Arrasul Buṭrus ḏ Kurninyus
10
1 Ḏinni ḏi ṯendint n Qayṣariya ij n uryaz qqaren-as Kurninyus. Netta ḏ aƹaskari ḏ ameqqran n arrumanus aqaṯ ḏeg yij n lfirqa n ȓƹaskar umi qqaren <Aṭalyan>.
2 Ḏayes ddin iteggweḏ Arebbi, netta ḏ marra ayṯbab n ṯeddarṯ nnes. Itegg ȓxir aṭṭas ḏeg yinni iḥḏajen, war ixeṭṭi ca ṯẓaǧiṯ.
3 Ij n nhar ɣar ṯȓaṯa uƹecci, iẓra nican ḏi lwaḥi ij n lmalaʼika n Arebbi taḏef-d xas tȓaɣa-yas-d: "A Kurninyus."
4 Ixzar ḏayes Kurninyus mliḥ, iggweḏ inna-as: "Min ṯrezzuḏ a siḏi?"
Ṯenna-as lmalaʼika nni: "Ṯẓaǧiṯ nnec ḏ ṣṣaḏaqa nnec uwḍent ɣar Arebbi, netta ifekkar ḏayec.
5 Sekk ȓexxu iryazen ɣar ṯendint n Yafa bac aḏ d awin ij n bnaḏem isem nnes Simƹan umi qqaren Buṭrus.
6 Aqaṯ ḏ anewji ɣar yij n bu-yiȓemawen qqaren-as Simƹan, ṯaddarṯ nnes aqat ṭṭarf i ȓebḥar."
7 Wami ṯuyur lmalaʼika nni iy kis issiwȓen, iȓaɣa-d i ṯnayen zeg ixeddamen nnes ḏ yij uƹaskari ḏayes ddin, itiȓi ȓebda akiḏes.
8 Iƹaweḏ-asen marra min iweqƹen, issekk-iṯen ɣar Yafa.
9 Ṯiwecca nnes, yinni itwassekken zi Kurninyus ɣar ṯendint n Yafa wami ƹȓayen aḏ awḍen ḏinni, yuȓi Buṭrus ɣar ṯzeqqaa ɣar uzyen nhar ḥima aḏ iẓẓaǧ.
10 Iǧuz aṭṭas irezzu aḏ icc. Wami ƹaḏ sewjaḏen-as mecca, yuḥa-yas-d Arebbi.
11 Iẓra ajenna inurzem ḏ yij n ȓḥajeṯ amecnaw ṯcuqqet ṯameqqrant twacedd zi ṯɣemmura nnes s arbeƹa ṯhewwa-d ɣar ṯmurṯ.
12 Ḏayes marra lḥayawanaṯ igguren x arbeƹa iḍaren, ḏ min itenḥuruḏen, ḏ yijḍaḍ ujenna.
13 Ṯeqqar-as ij n ṯmijja: "A Buṭrus, kkar, ɣareṣ, ecc!"
14 Inna-as Buṭrus: "Lla walu a Siḏi! Nec ƹemmarṣ war cciɣ min itwaḥsaben ḥram niɣ mekruh."
15 Ṯendeq-d ṯmijja nni wis marṯayen ṯenna-as: "Lla, war tḥarram ca can ȓḥajeṯ meȓa Arebbi iḥeǧeȓ-it!"
16 Iwqeƹ manaya ṯȓaṯa n ṯwaȓaṯin, ȓxeddnni ṯgaƹƹeḏ ṯcuqqet nni ɣar ujenna.
17 Wami iqqim Buṭrus itxemmam itƹejjeb ḏi ȓmaƹna n lwaḥi-ya iy iẓra, ȓxeddnnit iryazen nni iy d issekk Kurninyus ufin ṯaddarṯ n Simƹan, bedden ɣar ṯewwarṯ.
18 Ȓaɣan sseqsan: "Ma Simƹan umi qqaren Buṭrus aqaṯ ḏa ḏ anewji?"
19 Buṭrus ƹaḏ itxemmam ḏi lwaḥi nni, inna-as Arruḥ n Arebbi: "Qa ṯȓaṯa n iryazen rezzun xak.
20 Kkar hwa ɣarsen, ruḥ akiḏsen bȓa ma aḏ tcekkeḏ liʼanna ḏ nec iy ṯen d issekken."
21 Ihwa-d Buṭrus ɣar iryazen nni inna-asen: "Ḏ nec iy xef ṯrezzum. Minɣar d ṯusim?"
22 Nnan-as: "Issekk-aneɣ-d Kurninyus aƹaskari ameqqran n arrumanus. Netta ḏ ij n uryaz nican iteggweḏ Arebbi, tweqqaren-ṯ marra ȓqum n Ayṯ-Israʼil. Ṯenna-as ij n lmalaʼika n Arebbi: Sekk ɣar Buṭrus, aḏ d yas netta ɣar ṯeddarṯ nnec aḏas ṯṣennṭeḏ min ɣa yini."
23 Isiḏef-iṯen ɣar ḏaxeȓ isnewjew-iṯen.
Ṯiwecca nnes, ikkar Buṭrus iruḥ akiḏsen. Munen akiḏes ȓebƹaḍ n ayṯmas zi ṯendint n Yafa.
24 Farwecca nnesb yuweḍ Buṭrus ɣar ṯendint n Qayṣariya. Itraja-ṯen Kurninyus, akiḏes ȓebƹaḍ n ȓeḥbab nnes ḏ ȓebƹaḍ n imeddukaȓ nnes iy d iƹreḍ.
25 Wami yuweḍ Buṭrus ɣar ṯeddarṯ, iffeɣ-d ɣares Kurninyus iwḍa-yas ɣar iḍaren isejjeḏ-as.
26 Isbedd-iṯ Buṭrus x iḍaren inna-as: "Lla, kkar bedd, nec ḏ bnaḏem am cek am nec."
27 Yuḏef Buṭrus issaweȓ akiḏes yufa ḏinni aṭṭas n yiwḏan munen.
28 Inna-asen: "Ṯessnem belli iʼisraʼiliyen ɣarsen ḥram aḏ xellṭen ak ȓbarrani niɣ aḏ aḏfen ṯaddarṯ nsen. Maca Arebbi isfahem-ayi-d qbeȓ belli war qqareɣ i ḥadd qa cek ḥram niɣ mekruh.
29 Wami ḏayi d ṯȓaɣim usiɣ-d mebȓa ma aḏ iniɣ lla. Akenniw sseqsiɣ, mayemmi ɣari d ṯessekkem?"
30 Indeq-d Kurninyus inna-as: "Arbeƹiyyam zeg wami, am ȓweqṯ-a ɣar ṯȓaṯa uƹecci, nec tẓaǧiɣ ḏi ṯeddarṯ inu. Ƹlaɣafla ibedd-d zzaṯi ij uṯarras ɣares arruḍ itceƹciƹ.
31 Iqqar-ayi: A Kurninyus! Arebbi istajeb i ṯẓaǧiṯ nnec, ifekkar ḏi ṣṣaḏaqa nnec.
32 Sekk ɣar ṯendint n Yafa, awi-d Simƹan wenni umi qqaren Buṭrus, netta aqaṯ ḏ anewji ḏi ṯeddarṯ n yij n bu-yiȓemawen qqaren-as Simƹan, ṭṭarf i ȓebḥar.
33 X manaya ssekkeɣ-d ɣarek ḏeɣya, ṯeggiḏ mliḥ wami d ṯusiḏ. Neccin ȓexxu marra aqaneɣ neḥḍar zzaṯ i Arebbi bac a nṣenneṭ marra minzi c iweṣṣa Siḏi Arebbi."
34 Ibḏa Buṭrus issawaȓ inna-asen: "Ḏ ṣṣaḥ twaȓiɣ belli Arebbi war itegg bu s wuḏemawen jar yiwḏan,
35 maca Arebbi aḏ iqbeȓ iwḏan zi mkuȓ ȓgens iy ṯ iteggwḏen ig iteggen min iǧan nican.
36 Ṯessnem Arebbi issekk-d awaȓ nnes ɣar Ayṯ-Israʼil itbeccar-iṯen s Lʼinjil n ȓehna s Ƹisa Lmasiḥ, netta ḏ Siḏiṯneɣ n marra iwḏan.
37-38 Kenniw aqa ṯessnem min iweqƹen ḏi marra ṯamurṯ n Yahuḏiya, Yaḥya tuɣa itḥeddaṯ i yiwḏan aḏ ṭehharen s waman. Ssenni zi ṯmurṯ n Ljalil ibḏa Ƹisa naṣiri itbeccar wami ṯ iccur Arebbi s jjehḏ ḏ Arruḥ iqeddsen. Netta itraḥ zeg umcan ɣar unneɣni itegg ȓxir, isgenfa marra yinni iǧan swadday i ssulṭa n Ibȓis minzi Arebbi akiḏes.
39 Neccin ḏ ȓechuḏ x marra min igga Ƹisa ḏi ṯmurṯ n Ayṯ-Israʼil ḏ Lquds. Nɣin-ṯ wami ṯ refƹen x ṯeḥnact.c
40 Ḏi nhar wis ṯeȓtiyyam, Arebbi isekkar-iṯ-iḏ zi ȓmewṯ, iseḍhar-iṯ-iḏ.
41 Maci i marra ccaƹb, maca iseḍhar-iṯ-iḏ i ȓechuḏ iy ixḍar Arebbi zi qbeȓ, iƹni neccin iy kiḏes iccin iswin wami d ikkar zi ȓmewṯ.
42 Iweṣṣa-yaneɣ Ƹisa a nḥeddeṯ i ccaƹb, a necheḏ belli Arebbi ixḍar-iṯ aḏ iḥaseb yinni iddaren ḏ yinni immuṯen.
43 Marra lʼanbiya cehhḏen xas aqa marra yinni zzayes ɣa yamnen aḏasen twaɣfarent ȓmuƹṣiyaṯ nsen s yisem nnes."
44 Ƹaḏ issawaȓ Buṭrus ḏi manaya, ssenni ihwa-d Arruḥ iqeddsen x marra yinni itsȓan awaȓ nnes.
45 Ȓmuminin zeg Ayṯ-Israʼil iy d yusin akeḏ Buṭrus tƹejjben wami ufin Arruḥ iqeddsen itwafeyyeḍ uȓa x yinni war iǧin ca ḏ iʼisraʼiliyen.
46 Ȓaḥeqqac sȓin-asen ssawaȓen s luɣaṯ war iǧin bu nsen ḥemmḏen Arebbi.