Cawul itƹeddab jmaƹeṯ n ȓmuminin
8
1 Wami nɣin Stifan, Cawul aqaṯ ḏinni iḥḍar itafeq akisen. Zi nhar nni bḏan tƹeddaben jmaƹeṯ n ȓmuminin ḏi ṯendint n Lquds. Mesfraqen marra ȓmuminin ḏi jwayeh n Yahuḏiya ḏ Samarya kuȓ ijjen mani iruḥ, war iqqim ḏi Lquds illa arrusul.
2 Can iryazen iy teggwḏen Arebbi neḍȓen Stifan ḥeznen xas aṭṭas.
3 Cawul netta irezzu aḏ iqḍa x jmaƹeṯ n ȓmuminin, itaḏef ṯaddarṯ ṯaddarṯ isufuɣ-d iryazen ḏ ṯemɣarin itegg-iṯen ḏi ȓeḥbes.
Ttebcir s Lʼinjil ḏi ṯendint n Samarya
4 Ȓmuminin nni imesfraqen traḥen zeg umcan ɣar unneɣni tbeccaren s wawaȓ n Arebbi.
5 Filippas iruḥ ɣar ṯendint n Samarya, itḥeddaṯ imezḏaɣ nnes s Lmasiḥ.
6 Marra ȓɣaci nni wami sȓin ɣar wawaȓ nnes u ẓrin lmuƹjizaṯ nni igga, tṣennaṭen mliḥ ɣar min iqqar.
7 Jnun iƹeffanen ffɣen zeg waṭṭas, snekkaren ṯɣuyyiṯ s jjehḏ. Aṭṭas n izeḥḥafen ḏ yinni umi mmuṯen iḍaren genfan.
8 Farrḥen aṭṭas ḏi ṯendint nni.
9 Ḏinni ḏi ṯendint nni ij useḥḥar qqaren-as Simƹan, tuɣa isxeddam sḥur. Iseḏhac marra iwḏan n Samarya, itarra ixef nnes ḏ ameqqran.
10 Tesȓan ɣares marra s umezyan ḏ umeqqran nnan: "Aryaz-a ḏ jjehḏ nni ameqqran n Arebbi iy iǧan Ƹaḍim!"
11 Tesȓan ɣares minzi iseḏhac-iṯen aṭṭas n ȓweqṯ s sḥur nnes.
12 Wami ṯen ibeccar Filippas s ȓmulk n Arebbi ḏ yisem n Ƹisa Lmasiḥ, umnen tṭehharen s waman s iryazen ḏ ṯemɣarin.
13 Simƹan netta s yixef nnes yumen, iṭehhar s waman. Imun ak Filippas itƹejjeb Simƹan wami iẓra lmuƹjizaṯ ḏ lburhanaṯ imeqqranen ig itwaggen.
14 Wami sȓin arrusul ḏi Lquds qa Ayṯ-Samarya qebȓen awaȓ n Arebbi, kkaren arrusul ssekken ɣarsen Buṭrus ḏ Yuḥanna.
15 Wami uwḍen, ttaren-as i Arebbi ḥima aḏasen immuc Arruḥ iqeddsen.
16 Minzi ƹaḏ war d ihwi Arruḥ uȓa x yijjen zzaysen, tuɣa twaṭehharen s waman s yisem n Siḏiṯneɣ Ƹisa u ṣafi.
17 Kkaren sersen xafsen ifassen nsen, immuc-asen Arruḥ iqeddsen.
18 Wami sersen arrusul ifassen nsen x yiwḏan nni yufa Simƹan belli Arruḥ iqeddsen immuc-asen, ikkar irezzu aḏasen yuc tmenyaṯ i arrusul.
19 Inna-asen: "Ucem-ayi uȓa ḏ nec jjehḏ-a ḥima wenni iy xef ɣa serseɣ ifassen inu aḏas immuc Arruḥ iqeddsen."
20 Ikkar Buṭrus inna-as: "Lla, nnuqarṯ nnec aḏ tiȓi ḏ ṯimessi akiḏec ḏi ȓefna minzi ṯenwiḏ aḏ tesɣeḏ lhadiya n Arebbi s tmenyaṯ!
21 War ɣarek itiȓi bu umcan uȓa ḏ ȓḥaqq ḏi ȓxeḏmeṯ-a ȓaḥeqqac uȓ nnec war iǧi bu nican ak Arebbi.
22 Tub zi ccerr nnec, ttar Siḏi Arebbi imken aḏac iɣfar min ṯenwiḏ ḏeg wuȓ nnec.
23 Twaȓiɣ cek ṯeccureḏ s ṯarzugi n ȓeḥseḏ, cek ḏ ameḥbus n ccerr."
24 Inna-as Simƹan: "Ttareṯ akiḏi ɣar Siḏi Arebbi ḥima war ḏayi itweqiƹ uȓa ḏ ij n ȓḥajeṯ zi min ṯennim."
25 Wami Buṭrus ḏ Yuḥanna cehḏen x Ƹisa beccaren niṯni s wawaȓ n Siḏi Arebbi, kkaren ḏewȓen ɣar Lquds beccaren s Lʼinjil ḏeg waṭṭas n ȓedcur ḏi Samarya.
Filippas akeḏ yij n lwazir n ṯmurṯ n Lḥabaca
26 Ij n lmalaʼika n Siḏi Arebbi ṯessiweȓ-d ɣar Filippas ṯenna-as: "Kkar, ruḥ ɣar ljanub ekk x ubriḏ ḏi ȓexȓa itawin zi Lquds ɣar Ɣazza."
27 Ikkar iruḥ, imseȓqa ḏinni ak yij n uryaz ḏ aḥabaci ḏ axaṣiyun.a Netta zeg imeqqranen n lmalika n Lḥabaca qqaren-as nettaṯ Kandaka, itkellaf uryaz-a x uṣenduq n tmenyaṯ n lmalika nni. Tuɣa iruḥ ɣar Lquds aḏ iƹbeḏ Arebbi,
28 iḏweȓ-d ɣar Lḥabaca inya x ukarru nnes iqqar ḏi Lkitab n nnabi Icaƹya.
29 Inna-as Arruḥ n Arebbi i Filippas: "Yallah, mun ak ukarru-yin."
30 Yuzzeȓ Filippas ɣar uḥabaci nni itsȓa-yas, yufi-ṯ iqqar ḏi Lkitab n nnabi Icaƹya. Inna-as: "Ma ṯfehmeḏ min ṯeqqareḏ?"
31 Inna-as uḥabaci nni: "Nec, mammec ɣa fehmeɣ meȓa war ḏayi isefhem can yijjen?" Inna-as i Filippas: "Yallah aḏ d tenyeḏ akiḏi ḏeg ukarru."
32 Aqa lʼayaṯ nni iy iqqar uḥabaci ḏi Lkitab:
Amecnaw aḥuȓi xmi ṯ tawin aḏas ɣarṣen,
amecnaw izmar xmi isqar zzaṯ i yinni iȓessen ṯaḏufṯ,
ammen war irezzem ca aqemmum nnes.
33 Ḍeȓmen-ṯ, ksin-as ȓḥaqq nnes.
War ɣares ṯeǧi ddurriṯ axas yiȓi wawaȓ.
Ṯuḏarṯ nnes twakkes x ṯmurṯ.
34 Isseqsa uḥabaci nni Filippas inna-as: "Tettareɣ zzayek aḏayi ṯiniḏ, minxef issawaȓ nnabi-ya? Ma x yixef nnes niɣ x ḥadd nneɣnit?"
35 Issiweȓ Filippas, ibḏa-yas zi lʼayaṯ-a ḏi Lkitab, itbeccar-iṯ s Ƹisa.
36 Gguren ḏeg ubriḏ uwḍen ɣar can waman. Inna-as uḥabaci nni: "Aqac, aman mujud, min ḏayi iṭṭfen nec war ṭehhireɣ ca s waman?"
{
37 Inna-as Filippas: "Meȓa cek ṯumneḏ s marra uȓ nnec, ṯzemmareḏ aḏ tṭehhareḏ s waman." Yarra xas inna-as: "Wah, nec tamneɣ belli Ƹisa Lmasiḥ netta ḏ Mmis n Arebbi."}
38 Yumar aḏ sbedden karru nni. Hwan s ṯnayen iḏsen ɣar waman, Filippas iṭehhar aḥabaci nni s waman.
39 Wami d gaƹƹḏen zeg waman nni, Arruḥ n Siḏiṯneɣ ixḍef Filippas. War iqqim ca uḥabaci nni itwaȓa Filippas ktar ƹaḏ, yuyur x ubriḏ nnes s ȓefraḥeṯ.
40 Filippas yufa ixef nnes ḏi ṯendint n Wacdud, itraḥ zeg umcan ɣar unneɣni itbeccar s Lʼinjil ḏi marra ibilajen ḥetta aȓ wami yuweḍ ɣar Qayṣariya.