Siḏiṯneɣ Ƹisa iseȓmaḏ x ubriḏ n jḏiḏ
3
1 Tuɣa iǧa ij n uryaz qqaren-as Nikudim zi ȓḥizeb n ifarrisiyen. Netta ḏ ijjen zi lḥukkam n Ayṯ-Israʼil.
2 Yusa-d ɣar Ƹisa s ǧiȓeṯ inna-as: "A lmuƹallim, neccin nessen belli cek ḏ amseȓmaḏ iy d yusin zi Arebbi. War izemmar uȓa ḏ ijjen aḏ igg can lmuƹjizaṯ zi min teggeḏ cek illa meȓa kiḏes Arebbi."
3 Indeq-d Ƹisa inna-as: "Aqa tesȓiḏ ȓḥaqq: War izemmar uȓa ḏ ijjen aḏ iẓer ȓmulk n Arebbi illa meȓa ixȓeq-d zi jḏiḏ."
4 Inna-as Nikudim: "Mammec ɣa igg bnaḏem aḏ d ixȓeq zi jḏiḏ meȓa iwsar? Ma izemmar aḏ yaḏef ƹaweḏ ḏeg uƹeddis n yemmas aḏ d ixȓeq zi jḏiḏ?"
5 Inna-as Ƹisa: "Aqa tesȓiḏ ȓḥaqq: Meȓa can yijjen war d ixȓiq s waman ḏ Arruḥ n Arebbi, war izemmar aḏ yaḏef ḏi ȓmulk n Arebbi.
6 Min itwaxeȓqen zi ddat, nettaṯ ḏ ddat. Min itwaxeȓqen zi Arruḥ n Arebbi, netta ḏ arruḥ.
7 Meȓa nniɣ-ac itxeṣṣa-kenniw aḏ d txeȓqem zi jḏiḏ, war tƹejjib ca.
8 Arriḥ itṣuḍ mani ixes netta. Aḏ tesȓiḏ i ṣṣut nnes, walakin war ṯessineḏ ca manis d ikka uȓa ḏ mani ɣa iraḥ. Ammu iy ggin marra yinni itwaxeȓqen s Arruḥ n Arebbi."
9 Inna-as Nikudim: "Mammec manaya?"
10 Yarra xas Ƹisa inna-as: "Iwa ṯseȓmaḏeḏ cek Ayṯ-Israʼil war ṯfehhimeḏ ca manaya?
11 Aqa tesȓiḏ ȓḥaqq: Neccin nessawaȓ zi min nessen, ncehheḏ s min neẓra, walakin kenniw war ṯeqbiȓem ca chaḏeṯ nneɣ.
12 Meȓa ssiwȓeɣ ɣarwem x ṯmesȓayin n ṯmurṯ kenniw war timnem ca, mammec ɣa ṯamnem meȓa ssiwȓeɣ-awem x ṯmesȓayin n ujenna?
13 Uȓa ḏ ijjen ma yuȓi ɣar ujenna illa wenni d ihwan zeg ujenna, netta ḏ Mmis n bnaḏem.
14 Amecnaw mammec isbedd Musa fiɣer n neḥḥas x ṯeḥnact ḏi ȓexȓa,a ammu itxeṣṣa aḏ itwasbedd Mmis n bnaḏem ḏeg ujenna.
15 Marra wenni zzayes ɣa yamnen aɣares ṯiȓi ṯuḏarṯ i ȓebda."
16 Wami iḥibb Arebbi ddunect-a, ihḏa-yas Mmis awḥeḏani ḥima wenni zzayes ɣa yamnen war ifenni ca aɣares ṯiȓi ṯuḏarṯ n ȓebda.
17 Arebbi war d issekk ca Mmis ɣar ddunect ḥima aḏ iḥaseb iwḏan. Lla, issekk-iṯ-iḏ ḥima azzayes isenjem iwḏan.
18 Wenni zzayes itamnen ataf war itwaḥasab ca. Wenni war zzayes itimnen ca ataf itwaḥasab minzi netta war yumin ca zeg yisem n Mmis n Arebbi awḥeḏani.
19 Ḏ wa ḏ lḥukem iy xas ɣa yiȓin: Nnur yusa-d ɣar yiwḏan, yiwḏan xsen ṯaǧest ḥsen zi nnur minzi teggen ccerr.
20 Marra wenni iteggen min iǧan ḏ aƹeffan itƹiffa nnur, war ɣares d itis ca ɣar nnur ḥima war tnefḍiḥent ȓexḏayem nnes.
21 Wenni ixeddmen nican aḏ d yas ɣar nnur. Ammu aḏ d iban belli ȓexḏayem nnes itegg-iṯent i Arebbi.
Nnabi Yaḥya icehheḏ belli Siḏiṯneɣ Ƹisa imɣar x kuȓci
22 Menbaƹd i manaya Ƹisa ḏ imeḥḍaren nnes usin-d ɣar ṯmurṯ n Yahuḏiya iqqim akiḏsen ḏinni, itṭehhar iwḏan s waman.
23 Uȓa ḏ Yaḥya itṭehhar iwḏan s waman ḏi Ȓƹunṣar n Nun ḏi ṭṭarf n ṯendint n Salim minzi ḏinni aman aṭṭas. Tasen-d ḏinni yiwḏan ḥima aṯen iṭehhar.
24 (Iwqeƹ manaya qbeȓ ma aḏ ggen Yaḥya ḏi ȓeḥbes.)
25 Iwqeƹ lxilaf jar imeḥḍaren n Yaḥya ḏ ij n uʼisraʼili x mammec ɣa yiȓi ȓuḍu.
26 Usin-d ɣar Yaḥya nnan-as: "A lmuƹallim, wenni tuɣa akiḏec iǧan ajemmaḍ i yiɣzar n Lʼurdun u cek ṯcehḏeḏ xas, netta itṭehhar iwḏan s waman, gguren ɣares marra."
27 Inna-asen Yaḥya: "War izemmar bnaḏem aɣares ṯiȓi can ṯmesȓayṯ meȓa war ḏas d tusi ca zi Arebbi.
28 Kenniw s yixef nwem ṯcehḏem qa nniɣ-awem: Nec war ǧiɣ ca ḏ Lmasiḥ lla, twassekkeɣ-d qbeȓ i netta.
29 Wenni ɣar ṯeǧa ṯsȓiṯ, netta ḏ mulay. Awzir n mulayb iƹni wenni itbeddan zzaṯes itsȓa-yas, netta ifarreḥ aṭṭas i wawaȓ n mulay. Ammu uȓa ḏ nec farḥeɣ aṭṭas.
30 U labud netta aḏ imɣar, nec aḏ neqṣeɣ."
31 Wenni iy d itasen zeg ujenna, netta imɣar x kuȓci. Walakin wenni iy d itasen zi ṯmurṯ netta zi ṯmurṯ, issawaȓ amecnaw iwḏan n ṯmurṯ. Wenni iy d itasen zeg ujenna, netta imɣar x kuȓci.
32 Icehheḏ zi min iẓra ḏ min isȓa, walakin chaḏeṯ nnes war t iqebbeȓ uȓa ḏ ijjen.
33 Wenni iqebbȓen chaḏeṯ nnes, ataf itḥaqqeq belli Arebbi ḏ lḥaqiqa ig iǧa.
34 Wenni iy d issekk Arebbi issawaȓ s wawaȓ n Arebbi minzi iticc-as Arruḥ nnes bȓa ȓeqyas.
35 Babas iƹizz xas Mmis, igga-as kuȓci ḏeg ufus nnes.
36 Wenni itamnen zi Mmis ɣares ṯuḏarṯ n ȓebda. Wenni war itṭiƹin ca i Mmis, war ɣares tiȓi bu ṯuḏarṯ axas iɣḍeb Arebbi.