Iʼisraʼiliyen ḏ irumaniyen teṭṭfen Siḏiṯneɣ Ƹisa
18
1 Menbaƹd i ṯẓaǧiṯ nni, iffeɣ Ƹisa ak imeḥḍaren nnes zwan iɣzar n Qidrun. Ḏinni ij n jarda, uḏfen ḏayes netta ḏ imeḥḍaren nnes.
2 Tuɣa Yahuḏa wenni iy ṯ ɣa izzenzen issen amcan nni minzi Ƹisa tuɣa itmeȓqa ḏinni aṭṭas akeḏ imeḥḍaren nnes.
3 Ṣafi, yusa-d Yahuḏa ɣar jarda nni yuwi-d akiḏes ȓƹaskar, twassekken-d akiḏes ƹaweḏ can n iƹessasen zeg ifarrisiyen u zi arruyas n ȓfuqha. Usin-d s ȓefnaraṯ ḏ iṣfeḍawen ḏ ȓesnaḥ.
4 Issen Ƹisa marra min ḏas ɣa iweqƹen, iffeɣ-d ɣarsen inna-asen: "Minxef ṯrezzum?"
5 Nnan-as: "X Ƹisa zi Nnaṣira."
Inna-asen: "Aqa ḏ nec."
Ibedd akiḏsen Yahuḏa wenni iy ṯ izzenzen.
6 Wami ḏasen inna qa ḏ nec, ḏewȓen ɣar ḏeffar wḍan ɣar ṯmurṯ.
7 Inna-asen ƹaweḏ: "Minxef ṯrezzum?"
Nnan-as: "X Ƹisa zi Nnaṣira."
8 Inna-asen Ƹisa: "Qa nniɣ-awem-ṯ ḏ nec. Meȓa ṯrezzum xafi jjem yina aḏ uyuren."
9 S wawaȓ-a ikemmeȓ min inna Ƹisa zi qbeȓ iƹni <War ḏayi iweddar ḥadd zeg yinni iy ḏayi ṯuciḏ>.
10 Simƹan Buṭrus tuɣa ɣares ssif, ijbeḏ-iṯ-iḏ yuwṯa zzayes ismeɣ n arrayes n ȓfuqha iqess-as amezzuɣ afusi. Ismeɣ nni qqaren-as Maȓxus.
11 Inna-as Ƹisa i Buṭrus: "Arr ssif nnec ɣar umcan nnes. Ȓkas-a n ȓaƹḏab iy ḏayi yuca Baba, ma war sesseɣ ca zzayes?"
12 Ȓƹaskar ḏ arrayes nsen ḏ iƹessasen n iʼisraʼiliyen ṭṭfen Ƹisa carfen-ṯ.
13 Ḏ amezwaru nedhen-ṯ ɣar yijjen qqaren-as Ḥannin minzi netta ḏ babas n ṯemɣarṯ n Qiyafa. Qiyafa tuɣaṯ ḏ arrayes n ȓfuqha ḏeg useggwas nni.
14 Netta tuɣa inṣeḥ iʼisraʼiliyen inna-asen qa ḥsen aḏ immeṯ ij n uryaz x ccaƹb.
Simƹan Buṭrus inekkar Siḏiṯneɣ Ƹisa
15 Simƹan Buṭrus ḏ ij n umeḥḍar nneḍni ḏfaren Ƹisa. Ameḥḍar nni maƹruf ɣar arrayes n ȓfuqha, yuḏef ak Ƹisa ɣar ȓemraḥ n ṯeddarṯ n arrayes nni.
16 Buṭrus ibedd itraja barra ɣar ṯewwarṯ. Iffeɣ-d umeḥḍar nni ig iǧan maƹruf ɣar arrayes n ȓfuqha, issiweȓ ak ṯƹessast nni itiȓin ḏi ṯewwarṯ issiḏef-d Buṭrus.
17 Ṯaƹessast nni iḥeṭṭan ḏi ṯewwarṯ ṯenna-as i Buṭrus: "Ma war ṯeǧiḏ cek zeg imeḥḍaren n bnaḏem-a?"
Inna-as: "Nec, lla!"
18 Ixeddamen ḏ iƹessasen bedden ḏinni, ggin ṯimessi s ȓefḥam zɣaren ɣares minzi ṯesmeḍ. Ibedd uȓa ḏ Buṭrus akiḏsen ḥima aḏ izɣar.
19 Ibḏa arrayes n ȓfuqha itseqsa Ƹisa x imeḥḍaren nnes ḏ min iseȓmaḏ.
20 Inna-as Ƹisa: "Tbeccareɣ zzaṯ i yiwḏan, seȓmaḏeɣ-ṯen ȓebda ḏi ṯemziḏawin uȓa ḏi ṯemziḏa ṯameqqrant mani tmunen iʼisraʼiliyen marra. War ssiwiȓeɣ walu s ṯnufra.
21 Nec, mayemmi ḏayi tesseqsiḏ? Sseqsa yinni ḏayi isȓin min ḏasen nniɣ. Niṯni ssnen min nniɣ."
22 Inna-as Ƹisa manaya ȓexddennit ijjen zeg iƹessasen ibedden ḏinni yuca-as ij n useqqiȓ i Ƹisa inna-as: "Ma s wawaȓ-a iy zi ɣa ṯarreḏ x arrayes n ȓfuqha?"
23 Inna-as Ƹisa: "Meȓa xḍiɣ ḏeg wawaȓ, in-ayi minḏi xḍiɣ. Meȓa ssiwȓeɣ nican, mayemmi ḏayi ṯuwṯiḏ?"
24 Ssenni issekk-iṯ Ḥannin ḏ ameḥbus ɣar Qiyafa arrayes n ȓfuqha.
25 Buṭrus ibedd ḏinni izɣar ɣar ṯmessi. Nnan-as: "Ma war ṯeǧiḏ uȓa ḏ cek zeg imeḥḍaren nnes?"
Netta inkar inna-asen: "Nec, lla!"
26 Ȓexddennit ijjen zeg ixeddamen n arrayes n ȓfuqha, netta iteƹna-d i wenni umi iqess Buṭrus amejjun, iruḥ inna-as i Buṭrus: "Ma war ṯeǧiḏ ḏ cek iy ẓriɣ akiḏes ḏi jarda nni?"
27 Buṭrus inkar ƹaweḏ u ḏinni idden uyaziḍ.
Iʼisraʼiliyen thamen Siḏiṯneɣ Ƹisa ɣar irumaniyen
28 Uwin Ƹisa zi ṯeddarṯ n Qiyafa ɣar ȓeqṣar n lḥakem, tuɣa zic. Iʼisraʼiliyen war uḏifen ca ɣar ȓeqṣar ḥima war sḥerrimen ca ȓƹiḏ x yixef nsen.a
29 Iffeɣ-d ɣarsen lḥakem ḏ arumani qqaren-as Bilaṭus, inna-asen: "Man ttuhmeṯ iy ɣarwem x bnaḏem-a?"
30 Nnan-as: "Maƹlik war iǧi ḏ lmujrim, ataf war ḏac ṯiḏ ntiwi ca ḏa."
31 Inna-asen Bilaṭus: "Iwa awim-ṯ kenniw, axas tḥekmem s Ccariƹa nwem."
Nnan-as iʼisraʼiliyen: "War ḏaneɣ ṯsemḥem ca kenniw a nneɣ uȓa ḏ ijjen."
32 Iwqeƹ manaya ḥima aḏ ikemmeȓ wawaȓ iy inna Ƹisa x ȓmewṯ iy ɣa immeṯ.
33 Ssenni yuḏef-d ƹaweḏ Bilaṭus ɣar ȓeqṣar, iȓaɣa x Ƹisa inna-as: "Ma cek ḏ azeǧiḏ n Ayṯ-Israʼil?"
34 Inna-as Ƹisa: "Manaya, ma ṯeqqareḏ-t zi ɣarek niɣ nnan-ac-ṯ xafi inneɣni?"
35 Inna-as Bilaṭus: "Ma nec ḏ aʼisraʼili? Lʼumma nnec ḏ arruyas n ȓfuqha iy c d yuwin ɣari, min ṯeggiḏ?"
36 Inna-as Ƹisa: "Ȓmulk inu maci zi ddunect-a. Maƹlik ȓmulk inu zi ddunect-a, ataf imeḥḍaren inu ḥarben ḥima war weṭṭiɣ ca ḏeg ifassen n iʼisraʼiliyen. Lla, ȓmulk inu war iǧi ca ssanita."
37 Inna-as Bilaṭus: "Zaƹma, cek ḏ azeǧiḏ?"
Inna-as Ƹisa: "Ṯenniḏ cek nec ḏ azeǧiḏ. Nec xeȓqeɣ-d usiɣ-d ɣar ddunect ḥima aḏ cehḏeɣ i lḥaqiqa. Marra wenni iǧan zi lḥaqiqa aḏ iḏfar awaȓ inu."
38 Inna-as Bilaṭus: "Iwa min ṯeƹna lḥaqiqa-ya?" Wami inna ammu, iffeɣ ƹaweḏ ɣar iʼisraʼiliyen inna-asen: "War ḏayes ufiɣ bu ttuhmeṯ.
39 Walakin ṯnumem ḍeǧqeɣ-awem-d i yij n umeḥbus ḏi Ȓƹiḏ Ameqqran. Ȓexxu, ma ṯexsem aḏawem d ḍeȓqeɣ i uzeǧiḏ n Ayṯ-Israʼil?"
40 Ƹeyyḍen s jjehḏ nnan: "War d ḍeǧeq ca i wanita, ḍȓeq-d i Barabas!" Tuɣa Barabas ḏ aqeṭṭaƹ ibriḏen.