Ṭṭalaq ƹlaḥsab mammec iqqar Siḏna Ƹisa
10
1 Ikkar iruḥ ssenni, yiweḍ ɣar jwayeh n Yahuḏiya ḏ ujemmaḍ-in n yiɣzar n Lʼurdun. Munen-d xas ȓɣaci ƹaweḏ, ibḏa iseȓmaḏ-iṯen amecnaw ȓebda.
2 Qarrben ɣares can yiwḏan zi ȓḥizeb n ifarrisiyen ḥima aṯ jarrben, nnan-as: "Ma ḥalal ɣar bnaḏem aḏ iǧef i ṯemɣarṯ nnes?"
3 Yarra xasen inna-asen: "Minxef kenniw iweṣṣa Musa?"
4 Nnan-as Ifarrisiyen: "Musa ijja aryaz aḏ yuc ṯabrat n waǧef i ṯemɣarṯ nnes, aḏas iǧef."
5 Ijaweb-iṯen Ƹisa: "Yura ȓuṣiyeṯ nni i kenniw minzi uȓ nwem iqseḥ,
6 maca zeg wami ṯebḏa ddunect ixȓeq-iṯen Arebbi aryaz ḏ ṯemɣarṯ.
7 Suyenni aryaz aḏ ijj babas ḏ yemmas aḏ imun akeḏ ṯemɣarṯ nnes,
8 aḏ ḏewȓen s ṯnayen iḏsen ḏ ijjen. X manaya war tiȓin bu ḏ ṯnayen, aḏ iȓin ḏ ijjen.
9 Min ismun Arebbi war ṯ iferreq bnaḏem."
10 Ḏi ṯeddarṯ sseqsan-ṯ imeḥḍaren nnes ƹaweḏ x manaya.
11 Inna-asen: "Wenni ɣa iǧfen i ṯemɣarṯ nnes yiwi can icten nneɣnit, izna.
12 Meȓa ṯeǧef ṯemɣarṯ akeḏ uryaz nnes ṯiwi ijjen nneɣnit, ṯezna."
Siḏna Ƹisa itbarek iḥenjiren imezyanen
13 Uwin-d yiwḏan can iḥenjiren ḏ imezyanen ɣar Ƹisa ḥima aṯen iḥaḏa. Maca wami ẓrin manaya imeḥḍaren nnes, ƹarrḏen-asen.
14 Iẓra Ƹisa manaya, ixeyyeq inna-asen: "Jjem iḥenjiren imezyanen aɣari-d asen war ḏasen tƹarraḏem, ȓaḥeqqac ȓmulk n Arebbi itiȓi ɣar yinni iǧan am yina.
15 Aqa tesȓam ȓḥaqq: Labud i bnaḏem aḏ yamen ḏi ȓmulk n Arebbi mamc ḏayes itamen uḥenjir amezyan. Meȓa lla, ƹemmarṣ aḏ yaḏef ȓmulk n Arebbi."
16 Iḏerreƹ-asen, igga xasen ifassen nnes ibarek-iṯen.
Aryaz ig iǧan ḏ ttajar
17 Wami iggur ḏeg ubriḏ, yusa-d ɣares ijjen itazzeȓ, iwḍa x ifadden zzaṯes, isseqsa-ṯ inna-as: "A lmuƹallim aṣebḥan, min ɣa ggeɣ ḥima aɣari ṯiȓi ṯuḏarṯ n ȓebda?"
18 Inna-as Ƹisa: "Mayemmi ṯeqqareḏ nec ḏ aṣebḥan? War iǧi ḥadd ḏ aṣebḥan illa Arebbi waḥḏes.
19 Ṯessneḏ ȓuṣiyaṯ: War neqq, war zenni, war tacar, war cehheḏ bu zzur, war cemmeṯ, weqqar babac ḏ yemmac."
20 Inna-as uryaz nni: "A lmuƹallim, zeg wami ǧiɣ ḏ amezyan tweqqareɣ zi marra manaya."
21 Ixzar ɣares Ƹisa yuḏef-as ɣar wuȓ nnes, inna-as: "Ṯeqqim-ac ij n ȓḥajeṯ war ṯeggiḏ. Ruḥ zenz marra min ɣarek, freq-iṯ x ȓmusakin, uca aɣarek yiȓi ȓkenz ḏeg ujenna, as-d aḏayi ṯedfareḏ."
22 Wami isȓa i manaya ixeyyeq aṭṭas, iruḥ iḥzen ȓaḥeqqac ɣares aṭṭas n wagȓa.
23 Ixzar ɣarsen Ƹisa, inna-asen i imeḥḍaren nnes: "Mecḥaȓ iqseḥ x twajar aḏ aḏfen ȓmulk n Arebbi."
24 Ḏehcen imeḥḍaren nnes x wawaȓ nnes. Inna-asen ƹaweḏ Ƹisa: "A ṯarwa inu, mecḥaȓ iqseḥ waḏaf ḏi ȓmulk n Arebbi!
25 Qbeȓ iy ɣa yaḏef ij n ttajar ɣar ȓmulk n Arebbi, qa aḏ yaḏef ij n uȓɣem zi ṯiṭṭ n ṯseynefṯ!"
26 Tƹejjben aṭṭas, nnan i wayawya: "Xyar, wig izemmren aḏ injem!?"
27 Ixzar ɣarsen Ƹisa inna-asen: "Manaya war ḏas zemmren yiwḏan, maca aḏas izmer Arebbi. Kuȓci izemmer-as Arebbi."
28 Indeq-d Buṭrus inna-as: "Aqa neccin nesmeḥ ḏi kuȓci neḏfar-icek!"
29 Inna-as Ƹisa: "Aqa tesȓam ȓḥaqq: Wen ɣa isemḥen ḏi ṯeddarṯ nnes niɣ ḏi ayṯmas niɣ ḏi suyṯmas niɣ ḏi yemmas ḏ babas niɣ ḏi ṯarwa nnes niɣ ḏeg imarjeƹiwen nnes, ƹlaḥsab nec u ƹlaḥsab lʼinjil,
30 aɣares ṯiȓi miyya n ṯseqqar zi ṯuḏrin, ḏ ayṯmas, ḏ suyṯmas, ḏ yemmas, ḏ ṯarwa nnes, ḏ imarjeƹiwen nnes. Aɣares yiȓi uƹeddeb ḏi ȓweqṯ-a, walakin aɣares ṯiȓi ṯuḏarṯ n ȓebda ḏi zman iy d ɣa yasen.
31 Aṭṭas iǧan ḏ imezwura aḏ ḏewȓen ḏ ineggura. Aṭṭas iǧan ḏ ineggura aḏ ḏewȓen ḏ imezwura."
Siḏna Ƹisa issawaȓ ƹaweḏ x ȓmewṯ nnes
32 Aqa-ṯen x ubriḏ, tgaƹƹaḏen ɣar Lquds, Ƹisa aqa-ṯ zzaṯ. Imeḥḍaren nnes ḏehcen, yinni ṯ iḏfaren ggwḏen. Yiwi ṯenƹac nni n imeḥḍaren ṯwaȓa nneɣnit waḥeḏsen, ibḏa issawaȓ akiḏsen x min ḏas ɣa iweqƹen, inna:
33 "Aqa netgaƹƹaḏ ɣar Lquds mani ɣa itwaxḏeƹ Mmis n bnaḏem i arruyas n ȓefquha ḏ imseȓmaḏen n ccariƹa. Axas ḥekmen s ȓmewṯ, aṯ sellmen i yinni war iǧin ḏ uḏayen.
34 Axas ḍeḥcen, axas ssusfen, aṯ uwṯen s usɣun, aṯ nɣen. Maca ḏi nhar wis ṯeȓt-yyam aḏ d ikkar zi ȓmewṯ."
Ṭṭaleb n ṯarwa n Zabdi
35 Ruḥen ɣares Yaƹqub ḏ Yuḥanna ṯarwa n Zabdi, nnan-as: "A lmuƹallim, nxes aḏaneɣ ṯeggeḏ min zzayek ɣa nettar."
36 Inna-asen: "Min ṯrezzuḏ aḏawem ggeɣ?"
37 Nnan-as: "Ejj-aneɣ a neqqim ḏi lƹaḍama nnec ijjen x ufusi ijjen x uẓeȓmaḍ nnec."
38 Inna-asen Ƹisa: "Kenniw war ṯessinem min ṯettarem. Ma ṯzemmrem aḏ teswem zi ȓkas iy zi ɣa sweɣ nec? Niɣ aḏ tɣeḍsem ḏi ȓaƹḏab iy ḏi ɣa ɣeḍseɣ?"
39 Nnan-as: "Wah, nzemmer-as!"
Inna-asen: "Wah, aḏ teswem zi ȓkas iy zi ɣa sweɣ, aḏ tɣeḍsem ḏi ȓaƹḏab iy ḏi ɣa ɣeḍseɣ.
40 Maca aɣimi x ufusi inu ḏ uẓeȓmaḍ inu war iǧi bu ḏ nec iy ṯ ɣa yucen. Aɣimi-ya aḏ immuc i yinni umi itwasewjeḏ."
41 Wami sȓin ƹecra nni imeḥḍaren, xeyyqen x Yaƹqub ḏ Yuḥanna.
42 Iȓaɣa-yasen-d Ƹisa marra iḏsen inna-asen: "Ṯessnem belli arruyas n ṯmura ḥekkmen x ccaƹb, iwḏan imeqqranen nsen tzeyyaren xasen.
43 Maca manaya itxeṣṣa war itiȓi jarawem. Lƹaks, wenni irezzun aḏ iḏweȓ ḏ ameqqran jarawem itxeṣṣa aḏ yiȓi ḏ axeddam nwem.
44 Wenni irezzun aḏ iḏweȓ ḏ amezwaru jarawem aḏ yiȓi ḏ ismeɣ n marra.
45 Mmis n bnaḏem netta s yixef nnes war d yusi ḥima aḏas xeḏmen yiwḏan, maca ḥima aḏasen ixḏem. Aḏ isellem ṯuḏarṯ nnes ḥima aḏ isenjem aṭṭas zzaysen."
Siḏna Ƹisa isgenfa Bartimawus wenni iǧan ḏ aḍarɣaȓ
46 Uwḍen ɣar ṯendint n Ariḥa. Umbaƹd iffeɣ zi Ariḥa akeḏ imeḥḍaren nnes ḏ waṭṭas n ȓɣaci. Ufin ij n uḍarɣaȓ iqqim ṭṭarf n ubriḏ itettar. Qqaren-as Bartimawus mmis n Timawus.
47 Itesȓa belli Ƹisa Naṣiri ig iƹeddun, ibḏa isɣuyiw iqqar: "A Ƹisa mmis n Ayṯ-Dawud, rḥem-ayi!"
48 Zeyyaren xas aṭṭas n yiwḏan ḥima aḏ isqar, maca netta iqqim isɣuyiw ƹaḏ s jjehḏ, iqqar: "A mmis n Ayṯ-Dawud, rḥem-ayi!"
49 Ibedd Ƹisa, inna-asen: "Ȓaɣam-d xas."
Ȓaɣan-d x uḍarɣaȓ nni nnan-as: "Fareḥ, aqa itȓaɣa-d xak. Kkar!"
50 Inḍer xas axarṭiṭ, ikkar iruḥ ɣar Ƹisa.
51 Isseqsa-ṯ Ƹisa inna-as: "Min ṯexseḏ aḏac ggeɣ?"
Ijaweb-iṯ uḍarɣaȓ: "A lmuƹallim, xseɣ aḏ twaȓiɣ."
52 Inna-as Ƹisa: "Ruḥ, lʼiman nnec isgenfa-cek!" Ḏeg umcan iḏweȓ itwaȓa, uca iḏfar Ƹisa ḏeg ubriḏ.