Itamen Cawul s Siḏiṯneɣ Ƹisa
9
1 Cawul ƹaḏ itheddaḏ s ȓmewṯ imeḥḍaren n Siḏiṯneɣ. Ikkar iruḥ ɣar arrayes n ȓefquha,
2 ittar zzayes arruxṣaṯ aṯent isiweḍ ɣar ṯemziḏawin n Ayṯ-Israʼil ḏi Dimaceq bac yinni ɣa yaf ḏeffaren abriḏ n Ƹisa s ṯemɣarin ḏ iryazen aṯen yawi ḏ imeḥbas ɣar Lquds.
3 Wami iggur iqarreb ɣar Dimaceq, ƹlaɣafla iceƹceƹ xas ij n nnur zeg ujenna.
4 Iwḍa ɣar ṯmurṯ, isȓa ij n ṯmijja ṯeqqar-as-d: "A Cawul a Cawul, mayemmi ḏayi tƹeddabeḏ?"
5 Inna-as Cawul: "Min teƹniḏ cek a Siḏi?"
Yarra xas: "Nec ḏ Ƹisa, wenni iy tƹeddabeḏ.
6 Kkar aḏef ɣar ṯendint, aḏac itwanna min itxeṣṣa aḏ teggeḏ."
7 Iryazen nni isafaren ak Cawul bedden ḏinni ḏewȓen war ssiwiȓen ca. Sȓin i ṯmijja nni, maca war twiȓin ḥadd.
8 Ikkar Cawul zi ṯmurṯ irzem ṯiṭṭawin nnes, yufa war itwiȓi walu. Ṭṭfen-ṯ zeg ufus nnes, uwin-ṯ ɣar Dimaceq.
9 Iqqim ḏinni ṯeȓtiyyam war itett ca, war isess ca, war itwiȓi ca.
10 Ḏinni ḏi Dimaceq ij umeḥḍar qqaren-as Anas. Yuḥa-yas-d Siḏiṯneɣ inna-as: "A Anas."
Yarra xas: "Aqayi a Siḏi."
11 Inna-as Siḏiṯneɣ: "Kkar ruḥ ɣar zzenqeṯ umi qqaren <Abriḏ Iseggḏen>, rzu ḏi ṯeddarṯ n Yahuḏa x yij uryaz zi ṯendint n Ṭarsus, isem nnes Cawul. Netta itẓaǧa ḏinni.
12 Tuɣa iẓra ḏi lwaḥi ij n uryaz isem nnes Anas yuḏef xas isers xas ifassen bac aḏ iḏweȓ itwaȓa."
13 Yarra xas Anas: "A Siḏi, walakin xebbaren-ayi aṭṭas n yiwḏan x bnaḏem-a Cawul, mecḥaȓ itƹeddab netta ȓmuminin nnec ṣaliḥin ḏi Lquds.
14 Netta ȓexxu aqaṯ ḏa, ucin-as arruxṣa arruyas n ȓefquha aḏ iṭṭef marra yinni iƹebbḏen s yisem nnec."
15 Inna-as Siḏiṯneɣ: "Ruḥ, aqa aryaz-a ḏ nec iy ṯ ixḍaren ḥima aḏ isiweḍ isem inu i yinni war iǧin zi Ayṯ-Israʼil, ḏ izeǧiḏen nsen, ḏ iʼisraʼiliyen.
16 Nec aḏas seḍhareɣ mecḥaȓ iy ɣa itwaƹeddeb u labud x ssabab n yisem inu."
17 Iruḥ Anas yuḏef ṯaddarṯ nni, isers ifassen nnes x Cawul inna-as: "A uma Cawul, nec qa issekk-ayi-d Siḏiṯneɣ Ƹisa, wenni iy ḏac d imeḍharen ḏeg ubriḏ nni iy d ṯuwiḏ. Issekk-ayi-d ɣarek ḥima aḏ tḏewȓeḏ twaȓiḏ aḏ teccareḏ s Arruḥ iqeddsen."
18 Ȓxeddnnit ṯewḍa-d ij n ȓḥajeṯ am ṯeqcurṯ zi ṯiṭṭawin nnes, iḏweȓ itwaȓa. Ikkar itwaṭehhar s waman.
19 Wami icca, iḏweȓ-d ɣares jjehḏ nnes.
Cawul itbeccar ḏi Dimaceq
Iqqim Cawul ȓebƹaḍ n wussan akeḏ imeḥḍaren ḏi Dimaceq.
20 Ȓxeddnnit ibḏa itḥeddaṯ ḏi ṯemziḏawin n Ayṯ-Israʼil iqqar-asen qa Ƹisa ḏ Mmis n Arebbi.
21 Tƹejjben marra yinni itsȓan, qqaren: Ma war iǧi ḏ wanita irzun aḏ iqḍa x yinni itȓaɣan x yisem-a n Ƹisa ḏi Lquds? Ma war d yusi ca ɣarsen ḏanita aṯen iṭṭef aṯen yawi ɣar arruyas n ȓefquha?
22 Cawul netta irni itḥeddaṯ s jjheḏ, iseḏhac Ayṯ-Israʼil ig izeddɣen ḏi Dimaceq, isbeyyen-asen-d s wawar nnes qa Ƹisa ḏ Lmasiḥ.
23-24 Wami ƹḏun aṭṭas n wussan, mcawaren Ayṯ-Israʼil ḥima aṯ nɣen, Cawul yarra-d ȓexbar. Ḥeṭṭan ṯiwwura n ṯendint ǧiȓeṯ ḏ nhar ḥima aṯ nɣen.
25 Serwȓen-ṯ imeḥḍaren nnes s ǧiȓeṯ, sehwan-ṯ-iḏ s iseɣwan ḏeg yij n uqbub zi ṯburjat n ṣṣur n ṯendint.
Cawul ḏi ṯendint n Lquds
26 Iruḥ Cawul ɣar Lquds, irezzu aḏ imun akeḏ imeḥḍaren, walakin ggwḏen zzayes marra war ḏayes ttiqen ca netta ḏ ameḥḍar ḏ ṣṣaḥ.
27 Ikellef zzayes Barnaba, yuwi-ṯ ɣar arrusul. Iƹaweḏ-asen xas mammec ḏas d imeḍhar Siḏiṯneɣ i Cawul ḏeg ubriḏ ḏ mammec iy kis issiweȓ, ḏ mammec itḥeddaṯ s zƹameṯ s yiȓes n Ƹisa ḏi Dimaceq.
28 Ssenni itraḥ itas-d akiḏsen ḏi Lquds, itḥeddaṯ s yij n zƹameṯ s yisem n Siḏiṯneɣ.
29 Issawaȓ akeḏ iʼisraʼiliyen iy ssawaȓen luɣa ṯayunaniṯ itemnaqar akiḏsen. Niṯni rezzun aṯ nɣen.
30 Wami d arrin ȓexbar ayṯmaṯneɣ, uwin-ṯ ɣar Qayṣariya ssenni ssekken-ṯ ɣar Ṭarsus.
31 Ḏi ȓweqṯ nni jmaƹeṯ n ȓmuminin ḏi marra jwayeh n Yahuḏiya ḏ Ljalil ḏ Samarya hnan. Twajehḏen, teggwḏen zi Siḏi Arebbi, twacejjaƹen zi Arruḥ iqeddsen, twarnin ḏi lƹadad.
Agenfi n yij n bnaḏem qqaren-as Ƹinyas
32 Buṭrus itraḥ zeg umcan ɣar unneɣni, iruḥ iẓra ȓmuminin ṣaliḥin iy zeddɣen ḏeg ubilaj n Ludd.
33 Yufa ḏinni ij n uryaz qqaren-as Ƹinyas, ṯmenya iseggwusa netta izzeȓ ḏi ṯassuṯ mmuṯen-as iḍaren.
34 Inna-as Buṭrus: "A Ƹinyas, qa isgenfa-cek Ƹisa Lmasiḥ! Kkar jmeƹ ṯassuṯ nnec." Ikkar ȓxeddnnit ibedd.
35 Ẓrin-ṯ marra iwḏan iy zeddɣen ḏeg ubilaj n Ludd ḏ ȓewḍa n Carun, ḏewȓen ɣar Siḏi Arebbi.
Ṭabita tnekkar-d zi ȓmewṯ
36 Ḏinni ḏi ṯendint n Yafa ij n ṯmeḥḍarṯ qqaren-as Ṭabita (ȓmaƹna n yisem-a, <ṯiɣit n uzɣar>). Tuɣa tegg ȓxir aṭṭas tƹawan imesƹan.
37 Ḏi ȓweqṯ nni ṯehȓec ṯemmuṯ, kkarent sirḏent-teṯ sgaƹƹḏen-teṯ ɣar yij n ṯɣurfat.
38 Sȓin imeḥḍaren ḏi ṯendint n Yafa belli Buṭrus aqaṯ ḏi Ludd. Yafa ṯuḏes, ssekken ɣares ṯnayen n yiwḏan ttaren zzayes nnan-as: "Ƹafek arwaḥ akiḏneɣ ḏeɣya!"
39 Ikkar Buṭrus iruḥ akiḏsen. Wami yuweḍ sgaƹƹḏen-ṯ ɣar ṯɣurfat nni. Nnḍent-as-d i netta marra ṯajjaȓin, trunt seḍharent-as ičammiren ḏ izeǧuba iy tuɣa ṯxeyyeḍ Ṭabita wami ṯeǧa akiḏsent.
40 Isufeɣ-iṯen Buṭrus marra zi ṯɣurfat, iwḍa x ifadden iẓẓuǧ. Ixzar ɣar ddat nni inna-as: "Ya Ṭabita, kkar!" Nettaṯ ṯerzem ṯiṭṭawin nnes, wami ṯeẓra Buṭrus ṯekkar ṯeqqim.
41 Isiɣ-as fus nnes, isekkar-it-id. Iȓaɣa-d i ȓmuminin ṣaliḥin ḏ ṯajjaȓin iseḥḍar-it-id ṯeddar.
42 Iffeɣ ȓexbar ḏi ṯendint n Yafa marra, umnen zi Siḏiṯneɣ aṭṭas n yiwḏan.
43 Iqqim Buṭrus ḏi Yafa aṭṭas n wussan ɣar yij n bu-yiȓemawena qqaren-as Simƹan.