Lmuƹjiza ṯamezwarut n Siḏiṯneɣ Ƹisa
2
1 Ḏi nhar wis ṯeȓtiyyam ḏinni ȓfarḥ ḏeg ubilaj n Qana ḏi ṯmurṯ n Ljalil. Ḏinni yemmas n Ƹisa.
2 Uȓa ḏ Ƹisa ḏ imeḥḍaren nnes twaƹarḍen ɣar ȓfarḥ nni.
3 Wami war ɣarsen qqimen waman n uḍiȓ, ṯenna-as yemmas i Ƹisa qa aman n uḍiȓ qḍan.
4 Inna-as Ƹisa: "A yemma, maci ḏ cɣeȓ inu. Nec ȓweqṯ inu ƹaḏ war d tusi ca."
5 Ṯenna-asen yemmas i ixeddamen: "Ggem min ḏawem iqqar."
6 Ḏinni ḏi ṯeddarṯ nni setta n iqnucen n waman ƹlaḥsab mammec nnumen teggen zzaysen iʼisraʼiliyen ȓuḍu. Iqnucen nni twaxeḏmen s uzru, kuȓ ijjen ikessi zi ṯmanin aȓ miyya u ƹicrin litru n waman.
7 Inna-asen Ƹisa i ixeddamen: "Ƹemmarem iqnucen-a s waman." Ƹemmaren-ṯen s waman aȓ uqemmum.
8 Inna-asen: "Aymem cwayt awim-ṯen i wenni itkellafen zi ȓfarḥ." Uca uwin-as ci ḥaja.
9 Ufin aman ƹadi nni ḏewȓen ḏ aman n uḍiȓ. Wenni itkellafen zi ȓfarḥ-a iqqas-iṯen walakin netta war issin ca manis d kkin waman-a n uḍiȓ. Ixeddamen nnes iy ḏas d yuymen aman-a, ḏ niṯni ig ssnen manis d ikka manaya. Ṯumma wenni ikellfen zi ȓfarḥ issiweȓ ak mulay,
10 inna-as: "Ƹadatan ḏeg umezwaru iwḏan ticcen-asen i inewjiwen aman n uḍiȓ iṣebḥanen. Xmi tiȓi swin zzaysen aṭṭas, ḏi ȓweqṯ nni iy ḏasen ticcen aman n uḍiȓ ƹadi. Cek lla, ṯxemmȓeḏ aman n uḍiȓ iṣebḥanen aȓ ȓexxu."
11 Ṯanita ḏ lmuƹjiza ṯamezwarut ig igga Ƹisa. Iggi-t ḏeg ubilaj n Qana ḏi ṯmurṯ n Ljalil. Iseḍhar-d lƹaḍama nnes, umnen zzayes imeḥḍaren nnes.
12 Menbaƹd i manaya ihwa ɣar ṯendint n Kafernaḥum, netta ḏ yemmas ḏ ayṯmas ḏ imeḥḍaren nnes, qqimen ḏinni ḏrust n wussan.
Siḏiṯneɣ Ƹisa itazzeȓ x yinni iteggen ttijara ḏi ṯemziḏa ṯameqqrant
13 Wami d yuweḍ Ȓƹiḏ Ameqqran n Ayṯ-Israʼil, Ƹisa yuȓi ɣar ṯendint n Lquds.
14 Yufa ḏi ṯemziḏa ṯameqqrant znuzan ḏayes ifunasen ḏ iḥuȓiyen ḏ iḏbiren, uȓa ḏ iṣarrafen qqimen ḏinni tṣerrafen tmenyaṯ.
15 Imuḏ iseɣwan, s iseɣwan nni yuzzeȓ xasen marra zi ṯemziḏa ṯameqqrant s iḥuȓiyen ḏ ifunasen. Iqȓeb-asen i iṣarrafen missaṯ nsen, izeǧeƹ-asen tmenyaṯ nni ḏi ṯmurṯ.
16 Inna-asen i yinni iznuzan iḏbiren: "Ysiṯ manaya ssanita. War tarraṯ ca ṯaddarṯ n Baba ḏ ssuq!"
17 Fekkaren imeḥḍaren nnes manaya yusa-d ḏi Lkitab: "Aḏ sebbȓeɣ ṯuḏarṯ inu x ȓemḥibbeṯ n ṯemziḏa nnec."
18 Kkaren iʼisraʼiliyen nnan-as: "Man lmuƹjiza iy ɣa ṯeggeḏ bac aɣarec yiȓi ȓḥaqq aḏ teggeḏ manaya?"
19 Inna-asen Ƹisa: "Heḏmeṯ ṯamziḏa-ya ṯameqqrant, nec atid siȓiɣ ḏi ṯeȓtiyyam!"
20 Nnan-as iʼisraʼiliyen: "Cek, atid ṯsiȓiḏ ḏi ṯeȓtiyyam? Ṯamziḏa-ya ṯameqqrant ṯebna ḏi setta u arbeƹin iseggwusa!"
21 Walakin ṯamziḏa ṯameqqrant minxef issawaȓ Ƹisa nettaṯ ḏ ddat nnes.
22 Wami d ikkar zi ȓmewṯ, fekkaren imeḥḍaren nnes min ḏasen inna, umnen zi Lkitab ḏ wawaȓ inna Ƹisa.