Ȓmaƹna n ixemmasen iy ḏi iǧa ccerr
12
1 Ibḏa issawaȓ akiḏsen s ȓemƹani, inna: "Ij n uryaz iẓẓu aḍiȓ ḏeg yij n umarjeƹ nnes. Inneḍ-as ȓḥiḍ, igga ḏayes ṯasirṯ uḍiȓ. Ibna ḏayes ij n ṯsumƹeṯ iḥeṭṭu. Igga ḏayes ixemmasen, uca isafar.
2 Wami d yiweḍ ȓweqṯ n uȓqeḍ n uḍiȓ, ikkar issekk ij n uxeddam ɣar ixemmasen nni ḥima aḏas-d ucen ȓḥaqq nnes zeg uȓqeḍ n umarjeƹ uḍiȓ.
3 Maca ṭṭfen-ṯ ixemmasen, uwṯin-ṯ, ssekken-ṯ-id ixwa.
4 Ikkar issekk-asen ƹaweḏ ij n uxeddam nneɣnit, merzen-as ƹedden xas.
5 Ikkar issekk ijjen nneɣnit, nɣin-ṯ. Issekk-asen inneɣnit aṭṭas, ḥadd uwṯin-ṯ ḥadd nɣin-ṯ.
6 Iqqim-as mmis iƹizzen waḥḏes. Ɣar uneggar issekk-iṯ ɣarsen inna: Aqa aḏ ggwḏen memmi.
7 Maca ixemmasen nni nnan i wayawya: Aqa wenni iy ɣa iwarṯen! Aṯ nneɣ ḥima aḏ iḏweȓ umarjeƹ uḍiȓ nneɣ!
8 Ṭṭfen-ṯ, nɣin-ṯ, neḍren-ṯ barra i umarjeƹ uḍiȓ.
9 Iwa, min ɣa igg bab n umarjeƹ uḍiȓ? Aḏ d yas aḏ ineɣ ixemmasen nni, aḏ yuc amarjeƹ uḍiȓ nni i inneɣnit.
10 Ma war ṯeɣrim min yurin ḏi lkitab?
Azru iy ƹiffen ibennayen,
aḏ yiȓi ḏeg umcan aṣebḥan
ḏi ṯɣemmarṯ n dsas.
11 Ḏ Siḏi Arebbi ig iggin manaya,
ḏ ij n ȓḥajeṯ ḏ ṯameqqrant!"
12 Lḥukkam n wuḏayen rezzun aḏ ṭṭfen Ƹisa, maca ggwḏen zeg yiwḏan. Ssnen belli issiweȓ s ȓmaƹna-ya xasen. Jjin-ṯ ruḥen.
Ḍḍariba n Qayṣar
13 Kkaren ssekken ɣares can ifarrisiyen ḏ can yiwḏan zi ȓḥizeb n uzeǧiḏ Hirudus, rzun aṯ ṭṭfen x can wawaȓ nnes.
14 Wami usin-d ɣares nnan-as: "A lmuƹallim, nessen belli ṯeqqareḏ ȓḥaqq. War teggwḏeḏ i yiwḏan ȓaḥeqqac war teggeḏ bu uḏemawen. Ṯseȓmaḏeḏ s ȓḥaqq mammec ixes Arebbi a nƹic. Ṯsemmeḥ Ccariƹa nneɣ a nxeǧes ḍḍariba i uzeǧiḏ Qayṣar niɣ lla? Ma ḏas-t nxeǧes niɣ lla?"
15 Issen Ƹisa ȓexḏaƹ nsen, inna-asen: "Mayemmi ḏayi teggem ṯaxcebṯ? Awim-d ij n ṯpeyyast n nnuqarṯ ḥima at ẓreɣ."
16 Uwin-as-t-id. Inna-asen: "Uw t yiȓan teṣwarṯ-a ḏ yisem-a iy ḏayes?"
Nnan-as: "Qa n Qayṣar."
17 Indeq-d Ƹisa inna-asen: "Ucem-as i Qayṣar min iǧan n Qayṣar. Ucem-as i Arebbi min iǧan n Arebbi." Uca tƹejjben ḏayes.
Siḏna Ƹisa itbeccar x ṯuḏarṯ n ȓebda
18 Kkaren usin-d ɣar Ƹisa can yiwḏan zi ȓḥizeb n iṣadduqiyen (niṯni qqaren belli iwḏan war d tnekkiren zi ȓmewṯ), sseqsan-ṯ nnan-as:
19 "A lmuƹallim, yura-aneɣ Musa belli meȓa can uryaz immuṯ, ijja ṯamɣarṯ maca war d ijji bu ṯarwa, at yawi uȓwes nnes, akis d ijj ṯarwa i wumas immuṯen.
20 Tuɣa ḏin sebƹa n wawmaṯen, imȓec umezwaru, immuṯ war d ijji bu ṯarwa.
21 Yuwi-t wis ṯnayen, immuṯ war d ijji bu ṯarwa. Yuwi-t wis ṯȓaṯa
22 aȓ wis sebƹa. Mmuṯen, war kis d jjin bu ddurriṯ. Aȓ uneggar uȓa ḏ ṯamɣarṯ nni ṯemmuṯ.
23 Ḏi yewm lqiyama xmi d ɣa kkaren yinni immuṯen, umi ɣa ṯiȓi ṯemɣarṯ nni? Ȓaḥeqqac ḏ ṯamɣarṯ nsen s sebƹa."
24 Indeq-d Ƹisa inna-asen: "Kenniw ṯexḍim ȓaḥeqqac war ṯessinem lkitab uȓa ḏ jjehḏ iy ɣares ɣar Arebbi.
25 Xmi d ɣa kkaren yinni immuṯen iryazen ḏ ṯemɣarin war meǧcen ca, aḏ iȓin amecnaw lmalaʼikaṯ iǧan ḏeg ujenna.
26 Maca yinni immuṯen aḏ d kkaren zi ȓmewṯ. Ma ƹemmarṣ war ṯeɣrim min yurin ḏi lkitab n Musa? Ḏi ȓqiṣṣa n ṯcejjarṯ,a wami issiweȓ Arebbi akeḏ Musa inna-as qa nec ḏ Arebbi n Brahim, ḏ Arebbi n Isḥaq, ḏ Arebbi n Yaƹqub.
27 Inna-asen: Netta ḏ Arebbi n yinni iddaren maci n yinni immuṯen. Aqa ṯexḍim aṭṭas!"
Ȓuṣiyeṯ ṯameqqrant
28 Ikkar yusa-d ijjen zeg imseȓmaḏen n ccariƹa, isȓa-yasen tnaqacen. Iẓra belli ijaweb-iṯen Ƹisa mliḥ, isseqsa-ṯ: "Man ȓuṣiyeṯ qaƹ iǧan ḏ ṯamezwarut ḏi ccariƹa?"
29 Inna-as Ƹisa: "Ȓuṣiyeṯ ṯamezwarut nettaṯ: Ṣennṭeṯ, a Ayṯ-Israʼil, Siḏi Arebbi lʼilah nneɣ, Siḏi Arebbi ḏ ijjen.
30 Aḏ texseḏ Siḏi Arebbi nnec s marra uȓ nnec, s marra arruḥ nnec, s marra ȓaƹqeȓ nnec, s marra jjehḏ nnec.
31 Ȓuṣiyeṯ wis ṯnayen, aḏ texseḏ ajjar nnec amecnaw ixef nnec. War ḏinni bu can ȓuṣiyeṯ ktar zi ṯina."
32 Inna-as umseȓmaḏ nni n ccariƹa: "Mliḥ, a lmuƹallim, min ṯenniḏ ḏ ȓḥaqq. Siḏi Arebbi ḏ ijjen, war ḏinni uȓa ḏ ijjen illa netta.
33 Ƹaweḏ meȓa bnaḏem itexs Siḏi Arebbi s marra uȓ nnes ḏ ȓaƹqeȓ nnes ḏ jjehḏ nnes, itexs ajjar nnes amecnaw ixef nnes, manaya ḥsen zi bnaḏem meȓa iɣareṣ dbiḥeṯ at icmeḍ qaƹ ḏi tmessi niɣ aḏ iqeddem mana ktar i Arebbi."
34 Iẓra Ƹisa belli aryaz nni ijaweb-iṯ s ȓefhameṯ, indeq-d inna-as: "War ṯeǧiḏ bu ṯeggwjeḏ x ȓmulk n Arebbi." Ssenni war izƹim uȓa ḏ ijjen aṯ isseqsa ƹaḏ ktar.
Lmasiḥ ḏ siḏes n Dawud
35 Aqa-ṯ Ƹisa ḏi ṯemziḏa ṯameqqrant iseȓmaḏ ḏinni. Indeq-d inna-asen: "Mayemmi qqaren imseȓmaḏen n ccariƹa belli Lmasiḥ ḏ mmis n Dawud?"b
36 Inna-asen: "Dawud inna netta s yixef nnes s Arruḥ iqeddsen:
Siḏi Arebbi inna-as i Siḏi,
Qqim-d x ufusi inu,
aȓ ɣa ggeɣ ȓƹaḏyan nnec
swadday i iḍaren nnec.
37 Mammec ɣa yiȓi Lmasiḥ ḏ mmis d Dawud? Netta Dawud iqqar-as i Lmasiḥ A Siḏi."
Aṭṭas n ȓɣaci tesȓan-as, farḥen.
Lmunafiqin
38 Iseȓmaḏ-iṯen inna-asen: "Ḥḍam ixef nwem zeg imseȓmaḏen n ccariƹa. Texsen aḏ uyuren s iseȓhamen, texsen axasen seǧmen ḏi ȓeswaq,
39 aḏ qqimen ḏeg imucan imezwura ḏi ṯemziḏawin ḏ ȓefruḥ.
40 Tetten ṯajjaȓin, seḍharen-d ixef nsen tẓaǧan aṭṭas ḥima aḏ banen. Yina, lḥisab nsen aḏ yiȓi iqṣeḥ aṭṭas!"
Ṯajjaȓṯ ticc ṣṣaḏaqa ktar zi twajar
41 Iqqim Ƹisa zzaṯ i ṣṣenduq n ṯemziḏa ṯameqqrant. Iẓra mammec ȓɣaci teggen ṣṣaḏaqa nsen ḏi ṣṣenduq. Aṭṭas n twajar teggen ḏinni aṭṭas n tmenyaṯ.
42 Tusa-d ij n ṯajjaȓṯ ḏ ȓmeskina ṯegga ḏinni ṯnayen iṣuldan, iƹni ṯnayen frank.
43 Iȓaɣa-d Ƹisa x imeḥḍaren nnes, inna-asen: "Aqa tesȓam ȓḥaqq: Ṯajjaȓṯ-a ḏ ȓmeskina ṯegga ḏi ṣṣenduq ktar zi min ggin marra inneɣnit.
44 Minzi marra inneɣnit ucin zi min xasen izayḏen ḏ agȓa, maca nettaṯ waxxa ḏ ȓmeskina ṯuca marra min ṯeƹȓem."