Arrasul Buṭrus itxebbar jmaƹeṯ n ȓmuminin n Lquds
11
1 Menbaƹd, arrusul ḏ uwmaṯen iǧan ḏi Yahuḏiya sȓin qa uȓa ḏ yinni war iǧin zi Ayṯ-Israʼil qebȓen awaȓ n Arebbi.
2 Wami igaƹƹeḏ Buṭrus ɣar Lquds, ccin-ṯ s ȓhemm ȓmuminin nni n Ƹisa ig iticcen lhimma aṭṭas i ṭṭahareṯ.
3 Nnan-as: "Mayemmi ṯuḏfeḏ ɣar ṯeddarṯ n yinni war ṭehhiren ca ṯecciḏ akiḏsen aɣrum?"
4 Ibḏa Buṭrus itfessar-asen ṯa s ṯa, inna:
5 "Nec aqayi ḏi ṯendint n Yafa tẓaǧiɣ. Yuḥa-ayi-d Arebbi, ḏi lwaḥi ij n ȓḥajeṯ amecnaw ṯcuqqet ṯameqqrant twacedd zi ṯɣemmura nnes s arbeƹa ṯehwa-d zeg ujenna aȓ wami ḏayi d ṯuweḍ.
6 Xzareɣ ḏayes mliḥ, ẓriɣ lḥayawanaṯ igguren x arbeƹa iḍaren, ḏ ȓuḥuc, ḏ min itenḥuruḏen, ḏ yijḍaḍ ujenna.
7 Ssenni sȓiɣ ij n ṯmijja ṯeqqar-ayi: A Buṭrus, kkar, ɣareṣ, ecc!
8 Nniɣ-as: Lla walu a Siḏi! Qa nec ƹemmarṣ war ggiɣ min itwaḥsaben ḥram niɣ mekruh ḏeg uqemmum inu.
9 Ṯendeq-d ṯmijja nni wis marṯayen zeg ujenna ṯenna-ayi: Lla, war tḥarram ca can ȓḥajeṯ meȓa Arebbi iḥeǧeȓ-it!
10 Iwqeƹ-ayi manaya ṯȓaṯa n twaȓaṯin, ssenni igaƹƹeḏ kuȓci ɣar ujenna.
11 Ḏi ṯsaƹat nni bedden ṯȓaṯa n iryazen ɣar ṯeddarṯ nni mani ǧiɣ ḏ anewji, twassekken-d ɣari zi ṯendint n Qayṣariya.
12 Ssenni iweṣṣa-ayi Arruḥ n Arebbi inna-ayi ruḥ akisen bȓa ma aḏ tcekkeḏ. Ruḥen akiḏi setta-ya n ayṯma, nuḏef ɣar ṯeddarṯ n Kurninyus.
13 Iƹaweḏ-aneɣ mammec iẓra lmalaʼika ṯbedd-d ḏi ṯeddarṯ nnes ṯenna-as: Sekk iryazen ɣar ṯendint n Yafa bac aḏ d awin Simƹan umi qqaren Buṭrus.
14 Netta aḏac yini awaȓen iy zi ɣa ṯnejmeḏ, cek ḏ marra ayṯbab n ṯeddarṯ nnec.
15 Ssenni wami bḏiɣ ssawaȓeɣ, ihwa-d xasen Arruḥ iqeddsen mammec xaneɣ d ihwa ḏeg umezwaru.
16 Fekkareɣ-d min inna Siḏiṯneɣ qa Yaḥya iṭehhar iwḏan s waman, maca kenniw aḏ twaṭehharem s Arruḥ iqeddsen.
17 Arebbi meȓa yuca-asen amecnaw min ḏaneɣ yuca i neccin wami numen zi Siḏiṯneɣ Ƹisa Lmasiḥ, min ƹniɣ nec bac aḏ ƹarrḍeɣ i Arebbi?"
18 Yinni iḥḍaren wami sȓin i wawaȓ-a, sqaren ḥemḏen Arebbi nnan: "Xyar, Arebbi yuca-asen ttuba uȓa i yinni war iǧin zi Ayṯ-Israʼil bac aɣarsen ṯiȓi ṯuḏarṯ!"
Jmaƹeṯ n ȓmuminin iǧan ḏi ṯendint n Wanṭakya
19 Ƹlaḥsab aƹeddeb nni iy iweqƹen wami itwaneɣ Stifan, ȓmuminin kuȓ ijjen mani iruḥ. Ruḥen ḥetta aȓ Finiqya ḏ Qubruṣ ḏ Wanṭakya, war tbecciren ḏinni ḥadd s wawaȓ n Arebbi illa iʼisraʼiliyen.
20 Walakin ȓebƹaḍ n iryazen zi Qubruṣ ḏ Lqurina usin-d ɣar Wanṭakya, bḏan ssawaȓen akeḏ iyunaniyen tbeccaren-ṯen s Siḏiṯneɣ Ƹisa.
21 Siḏi Arebbi aqaṯ akiḏsen, umnen aṭṭas n yiwḏan, ḏewȓen ɣar Siḏiṯneɣ.
22 Yuweḍ ȓexbar-a ɣar jmaƹeṯ n ȓmuminin ḏi Lquds, ssenni ssekken Barnaba ɣar Wanṭakya.
23 Wami d yuweḍ, yufa mammec ṯen ibarek Arebbi. Ifareḥ itcejjaƹ-iṯen marra bac aḏ qqimen ḏeg ubriḏ n Siḏiṯneɣ s marra wuȓ nsen.
24 Barnaba netta ḏ ij n uryaz iṣbaḥ iccur s Arruḥ iqeddsen, itamen aṭṭas. U aṭṭas n yiwḏan umnen ḏi Siḏiṯneɣ.
25 Iruḥ Barnaba ɣar ṯendint n Ṭarsus irezzu x Cawul.
26 Wami ṯ yufa yuwi-ṯ-id akis ɣar ṯendint-a n Wanṭakya. Seƹḏun ƹam ikmeȓ akeḏ jmaƹeṯ n ȓmuminin, seȓmaḏen aṭṭas n yiwḏan. U ḏi Wanṭakya-ya ḏinni iy twasemman imeḥḍaren ṯwaȓa ṯamezwarut s <imasiḥiyen>.
27 Ḏi ȓiyyam nni hwan-d can n lʼanbiya zi Lquds ɣar Wanṭakya.
28 Ikkar ijjen zzaysen isem nnes Ɣabus, ixbar i ȓmuminin ḏinni s min ḏas inna Arruḥ n Arebbi, inna-asen qa aḏ iwqeƹ ij n buheyyuf ḏ ameqqran x ṯmurṯ marra (u ḏ ṣṣaḥ iwqeƹ manaya ḏi ȓweqṯ n lmalik Qayṣar Kludyus).
29 Kkaren imeḥḍaren tafqen ḥima aḏ ssekken kuȓ ijjen zzaysen cwayt n lmuƹawana ƹlaḥsab ṯizemmar nsen ɣar ayṯmaṯsen ig izeddɣen ḏi Yahuḏiya.
30 Amenni iy ggin, ucin lmuƹawana nni i Barnaba ḏ Cawul at siwḍen i imeqqranen n jmaƹeṯ n ȓmuminin iy iǧan ḏinni.