Arrasul Buṭrus isgenfa ij n unecruf
3
1 Ij n nhar ḏi ȓweqṯ n ṯẓaǧiṯ, ɣar ṯȓaṯa uƹecci, gaƹƹḏen Buṭrus ḏ Yuḥanna ɣar ṯemziḏa ṯameqqrant n Ayṯ-Israʼil.
2 Ḏinni ij uryaz ḏ anecruf zeg wami iy d ixȓeq. Tawin-ṯ-iḏ yiwḏan ɣar ṯewwarṯ n ṯemziḏa umi qqaren <Ṯawwarṯ iṣebḥan>, srusan-ṯ ḏinni mkuȓ nhar aḏ ittar i yinni itaḏfen ɣar ṯemziḏa ṯameqqrant.
3 Wami iẓra unecruf nni Buṭrus ḏ Yuḥanna taḏfen ɣar ṯemziḏa ṯameqqrant, ittar-asen ṣṣaḏaqa.
4 Buṭrus ḏ Yuḥanna xezzaren ḏayes mliḥ, inna-as Buṭrus: "Xzar-d ɣarneɣ!"
5 Ixzar ɣarsen, itraja aḏas ucen can ȓḥajeṯ.
6 Indeq-d Buṭrus inna-as: "Nec war ɣari ca nnuqqarṯ war ɣari ca dheb, maca zi min ɣari aḏac uceɣ: S yisem n Ƹisa Lmasiḥ zi Nnaṣira, kkar uyur!"
7 Iṭṭef-iṯ zeg ufus afusi isbedd-iṯ, ȓxeddnnit ṯicƹebina ḏ iḍaren nnes genfan.
8 Inexḍef ibedd x iḍaren ibḏa iggur. Yuḏef akiḏsen ɣar ṯemziḏa ṯameqqrant iggur ineṭṭew iḥemmeḏ Arebbi.
9 Ẓrin-ṯ marra iwḏan iggur iḥemmeḏ Arebbi,
10 ƹeqȓen-ṯ belli ḏ wenni tuɣa itɣiman itettar zzaṯ i ṯemziḏa ṯameqqrant ɣar ṯewwarṯ umi qqaren <Iṣebḥan>. Tƹejjben aṭṭas, ḏehhcen zi min ḏas iweqƹen.
Lxuṭba wis ṯnayen n arrasul Buṭrus
11 Bnaḏem nni igenfan iṭṭef ḏi Buṭrus ḏ Yuḥanna. Ḏehhcen marra iwḏan, ruḥen ɣarsen tazzȓen ɣar umcan umi qqaren <Asqif n Suliman>.
12 Wami ṯen iẓra Buṭrus, inna-asen: "Ay iryazen n Ayṯ-Israʼil, mayemmi ṯetƹejjbem x manaya? Mayemmi ṯxezzarem ḏayneɣ? Ma tfekkarem s jjehḏ nneɣ ḏ ddin nneɣ narra aryaz-a iggur? Lla!
13 Arebbi n ȓejḏuḏ nneɣ, iƹni Arebbi n Brahim ḏ Arebbi n Isḥaq ḏ Arebbi n Yaƹqub, liʼanna ḏ netta iy d iseḍharen lƹaḍama nnes ḏeg uxeddam nnes Ƹisa. Kenniw iy ṯ isellmen i lḥukkam ṯenkarem-ṯ zzaṯ i Bilaṭus iy tuɣa iggin aḏas irxu.
14 Wenni iǧan iṣfa ḏ ṣṣaliḥ ṯƹiffem-ṯ, ṯettarem aḏawem itwarxu ij umeḥbus iy iǧan ḏ lmujrim.b
15 Ṯenɣim wenni iǧan ḏ lʼaṣel n ṯuḏarṯ, maca Arebbi isekkar-iṯ-iḏ zi ȓmewṯ, neccin necheḏ xas.
16 Ḏeg yisem n Ƹisa iƹni ḏ lʼiman ḏeg yisem nnes, aqa aryaz-a iy twaȓam iy ṯessnem iḏweȓ ijheḏ. S lʼiman nnes ḏi Ƹisa ig igenfa qaƹ mammec twaȓam marra kenniw.
17 Ȓexxu ssneɣ ay ayṯma belli ṯeggim manayenni i Ƹisa s ȓeqfaȓeṯ nwem kenniw ḏ arruyas nwem.
18 Ammu ikemmeȓ Arebbi awaȓ nnes iy tuɣa ḏasen inna i marra lʼanbiya zi qbeȓ, iƹni itxeṣṣa Lmasiḥ nnes aḏ itwaƹeddeb.
19 S manaya tubeṯ, ḏewȓeṯ ɣar Arebbi ḥima aḏ twakksent ȓmuƹṣiyaṯ nwem,
20 ḥima aḏ d tas ṯsaƹat n lfaraj zi Siḏi Arebbi, aḏ d issekk Lmasiḥ iy ḏawem itwaxḍaren zi qbeȓ, iƹni Ƹisa.
21 Itxeṣṣa aḏ iqqim ḏeg ujenna aȓ ȓweqṯ iy ḏi ɣa itwaƹḏer kuȓci, ƹlaḥsab awaȓen n lʼanbiya ṣaliḥin iy ḏasen inna Arebbi ḏeg yij n zman.
22 Aqa inna Musa: Aḏawem-d yuc Siḏi Arebbi nwem ij n nnabi zeg ayṯmaṯwem amecnaw nec. Itxeṣṣa aḏ tesȓem ɣar marra min ḏawem ɣa yini.
23 Marra wenni war ḏas itsȓin ca ɣar nnabi nni aḏ itwakkes zi ȓqum aḏ inehḏem.
24 Nnabi Ṣamwil ḏ marra lʼanbiya iy ṯiḏ iḏfaren xebbaren x wussan-a yina iy ḏi neǧa.
25 Kenniw ḏ ddurriṯ n lʼanbiya. Kenniw ḏ ṯarwa n ȓƹaheḏ nni igga Arebbi ak ȓejḏuḏ nwem. Inna-as Arebbi i Brahim: Zi ddurriṯ nnec iy zi ɣa barkeɣ marra ȓegnus n ṯmurṯ.
26 Wami ḏawem d yuca Arebbi axeddam nnes Ƹisa, issekk-awem-ṯ-iḏ ḏ amezwaru bac aḏawem ibarek, iƹni aḏ isbeƹƹeḏ mkuȓ ijjen zzaywem x ccerr nnes."