Lƹalamaṯ n ȓfana n ddunect
13
1 Iffeɣ Ƹisa zi ṯemziḏa ṯameqqrant, inna-as ij n zeg imeḥḍaren nnes: "A Lmuƹallim, xzar izra-ya ḏ ȓebni-ya ḏ aṣebḥan!"
2 Ijaweb-iṯ Ƹisa inna-as: "Twaȓiḏ ȓebni-ya aṣebḥan? War ḏa itɣimi ij n uzru x unneɣnit. Marra aḏ inehḏem."
3 Wami iqqim ḏeg uḏrar n zzitun zzaṯ i ṯemziḏa ṯameqqrant, sseqsan-ṯ Buṭrus ḏ Yaƹqub ḏ Yuḥanna ḏ Andrawus waḥeḏsen nnan-as:
4 "Ini-yaneɣ, meȓmi ɣa iwqeƹ manaya? Mant lƹalama iqqaren belli marra manaya ƹȓayen aḏ iwqeƹ?"
5 Yarra xasen Ƹisa inna-asen: "Ḥḍam ixef nwem ḥima war kenniw ixeddeƹ ḥadd.
6 Aṭṭas iy d ɣa yasen s yisem inu aḏ inin ḏ nec! Aḏ xeḏƹen aṭṭas n yiwḏan.
7 Xmi ɣa ṯesȓem x lḥuȓub ḏ ȓexbar n ȓḥarb war teggwḏem ca. Labuda zi manaya, maca ƹaḏ war ṯfenni ddunect.
8 Ȓgens aḏ ihjem x ȓgens, lmemlaka x lmemlaka. Aḏ iwqeƹ zzinzal ḏeg waṭṭas n imucan, aḏ yiȓi jjuƹ. Manaya aḏ yiȓi amecnaw amezwaru n ȓeḥriq n ṯemɣarṯ iy ɣa yarwen.
9 Ḥḍam ixef nwem! Akenniw sellmen i lmaḥkamaṯ, akenniw uwṯen ḏi ṯemziḏawin n wuḏayen. Aḏ tbeddem zzaṯ i lḥukkam ḏ izeǧiḏen ƹlaḥsab isem inu ḥima axafi ṯcehḏem.
10 Ixeṣṣa aḏ ḥeddṯen s lʼinjil jar marra ȓegnus.
11 Axmi kenniw ɣa jarren ḥima akenniw sellmen, war tfekkarem ca ḏi min ɣa ṯinim. Maca awaȓen iy ɣa ṯinim ḏ Arebbi iy ḏawem-ṯen ɣa yucen ḏi ṯsaƹat nni. War iǧi bu ḏ kenniw iy ɣa issiwȓen, maca ḏ Arruḥ iqeddsen.
12 Umas aḏ isellem umas i ȓmewṯ, babas aḏ isellem mmis. Ṯarwa aḏ raḥen ḍed i lwalidin nsen, aṯen nɣen.
13 Aḏ ƹiffen marra kenniw ƹlaḥsab isem inu, maca wenni ɣa iṣbaren aȓ uneggar aḏ injem.
14 Xmi ɣa ṯeẓrem "min iǧan ḏ aƹeffan aṭṭas iheddmen," itbedda mani ixeṣṣa war itbeddi (Fhem, a wenni iɣrin manaya!), ȓxeddnnit ixeṣṣa yinni iǧan ḏi ṯmurṯ n Yahuḏiya aḏ rewȓen ɣar iḏurar.
15 Wenni iy ɣa yiȓin x ṯzeqqaa nnes ixeṣṣa war ihekkwi ɣar ṯeddarṯ, war ḏayes itiḏef ca ḥima aḏ iysi can ȓḥajeṭ.
16 Wenni iǧan ḏeg umarjeƹ ixeṣṣa war iḏekkwiȓ ɣar ṯeddarṯ aḏ iysi čammir nnes.
17 Ya tamara x ṯemɣarin iy ɣa yiȓin s uƹeddis ḏeg wussan nni, ḏ ṯinni nneɣnit isuṭuḍen!
18 Ttareṯ i Arebbi ḥima war itiȓi manaya ḏi ȓmecta.
19 Ḏi ȓweqṯ nni aḏ tiȓi ij n tamara iy war iweqiƹen ƹemmarṣ zeg wami ixȓeq Arebbi ddunect aȓ ȓexxu, u ƹemmarṣ aḏ tewqeƹ ƹaweḏ.
20 Mȓi Siḏi Arebbi war isenqes ȓiyyam n tamara nni, aḏ tiȓi war inejjem uȓa ḏ ijjen. X ȓesbab n yinni ixḍar Arebbi, isenqes ȓiyyam nni.
21 Meȓa inna-awem can ḥadd: Xzarem! Aqa-ṯ ḏa Lmasiḥ! Niɣ, Aqa-ṯ ḏiha! War ṯ tamnem ca.
22 Aqa aṭṭas iy d ɣa iḍharen aḏ inin qa nec ḏ Lmasiḥ niɣ nec zi lʼanbiya, maca s ixarriqen. Aḏ ggen lmuƹjizaṯ ḏ ȓaƹjayeb ḥima aḏ xeḏƹen iwḏan. Maƹlik zemmren iȓi xeḏƹen uȓa ḏ yinni ixḍar Arebbi.
23 Ɣarwem kenniw! Aqa ƹeȓmeɣ-awem x marra manaya qbeȓ ma ḏ iwqeƹ.
24 Menbaƹd i tamara n ȓiyyam nni,
ṯfuct aḏ teḏweȓ ḏ ṯaǧest,
ṯaziri war ticc bu ṯfawṯ,
25 iṯran aḏ d wḍan zeg ujenna,
yinni ijehḏen ḏeg ujenna
aṯen isenhezz Arebbi.
26 Ȓxeddnnit iy ɣa ẓren Mmis n bnaḏem xmi d ɣa ihwa ḏeg useynu s lƹaḍama ḏ jjehḏ nnes imɣaren.
27 Aḏ d issekk Arebbi lmalaʼikaṯ nnes ɣar arbeƹa imucan n ṯmurṯ manis d itekk usemmiḍ: ccarq ḏ lɣarb ḏ ljanub ḏ ccamal. Aḏ d ismun yinni ixḍar zi ȓaḥedd n ddunect aȓ ȓaḥedd n ujenna.
28 Ȓemḏem ȓmaƹna zi ṯcejjarṯ n ṯazarṯ. Ɣir aḏ meɣren ȓefruƹ nnes aḏ tegg ṯifray, aḏ tessnem belli anebḏu iqarreb-d.
29 Amenni, uȓa ḏ kenniw, xmi ɣa ṯeẓrem marra manayenni iy ɣa iweqƹen, ṯessnem belli yuḏes-d, aqa-ṯ qibač i ṯewwarṯ.
30 Aqa tesȓam ȓḥaqq: War tmettin yiwḏan n ȓweqṯ-a aȓ ɣa iwqeƹ marra manaya.
31 Aḏ ikkes ujenna ḏ ṯmurṯ, maca awaȓ inu war itekkes ƹemmarṣ.
32 Maca nhar nni niɣ ṯsaƹat nni, war ṯen issin uȓa ḏ ijjen, lla lmalaʼikaṯ ḏeg ujenna, lla Mmis. Baba waḥḏes iy issnen.
33 Ḥḍaṯ ixef nwem, iȓim ƹlabal minzi war ṯessinem meȓmi d ɣa ṯas ȓweqṯ nni.
34 Amecnaw ij n uryaz ixes aḏ isafer, ijja ṯaddarṯ nnes, yuca-asen ssulṭa i ixeddamen nnes, kuȓ ijjen ḏ ȓxeḏmeṯ nnes. Iweṣṣa aƹessas n ṯewwarṯ aḏ iqqim aḏ iḥḍa.
35 Iȓim ƹlabal, war ṯessinem meȓmi d ɣa yas bab n ṯeddarṯ, ma ag uƹecci niɣ ɣar ȓwesṭ n ǧiȓeṯ niɣ xmi ɣa idden uyaziḍ niɣ ɣar ȓefjar,
36 ḥima war d itis ƹlaɣafla akenniw yaf ṯeṭṭṣem!
37 Min ḏawem qqareɣ, qqareɣ-ṯ i marra: Iȓim ƹlabal."