Stifan itwajah Jmaƹeṯ n Lḥukkam n Ayṯ-Israʼil
7
1 Ikkar arrayes n ȓefquha inna-as i Stifan: "Ma ḏ ṣṣaḥ manaya?"
2 Inna-asen Stifan: "Ay ayṯma! Ay imɣaren! Ṣennṭeṯ ɣari. Wami tuɣa jeddiṯneɣ Brahim iǧa ḏi ṯmurṯ nni n Misubuṭamya, qbeȓ ma aḏ izḏeɣ ḏi ṯendint n Ḥaran, imeḍhar-as-d Arebbi Ƹaḍim,
3 inna-as: Kkar, ffeɣ ssa zi ṯmurṯ-a nnec, ejj ȓeḥbab nnec ruḥ ɣar ṯmurṯ nni iy ḏac d ɣa seḍhareɣ.
4 Ikkar Brahim yuyur zi ṯmurṯ nni n ikaldaniyen, iƹni Misubuṭamya, iruḥ izḏeɣ ḏi ṯendint n Ḥaran. Wami immuṯ babas, yuwi-ṯ Arebbi ɣar ṯmurṯ-a mani ṯzeddɣem ȓexxu.
5 Walakin war ḏas yuci uȓa ḏ cbar zi ṯmurṯ-a at imlek. Ḏi ȓweqṯ nni Brahim war ɣares bu ṯarwa. Waxxa amenni, iwƹeḏ-iṯ Arebbi inna-as: Aḏac uceɣ ṯamurṯ-a i cek ḏ ddurriṯ nnec aḏ tiȓi nwem.
6 Ammu iy ḏas inna Arebbi: Aḏ ƹicen ddurriṯ nnec ḏi ṯmurṯ n midden, aḏ iȓin ḏ isemɣana i ayṯbab n ṯmurṯ nni, axasen ssekken tamara arbeƹmiyya iseggwusa.
7 Walakin Arebbi iqqar: Aḏ ƹaqbeɣ iwḏan n ṯmurṯ nni iy ṯen iggin ḏ isemɣan, menbaƹd aḏ ffɣen ddurriṯ nnec ssenni aḏayi ƹebḏen ḏeg umcan-a.b
8 Fa Arebbi yuca-as i Brahim ȓƹaheḏ nni iƹni n ṭṭahareṯ. Brahim ijja-d Isḥaq, iṭehhar-iṯ nhar wis ṯmenyam. Isḥaq ijja-d Yaƹqub. Yaƹqub ijja-d ṯenƹac n ȓejḏuḏ nneɣ.
9 Ȓejḏuḏ nneɣ ḥessḏen umaṯsen Yusef, zzenzen-ṯ aḏ iḏweȓ ḏ ismeɣ ḏi Miṣra. Maca Arebbi aqaṯ akis,
10 ifekk-iṯ zi marra tamara nnes! Yuca-as lḥikma, isƹizz-iṯ ɣar Firƹun iƹni azeǧiḏ n Miṣra. Iggi-ṯ aḏ iḥkem x Miṣra ḏ marra ȓeqṣar nnes.
11 Ṯumma iwqeƹ buheyyuf ḏi marra Miṣra ḏ marra ṯamurṯ n Kanƹan. Ṯekka tamara ḏ ṯameqqrant, war ufin ȓejḏuḏ nneɣ min ɣa ccen.
12 Wami isȓa Yaƹqub belli Miṣra ḏayes irḏan, issekk ȓejḏuḏ nneɣ ḏinni ṯwaȓa ṯamezwarut.
13 Wami ḏewȓen ṯwaȓa wis ṯnayen, inna-asen Yusef i ayṯmas qa nec ḏ umaṯwem ȓxeddnnit ƹeqȓen-ṯ. Ssenni ig issen Firƹun ȓeḥbab n Yusef.
14 Yusef issekk aḏ d awin babas Yaƹqub ḏ ȓeḥbab nnes, niṯni ḏi xemsa u sebƹin iḏsen.
15 Ihwa-d Yaƹqub ɣar Miṣra, ḏinni ig immuṯ netta ḏ ȓejḏuḏ nneɣ.
16 Mmeysin-d ssenni ɣar ṯmurṯ n Cakim, neḍȓen-ṯen ḏinni ḏeg unḍeȓ iy tuɣa isɣa Brahim s yij n ttaman n nnuqarṯ x Ayṯ-Ḥammur ḏi Cakim.
17 Ṯumma wami d ṯqarreb ȓweqṯ iy ḏi ɣa ikemmeȓ Arebbi minzi iwƹeḏ Brahim, ikṯar imɣar ccaƹb nneɣ ḏi Miṣra.
18 Imeḍhar-d ij n uzeǧiḏ nneɣnit ḏi Miṣra war issin ca Yusef.
19 Ixḏeƹ ccaƹb nneɣ, issekk-it x ȓejḏuḏ nneɣ, itegg xasen bessif bac aḏ nḍaren iseyman nsen ɣar barra ḥima aḏ mmṯen.
20 Ḏi ȓweqṯ nni ixȓeq Musa, netta iṣbaḥ aṭṭas. Itwarebba ṯeȓt chur ḏi ṯeddarṯ n babas.
21 Wami ṯ nḍaren ɣar barra, ṯbenna-ṯ yeǧis n Firƹun ṯrebba-ṯ ṯarri-ṯ ḏ mmis.
22 Iȓmeḏ Musa marra min seȓmaḏen imiṣriyen, ɣares jjehḏ ḏi min iqqar ḏ min itegg.
23 Ṯumma wami ikemmeȓ arbeƹin iseggwusa, irezzu aḏ ifqeḏ ayṯmas Ayṯ-Israʼil.
24 Iẓra ij umiṣri itƹedda x yij n uʼisraʼili, ikkar iḏafeƹ x wenni itwaḍeȓmen, intaqam zzayes inɣa amiṣri nni.
25 Netta inwa belli ayṯmas Ayṯ-Israʼil aḏ fehmen belli Arebbi aṯen isenjem x ufus nnes, maca niṯni war fhimen ca.
26 Ṯiwecca nnes, yufa ṯnayen iʼisraʼiliyen tmenɣan, ixes aṯen ismeṣȓaḥ inna-asen: Kenniw ḏ awmaṯen, mayemmi tƹeddam x wayawya?
27 Ikkar-d wenni itƹeddan, iḏfeƹ-iṯ inna-as: Uw c iggin ḏ arrayes niɣ ḏ ȓqaḍi xaneɣ?
28 Ma ṯrezzuḏ aḏayi ṯenɣeḏ am ṯenɣiḏ amiṣri nni n iḍennaṭ?
29 Wami isȓa manaya Musa, ikkar irweȓ iruḥ ɣar ṯmurṯ n Midyan iƹic ḏinni ḏ abarrani, ijja-d ḏinni ṯnayen iḥenjiren.
30 Ṯumma wami iƹḏu arbeƹin iseggwusa, ṯbedd-d ɣares ij n lmalaʼika ḏeg uḥaḏuq n ṯmessi ṯreqq ḏi ṯzeggwarṯ ḏi ṣṣaḥra zzaṯ uḏrar n Sina.
31 Wami iẓra Musa manayenni, itƹejjeb iruḥ aɣares iqarreb aḏ ixzar. Isȓa i ṣṣut n Siḏi Arebbi inna-as:
32 Nec ḏ Arebbi n ȓejḏuḏ nnec, ḏ Arebbi n Brahim ḏ Isḥaq ḏ Yaƹqub. Ibḏa Musa iterjiji s ṯiggwḏi war izƹim ca aḏ ixzar.
33 Inna-as Siḏi Arebbi: Kkes ṯisiȓa zeg iḍaren nnec minzi amcan-a iy xef ṯbeddeḏ aqaṯ muqeddes.
34 Qa ẓriɣ ȓaƹḏab iy ḏi iǧa ccaƹb inu ḏi Miṣra, sȓiɣ iɣuyan nsen hwiɣ-d aṯen snejmeɣ. Araḥ-d ȓexxu ac ssekkeɣ ɣar Miṣra.
35 Musa-ya nkaren-ṯ nnan-as: Uw c iggin ḏ arrayes niɣ ḏ ȓqaḍi xaneɣ? Walakin netta issekk-iṯ Arebbi bac aḏ yiȓi ḏ arrayes ḏ wenni iy ṯen ɣa isnejmen. Issekk-iṯ Arebbi x ufus n lmalaʼika nni iy ḏas d imeḍharen ḏi ṯzeggwarṯ nni.
36 Musa-ya ḏ netta iy ṯen isufɣen s ȓaƹjayeb ḏ lƹalamaṯ iy igga ḏi Miṣra, ḏi Ȓebḥar azeggwaɣ, uȓa ḏi ṣṣaḥra arbeƹin iseggwusa.
37 Ḏ Musa-ya iy innan i Ayṯ-Israʼil: Aḏawem d yuc Arebbi ij n nnabi zeg ayṯmaṯwem amecnaw nec.
38 Ḏ netta Musa iy igguren akeḏ jmaƹeṯ n Ayṯ-Israʼil ig imunen ḏi ṣṣaḥra. Ḏ netta mikeḏ ṯessiweȓ lmalaʼika x uḏrar n Sina ƹaweḏ akeḏ ȓejḏuḏ nneɣ. Ḏ netta iy xef d hwan wawaȓen iddaren ḥima aḏaneɣ ṯen yuc.
39 Walakin ȓejḏuḏ nneɣ war xsen ca aḏas ṭaƹen ugin aṯ qebȓen, nwan aḏ ḏewȓen ɣar Miṣra.
40 Nnan-as i Harun:c Ṣneƹ-aneɣ lʼaṣnamaṯ ḥima aḏ iȓin ḏ arebbiṯen nneɣ aṯen neysi ɣar zzaṯ nneɣ. War nessin ca manis ikka Musa-ya iy ḏaneɣ d isufɣen zi Miṣra!
41 Ḏi ȓiyyamaṯ nni ṣenƹen ij n lʼaṣnam x teṣwirṯ n uyenduz. Qeddmen-as dbiḥeṯ, farḥen aṭṭas x min ggin s ifassen nsen.
42 Ibeƹƹeḏ xasen Arebbi, ijji-ṯen aḏ ƹebbḏen iṯran ujenna amecnaw mammec iqqar Lkitab n lʼanbiya:
"Ay Ayṯ-Israʼil, wami tqeddamem dbiḥeṯ ḏ teḍḥiyeṯ
ḏi arbeƹin iseggwusa nni ḏi ṣṣaḥra,
ma ṯeggim manayenni i nec niɣ?
43 Lla, ṯeysim aqiḍun n lʼaṣnam umi qqaren Mulux,
ḏ yiṯri n arebbi nwem umi qqaren Rafan.
Ḏ yina ḏ lʼaṣnam iy ṯeggim bac aṯen ṯƹebḏem!
X manaya axawem azzȓeɣ aɣirin i ṯmurṯ n Babil."
44 Ɣarsen ɣar ȓejḏuḏ nneɣ ḏi ṣṣaḥra Ṯamziḏa uqiḍun n Arebbi. Iggi-t Musa amec iy ṯ yumar Arebbi ƹlaḥsab ckel iy tuɣa iẓra.
45 Ṯamziḏa nni uqiḍun ṯemmuc-asen i ȓejḏuḏ nneɣ. Niṯni ysin-t akiḏsen ak Yacuƹd ɣar ṯmurṯ n ȓegnus iy xef yuzzeȓ Arebbi zzaṯ i ȓejḏuḏ nneɣ. Ṯeqqim amenni aȓ wussan n Dawud.
46 Dawud irḍa xas Arebbi inna-as: A Siḏi Arebbi n jeddiṯneɣ Yaƹqub, ejj-ayi aḏ ḏebbareɣ ij umcan aḏ tiȓi ḏayes ṯazeddiɣṯ nnec.
47 Walakin Suliman ḏ netta ig ibnan ṯaddarṯ nni i Arebbi.
48 Maca Arebbi Yuƹȓan war izeddeɣ ca ḏi ṯuḏrin iy bennan ifassen. Amec inna nnabi Icaƹya:
49 Iqqar Siḏi Arebbi: Ajenna netta ḏ lƹarc inu,
ṯamurṯ ḏ nettaṯ mix srusiɣ iḍaren inu.
Mammec ṯegga ṯeddarṯ iy ḏayi ɣa ṯebnam?
Mani ɣa yiȓi umcan n arraḥeṯ inu?
50 Ma war iǧi ḏ fus inu iy d ixeȓqen manaya kuȓci?
51 Inna-asen Stifan: A yinni iy ḏi ṯeǧa ṯɣennant, ɣarwem uȓawen nwem qesḥen, imejjan nwem war tesȓin ca! Teggem kenniw mammec ggin ȓejḏuḏ nwem, kif-kif. Aqa ƹaḏ tƹarraḍem-as i Arruḥ iqeddsen.
52 Ma iqqim can n nnabi war ṯ ƹeddben ca ȓejḏuḏ nwem? Niṯni nɣin uȓa ḏ lʼanbiya nni n zman iy innan qa aḏ d yas wenni iǧan ṣṣaliḥ, iƹni wenni ṯxeḏƹem ȓexxu kenniw ṯenɣim-ṯ.
53 Ṯeṭṭfem Ccariƹa x ufus n lmalaʼikaṯ, maca war zzayes ṯeggim ca."
Ȓmewṯ n Stifan
54 Wami sȓin Jmaƹeṯ nni n lḥukkam n Ayṯ-Israʼil awaȓ n Stifan, xeyyqen ɣeḍben, ɣeẓẓen ɣares ṯiɣmas.
55 Stifan iccur s Arruḥ iqeddsen, ixzar ɣar ujenna iẓra lƹaḍama n Arebbi, Ƹisa ibedd x ufusi n Arebbi.
56 Inna: "Aqa twaȓiɣ ajenna inurzem ḏ Mmis n bnaḏem ibedd x ufusi n Arebbi."
57 Snekkaren ṯɣuyyiṯ s jjehḏ qqnen x imejjan nsen, hejmen xas marra iḏsen.
58 Sufɣen-ṯ barra i ṯendint rejmen-ṯ s uzru. Sersen izeǧuba nsen ɣar iḍaren n yij n ccab qqaren-as Cawul.
59 Qqimen rejjmen Stifan s uzru u netta iqqar: "A Siḏiṯneɣ Ƹisa, qbeȓ buḥbeȓ inu!"
60 Iwḍa x ifadden iƹeyyeḍ s jjehḏ inna: "A Siḏi, war xasen ḥesseb ca ȓmuƹṣiyeṯ-a!" Wami inna manaya ṣafi iffeɣ-iṯ buḥbeȓ.