Ij n ṯemɣarṯ ṯḏehhen Siḏna Ƹisa s waman n lwarḏ
14
1 Iqqim-as yewmayen i Ȓƹiḏ Ameqqran n wuḏayen ḏ ȓƹiḏ umi qqaren Ȓƹiḏ n Ṯefḍirṯ. Arruyas n ȓefquha ḏ imseȓmaḏen n ccariƹa rezzun mammec aḏ ṭṭfen Ƹisa s ṯeḥraymect aṯ nɣen.
2 Nnan jarasen: "Itxeṣṣa war ṯ nteṭṭef ḏi Ȓƹiḏ ḥima war tewqiƹ ȓfawḍa ḏi ccaƹb."
3 Ƹisa aqa-ṯ ḏi ṯendint n Bayt Ƹanya ḏi ṯeddarṯ n Simƹan bu-jḏam. Wami iqqim ḏinni ittet, ṯqarreb-d ɣares ij n ṯemɣarṯ ɣares ṯazeyyat n waman n lwarḏ ṣfan, iɣȓan s waṭṭas. Ṯerzem-it, uca ṯferreɣ-as-t x uzeǧif nnes.
4 Ca zzaysen iqess-asen ȓḥaȓ nnan jarasen: "Mayemmi aḍeyyeƹ n waman-a n lwarḏ?
5 Iȓi menzen ktar zi ṯeȓt-miyya n ṯpeyyasin n nnuqarṯ, aḏ mmucent tmenyaṯ nni i ȓmusakin!" Uca mƹeyyaben akiḏes.
6 Inna-asen Ƹisa: "Ejjem-teṯ! Mayemmi t ṯesxeyyaqem? Aqa min ḏayi ṯegga iṣbaḥ.
7 Ȓmusakin aqa-ṯen akiḏwem ȓebda. Meȓmi ma ṯexsem, ṯzemmrem aḏaysen ṯeggem ȓxir. Maca nec war kiḏwem tɣimiɣ ca i ȓebda.
8 Ṯegga min xas. Ṯeḏhen ddat inu s waman n lwarḏ, ṯsewjeḏ-ayi i ṯenḍeȓṯ inu.
9 Aqa tesȓam ȓḥaqq: Mani ma yiweḍ lʼinjil ḏi ddunect amen tekmeȓ, aḏ ƹawḏen x min ṯegga ṯemɣarṯ-a ḥima aḏayes fekkaren yiwḏan."
10 Iruḥ Yahuḏa Isxaryuṭi, u netta zi ṯenƹac n arrusul, ɣar arruyas n ȓefquha ḥima aḏasen izzenz Ƹisa.
11 Sȓin manaya farḥen, weƹḏen-ṯ aḏas ucen ṯipeyyasin n nnuqarṯ. Irezzu lfurṣa mammec ṯ ɣa izzenz.
Amensi n Ȓƹiḏ Ameqqran n wuḏayen
12 Nhar amezwaru zi Ȓƹiḏ n Ṯefḍirṯ, nhar iy ḏi ɣarṣen izmaren, nnan-as imeḥḍaren nnes: "Mani ṯexseḏ a nraḥ aḏac nsewjeḏ amensi n Ȓƹiḏ?"
13 Issekk ṯnayen zeg imeḥḍaren nnes inna-asen: "Ruḥem ɣar ṯendint, akiwem imeȓqa ij n uryaz iysi aqnuc n waman, ḏfarem-ṯ.
14 Mani ma yuḏef, inim-as i bab n ṯeddarṯ nni, aqa inna-ac lmuƹallim: Mani iǧa uxxam inu iy ḏi ɣa ƹeyyḏeɣ ak imeḥḍaren inu?
15 Akenniw yawi ɣar ij n ṯɣurfat ḏ ṯameqqrant ṯessu, ṯewjeḏ. Ḏinni iy ḏaneɣ ɣa ṯeswejḏem."
16 Ruḥen imeḥḍaren nnes, uḏfen ɣar ṯendint, ufin nican amecnaw mammec ḏasen inna. Uca swejḏen amensi n Ȓƹiḏ.
17 Wami d tiweḍ ṯmeddiṯ, yusa-d Ƹisa akeḏ ṯenƹac n arrusul nnes.
18 Qqimen tetten, inna-asen Ƹisa: "Aqa tesȓam ȓḥaqq: Ijjen zzaywem ittet akiḏi aḏayi izzenz."
19 Xeyyqen imeḥḍaren, tseqsan-ṯ ij ij: "Yac war iǧi bu ḏ nec?"
20 Yarra xasen Ƹisa inna-asen: "Ijjen zi kenniw zi ṯenƹac iḏwem, wenni iy kiḏi issisnen ḏi ṭebṣi.
21 Mmis n bnaḏem aḏas iwqeƹ ƹlaḥsab mamc xas yura ḏi lkitab, maca ya ȓefḍiḥeṯ n wenni iy ṯ ɣa izzenzen! Mȓi war ixȓiq iȓi ḥsen-as."
22 Wami ƹaḏ tetten, iysi aɣrum ickar Arebbi, irza aɣrum nni ifreq-asen-ṯ, inna: "Ysim-ṯ, wa ig iǧan ḏ ddat inu."
23 Iysi ȓkas ickar Arebbi, yuca-asen-ṯ, swin zzayes marra iḏsen.
24 Inna-asen: "Ȓkas-a ḏ iḏammena n ȓƹaheḏ, iḏammen inu iy ɣa azzȓen ƹlaḥsab aṭṭas n yiwḏan.
25 Aqa tesȓam ȓḥaqq: Zi ssa aȓ ṯsawent war sesseɣ zeg waman-a uḍiȓ ḥetta aȓ nhar nni iy ṯen ɣa sweɣ zi jḏiḏ ḏi ȓmulk n Arebbi."
26 Ɣenjen izȓi n Ȓƹiḏ uca ffɣen ruḥen ɣar uḏrar n zzitun.
Siḏna Ƹisa issawaȓ x unkar n Buṭrus
27 Inna-asen Ƹisa i imeḥḍaren nnes: "Aḏayi ṯsemḥem marra iḏwem, minzi iqqar lkitab:
Aḏ uwṯeɣ wenni irassen,
iḥuȓiyen kuȓ ijjen mani ɣa irweȓ.b
28 Maca xmi d ɣa kkareɣ zi ȓmewṯ, aḏawem izwareɣ ɣar ṯmurṯ n Ljalil."
29 Inna-as Buṭrus: "Waxxa ḏayec ɣa semḥen marra, nec war ḏayec semḥeɣ ca."
30 Yarra xas Ƹisa inna-as: "Aqa tesȓiḏ ȓḥaqq: Ǧiȓeṯ-a qbeȓ iy ɣa idden uyaziḍ ṯnayen ṯwaȓaṯin, aḏayi ṯenkareḏ ṯȓaṯa n ṯwaȓaṯin."
31 Inna-as Buṭrus aṭṭas n ṯwaȓaṯin: "War c nekkireɣ waxxa iy ɣa ssneɣ akic mmṯeɣ." Ammu iy nnan marra imeḥḍaren.
Siḏna Ƹisa itẓaǧa ḏeg Uḏrar n zzitun
32 Yusa-d Ƹisa akeḏ imeḥḍaren nnes ɣar ij n umcan qqaren-as "Gatsimani," inna-asen: "Qqimem ḏa, nec aḏ raḥeɣ aḏ ẓẓaǧeɣ."
33 Yiwi akis Buṭrus ḏ Yaƹqub ḏ Yuḥanna, uca inexȓeƹ ixeyyeq.
34 Inna-asen: "Uȓ inu ƹȓayen aḏ idduqqez s uḥzan. Qqimem ḏa ṯfaqem."
35 Ibeƹƹeḏ xasen cwayt, irkeƹ, itettar i Arebbi inna: "Meȓa imken, senjem-ayi zi ȓweqṯ-a."
36 Ƹaweḏ inna: "A Baba, cek kuȓci ṯzemmreḏ-as, sbeƹƹeḏ xafi ȓkas-a n ȓaƹḏab. Maci mamc xseɣ nec, lla! Mamc ixes ȓxaḍar nnec cek."
37 Iḏweȓ ɣarsen yufi-ṯen ṭṭṣen, inna-as i Buṭrus: "Ma teṭṭṣeḏ, a Simƹan? War ṯzemmreḏ aḏ tfaqeḏ ij n ṯsaƹat?
38 Iȓim ƹlabal ṯeẓẓaǧem ḥima war tiḏfem ḏi ȓemḥayen. Uȓ n bnaḏem ixes aḏ igg min iǧan ḏ aṣebḥan, maca netta iḍƹef."
39 Ibaƹƹeḏ xasen ƹaweḏ, ittar i Arebbi amecnaw amezwaru.
40 Iḏwer-d ƹaweḏ ɣarsen, yufi-ṯen ṭṭṣen ȓaḥeqqac iɣȓeb xasen yiḍeṣ u war ufin minzi ṯ ɣa jawben.
41 Iḏwer-d ɣarsen wis ṯeȓt-marraṯ, inna-asen: "Ƹaḏ teṭṭṣem, ṯreyyḥem? Baraka! Ṯuweḍ-d ȓweqṯ iy ḏi ɣa itwasellem Mmis n bnaḏem ɣar ifassen n yinni iƹṣan.
42 Kkarem a nuyurem, wenni iy ḏayi ɣa izzenzen aqa yuḏes-d."
Uḏayen ḏ irumaniyen teṭṭfen Siḏna Ƹisa
43 Ƹisa yallah ƹaḏ issawaȓ, yuweḍ-d Yahuḏa, ijjen zi ṯenƹac nni n arrusul nnes. Yuwi-d akis ȓɣaci, iwḏan ysin ȓesyuf ḏ idebbuzen, ssekken-ṯen-d arruyas n ȓefquha ḏ imseȓmaḏen n ccariƹa ḏ imeqqranen n wuḏayen.
44 Tuɣa yuca-asen Yahuḏa iy ṯ ɣa izzenzen ij n lƹalama, inna-asen: Wenni xef ɣa seǧmeɣ ḏ wenni iy ṯrezzum. Ṭṭfem-ṯ, awim-ṯ iḥḍa.
45 Ȓxeddnnit iqarreb Yahuḏa ɣar Ƹisa inna-as: "A Siḏi." Uca iseǧem xas.
46 Sersen xas ifassen nsen, ṭṭfen-ṯ.
47 Ijjen zeg yinni ḏin iǧan ijbeḏ-d ssif, yuwṯa ismeɣ n arrayes n ȓefquha iqess-as amezzuɣ.
48 Inna-asen Ƹisa: "Ma tɣir-awem qa nec ḏ lmujrim wami teysim ȓesyuf ḏ idebbuzen ḥima aḏayi ṯeṭṭfem?
49 Tuɣa tiȓiɣ akiḏwem mkuȓ nhar ḏi ṯemzida ṯameqqrant, seȓmaḏeɣ, war ḏayi ṯeṭṭifem. Maca marra manaya iwqeƹ ḥima aḏ ikemmeȓ min yurin ḏi lkutub."
50 Uca semḥen ḏayes marra rewȓen.
51 Iḏfar-iṯ ij n uḥenjir, xas čammir waha. Uca ṭṭfen-ṯ,
52 maca irweȓ-asen bȓa čammir nnes ḏ aƹeryan.
Siḏna Ƹisa zzaṯ i lḥukkam n wuḏayen
53 Uwin Ƹisa ɣar arrayes n ȓefquha. Munen akis marra arruyas n ȓefquha, ḏ imeqqranen n wuḏayen, ḏ imseȓmaḏen n ccariƹa.
54 Iḏfar-iṯ Buṭrus zi ȓeggwaj, yuḏef ɣar ȓemraḥ n ṯeddarṯ n arrays n ȓefquha. Iqqim ak ixeddamen izɣar ɣar ṯmessi.
55 Arruyas n ȓefquha ḏ marra Jmaƹṯ n lḥukkam n wuḏayen rezzun chaḏeṯ ḍed i Ƹisa ḥima aṯ nɣen, maca war ufin ca.
56 Aṭṭas iy xas icehhḏen zzur, maca ɣarsen tanaquḍ ḏi chaḏeṯ nsen.
57 Kkaren ȓebƹaḏ cehḏen xas zzur nnan:
58 "Netsȓa-yas iqqar: Aḏ heḏmeɣ ṯamziḏa-ya ṯameqqrant iy bnan yiwḏan s ifassen. Ḏi ṯeȓt-yyam aḏ bniɣ ij n ṯemziḏa war t bnin yiwḏan s ifassen."
59 Maca ƹaweḏ ɣarsen tanaquḍ ḏi chaḏeṯ nsen.
60 Ikkar arrays n ȓefuqah ḏi ȓwesṭ n jmaƹṯ isseqsa Ƹisa inna-as: "Ma war tjiwibeḏ zi can ȓḥajeṯ? Min xac cehhḏen yiwḏan-a?"
61 Iqqim Ƹisa isqar, war inni walu. Isseqsa-ṯ ƹaweḏ arrayes n ȓefuqah, inna-as: "Ma cek ḏ Lmasiḥ Mmis n Arebbi?"
62 Inna-as Ƹisa: "Wah, ḏ nec. Aḏ teẓrem Mmis n bnaḏem iqqim x ufusi n Arebbi ig izemmren i kuȓci, aṯ ṯeẓrem ƹaweḏ ihwa-d ak useynu ujenna."
63 Arrays nni n ȓefquha iɣareṣ arruḍ nnes s uxiyyeq, inna-asen: "War neḥḏij bu ȓechuḏ!
64 Ma ṯesȓim-as? Iqqar awaȓ war iḥȓin x Siḏi Arebbi! Min ḏawem iḍharen?" Marra ḥekmen xas belli isḏaheǧ ȓmewṯ.
65 Uca bḏan ȓebƹaḍ zzaysen ssusufen xas. Ȓeḥḥfen-as x uɣembub nnes ccaṯen-ṯ, qqaren-as: Iwa ḥaqq, a nnabi! Uwin-ṯ-id iƹassasen uwṯin-ṯ s iseqqiȓen.
Buṭrus inekkar Siḏna Ƹisa
66 Buṭrus iqqim ḏi ȓemraḥ. Ṯusa-d ɣares ij n ṯxeddant n arrays n ȓefquha,
67 ṯeẓri-ṯ izɣar ɣar ṯmessi, ṯexzar ḏayes mliḥ ṯenna-as: "Ȓa ḏ cek tiȓiḏ akeḏ Ƹisa zi Nnaṣira."
68 Inkar Buṭrus inna-as: "War ḏam fhimeɣ ca, war ssineɣ ca minxef ṯessawaȓeḏ!" Ikkar Buṭrus iruḥ ṭṭarf n ṯewwarṯ n ȓemraḥ. [Ȓxeddnnit idden uyaziḍ].
69 Ṯeẓri-ṯ ṯxeddant nni, ṯenna-asen i yin iḥḍaren: "Aryaz-a zzaysen."
70 Inkar Buṭrus ƹaweḏ. Umbaƹd cwayt nnan yin iḥḍaren: "Nican, cek zzaysen. Cek zi Ljalil."