Imeḥḍaren war tifen ca Siḏiṯneɣ Ƹisa ḏeg unḍeȓ
20
1 Ḏi nhar amezwaru n ssimana, ṯusa-d Maryam ṯamagdaliṯa ɣar yifri n unḍeȓ n Ƹisa zic. Tuɣa ƹaḏ ṯaǧest, ṯufa azru itwakkes x yifri n unḍeȓ.
2 Ṯuzzeȓ-d ṯusa-d ɣar Simƹan Buṭrus ḏ umeḥḍar nneɣni wenni iƹizzen x Ƹisa aṭṭas, ṯenna-asen qa ysin Ƹisa zeg yifri n unḍeȓ, war nessin mani ṯ ggin.
3-4 Iffeɣ Buṭrus ḏ umeḥḍar nni nneɣni ruḥen s ṯazzȓa s ṯnayen iḏsen ɣar yifri n unḍeȓ. Ameḥḍar nni izwar-as i Buṭrus yuweḍ ḏ amezwaru ɣa yifri n unḍeȓ.
5 Isijj x yifri itwaȓa ȓecfen itwasers ḏinni walakin war yuḏif ca.
6 Iḏeffar-iṯ-iḏ Simƹan Buṭrus ixḍeȓ, yuḏef ḏeg yifri n unḍeȓ. Itwaȓa ȓecfen nni
7 yufa ȓqabb iy zi tuɣa iɣeṭṭa uzeǧif n Ƹisa war iǧi ca ag ȓecfen, iḍfes waḥḏes.
8 Ȓexddennit yuḏef umeḥḍar nni izwaren ɣar yifri n unḍeȓ, iẓra manayenni yumen.
9 Walakin niṯni ƹaḏ war fhimen ca zi Lkitab belli labud aḏ ikkar Ƹisa zi ȓmewṯ.
10 Ssenni rewwḥen imeḥḍaren.
Siḏiṯneɣ Ƹisa iḍehhar-d i Maryam ṯamagdaliṯ
11 Maryam ṯbedd ɣar ṯewwarṯ n yifri n unḍeȓ ṯeqqim tetru. Wami ṯetru ṯsijj x yifri n unḍeȓ
12 ṯufa ṯnayen n lmalaʼikaṯ s warruḍ ḏ acemȓaȓ icten ṯeqqim ɣar uzeǧif icten ṯeqqim ɣar iḍaren mani tuɣa ṯeǧa ddat n Ƹisa.
13 Nnant-as: "A ṯamɣarṯ min cem yuɣin ṯetruḏ?"
Ṯenna-asent: "Ysin Siḏi, war ssineɣ mani ṯ sersen."
14 Ṯenna manayenni ṯexzar ɣar ḏeffar ṯufa ḏinni Ƹisa, walakin nettaṯ war ṯessin ca netta ḏ Ƹisa.
15 Inna-as Ƹisa i Maryam: "A ṯamɣarṯ min cem yuɣin ṯetruḏ, mixef ṯrezzuḏ?"
Maryam tɣir-as ḏ bab n jarda nni, ṯenna-as: "A Siḏi meȓa ḏ cek iy ṯ iysin, in-ayi mani ṯ ṯserseḏ ḥima aṯ ysiɣ."
16 Inna-as Ƹisa: "A Maryam!"
Ȓexdennit ṯeƹqeȓ-iṯ ṯenna-as s luɣa n iʼisraʼiliyen: "A Rabuni!" (Zaƹma <A Lmuƹallim>.)
17 Inna-as Ƹisa: "War ḏayi teṭṭef ca,b qa nec ƹaḏ war gaƹƹḏeɣ ca ɣar Baba. Ruḥ ɣar ayṯma inu, in-asen qa nec aḏ gaƹƹḏeɣ ɣar Baba ḏ Babaṯwem, ɣar Arebbi inu ḏ Arebbi nwem."
18 Ṯruḥ Maryam ṯamagdaliṯ ṯsiweḍ-asen ȓexbar i imeḥḍaren ṯenna-asen qa ẓriɣ Siḏiṯneɣ issiweȓ-d akiḏi aqa min ḏayi inna...
Siḏiṯneɣ Ƹisa iḍehhar-d ṯȓaṯa n ṯwaȓaṯin i imeḥḍaren nnes
19 Nhar n ȓḥad munen imeḥḍaren ɣar ṯmeddiṯ, ṯiwwura qqnent ggwḏen zeg iʼisraʼiliyen. Yusa-d Ƹisa ibedd ḏi ȓwesṭ inna-asen: "Sȓam xawem."
20 Inna-asen manaya, isbeyyen-asen-d ifassen nnes ḏ uɣezḏis nnes. Farḥen imeḥḍaren wami ẓrin Siḏiṯsen.
21 Inna-asen ƹaweḏ Ƹisa: "Sȓam xawem. Mammec ḏayi d issekk Baba, ammu nec akenniw ssekkeɣ."
22 Wami inna manaya iṣṣuḍ xasen, inna-asen: "Qebȓeṯ Arruḥ iqeddsen.
23 Wenni umi ṯsemḥem i dnub nnes, aḏas twasemḥent. Wenni umi war ṯesmiḥem ca, war ḏas twasmiḥent ca."
24 Walakin ijjen zi ṯenƹac n imeḥḍaren nnes umi qqaren Ṭumma tȓaɣan-as Acniw,c war kisen iǧi ca wami d yusa Ƹisa.
25 Nnan-as imeḥḍaren nni nneɣni qa neẓra Siḏiṯneɣ!
Ikkar Ṭumma inna-asen: "Meȓa war ẓriɣ ca lʼaṯar n imesmiȓen ḏeg ifassen nnes aḏ ggeɣ ḍaḍ inu ḏeg umcan n imesmiȓen nni, aḏ serseɣ fus inu x uɣezḏis nnes, war timneɣ ca."
26 Menbaƹd i ṯmeniyyam, munen imeḥḍaren ƹaweḏ ɣar ḏaxeȓ, ṯiwwura qqnent akiḏsen Ṭumma. Yusa-d Ƹisa ibedd ḏi ȓwesṭ nsen, inna-asen: "Sȓam xawem!"
27 Inna-as i Ṭumma: "Egg ḍaḍ nnec ḏanita, xzar ifassen inu. Sers fus nnec x uɣezḏis inu. War tcekka ca, lla, amen."
28 Indeq-d Ṭumma inna-as: "A Siḏi inu, ay Arebbi inu!"
29 Inna-as Ƹisa: "Aȓ wami ḏayi ṯeẓriḏ, ƹaḏ iy ṯumneḏ? Ssaƹḏ n yinni war ḏayi ẓrin ca, umnen."