Iʼisraʼiliyen rezzun aḏ ṣellben Siḏiṯneɣ Ƹisa
19
1 Yuwi Bilaṭus Ƹisa ḥima aṯ uwṯen ȓƹaskar s usɣun.
2 Muḏen-as ij n ttaj n isennanen ggin-as-ṯ x uzeǧif nnes. Ggin xas aseȓham ḏ azeggwaɣ.a
3 Tqerraben ɣares ccaṯen-ṯ s iseqqiȓen, qqaren-as ssalam ay azeǧiḏ n Ayṯ-Israʼil.
4 Iffeɣ-d ƹaweḏ Bilaṭus inna-asen: "Xzareṯ, aḏawem ṯiḏ sufɣeɣ ḥima aḏ tessnem belli nec war ḏayes ufiɣ bu can ȓḥajeṯ n ttuhmeṯ."
5 Ssenni iffeɣ Ƹisa ɣar barra s ttaj nni n isennanen ḏ useȓham nni azeggwaɣ. Inna-asen Bilaṭus: "Haqa bnaḏem nni."
6 Wami ṯ ẓrin arruyas n ȓfuqha ḏ iƹessasen, tƹeyyaḍen s jjehḏ qqaren-as: "Ṣelleb-iṯ! Ṣelleb-iṯ!"
Inna-asen Bilaṭus: "Ysim-ṯ kenniw ṣellbem-ṯ, nec war ḏayes ufiɣ bu can ȓḥajeṭ n ttuhmeṯ."
7 Arrin xas iʼisraʼiliyen nnan-as: "Ɣarneɣ ij n ȓqanun. Ƹlaḥsab ȓqanun nni itxeṣṣa aḏ immeṯ minzi netta itarra ixef nnes ḏ Mmis n Arebbi."
8 Wami isȓa Bilaṭus awaȓ-a iggweḏ ktar.
9 Yuḏef ƹaweḏ ɣar ȓeqṣar nnes inna-as i Ƹisa: "Manis cek?" Ƹisa war xas yarri ca.
10 Inna-as Bilaṭus: "Ma war kiḏi ṯessiwiȓeḏ ca? Ma war ṯessineḏ belli ɣari jjehḏ aḏac ḍeȓqeɣ niɣ ac ṣellbeɣ?"
11 Indeq-d Ƹisa inna-as: "War ɣarek bu jjehḏ xafi illa meȓa immuc-ac zi Arebbi. Ƹlaḥsab manaya, wenni iy ḏayi d yuwin ɣarec, ɣares dnub ktar zzayek."
12 Ssenni irezzu Bilaṭus aḏas iḍȓeq. Walakin iʼisraʼiliyen tƹeyyaḍen s jjehḏ qqaren: "Meȓa ṯḍeȓqeḏ i uryaz-a ataf war ṯeǧiḏ ca ḏ ameddukeȓ n Qayṣar.b Marra wenni itarran ixef nnes ḏ azeǧiḏ netta ḍed i Qayṣar."
13 Wami isȓa Bilaṭus awaȓ-a isufeɣ Ƹisa, iqqim Bilaṭus x ȓkursi n ȓeḥkam ḏeg umcan qqaren-as <Ssaḥa n Uzru>. S wawaȓ n iʼisraʼiliyen qqaren-as <Gabbaṭa>.
14 Nhar nni ḏ jjemƹa ɣar jwayeh n ṯenƹac, sewjaḏen i Ȓƹiḏ Ameqqran. Inna-asen Bilaṭus i iʼisraʼiliyen: "Haqawem azeǧiḏ nwem."
15 Walakin tƹeyyaḍen s jjehḏ qqaren: "Ysi-ṯ ysi-ṯ, ṣelleb-iṯ."
Inna-asen Bilaṭus: "Ma aḏ ṣellbeɣ azeǧiḏ nwem?"
Arrin xas arruyas n ȓfuqha nnan-as: "War ɣarneɣ bu uzeǧiḏ illa Qayṣar!"
16 Ssenni isellem-asen-ṯ ḥima aṯ ṣellben x ṣṣalib, ysin Ƹisa.
Irumaniyen tṣellaben Siḏiṯneɣ Ƹisa x ṣṣalib
17 Iffeɣ Ƹisa yarbu ṣṣalib s yixef nnes iruḥ ɣar yij n umcan qqaren-as <Amcan n Jumjuma>. S wawaȓ n iʼisraʼiliyen qqaren-as <Gulguṭa>.
18 Mani ṯ ṣellben, ṣellben akiḏes ṯnayen nneɣni, ssa ḏ ssa, Ƹisa ḏi ȓwesṭ.
19 Yura Bilaṭus ḏeg ij n ṯeȓwiḥet, iggi-t ɣar uzeǧif n Ƹisa x ṣṣalib ṯura ḏayes: <Ƹisa zi Nnaṣira, Azeǧiḏ n Ayṯ-Israʼil>.
20 Ṯaȓwiḥet nni ɣrin-t aṭṭas n iʼisraʼiliyen minzi amcan mani iy ṣellben Ƹisa yuḏes ṯandint. Ṯaȓwiḥet nni tuɣa ṯura s Lƹibriya ḏ Latiniya ḏ Ṯyunaniṯ.
21 Nnan-as arruyas n ȓfuqha n iʼisraʼiliyen i Bilaṭus: "War tari ca, <Azeǧiḏ n Ayṯ-Israʼil>. Ari: <Aryaz-a inna nec ḏ Azeǧiḏ n Ayṯ-Israʼil>."
22 Inna-asen Bilaṭus: "Nec min uriɣ, qa uriɣ-ṯ."
23 Wami ȓƹaskar ṣellben Ƹisa, ysin arruḍ nnes bḍan-ṯ x arbeƹa n ṯseqqar kuȓ aƹeskri iysi ṯasɣarṯ nnes. Ysin ƹaweḏ cammir, cammir nni iṣneƹ-iṯ uḏerraz.c
24 Nnan i wayawya, War ṯ netcarrig ca, axas negg lqurƹa bac a nessen wi ṯ ɣa iysin. Ammu ikemmeȓ wawaȓ n Lkitab:
"Bḍan arruḍ inu jarasen,
ggin lqurƹa x ȓeɣḍa inu."
U ḏ manaya iy ggin ȓƹaskar.
25 Zzaṯ i ṣṣalib n Ƹisa ṯbedd yemmas ḏ xačes ḏ Maryam ṯamɣarṯ n Krifas ḏ Maryam ṯamagdaliṯ.
26 Wami iẓra Ƹisa yemmas ibedd akiḏes umeḥḍar nni iy xas iƹizzen aṭṭas, inna-as: "A yemma, aqaṯ ḏin mmim!"
27 Inna-as ƹaweḏ i umeḥḍar nni: "Aqat ḏin yemmac!" Ssenni yuwi-t umeḥḍar nni ɣar ṯeddarṯ nnes.
Ȓmewṯ n Siḏiṯneɣ Ƹisa
28 Menbaƹd i manaya issen Ƹisa belli kuȓci ikemmeȓ, inna: "Aqayi ffuḏeɣ." S wawaȓ nni iffeɣ min d yusin ḏi Lkitab.d
29 Ḏinni ij uɣerraf iccur s waman uḍiȓ ḏ isemmamen. Sɣeḍṣen spunxa ḏeg waman uḍiȓ nni, ggin-t x ukeccuḍ ucin-as-t ɣar uqemmum nnes.
30 Wami iqqas Ƹisa aman nni, inna: "Itwakemmeȓ!" Isaḏar azeǧif nnes, isellem buḥbeȓ nnes.
31 Iwqeƹ manayenni iḍennaṭ n Ȓƹiḏ Ameqqran. X manaya iʼisraʼiliyen ttaren-as i Bilaṭus aḏasen rzen iḍaren i yinni itwaṣellben aḏ d sehwan ddat nsen zi ṣṣalib. Ggin-asen amenni ḥima war tɣimi ddat nsen x ṣṣalib ḏi nhar n ssebṯ n lƹibada minzi nhar n ssebṯ nni ḏ ameqqran aṭṭas.
32 Usin-d ȓƹaskar rzin iḍaren i umezwaru ḏ wis ṯnayen iy kiḏes itwaṣellben.
33 Wami ruḥen ɣar Ƹisa, war ḏas rzin bu iḍaren minzi ufin-ṯ immuṯ.
34 Walakin ijjen zi ȓƹaskar nni icukk-iṯ ɣar uɣezḏis nnes s yij n ukeccuḍ ḏayes ṯicceṭ n wuzzeȓ, uzzȓen-d zzayes ḏeɣya iḏammen ḏ waman aṭṭas.
35 Wenni iẓrin manayenni icheḏ xas, u min icheḏ nican iy iǧa. Issen belli min iqqar ḏ lḥaqiqa u icehheḏ bac azzayes ṯamnem uȓa ḏ kenniw.
36 Iwqeƹ manaya ḥima aḏ ikemmeȓ min d yusin ḏi Lkitab: <War zzayes itrezzi uȓa ḏ ij n yiɣes>.
37 Ṯusa-d ḏeg yijjen n lʼaya nneɣni: <Aḏ xzaren ɣar wenni itwacukken>.
Yusef ḏ Nikudim neṭṭȓen Siḏiṯneɣ Ƹisa
38 Menbaƹd i manaya, ijjen qqaren-as Yusef zi ṯendint n Arimatya iruḥ ittar-as i Bilaṭus aḏ iysi ddat n Ƹisa. Netta Yusef ḏ ameḥḍar n Ƹisa walakin war d isbeyyen ca ixef nnes iggweḏ zeg iʼisraʼiliyen. Wami iqbeȓ Bilaṭus, iruḥ Yusef iysi ddat n Ƹisa.
39 Yusa-d uȓa ḏ Nikudim, aryaz nni tuɣa ig iggin zziyara ijjen n ṯwaȓa s ǧiȓeṯ ɣar Ƹisa. Ȓexxu yuwi-d akiḏes ca n texliṭa ḏayes arbeƹa u ṯȓaṯin kilu n murre ḏ ukeccuḍ n lƹudf teggen-t iʼisraʼiliyen i yinni immuṯen.
40 Ssenni ysin ddat n Ƹisa keffnen-t s ȓecfen ḏ lƹiṭar nni, mammec teggen iʼisraʼiliyen i yinni immuṯen.
41 Ḏeg umcan nni mani ṣellben Ƹisa ḏinni ij n jarda. Ḏi jarda nni ḏayes ij n unḍeȓ ḏ jḏiḏ am yifri, war ḏayes inḍiȓ ḥadd.
42 Nhar nni ḏ jjemƹa, iʼisraʼiliyen sewjaḏen i nhar n ssebṯ n lƹibada. X manayenni neḍȓen Ƹisa ḏeg yifri nni n unḍeȓ minzi yuḏes.