Buṭrus ḏ Yuḥanna zzaṯ i lḥukkam n Ayṯ-Israʼil
4
1 Usin-d iṣadduqiyen ḏ ȓefquha ḏ umeqqran n iƹessasen n ṯemziḏa ṯameqqrant n Ayṯ-Israʼil, ufin Buṭrus ḏ Yuḥanna ssawaȓen ak yiwḏan.
2 War ḏasen iƹjib bu ȓḥaȓ qaƹ wami ṯen ufin seȓmaḏen tḥeddaṯen iwḏan x Ƹisa belli iwḏan aḏ d kkaren zi ȓmewṯ.
3 Kkaren ṭṭfen Buṭrus ḏ Yuḥanna, nhar nni ggin-ṯen ḏi ȓeḥbes aȓ ṯiwecca minzi iƹḏu ȓḥaȓ.
4 Aṭṭas n yiwḏan iy isȓin awaȓ nsen umnen, uwḍen can xemsa aȓaf n iryazen.
5 Ṯiwecca nnes munen ḏi Lquds imeqqranen n Ayṯ-Israʼil ḏ arruyas nsen ḏ imseȓmaḏen n Ccariƹa.
6 Tuɣa ḏinni Ḥanin arrayes n ȓefquha ḏ Qiyafa ḏ Yuḥanna ḏ Iskandar ḏ yinni iǧan zi ȓeḥbab n arrayes n ȓefquha.
7 Sbedden Buṭrus ḏ Yuḥanna ḏi ȓwesṭ nnan-asen: "Zi mant jjehḏ niɣ ḏ mant yisem iy zi teggem manaya?"
8 Buṭrus iccur s Arruḥ iqeddsen inna-asen ȓxeddnnit: "Ay arruyas ḏ imeqqranen n ccaƹb!
9 Ma ḏaneɣ teggem nhara lʼistijwab x ȓxir itwaggen ḏeg yij n unecruf ƹlaḥsab mammec igenfa?
10 Iwa itxeṣṣa aḏ tessnem kenniw ḏ marra Ayṯ-Israʼil belli aryaz-a iy ḏa ibedden zzaṯwem igenfa s yisem n Ƹisa Lmasiḥ zi Nnaṣira. Kenniw ṯṣellbem-ṯ, walakin Arebbi isekkar-iṯ-iḏ zi ȓmewṯ.
11 Ƹisa-ya netta ḏ azru iy ṯƹiffem kenniw ibennayen. Ȓexxu iḏweȓ ḏeg umcan aṣebḥan ḏi ṯɣemmarṯ n dsas.
12 War izemmar ḥadd aḏ injem bȓa zzayes zi netta. Liʼanna war ḏinni ȓa ḏ ij n yisem nneɣnit jar i iryazen ḏi ddunect-a amen-tekmeȓ izemmar aḏaneɣ isenjem."
13 Xzaren arruyas nni ḏi zƹameṯ n Buṭrus ḏ Yuḥanna, ufin-ṯen war ɣrin ca niṯni ḏ iwḏan ƹadi. Qqimen tƹejjben, ƹeqȓen-ṯen belli tuɣa ǧan ak Ƹisa.
14 Twaȓan aryaz nni igenfa ibedd zzaṯsen, war ufin min ɣa inin.
15 Umaren-ṯen arruyas nni aḏ ffɣen barra, aḏ jjen Jmaƹeṯ nsen n lḥukkam aḏ mcawaren jarasen.
16 Nnan: "Min ɣa negg i ṯnayen-a n iryazen? War nzemmar ca a nenkar lmuƹjiza-ya iy ggin ȓaḥeqqac ẓrin-t marra imezḏaɣ n Lquds.
17 Maca labud aḏasen neƹȓem war ssiwiȓen i ḥadd s yiȓes n Ƹisa ssa aȓ tsawent bac war tenticir ca ṯɣuri-ya ḏi ccaƹb."
18 Siḏfen-ṯen-d, umaren-ṯen nnan-asen war ssawaȓeṯ war seȓmaḏeṯ qaƹ s yiȓes n Ƹisa.
19 Nedqen-d Buṭrus ḏ Yuḥanna nnan-asen: "Ḥekmeṯ kenniw, ma mliḥ i Arebbi a nṭaƹ i kenniw niɣ i netta?
20 War nzemmar a nestuk x min neẓra ḏ min nesȓa."
21 Rnin siggwḏen-ṯen, menbaƹd rxun-asen. War ufin mammec ɣa ggen aṯen ƹeqqben minzi marra iwḏan ḥemmḏen Arebbi x min iweqƹen.
22 Aryaz-a igenfan s lmuƹjiza nni ɣares ktar zi arbeƹin iseggwusa.
Ȓmuminin tettaren zƹameṯ zi Arebbi
23 Ɣir ḍeȓqen i Buṭrus ḏ Yuḥanna, ruḥen ɣar imeddukaȓ nsen ƹawḏen-asen marra min ḏasen nnan arruyas n ȓefquha ḏ imeqqranen n Ayṯ-Israʼil.
24 Wami sȓin i manaya, ttaren ḏi ṯẓaǧiṯ i Arebbi marra iḏsen nnan-as: "Cek, ya Mawlana ixeȓqen ajenna ḏ ṯmurṯ ḏ ȓebḥar ḏ marra min ḏaysen.
25 Cek iy innan s Arruḥ iqeddsen x yiȓes n jeddiṯneɣ Dawud ȓƹabḏ nnec wami inna:
Mayemmi ȓegnus ɣeḍben aṭṭas?
Mayemmi iwḏan tciṭinen ḏi ȓxawi?
26 Wejḏen izeǧiḏen n ṯmurṯ,
munen arruyas nnes,
bac aḏ ƹarrḍen i Siḏi Arebbi ḏ Lmasiḥ nnes.
27 Li'anna ḏ ṣṣaḥ azeǧiḏ Hirudus ḏ ȓḥakem Bunṭyus Bilaṭus munen akeḏ Ayṯ-Israʼil ḏ yinni war iǧin zi Ayṯ-Israʼil ḏi ṯendint-a. Tafqen ḍed i uxeddam nnec iqeddsen Ƹisa iy ṯixḍareḏ.
28 Ggin marra min tuɣa ṯzemmmeḏ aḏ iwqeƹ s ufus ḏ ȓxaḍar nnec.
29 Ȓexxu a Siḏi, xzar mammec ḏaneɣ theddaḏen, uc-aneɣ i neccin lƹibad nnec a nessiweȓ s wawaȓ nnec s zƹameṯ.
30 Sarreḥ fus nnec bac aḏ tesgenfiḏ aḏ teggeḏ lmuƹjizaṯ ḏ lburhanaṯ s yisem n Ƹisa axeddam nnec iqeddsen."
31 Wami kemmȓen ṯẓaǧiṯ, inhezz umcan mani munen. Ccuren marra iḏsen s Arruḥ iqeddsen, ssawaȓen s wawaȓ n Arebbi s zƹameṯ.
Ȓmuminin carrcen marra jarasen
32 Jmaƹeṯ nni n ȓmuminin ɣarsen uȓ nsen ḏ ȓaƹqeȓ nsen kif-kif. Uȓa ḏ ijjen war iḥesseb ca min ɣares nnes waḥḏes, carrcen marra ṯimesȓayin jarasen.
33 Cehhḏen arrusul s yij n jjehḏ ḏ ameqqran x lqiyama iy igga Siḏiṯneɣ Ƹisa zi ȓmewṯ. Arebbi igga xasen marra lbaraka ṯemɣar.
34 War iǧi uȓa ḏ ijjen zzaysen iḥḏaj. Li'anna yinni iy ɣar iǧa ṯimura ḏ ṯuḏrin traḥen znuzan-ṯent tawin-d tmenyaṯ nni,
35 srusan-ṯent ɣar iḍaren n arrusul. Niṯni ferrqen-ṯent ƹlaḥsab mkuȓ ijjen min iḥḏaj.
36 Ḏinni ijjen qqaren-as Yusef, semman-ṯ arrusul ƹaweḏ s Barnaba iƹni <wenni itcejjaƹen>. Netta zi Ayṯ-Lawi ḏ mmis n ṯendint n Qubruṣ.
37 Ikkar izzenz ij n ṯmurṯ iy ɣares, yuwi-d tmenyaṯ nni isers-iṯent ɣar iḍaren n arrusul.