Tawin Siḏna Ƹisa ɣar lḥakem Bilaṭus
15
1 Wami iṣbaḥ ȓḥaȓ, munen arruyas n ȓefquha ḏ imeqqranen n wuḏayen ḏ imseȓmaḏen n ccariƹa, ḏ marra Jmaƹṯ n lḥukkam nsen, cedden Ƹisa uwin-ṯ aṯ sellmen i lḥakem arrumani umi qqaren Bilaṭus.
2 Isseqsa-ṯ Bilaṭus inna-as: "Cek, ma ḏ azeǧiḏ n wuḏayen?"
4 Inna-as Bilaṭus ƹaweḏ: "Ma war tjiwibeḏ ca? Xzar min xak tceṯcan!"
5 Itƹejjeb Bilaṭus wami war xasen d yarri ca Ƹisa.
6 Ḏi mkuȓ Ȓƹiḏ Ameqqran isemmeḥ Bilaṭus ij umeḥbus zeg wenni ixes ccaƹb.
7 Ij n umeḥbus qqaren-as Barabas, ggin-ṯ ḏi ȓeḥbes akeḏ can lmujrimin minzi nɣin can ijjen ḏi ȓfawḏa.
8 Igaƹƹeḏ ȓɣaci ɣar Bilaṭus, bḏan tarran zzayes aḏasen igg min itegg ḏi lƹada nnes.
9 Isseqsa-ṯen Bilaṭus inna-asen: "Ma ṯexsem aḏawem semḥeɣ i uzeǧiḏ n wuḏayen?"
10 Tuɣa issen Bilaṭus belli arruyas n ȓefquha sellmen-as Ƹisa ȓaḥeqqac ḥesḏen-ṯ.
11 Arruyas n ȓefquha qeȓben azeǧif i ȓɣaci ḥima aḏasen ismeḥ i Barabas.
12 Isseqsa-ṯen ƹaweḏ Bilaṭus inna-asen: "Min ṯexsem aḏ ggeɣ i wenni umi ṯeqqarem qa netta ḏ Azeǧiḏ n wuḏayen?"
13 Snekkaren ṯɣuyyiṯ ƹaweḏ qqaren: "Ṣelleb-iṯ!"
14 Inna-asen Bilaṭus: "Maɣar? Man ṯuƹuffna ig igga wanita?"
Maca rennin snekkaren ṯɣuyyiṯ s jjehḏ qqaren: "Ṣelleb-iṯ!"
15 Bilaṭus iseƹƹef ȓɣaci. Irxu-yasen-d i Barabas uca uwṯin Ƹisa s usɣun isellem-iṯ aṯ ṣellben.
16 Uwin-ṯ ȓƹaskar ɣar ḏaxeȓ, ɣar ȓemraḥ n ȓeqṣar n lḥakem, ȓaɣan-d x marra ȓƹaskar.
17 Ggin xas aseȓham ḏ azeggwaɣ,a muḏen ij n ttaj n isennanen, ggin-as-t x uzeǧif nnes.
18 Bḏan seǧamen xas qqaren-as, ssalam ay azeǧiḏ n wuḏayen.
19 Ccaṯen-ṯ ɣar uzeǧif nnes s yij n uɣanim, ssusufen xas, terkaƹen-as, tsejjaḏen-as.
Tawin Siḏna Ƹisa ḥima aṯ ṣellben
20 Wami kemmȓen zeg ubuṣar xas, kksen-as aseȓham nni azeggwaɣ, ggin-as arruḍ nnes uca sufɣen-ṯ aṯ ṣellben.
21 Ij n uryaz ikka-d zi ȓkampu iƹḏu ssenni. Ggin xas ȓƹaskar ṣṣalib s bezzez ḥima aṯ irbu. Aryaz nni zi Lqurina, qqaren-as Simƹan babas n Iskander ḏ Rufus.
22 Uwin Ƹisa ɣar ij n umcan qqaren-as "Gulguṭa" (Ȓmaƹna n yisem-a: amcan n Jumjuma).
23 Ucin-as aman uḍiȓ xellṭen akeḏ yij n dwa qqaren-as murr, maca yugi aṯen isew.
24 Ṣellben-ṯ, ferqen arruḍ nnes jarasen. Ggin lqurƹa ḥima kuȓ ijjen min ɣa iysi.
25 Tuɣa-t ḏ tesƹa n ṣbaḥ wami ṯ ṣellben.
26 Ɣar uzeǧif nnes ḏinni ij n ṯeȓwiḥet ṯura ḏayes minxef ṯ nɣin: Wa ḏ azeǧiḏ n wuḏayen.
27 Ṣellben akis ṯnayen iceffaren, ijjen x ufusi ijjen x uẓeȓmaḍ nnes.
28 [U ikemmeȓ min yurin ḏi lkitab: Ḥesben-ṯ zi lmujrimin.]
29 Iwḏan ssenni tekkan tukkaren-ṯ thezzan xas azeǧif, qqaren-as: "Ma ḏ cek ig iheddmen ṯamziḏa ṯameqqrant ṯbenniḏ-t ḏi ṯeȓt-iyyam!
30 Nejja ixef nnec, hwa-d zi ṣṣalib!"
31 Uȓa ḏ arruyas n ȓefquha ḏ imseȓmaḏen n ccariƹa tbuṣaren xas ƹaweḏ, qqaren i wayawya: "Isenjem inneɣnit, maca war izemmer aḏ isenjem ixef nnes!
32 Hwa-d, a Lmasiḥ, ay azeǧiḏ n Bani Israʼil ȓexxu zi ṣṣalib, ḥima a nexzar azzayek namen!" Ƹaweḏ zawaren-ṯ lmujrimin nni iy kis ṣellben.
Siḏna Ƹisa immuṯ
33 Ɣar uzyen nhar, ṯehwa-d ṯaǧest x ṯmurṯ amen ṯekmeȓ aȓ wami ḏ ṯȓaṯa uƹecci.
34 Ɣar ṯȓaṯa isɣuy Ƹisa s jjehḏ inna: "Iluy, Iluy, lma sbaqṯani?" Ȓmaƹna n wawaȓ-a: "Ya Arebbi, ya Arebbi, maɣar ḏayi ṯejjiḏ?"
35 Sȓin-as ȓebƹaḍ zeg yin iḥḍaren ḏinni nnan: "Aqa itȓaɣa i nnabi Ilyas."
36 Ȓxeddnnit iruḥ itazzeȓ ijjen zzaysen, iysi ij n spunxa, isuff-it s waman uḍiȓ ḏ isemmamen, iggi-t x yij n uɣanim, yuca-as aḏ isew. Inna: "Jjem-ṯ, a nẓer ma d yas nnabi Ilyas aṯ-id isehwa!"
37 Isɣuy Ƹisa ij n ṯɣuyyiṯ ṯejheḏ uca immuṯ.
38 Iqqarṣ arwaq n ṯemziḏa ṯameqqrant x ṯnayen, zeg ujenna aȓ ṯmurṯ.
39 Ij n uƹaskari ḏ ameqqran n arrumanus ibedd ḏin zzaṯes iẓra ȓmewṯ ig igga Ƹisa, inna: "Ḏi lḥaqiqa aṯarras-a ḏ Mmis n Arebbi."
40 Ḏin can n ṯemɣarin xezzarent-id zi ȓeggwaj, ḏaysent Maryam ṯamagdaliṯ, ḏ Salumi, ḏ Maryam yemmas n Yaƹqub amezyan ḏ Yusis.
41 Niṯenti tuɣa ḏfarent-ṯ, tsexxarent xas wami iǧa ḏi ṯmurṯ n Ljalil. Ḥḍarent ƹaweḏ akis aṭṭas n ṯemɣarin nneɣnit zi ṯinni kis itgaƹƹaḏen ɣar Lquds.
Neṭṭȓen Siḏna Ƹisa
42 Nhar nni sewjaḏen i nhar n ssebṯ n lƹibada. Wami d yiweḍ uƹecci,
43 yusa-d ij uryaz qqaren-as Yusef, zi dcar n Arimatya. Netta ḏ ij n uryaz muhim jar jmaƹṯ n lḥukkam n wuḏayen, ƹaweḏ itreḥḥab zi ȓmulk n Arebbi. Izƹem yuḏef ɣar Bilaṭus, ittar-as ddat n Ƹisa.
44 Iḏhec Bilaṭus wami isȓa Ƹisa immuṯ ḏeɣya. Iȓaɣa-d x uƹaskari nni ameqqran isseqsa-ṯ: Ma immuṯ ma ƹaḏ?
45 Wami issen Bilaṭus zeg uƹaskari nni belli immuṯ, isellem ddat n Ƹisa i Yusef.
46 Isɣa-d Yusef ȓecfen, isehwa-d ddat nnes,b ikeffen-it s ȓecfen. Isers-it ḏeg yij n unḍeȓ iɣzin ḏeg uzru am yifri. Yarra ij n uzru x uqemmum n unḍeȓ.
47 Maryam ṯamagdaliṯ ḏ Maryam yemmas n Yusis xezzarent mani inḍeȓ.