Aṭṭas n yiwḏan zi Samarya tamnen zi Siḏiṯneɣ Ƹisa
4
1 Issen Ƹisa belli ifarrisiyen arrin-d ȓexbar wami d mernin ɣares imeḥḍaren itṭehhar-iṯen s waman ktar zi Yaḥya.
2 Walakin Ƹisa s yixef nnes war itṭehhar ca i yiwḏan, ḏ imeḥḍaren nnes ig iggin manayenni.
3 Ssenni iffeɣ zi ṯmurṯ n Yahuḏiya, iruḥ ɣar ṯmurṯ n Ljalil.
4 Itxeṣṣa-yas i netta aḏ ikk x ṯmurṯ n Samarya.
5 Ikka x yij n ṯendint zi Samarya qqaren-as Suxar, zzaṯ i umarjeƹ nni ig yuca Yaƹqub i mmis Yusef.
6 Ḏinni anu n Yaƹqub. Wami Ƹisa yuḥeȓ s ubriḏ ag uzyen n nhar, iqqim ɣar wanu nni n Yaƹqub.
7-8 Ṯusa-d icten n ṯemɣarṯ zi Samarya aḏ tayem aman. Imeḥḍaren n Ƹisa niṯni tuɣa ruḥen ɣar ṯendint aḏ sɣen min ɣa ccen. Inna-as Ƹisa i ṯemɣarṯ nni: "Uc-ayi aḏ sweɣ."
9 Ṯenna-as ṯemɣarṯ nni: "Cek ḏ aʼisraʼili, nec ḏ ṯasamariṯ. Mammec ḏac ṯexȓeq cek ṯettareḏ-ayi aḏ tesweḏ?" (Iwa iʼisraʼiliyen qa war temṣurufen ca ak yiwḏan n Samarya.)
10 Inna-as Ƹisa: "Maƹlik cem ṯessneḏ lhadiya n Arebbi ṯessneḏ min ƹniɣ nec iy ḏam iqqaren uc-ayi aḏ sweɣ, ataf ṯettareḏ-ayi cem aman aḏam uceɣ aman n ṯuḏarṯ."
11 Ṯenna-as: "A Siḏi, war ɣarek ca minzi ɣa ṯaymeḏ. Anu-ya yuǧeɣ, manis d ɣa ṯawiḏ aman nni n ṯuḏarṯ?
12 Jeddiṯneɣ Yaƹqub yuca-aneɣ anu-ya, iswa zzayes netta s yixef nnes ḏ ṯarwa nnes ḏ ȓebhayem nnes. Ma tḥessbeḏ ixef nnec ktar zzayes?"
13 Indeq-d Ƹisa inna-as: "Marra wenni ɣa iswen zeg waman-a ataf aḏ iffaḏ ƹaweḏ.
14 Walakin wenni ɣa iswen aman iy ḏas ɣa uceɣ nec ataf war itfiḏi ca ƹemmarṣ. Aman iy ḏas ɣa uceɣ nec aḏ ḏewȓen ḏayes amecnaw ij n ȓƹunṣar azzayes ṯesfiy ṯuḏarṯ n ȓebda."
15 Ṯenna-as ṯemɣarṯ nni: "A Siḏi, uc-ayi aman nni ḥima war tfiḏiɣ ca, war d tiseɣ ca war taymeɣ ca aman ssanita."
16 Inna-as Ƹisa: "Ruḥ ȓaɣa-d i uryaz nnem, ḏweȓ-d ḏanita."
17 Ṯenna-as ṯemɣarṯ nni: "War ɣari bu aryaz."
Inna-as Ƹisa: "Wah, cem ṯessiwȓeḏ nican wami ṯenniḏ war ɣari bu aryaz,
18 minzi ṯuwiḏ xemsa n iryazen. Aryaz nni mikeḏ tƹiceḏ ȓexxu war iǧi bu ḏ aryaz nnem. Iwa ɣarem ṣṣaḥ ḏi min ṯenniḏ."
19 Ṯenna-as ṯemɣarṯ nni: "A Siḏi, twaȓiɣ cek ḏ nnabi.
20 Ȓejḏuḏ nneɣ ƹebbḏen Arebbi ḏeg uḏrar-a, kenniw iʼisraʼiliyen ṯeqqarem qa itxeṣṣa ḏi Lquds amcan mani ɣa nƹebbeḏ."
21 Inna-as Ƹisa: "Tiqqa-ayi a ṯamɣarṯ, aḏ d tas ijjen n ȓweqṯ ataf kenniw war ṯƹebbḏem ca Baba uȓa ḏeg uḏrar-a uȓa ḏi Lquds.
22 Kenniw ṯƹebbḏem wenni war ṯessinem, neccin nƹebbeḏ wenni iy nessen minzi asenjam ikka-d zeg iʼisraʼiliyen.
23 Walakin aḏ d tas ȓweqṯ aqa ȓexxu ṯusa-d, xmi yinni iƹebbḏen nican ataf aḏ ƹebbḏen Baba s lḥaqiqa ḏ arruḥ. Ḏ yina iy xef irezzu Baba.
24 Arebbi netta ḏ Arruḥ, yinni iy ṯ iƹebbḏen itxeṣṣa-yasen aṯ ƹebḏen s lḥaqiqa ḏ arruḥ."
25 Ṯenna-as ṯemɣarṯ nni: "Nec qa ssneɣ aḏ d yas Lmasiya, qqaren-as Lmasiḥ. Xmi d ɣa yas aḏaneɣ yini kuȓci."
26 Inna-as Ƹisa: "Qa ḏ nec iy kiḏem issawaȓen."
27 Wami d ƹeqben imeḥḍaren nnes, tƹejjben wami ṯ ufin issawaȓ akeḏ yij n ṯemɣarṯ. Walakin war ḏas yinni uȓa ḏ ijjen min ɣares ṯrezzuḏ ɣar ṯa? Niɣ, mayemmi iy kiḏes ṯessawaȓeḏ?
28 Ṯejja ṯemɣarṯ nni aqḏiḥa nnes ṯruḥ ɣar ṯendint, ṯenna-asen i yiwḏan:
29 "Araḥem-d aḏ teẓrem ij n uryaz inna-ayi marra min ggiɣ. Imken ḏ Lmasiḥ niɣ?"
30 Ffɣen yiwḏan nni zi ṯendint ruḥen ɣares.
31 Ḏi ȓweqṯ nni qqaren-as imeḥḍaren a lmuƹallim, ecc!
32 Walakin netta inna-asen: "Ɣari min tetteɣ, kenniw war ṯ ṯessinem ca."
33 Imeḥḍaren nnes sseqsan ayawya ma yuwi-as-d ḥadd min ɣa icc?
34 Inna-asen Ƹisa: "Ȓmakla inu aḏ xeḏmeɣ min ixes wenni ḏayi d issekken aḏ kemmȓeɣ ȓxeḏmeṯ nnes.
35 Ɣarwem ij n lmiṯal iqqar: Menbaƹd i arbeƹa n chur aḏ d tas ȓweqṯ n umjar. Nec aḏawem iniɣ: Rezmeṯ ṯiṭṭawin nwem xzareṯ imarjeƹiwen, ṯuweḍ-d ȓweqṯ n umjar.
36 Wenni imejjaren aḏ iysi texȓiseṯ nnes ijemmeƹ ṯafeǧaḥṯ i ṯuḏarṯ n ȓebda, ḥima aḏ munen ḏi ȓefraḥeṯ nsen yinni izarrƹen ḏ yinni imejjaren.
37 Iƹni ḏ ṣṣaḥ min iqqar lmiṯal: Ijjen izarreƹ, ijjen imejjar.
38 Nec ssekkeɣ-d kenniw aḏ temjarem mani war ṯzarƹem ca. Inneɣni zarƹen, kenniw ṯestenfaƹem zi ȓxeḏmeṯ nsen."
39 Aṭṭas n yiwḏan zi jjihet n Samarya umnen zi Ƹisa wami ṯecheḏ ṯemɣarṯ nni ṯenna-asen qa inna-ayi marra min ggiɣ.
40 Wami iy ɣares d usin yiwḏan zi Samarya ƹerḍen-ṯ akiḏsen iqqim. Ssenni iqqim akiḏsen yumayen ḏinni.
41 Wami sȓin awaȓ n Ƹisa mernin yiwḏan iy zzayes yumnen.
42 Nnan-as i ṯemɣarṯ nni neccin war ntimen ca ȓexxu ɣir ƹlaḥsab min ḏaneɣ ṯenniḏ cem, minzi issiweȓ akiḏneɣ s yixef nneɣ u neccin nessen belli ḏ ṣṣaḥ ḏ wa ig isenjamen ddunect.
Siḏiṯneɣ Ƹisa isgenfa mmis n yij umxazni
43 Menbaƹd i yumayen iffeɣ ssenni Ƹisa, iruḥ ɣar ṯmurṯ n Ljalil.
44 U netta s yixef nnes iqqar uȓa ḏ ijjen n nnabi ma meḥtarem ḏi ṯmurṯ nnes.
45 Wami yuweḍ ɣar Ljalil reḥḥben zzayes yiwḏan minzi niṯni ẓrin marra ṯimesȓayin ig igga ḏi Ȓƹiḏ ḏi Lquds. Uȓa ḏ niṯni tuɣa ḥḍaren ḏinni ḏi Ȓƹiḏ.
46 Yusa-d ƹaweḏ ɣar ubilaj n Qana ḏi ṯmurṯ n Ljalil mani tuɣa yarra aman ƹadi ḏ aman n uḍiȓ. U ḏi ṯendint n Kafernaḥum ḏinni ijjen zeg imxazniyen n uzeǧiḏ ihȓec mmis.
47 Amxazni nni wami d yarra ȓexbar Ƹisa yusa-d zi ṯmurṯ n Yahuḏiya ɣar ṯmurṯ n Ljalil, iruḥ ɣares inna-as ma kiḏi ṯehwiḏ ḥima aḏ tesgenfiḏ memmi? Qa ƹȓayen aḏ immeṯ.
48 Inna-as Ƹisa: "Kenniw, ma war timnem ca ḥetta aḏ teẓrem lmuƹjizaṯ ḏ lburhanaṯ?"
49 Inna-as umxazni: "A Siḏi, hwa-d akiḏi qbeȓ ma aḏ immeṯ uḥenjir inu."
50 Inna-as Ƹisa: "Ruḥ, aqa mmic iddar."
Aryaz nni yumen zeg wawaȓ nni iy ḏas inna Ƹisa uca iruḥ.
51 Ihewwa-d netta, mseȓqan akiḏes ixeddamen nnes nnan-as: "Aḥarmuc nnec iddar."
52 Isseqsa-ṯen inna-asen: "Man ṯsaƹat nni ig igenfa?"
Nnan-as: "Ɣar lwaḥḏa n yiḍennaṭ ag uƹecci ṯruḥ xas ṯmessi iy ḏayes."