21
1 Menbaƹd i manaya imeḍhar-d Ƹisa ƹaweḏ i imeḥḍaren nnes x cceṭṭ n ȓebḥar n Ṭabarya. Ammu iy iwqeƹ.
2 Munen ḏinni ȓebƹaḍ n imeḥḍaren nnes: Simƹan Buṭrus ḏ Ṭumma wenni umi qqaren <Acniw>,a ḏ Naṯnahil netta zeg ubilaj n Qana ḏi ṯmurṯ n Ljalil, ḏ ṯarwa n Zubaydi, ḏ ṯnayen nneɣni.
3 Ikkar Simƹan Buṭrus inna-asen nec aḏ raḥeɣ aḏ ymareɣ.
Nnan-as akic nraḥ uȓa ḏ neccin. Ffɣen, nyin ḏi ṯɣarrabut. Ḏi ǧiȓeṯ nni war ymaren walu.
4 Wami iṣbaḥ ȓḥaȓ, ufin Ƹisa ibedd x cceṭṭ n ȓebḥar walakin imeḥḍaren war ṯ ƹqiȓen ca.
5 Inna-asen: "Ay iḥenjiren, ma ṯeymarem can iseȓman?"
Nnan-as: "Lla, walu."
6 Inna-asen Ƹisa: "Seyybeṯ ṯracca x ufusi n ṯɣarrabut aḏ tafem iseȓman." Wami t seyyben war zemmaren atid jebḏen ȓaḥeqqac ṯƹemmar s iseȓman aṭṭas.
7 Ameḥḍar nni iƹizzen x Ƹisa aṭṭas inna-as i Buṭrus qa win ḏ Siḏiṯneɣ. Wami isȓa Simƹan Buṭrus qa win ḏ Ƹisa, ikkar ireḍ cammir nnes ȓaḥeqqac tuɣa ikkes-iṯ, ȓexddennit inḍew ḏi ȓebḥar bac aḏ iraḥ ɣar Ƹisa.
8 Walakin imeḥḍaren nni nneɣni iy kiḏes iǧan ḏfaren-ṯ-iḏ s ṯɣarrabut, jebbḏen-d ṯracca nni ṯeccur s iseȓman. War ggwijen ca x ȓbarr ɣir can miyyat mitru waha.
9 Wami d uwḍen ɣar ȓbarr, ufin ṯimessi n ȓefḥam xas iseȓman ḏ uɣrum.
10 Inna-asen Ƹisa: "Awim-d cwayt n iseȓman iy d ṯeymarem ȓexxu."
11 Inya Simƹan Buṭrus ijbeḏ-d ṯracca nni ɣar ȓbarr, ḏayes miyya u ṯȓaṯa u xemsin n iseȓman ḏ imeqqranen. Qaƹ manaya, war ṯeqqares ca ṯracca nni.
12 Inna-asen Ƹisa: "Araḥem-d aḏ teccem." War izƹim uȓa ḏ ijjen zeg imeḥḍaren aṯ isseqsa, min teƹniḏ cek? Ȓaḥeqqac ssnen qa ḏ Siḏiṯsen.
13 Iruḥ Ƹisa iysi-d aɣrum nni ḏ iseȓman nni ifreq-iṯen xasen.
14 Ṯanita ḏ wis ṯeȓt marraṯ iy ḏi itmeḍhar-d Ƹisa i imeḥḍaren nnes zeg wami iy d ikkar zi ȓmewṯ.
Siḏiṯneɣ Ƹisa isezƹam Simƹan Buṭrus
15 Wami reyyqen, inna-as Ƹisa i Simƹan Buṭrus: "A Simƹan a mmis n Yuḥanna, ma tḥibbiḏ-ayi ktar zi yina?"
Inna-as Simƹan Buṭrus: "Wah a Siḏi, cek ṯessneḏ qa nec texseɣ-c."
Inna-as Ƹisa: "Secc izmaren inu."
16 Inna-as Ƹisa wis marṯayen: "A Simƹan a mmis n Yuḥanna, ma tḥibbiḏ-ayi?"
Yenna-as Simƹan: "Wah a Siḏi, cek ṯessneḏ qa nec texseɣ-c."
Inna-as Ƹisa: "Rwes iḥuwȓiyen inu."
17 Inna-as Ƹisa wis ṯeȓt marraṯ: "A Simƹan a mmis n Yuḥanna, ma texseḏ-ayi?"
Iqqes-as ȓḥaȓ i Buṭrus ȓaḥeqqac inna-as-ṯ wis ṯeȓt marraṯ, cek ma texseḏ-ayi? Inna-as: "A Siḏi, cek ṯessneḏ kuȓci. Ṯessneḏ qa nec texseɣ-c."
Inna-as Ƹisa: "Secc iḥuȓiyen inu.
18 Aqa tesȓiḏ ȓḥaqq: Ḏi ṯemzi nnec tḥezzameḏ ixef nnec traḥeḏ mani ma ṯexseḏ. Walakin xmi ɣa ṯewsareḏ, aḏ tḍeȓqeḏ ifassen nnec ataf ḥadd nneɣni ac iḥezzem ac yawi mani war texseḏ ca."
19 Inna manayenni Ƹisa ḥima aḏ isbeyyen mamc ɣa immeṯ Buṭrus ḥima aḏ tmeḍhar lƹaḍama n Arebbi. Wami iy ḏas inna manayenni, inna-as: "Ḏfar-ayi-d."
20 Ineqȓeb Buṭrus yufa iḏeffar-iṯen-d umeḥḍar nni iƹizzen x Ƹisa aṭṭas, iƹni wenni tuɣa iqqimen ɣar uɣezḏis n Ƹisa ḏeg umensi nni inna-as: A Siḏi, min iƹna wenni c ɣa izzenzen?
21 Wami ṯ iẓra Buṭrus inna-as i Ƹisa: "A Siḏi, y win min ḏas ɣa iweqƹen?"
22 Inna-as Ƹisa i Buṭrus: "Nec meȓa xseɣ win aḏ iddar aȓ ɣa d ḏewȓeɣ, war ḏac iruḥ bu ȓḥaȓ. Cek ḏfar-ayi-d!"
23 Ssenni iffeɣ ȓexbar ɣar wawmaṯen qqaren: <Ameḥḍar-a war itmetti ca>. Walakin ḏ ṣṣaḥ Ƹisa war yinni ca belli ameḥḍar-a war itmetti ca. Min inna? Inna-t ammu: <Nec meȓa xseɣ win aḏ iddar aȓ ɣa d ḏewreɣ, war ḏac iruḥ bu ȓḥaȓ>.
24 Ameḥḍar-a, min iƹna? Ḏ netta ig icehhḏen x ṯmesȓayin-a ṯumma yuri-ṯent. Neccin nessen qa chaḏeṯ nnes n ṣṣaḥ.
25 Aṭṭas n ṯmesȓayin nneɣni iy igga Ƹisa. Maƹlik ṯura kuȓ icten zzaysent ict ict, ḥessbeɣ belli ataf ddunect marra war ṯzemmar aḏ teysi lkutub nni iy ɣa yarin.