Arruḥ iqeddsen ihewwa-d x ȓmuminin
2
1 Wami d yuweḍ Ȓƹiḏ n nhar wis xemsin,a munen marra ȓmuminin ḏeg yij n umcan.
2 Ƹlaɣafla ihwa-d zeg ujenna ȓḥess amecnaw arriḥ ijheḏ itṣuḍ, yuḏef ḏi mkuȓ jjihet n ṯeddarṯ mani qqimen.
3 Ẓrin iṣfeḍawen n ṯmessi amecnaw iȓesawen kuȓ ijjen waḥḏes, mersen x kuȓ ijjen zzaysen.
4 Ccuren marra iḏsen s Arruḥ iqeddsen, bḏan ssawaȓen s luɣaṯ war iǧin bu nsen amecnaw mammec ḏasen yuca Arruḥ aḏ ssiwȓen.
5 Ḏinni can iryazen zi Ayṯ-Israʼil iy teggwḏen Arebbi tzuren ḏi Lquds, niṯni zi marra ṯimura n ddunect.
6 Wami iwqeƹ ȓḥess nni tƹejjben iryazen nni, mkuȓ ijjen itsȓa i luɣa nnes.
7 Ḏehhcen, tƹejjben nnan: "Iwḏan-a iy ssawaȓen, ma war ǧin ca marra iḏsen zi ṯmurṯ n Ljalil?
8 Mammec mkuȓ ijjen zzayneɣ itsȓa i luɣa n ṯmurṯ nnes?
9 Iƹni ṯamurṯ n Barṯya ḏ Madya ḏ Ƹilam, ḏ imezḏaɣ n Misubuṭamya b ḏ Yahuḏiya ḏ Kabdukya, ḏ Bunṭus ḏ Asya,
10 ḏ Farijya ḏ Pamfilya, ḏ Miṣra ḏ jwayeh n Lqurina ḏi Libya, ḏ yinni itzuren zi ṯendint n Ruma.
11 Ḏ Ayṯ-Israʼil ḏ yinni ig iseȓmen ḏi ddin n Ayṯ-Israʼil, ḏ Ayṯ-Krit ḏ waƹraben. Neccin marra netsȓa-yasen ssawaȓen s luɣaṯ nneɣ x ṯmesȓayin ṯimeqqranin n Arebbi."
12 Ḏehcen marra ccekken, ssiwȓen jarasen nnan: "Min ixes aḏ yini manaya?"
13 Ȓebƹaḍ ḍeḥcen xasen nnan: "Aqa swin aṭṭas n waman uḍiȓ."
Lxuṭba ṯamezwarut n arrasul Buṭrus
14 Buṭrus aqaṯ ak ḥiṭac nni n arrusul, ikkar issiweȓ s jjehḏ inna-asen: "Ay iryazen n Ayṯ-Israʼil ḏ marra imezḏaɣ n Lquds, itxeṣṣa aḏ tessnem aḏ tṣennṭem i wawaȓen inu.
15 Iwḏan-a war swin war ɣellan s creb amecnaw mammec ṯḥesbem. Ṯsaƹat ƹaḏ ḏ tesƹa n ṣbaḥ!
16 Innama issiweȓ nnabi Waʼil x manaya ḏeg yij n zman inna:
17 Arebbi inna: Ḏeg wussan ineggura
aḏ sfeyyḍeɣ Arruḥ inu x marra iwḏan.
Ṯarwa nwem ḏ yissiṯwem aḏ ssiwȓen s min ƹeǧmen zi Arebbi.
Iḥenjiren nwem aḏ ẓren lwaḥi,
iwessura nwem aḏ arjan ṯirja.
18 Ḏeg wussan nni aḏ sfeyyḍeɣ Arruḥ inu
x lƹibad inu iryazen ḏ ṯemɣarin,
aḏ ssiwȓen s min ƹeǧmen zi Arebbi.
19 Aḏ ggeɣ ȓaƹjayeb ḏeg ujenna ḏ lƹalamaṯ ḏi ṯmurṯ,
aḏ weqƹen iḏammen ḏ ṯmessi ḏ waṭṭas n ddexxan.
20 Ṯfuct aḏ teḏweȓ ḏ ṯaǧest, ṯaziri aḏ teḏweȓ ḏ iḏammen
qbeȓ iy d ɣa yas nhar nni ameqqran ig iǧan ƹaḍim n Siḏi Arebbi.
21 Uca marra wenni ɣa iȓaɣan s yisem n Siḏi Arebbi aḏ injem.
22 Ay iryazen n Ayṯ-Israʼil, ṣennṭeṯ i min ḏawem ɣa iniɣ. Ƹisa zi Nnaṣira ḏ ij n uryaz itwaḍhar-d zi Arebbi i kenniw s lmuƹjizaṯ ḏ lburhanaṯ ḏ lƹalamaṯ ig igga Arebbi x ufus n Ƹisa jarawem amecnaw mammec ṯessnem kenniw.
23 Netta, wami itwasellem ƹlaḥsab mammec ixes Arebbi ḏ mammec tuɣa issen, tṣellbem-ṯ ṯenɣim-ṯ s ifassen n lkuffar.
24 Walakin Arebbi netta isekkar-iṯ-iḏ iḍȓeq-as zi ȓeḥriq n ȓmewṯ, aqa ȓmewṯ war ḏas ṯzemmar.
25 Liʼanna issiweȓ xas nnabi Dawud ḏeg yij n zman inna:
Twaȓiɣ Siḏi Arebbi zzaṯi i ȓebda,
aqaṯ x ufusi inu bac war tenxeȓxuȓeɣ.
26 X manaya ifareḥ wuȓ inu, izhu yiȓes inu.
Ddat inu aḏ tƹic ḏi lʼamal.
27 War ḏayes ṯsemmḥeḏ ca ḏi ȓaƹmar inu ḏi Lʼaxira,
war tejjiḏ ca axeddam nnec iṣfan aḏ ikiccew.
28 Ṯseḍhareḏ-ayi ibriḏen n ṯuḏarṯ,
aḏayi ṯesfarḥeḏ s waṭṭas xmi ɣa ẓreɣ aɣembub nnec.
29 Ay ayṯma, aḏawem iniɣ ṣarraḥa: Dawud netta zi ssalaf ṣaliḥin, immuṯ inḍeȓ. Anḍeȓ nnes aqaṯ akiḏneɣ aȓ nhara.
30 Azeǧiḏ Dawud tuɣa ḏ nnabi iƹni issen belli iƹaheḏ-iṯ Arebbi inna-as qa aḏ sɣimeɣ ijjen zi ddurriṯ nnec x lƹarc nnec.
31 Dawud iẓra min ɣa iweqƹen, issiweȓ x lqiyama n Lmasiḥ belli war ḏayes isemmeḥ ca ḏi Lʼaxira, war ṯexsar ca ddat nnes.
32 Ƹisa-ya wanita isekkar-iṯ-iḏ Arebbi zi ȓmewṯ, aqa necheḏ marra iḏneɣ x manaya.
33 Wami itwarfeƹ ɣar ufusi n Arebbi,c iysi zi Babas Arruḥ iqeddsen iy zi ṯ iƹaheḏ, isfeyyeḍ-d Ƹisa manaya iy twaȓam ȓexxu ḏ manaya iy ṯesȓam.
34 Qa Dawud war igaƹƹeḏ ca ɣar ujenna, netta s yixef nnes ig innan:
Siḏi Arebbi inna-as i Siḏi: Qqim-d x ufusi inu,
35 aȓ ɣa ggeɣ ȓƹaḏyan nnec swadday iḍaren nnec.
36 Iwa, itxeṣṣa aḏ tessnem marra Ayṯ-Israʼil mebȓa ccekk, aqa Ƹisa-ya wanita iy ṯṣellbem iggi-ṯ Arebbi ḏ Siḏiṯneɣ ḏ Lmasiḥ."
37 Wami sȓin yiwḏan nni i wawaȓ-a, uȓawen nsen cemḍen, kkaren nnan-as i Buṭrus ḏ arrusul nneɣnit: "Ay ayṯma, min ɣa negg?"
38 Inna-asen Buṭrus: "Tubeṯ, ṭehhareṯ s waman kuȓ ijjen zzaywem s yisem n Ƹisa Lmasiḥ ḥima aḏ twaɣfarent ȓmuƹṣiyaṯ nwem, aḏawem immuc Arruḥ iqeddsen ḏ lhadiya.
39 Liʼanna yuca-awem ȓƹaheḏ i kenniw ḏ ṯarwa nwem ḏ marra yinni iggwjen, iƹni i marra yinni iy xef d ɣa iȓaɣa Siḏi Arebbi."
40 Iƹȓem-asen Buṭrus aṭṭas, iweṣṣa-aṯen inna-asen: "Snejmeṯ ixef nwem zeg yiwḏan n ȓqewṯ-a ḏi ǧan ixarwiḍen."
41 Ssenni yinni iqebȓen awaȓ nnes ruḥen niṯni twaṭehharen s waman. Nhar nni twarnin can n ṯeȓt-aȓaf iḏsen ɣar ȓmuminin.
Mammec tƹicen ȓmuminin imezwura
42 Ȓebda tesȓan ȓmuminin ɣar ṯɣuri n arrusul, tmunen ag wayawya am wumaṯen, tetten aɣrum ag wayawya, tẓaǧan.
43 Arrusul teggen aṭṭas n lmuƹajizaṯ ḏ lƹalamaṯ, tƹejjben yiwḏan marra.
44 Tmunen marra ȓmuminin carrcen marra ag wayawya.
45 Znuzan agȓa nsen ḏ ȓeḥwayej iy ɣarsen, ferrqen i mkuȓ ijjen min iḥḏaj.
46 Tmunen marra iḏsen mkuȓ nhar ḏi ṯemziḏa ṯameqqrant n Ayṯ-Israʼil, tetten aɣrum marra ḏi ṯuḏrin nsen, tetten mecca s ȓefraḥeṯ ḏ ȓxaḍar nsen.
47 Ḥemmḏen Arebbi, reṭṭan xasen yiwḏan marra. Irenni-yasen Siḏi Arebbi mkuȓ nhar ḏi lƹadad n yinni inejjmen.