Anas ḏ ṯemɣarṯ nnes Safura
5
1 Ikkar ij n uryaz qqaren-as Anas netta ḏ ṯemɣarṯ nnes qqaren-as Safura, iruḥ izzenz ij n ṯmurṯ nnes.
2 Ijja ɣares can n tmenyaṯ, yuwi-d ṯinneɣnit isers-iṯent ɣar iḍaren n arrusul. Ṯamɣarṯ nnes ṯessen mliḥ manayenni.
3 Inna-as Buṭrus: "A Anas, mayemmi c iɣarr Cciṭan yuḏef ḏeg wuȓ nnec? Mayemmi ṯesxerrqeḏ x Arruḥ iqeddsen, ṯejjiḏ can n tmenyaṯ i yixef nnec zi tmenyaṯ n ṯmurṯ nni?
4 Ma war ṯeǧi ṯmurṯ nni nnec qbeȓ iy t ɣa ṯezzenzeḏ? Wami t ṯezzenzeḏ, ma war ǧint tmenyaṯ nni nnec?" Inna-as: "Mayemmi ṯenwiḏ ḏeg wuȓ nnec aḏ teggeḏ manaya? War ṯesxerrqeḏ ca x yiwḏan, qa ṯesxerrqeḏ x Arebbi."
5 Anas wami isȓa i wawaȓ-a, iwḍa ɣar ṯmurṯ immuṯ ḏinni. Marra wi d yarrin ȓexbar i manaya iggweḏ aṭṭas.
6 Kkaren ccabab keffnen Anas s ȓecfen uwin-ṯ aṯ neḍȓen.
7 Ƹḏunt can ṯȓaṯa n ṯsaƹaṯin ṯusa-d ṯemɣarṯ n Anas war d ṯarri ca ȓexbar x min iweqƹen.
8 Indeq-d Buṭrus inna-as: "In-ayi cem, ma anictuya iy zi ṯezzenzem ṯamurṯ nni?"
Ṯenna-as: "Wah, anictuya."
9 Inna-as Buṭrus: "Mayemmi ṯtafqem aḏ tzaƹmem aḏ teẓrem Arruḥ n Siḏi Arebbi min ɣa igg? Aqa ḏewȓen-d yinni inḍȓen aryaz nnem, aqaṯen ɣar ṯewwarṯ acem ysin uȓa ḏ cem."
10 Ṣafi ṯewḍa ȓxeddnnit ɣar iḍaren n Buṭrus ṯemmuṯ ḏinni. Wami d uḏfen ccabab nni ufin-t ṯemmuṯ, ysin-teṯ neḍȓen-teṯ ak uryaz nnes.
11 Marra jmaƹeṯ n ȓmuminin ḏ marra yinni isȓin manaya ggwḏen aṭṭas.
Arrusul sgenfan aṭṭas n yiwḏan
12 Arrusul teggen aṭṭas n lmuƹjizaṯ ḏ lburhanaṯ jar yiwḏan, tmunen marra ḏeg Useqqif n Suliman.
13 Zeg yiwḏan nni iy war yuminen war izƹim ḥadd akisen imun ak ȓmuminin waxxa amenni teḥtaramen-ṯen aṭṭas.
14 Twarnin aṭṭas n yinni iy yumnen zi Siḏiṯneɣ, ij n lƹadad n iryazen ḏ ṯemɣarin.
15 Iwḏan sufuɣen imehȓac ɣar znaqi, srusan-ṯen ḏi ṯassuṯ ḏ ijarṯaȓ ḥima axmi ssenni d ɣa ikk Buṭrus, bac imken aṯen teȓqef ṯiȓi nnes ȓebƹaḍ zzaysen.
16 Tasen-d aṭṭas n yiwḏan zi ȓeḏcur yuḏsen ɣar Lquds, tawin-d imehȓac ḏ yinni itƹeddaben jnun iƹeffanen uca tgenfan marra.
Ayṯ-Israʼil tƹeddaben arrusul
17 Ikkar arrayes n ȓefquha ḏ marra yinni kis iǧan, iƹni ȓḥizeb n iṣadduqiyen, ḥesḏen arrusul aṭṭas,
18 ṭṭfen-ṯen ggin-ṯen ḏi ȓeḥbes.
19 Walakin s ǧiȓeṯ ij n lmalaʼika n Siḏi Arebbi ṯerzem-asen ṯiwwura n ȓeḥbes, ṯsufeɣ-iṯen ṯenna-asen:
20 "Ruḥem beddeṯ ḏi ṯemziḏa ṯameqqrant n Ayṯ-Israʼil, ḥeddṯem i yiwḏan s marra awaȓen n ṯuḏarṯ-a n jḏiḏ."
21 Ḏ manayenni iy ggin, uḏfen ɣar ȓefjar ɣar ṯemziḏa ṯameqqrant n Ayṯ-Israʼil bḏan seȓmaḏen.
Walakin arrayes n ȓefquha ḏ marra yinni kis iǧan smunen-d Jmaƹeṯ n lḥukkam n Ayṯ-Israʼil, iƹni marra imeqqranen nsen, ssekken iƹessasen n ṯemziḏa d awin arrusul zi ȓeḥbes.
22 Wami uwḍen iƹessasen nni ɣar ȓeḥbes war ḏin ṯen ufin ca. Ḏewȓen-d siwḍen ȓexbar,
23 nnan: "Nufa ṯiwwura n ȓeḥbes bellƹent mliḥ, ḏ iƹessasen n ȓeḥbes bedden zzaṯ i ṯewwura nni. Wami nuḏef ɣar ḏaxeȓ war ḏinni nufi ḥadd."
24 Wami sȓin ȓexbar-a arruyas n ȓefquha ḏ umeqqran n iƹessasen n ṯemziḏa ṯameqqrant ismeḍ-asen ȓaƹjeb ḏeg wuȓ fekkaren mani ɣa yaweḍ manaya?
25 Yusa-d ɣarsen ijjen inna-asen: "Iryazen nni ṯeggim ḏi ȓeḥbes aqaṯen ḏi ṯemziḏa ṯameqqrant seȓmaḏen iwḏan!"
26 Ȓxeddnnit iruḥ umeqqran nni n iƹessasen ak imxazniyen nnes uwin-d arrusul bȓa lƹunf, minzi ggwḏen aṯen rejmen ccaƹb s uzru.
27 Wami d siḏfen arrusul, sbedden-ṯen zzaṯ i Jmaƹeṯ n lḥukkam n Ayṯ-Israʼil. Inna-asen arrayes n ȓefquha:
28 "Numar i kenniw war ṯseȓmaḏem ca s yiȓes nni n Ƹisa, walakin kenniw ṯƹemmarem Lquds s ṯɣuri nwem. Ṯexsem aḏ teggem ȓmewṯ n uryaz-a x yiri nneɣ."
29 Indeq-d arrasul Buṭrus ḏ arrusul nneɣni nnan-asen: "Itxeṣṣa-yaneɣ a nṭaƹ i Arebbi, maci i yiwḏan!
30 Arebbi n ȓejḏuḏ nneɣ isekkar-d Ƹisa iy ṯenɣim kenniw wami ṯ ṯrefƹem x ṯeḥnact.
31 Irfeƹ-iṯ Arebbi ɣares iggi-ṯ x ufusi nnes bac aḏ iḥkem aḏ isenjem, aḏ yuc ttuba i Ayṯ-Israʼil, aḏ iɣfar ȓmuƹṣiyaṯ nsen.
32 X ṯmesȓayin-a ncehheḏ xasent neccin ḏ Arruḥ iqeddsen, Arruḥ-a yuci-ṯ Arebbi i yinni ḏas itṭaƹan."
33 Wami sȓin awaȓ-a xeyyqen ɣeḍben, rezzun aṯen nɣen.
34 Ikkar-d ij ufarrisi, netta ḏ amseȓmaḏ n Ccariƹa qqaren-as Gamlil iteḥtaram-iṯ marra ccaƹb. Ibedd ḏi ȓwesṭ n Jmaƹeṯ n lḥukkam n Ayṯ-Israʼil, ittar-asen aḏ sufɣen arrusul cwayt n ȓweqṯ ɣar barra.
35 Inna-asen: "Ay iryazen n Ayṯ-Israʼil, ḥḍam ixef nwem zi min ṯexsem aḏ txeḏmem i yiwḏan-a!
36 Qbeȓ i wussan-a, ikkar-d ij uryaz qqaren-as Aṯuddas. Netta yarra ixef nnes ḏ ameqqran, ḏfaren-ṯ can arbeƹa miyya n iryazen. Walakin itwaneɣ, mesfraqen marra yinni iy ṯ iḏfaren ḏewȓen ḏ walu.
37 Menbaƹd i uryaz-a Aṯuddas, ikkar-d Yahuḏa zi ṯmurṯ n Ljalil ḏi ȓiyyam n lʼiḥṣaʼ n imezḏaɣ n Ayṯ-Israʼil. Indeh akis ij n lƹadad n yiwḏan, walakin itwaneɣ uȓa ḏ netta, yinni iy ṯ iḏfaren kuȓ ijjen manis ikka.
38 Ȓexxu akenniw neṣḥeɣ aḏ tbeƹƹḏem i yiwḏan-a, aṯen tejjem. Min newwan ḏ min xeddmen, meȓa zeg yiwḏan waha aḏ iqḍa.
39 Meȓa manayenni zi Arebbi war ṯzemmarem axasen ṯeqḍam. Ḥḍam war tifem ixef nwem tmenɣam akeḏ Arebbi!"
40 Sȓin yiwḏan nni ɣar Gamlil. Uwin-d arrusul ƹannen-asen aƹmuḏ nnan-asen: "War tƹawaḏem aḏ tessiwȓem s yiȓes n Ƹisa." Ȓxeddnnit ḍeȓqen-asen.