Siḏna Ƹisa itaḏaf x usnus ɣar Lquds
11
1 Wami qarrben ɣar ṯendint n Lquds, ɣar ȓedcur n Bayt Faji ḏ Bayt Ƹanya ṭṭarf n uḏrar n zzitun, issekk Ƹisa ṯnayen zeg imeḥḍaren nnes,
2 inna-asen: "Ruḥem ɣar dcar iǧan zzaṯwem. Xmi ɣa ṯawḍem, aȓ ḏinni ṯafem ij n usnus iqqen, ƹemmarṣ war xas inyi uȓa ḏ ijjen qbeȓ, fsim-as awim-ṯ-id.
3 Meȓa inna-awem can ijjen mayemmi teggem manaya, inim-as iḥḏaj-iṯ Siḏiṯneɣ. Ȓxeddnnit akiwem-ṯ-iḏ issekk ḏanita."
4 Ruḥen ufin asnus ḏeg ubriḏ iqqen ɣar ṯewwarṯ, fesyen-as.
5 Nnan-asen ȓebƹaḍ zeg yinni ḏinni ibedden: "Min teggem? Mayemmi ṯfessim i usnus-a?"
6 Jawben-ṯen amecnaw mammec ṯen iweṣṣa Ƹisa. Uca jjin-ṯen.
7 Uwin-ṯ-iḏ ɣar Ƹisa, ggin xas izeǧuba nsen, inya xas.
8 Aṭṭas n yiwḏan ssun-as abriḏ s izeǧuba nsen. Inneɣnit qessen zeg imarjeƹiwen afriwen n ṯcejjura ssun zzaysen abriḏ.
9 Yinni gguren zzaṯes ḏ yinni iy ṯ iteḏfaren qqaren:
"Lḥamdu i Arebbi!
Ssaƹḏ n wenni iy d yusin s lʼiḏen n Siḏi Arebbi.
10 Ssaƹḏ n ȓmulk n babaṯneɣ Dawud iy d yusin.
Lḥamdu i Arebbi yuƹȓan."
11 Yuḏef Ƹisa ɣar Lquds, ɣar ṯemziḏa ṯameqqrant n wuḏayen, ixzar marra min ḏinni. Wami d iqarreb uƹecci, iffeɣ akeḏ ṯenƹac n imeḥḍaren nnes ɣar Bayt Ƹanya.
Ṯacejjarṯ n ṯazarṯ yuzɣen
12 Ṯiwecca nnes ffɣen zi Bayt Ƹanya, Ƹisa iǧuz.
13 Iẓra zi ȓeggwaj ij n ṯcejjarṯ n ṯazarṯ ḏayes ṯifray, iqarreb ɣares ḥima aḏ irzu x ṯazarṯ. Wami ɣares yiweḍ yufa ḏayes ɣir ṯifray minzi ƹaḏ war ṯiwiḍ ȓweqṯ n ṯazarṯ.
14 Inna-as: "Zi ssa aȓ ṯsawent ƹemmarṣ war zzayem itett ḥadd." Imeḥḍaren nnes tesȓan-as i min inna.
Siḏna Ƹisa ḏi ṯemziḏa ṯameqqrant n wuḏayen
15 Iwḍen ɣar Lquds, yuḏef Ƹisa ɣar ṯemziḏa ṯameqqrant ibḏa itazzeȓ x yinni issaɣen iznuzan ḏi ṯemziḏa. Iqȓeb-asen missaṯ n iṣarrafen n tmenyaṯ ḏ ȓekrasa n yinni iznuzan iḏbiren.
16 War itijji uȓa ḏ ijjen aḏ ikk x ṯemziḏa meȓa ɣares sseȓƹaṯ.
17 Iseȓmaḏ-iṯen inna-asen: "Lkitab iqqar: Ṯaddarṯ inu aḏ tiȓi ḏ ṯaddarṯ n ṯẓaǧiṯ i marra ȓegnus, maca kenniw ṯarrim-teṯ ḏ ifri n ixewwanen."
18 Sȓin-as arruyas n ȓefquha ḏ imseȓmaḏen n ccariƹa, rezzun mammec aṯ nɣen. Ggwḏen zzayes minzi marra ȓɣaci ḏehcen ḏeg useȓmaḏ nnes.
19 Ɣar uƹecci teffɣen ɣar barra n ṯendint.
Asfhem n ṯcejjarṯ n ṯazarṯ yuzɣen
20 Ɣar sbaḥ zic, wami gguren ẓrin ṯacejjarṯ nni n ṯazarṯ ṯuzeɣ s izewran nnes.
21 Ifekkar Buṭrus inna-as: "A Lmuƹalim, xzar! Ṯacejjarṯ nni n ṯazarṯ iy ṯexziḏ ṯuzeɣ."
22 Yarra xasen Ƹisa inna-asen: "Amneṯ zi Arebbi!
23 Aqa tesȓam ȓḥaqq: Meȓa can ijjen inna-as i uḏrar-a: Neqȓeƹ menḍer ḏi ȓebḥar, u war ḏayes bu ccekk ḏeg wuȓ nnes iƹni itamen belli min inna aḏ iwqeƹ, min ɣa yini aḏ yiȓi.
24 X manaya aḏawem iniɣ: Amneṯ aɣarwem yiȓi marra min ɣa ṯettarem i Arebbi ḏi ṯẓaǧiṯ nwem, uca aɣarwem yiȓi.
25 Xmi ɣa ṯbeddem aḏ teẓẓaǧem, semḥeṯ i yinni kiḏwem ixḍan ḥima aḏawem iɣfar ƹaweḏ Babaṯwem iǧan ḏeg ujenna dnub nwem.
26 [Meȓa war ṯsemḥem i yiwḏan, Babaṯwem iǧan ḏeg ujenna war ḏawem iɣeffar ca dnub nwem.]"
Ssulṭa n Siḏna Ƹisa
27 Ḏewȓen ɣar Lquds. Wami iggur ḏi ṯemziḏa ṯameqqrant, usin-d ɣares arruyas n ȓefquha ḏ imseȓmaḏen n ccariƹa ḏ imeqqranen n wuḏayen.
28 Kkaren nnan-as: "Zi mant ssulṭa iy zi teggeḏ ȓexḏayem-a, niɣ wi ḏac yucin ssulṭa-ya iy zi teggeḏ ȓexḏayem-a?"
29 Ijaweb-iṯen, inna-asen: "Uȓa ḏ nec akenniw sseqsiɣ x yij n ṯmesȓayṯ, meȓa ṯjawbem-ayi, aḏawem iniɣ uw ḏayi yucin ssulṭa-ya:
30 Ssulṭa n Yaḥya aḏ iṭehhar s waman, ma zi Arebbi niɣ zeg yiwḏan? Jawbem-ayi."
31 Ssiwȓen jarasen nnan: "Meȓa nenna-as zi Arebbi, aḏaneɣ yini: Mayemmi war zzayes ṯuminem?
32 Ma aḏas nini zeg yiwḏan?"
Indeq-d Ƹisa inna-asen: "Iwa uȓa ḏ nec war ḏawem qqireɣ man ssulṭa iy zi xeddmeɣ."