Siḏna Ƹisa ikkar-d zi ȓmewṯ
16
1 Wami iƹḏu nhar n ssebt, Maryam ṯamagdaliṯ ḏ Maryam yemmas n Yaƹqub ḏ Salumi sɣint lƹiṭar, uwint-ṯ-id aḏas ḏehnent.
2 Ḏi nhar amezwaru n ssimana, zic ak ubeyyen n ṯfuct, usint-id ɣar unḍeȓ nnes.
3 Ssawaȓent jarasent qqarent: "Wi ḏaneɣ ɣa ikksen azru x uqemmum n unḍeȓ?"
4 Wami xzarent, twaȓant azru itwakkes, waxxa ḏ ameqqran aṭṭas.
5 Uḏfent ɣar yifri n unḍeȓ nni, ẓrint ij uḥenjir x jjiha ṯafusist iqqim, igga arruḍ ḏ acemȓaȓ uca ḏehcent.
6 Inna-asent: "War ḏehhcent ca! Ṯrezzunt x Ƹisa Naṣiri itwaṣellben. Ikkar zi ȓmewṯ, war ḏa iǧi ca. Haqa amcan mani tuɣa ṯ sersen.
7 Ruḥent ȓexxu ɣar imeḥḍaren nnes ḏ Buṭrus inint-asen: Ƹisa aḏ iraḥ ȓexxu ɣar ṯmurṯ n Ljalil akenniw iraja ḏinni. Ḏinni iy ṯ ɣa ṯeẓrem amecnaw mammec ḏawem inna."
8 Uca ffɣent-id zeg unḍeȓ rewȓent-id ssenni, bḏant terjjijint ḏehhcent aṭṭas. War ƹawḏent manaya uȓa i ijjen minzi ggwḏent.
Siḏna Ƹisa itwarfeƹ ɣar ujenna
9 {Wami Ƹisa ikkar-d zi ȓmewṯ zic nhar amezwaru n ssimana, imeḍhar-d ḏ amezwaru i Maryam ṯamagdaliṯ iy zi isufeɣ sebƹa n jnun.
10 Ṯruḥ aḏ tsiweḍ ȓexbar i yinni tuɣa iǧan ak Ƹisa, ṯufi-ṯen ḥeznen trun.
11 Wami ḏasen ṯenna qa ẓriɣ-ṯ iddar, war t uminen ca.
12 Umbaƹd i manaya iḍhar-asen-d s yij n ṣṣifeṯ nneɣnit i ṯnayen zzaysen u niṯni gguren ɣar ȓkampu.
13 Wami d ḏewȓen, ƹawḏen ȓexbar i inneɣnit, war ṯen uminen ca.
14 Aȓ uneggar wami qqimen tetten ḥiṭac n arrusul nnes, iḍhar-asen-d iƹeyyeb-iṯen minzi lʼiman nsen ḏ uqlil ḏ wuȓ nsen iqseḥ. U ƹaweḏ war uminen yinni ṯ iẓrin wami d ikkar zi ȓmewṯ.
15 Inna-asen: "Ruḥem ɣar marra ddunect, ḥeddṯem s lʼinjil i marra iwḏan.
16 Wenni iy ɣa yamnen aḏ iṭehhar s waman aḏ injem. Wenni war itimnen ca aḏ itwaḥkem.
17 Ḏ ṯina ḏ lƹalamaṯ iy d ɣa iḍharen aked yinni itamnen: Aqa niṯni aḏ sufɣen jnun s lḥikma inu, aḏ ssiwȓen s yiȓesawen ḏ jḏiḏ,
18 aḏ ysin ifiɣeran s ifassen nsen. Meȓa swin min ineqqan, war ṯen iḍarri ca. Aḏ sersen ifassen nsen x imehȓac aḏ genfan."