Sebƹa n ṣṣaḥaba n arrusul ḏi ṯendint n Lquds
6
1 Ḏeg wussan nni lƹadad n imeḥḍaren itwarni. Ȓmuminin iy ssawaȓen s luɣa ṯayunaniṯ tceṯcan zeg yinni issawaȓen lƹibriya, qqaren qa ṯajjaȓin nneɣ war ḏasent ticcen bu ȓḥaqq nsent xmi ferrqen lmuƹawana mkuȓ nhar.
2 Kkaren ṯenƹac nni n arrusul smunen marra imeḥḍaren nnan-asen: "Maci maƹqul neccin arrusul a nesmeḥ ḏeg wawaȓ n Arebbi bac a nefreq lmuƹawana.
3 Ay ayṯma, kkarem awim-d sebƹa n iryazen zzaywem aḏ tiȓi ṯessnem-ṯen aqaṯen mliḥ, aḏ iȓin ccuren s Arruḥ iqeddsen ḏ ȓefhameṯ. Neccin aṯen nkellef s lmuhimma-ya
4 bac neccin arrusul a nuc ȓweqṯ nneɣ i ṯẓaǧiṯ ḏ uḥeddeṯ."
5 Iƹjeb-asen ȓḥaȓ i marra jmaƹeṯ. Kkaren ixḍaren ijjen qqaren-as Stifan, netta ḏ ij n uryaz iccur s lʼiman ḏ Arruḥ iqeddsen. Ixḍaren Filippas ḏ Brukurus ḏ Nikanur ḏ Timun ḏ Barminas ḏ Nikulas zeg Wanṭakya, tuɣa isȓem netta ḏi ddin n Ayṯ-Israʼil.
6 Sebƹa-ya n ṣṣaḥaba qeddmen-ṯen ɣar arrusul ssenni ẓẓuǧen xasen sersen xasen ifassen nsen baraken-ṯen.a
7 Intacar wawaȓ n Arebbi, twarnin aṭṭas imeḥḍaren ḏi Lquds, umnen aṭṭas n ȓefquha n Ayṯ-Israʼil zi Lʼinjil.
Teṭṭfen Stifan ijjen zi sebƹa n ṣṣaḥaba n arrusul
8 Stifan-a netta iccur s lbaraka n Arebbi ḏ jjehḏ, itegg jar yiwḏan lburhanaṯ ḏ lmuƹjizaṯ ḏ ṯimeqqranin.
9 Kkaren ȓebƹaḍ zi temziḏa umi qqaren <Libirtinun>.b Niṯni ḏ iʼisraʼiliyen n ṯendint n Lqurina ḏ ṯendint n Iskandariya ḏ inneɣnit zi lʼiqlim n Kilikya ḏ lʼiqlim n Asya. Bḏan temnaqaren ak Stifan,
10 maca war zemmaren aḏ qawwmen ȓefhameṯ ḏ Arruḥ iy zi issawaȓ.
11 Kkaren ucin arrecweṯ i can iryazen bac aḏ inin, Neccin nesȓa i Stifan iqqar awaȓ war iḥȓin x Musa ḏ Arebbi!
12 Sƹeṣṣben iwḏan uȓa ḏ imeqqranen n Ayṯ-Israʼil ḏ imseȓmaḏen n Ccariƹa, ṭṭfen Stifan uwin-ṯ ɣar Jmaƹeṯ n lḥukkam n Ayṯ-Israʼil.
13 Ggin iwḏan axas cehḏen ẓẓur, qqaren: "Bnaḏem-a iqqar awaȓ war iḥȓin x umcan-a iṣfan ḏ Ccariƹa n Musa!
14 Nesȓa-yas iqqar belli Ƹisa zi Nnaṣira aḏ ihḏem amcan-a, aḏ ibeddeȓ lƹadaṯ iy ḏaneɣ d ijja Musa."
15 Xezzaren ḏayes ḏi Stifan marra yinni iy ḏin iǧan ḏi Jmaƹeṯ n lḥukkam n Ayṯ-Israʼil, ufin aɣembub nnes am uɣembub n lmalaʼika.