa ṯzemmreḏ ƹawen-aneɣ, rḥem-aneɣ."

23 Inna-as Ƹisa: "Mayemmi ṯeqqareḏ meȓa zemmreɣ? Wenni yumnen izemmer i kuȓci."

24 Ȓxeddnnit isɣuy babas n uḥenjir inna-as: "Umneɣ. Ƹawen lʼiman inu ḏ uqlil."

25 Wami iẓra Ƹisa ȓɣaci tazzȓen ɣares, isbedd jjen nni aƹeffan inna-as: "A jjen azeynun, aḏehcur, tamareɣ cek ffeɣ zzayes ƹemmarṣ war ḏayes taḏef ƹaweḏ!" 26 Isɣuy jjen nni, isrejjiji aḥenjir aṭṭas uca iffeɣ zzayes. Iḏweȓ uḥenjir axmi immuṯ aȓ wami nnan aṭṭas n yiwḏan aqa immuṯ. 27 Maca Ƹisa iṭṭef ḏeg ufus nnes, isbedd-iṯ ikkar.

28 Yuḏef Ƹisa ɣar ṯeddarṯ, sseqsan-ṯ imeḥḍaren nnes waḥḏes nnan-as: "Mayemmi neccin war nzemmer aṯ nsufeɣ?"

29 Yarra xasen: "Nnuƹ wa n jjenn aṯ tsufɣem ɣir s ṯẓaǧiṯ."

30 Ruḥen ssenni kkin x ṯmurṯ n Ljalil. Ƹisa war ixes uȓa ḏ ijjen aḏ issen aqa-ṯen ḏin 31 minzi iseȓmaḏ i imeḥḍaren nnes. Inna-asen: "Aḏ itwasellem Mmis n bnaḏem ɣar ifassen n yiwḏan. Aṯ nɣen, maca nhar wis ṯeȓt-iyyam menbaƹd i ȓmewṯ nnes aḏ d ikkar." 32 Maca niṯni war fhimen awaȓ nni, ggwḏen aṯ sseqsan x manaya.

Manwen ig iǧan ḏ ameqqran?

33 Usin-d ɣar Kafernaḥum. Wami iǧa ḏi ṯeddarṯ isseqsa imeḥḍaren nnes: "Minxef tmenɣim ḏeg ubriḏ?" 34 Sqaren, minzi ḏeg ubriḏ tmenɣan akeḏ wayawya ug iǧan ḏ ameqqran ḏaysen.

35 Iqqim, iȓaɣa-d x ṯenƹac nni n imeḥḍaren inna-asen: "Meȓa can ijjen ixes aḏ yiȓi ḏ amezwaru itxeṣṣa aḏ yiȓi ḏ aneggaru, ḏ axeddam n marra." 36 Isqarreb-d ɣares ij uḥenjir, isbedd-iṯ ḏi ȓwesṭ nsen iḏerreƹ-as, inna-asen: 37 "Wen ɣa iqebȓen ƹlaḥsab nec can uḥenjir am wa, ḏ nec ig iqbeȓ. Wen ḏayi ɣa iqebȓen, maci ḏ nec ig iqbeȓ maca iqbeȓ wenni ḏayi-d issekken."

38 Inna-as Yuḥanna: "A lmuƹallim, neẓra ijjen isufuɣ jnun s lḥikma nnec. Neccin nerzu aṯ nesbedd minzi war iggur ca akiḏneɣ."

39 Inna-as Ƹisa: "War ṯ sbeddam ca. War izemmer uȓa ḏ ijjen aḏ igg lmuƹjiza s lḥikma inu, ȓxeddnni ḏeɣya axafi yini awaȓ ḏ aƹeffan. 40 Wenni war iǧi ḍed nneɣ, aqa-ṯ akiḏneɣ. 41 Aqa tesȓam ȓḥaqq: Wenni ḏawem ɣa yucen ȓkas n waman ȓaḥeqqac teḏfarem Lmasiḥ aqa aḏ yawi lʼajar nnes."

Lʼiman ḏ ȓmuƹṣiyeṯ

42 Wenni iy ɣa yawin ijjen zeg imezyanen-a iy zzayi itamnen ɣar ȓmuƹṣiyeṯ, ḥsen-as aḏ cedden ij n uzru n ṯsirṯ ɣar yiri nnes, aṯ neḍren ḏi ȓebḥar. 43 Meȓa fus nnec itsebbab-ac ḏi can ȓmuƹṣiyeṯ, qess-iṯ. Aḏ taḏfeḏ jenneṯ s yij n ufus, ḥsen-ac zi meȓa qqimen ɣarek ṯnayen ifassen aḏ taḏfeḏ jahennama, ɣar ṯmessi iy war ixessin ca. 44 [Mani ikeccawen war tmettin, ṯimessi war ṯxessi ca.] 45 Meȓa ḍar nnec itsebbab-ac ḏi can ȓmuƹṣiyeṯ, qess-iṯ. Aḏ taḏfeḏ jjenneṯ s yij n uḍar, ḥsen-ac zi meȓa qqimen ɣarek ṯnayen iḍaren aḏ taḏfeḏ jahennama. 46 [Mani ikeccawen war tmettin, ṯimessi war ṯxessi ca.] 47 Meȓa ṯiṭṭ nnec tsebbab-ac ḏi can ȓmuƹṣiyeṯ, qȓeƹ-it. Aḏ taḏfeḏ jenneṯ s yij n ṯiṭṭ, ḥsen-ac zi meȓa qqiment ɣarek ṯnayen ṯiṭṭawin aḏ taḏfeḏ jahennama 48 mani ikeccawen war tmettin, ṯimessi war ṯxessi ca. 49 Minzi marra iwḏan aḏ twameǧḥen s ṯmessi. 50 Ȓemȓeḥ ṯṣeǧaḥ, maca meȓa iruḥ-as lmaḏaq nnes, mamc ḏas ɣa negg aḏas-ṯ-iḏ narr? Aɣarwem ṯiȓi ȓemȓeḥ ḏi nnefs nwem, iȓim ḏi ȓehna akeḏ wayawya."