Ȓmewṯ n Arrasul Yaƹqub
12
1 Ḏi ȓweqṯ nni, azeǧiḏ Hirudus ibḏa itƹeddab ȓebƹaḍ zi jmaƹeṯ n ȓmuminin.
2 Netta yumar uca nɣin s ssif Yaƹqub umas n Yuḥanna.
3 Wami yufa belli manaya iƹjeb-asen i Ayṯ-Israʼil ikkar iṭṭef uȓa ḏ Buṭrus. Ḏi ȓiyyam n Ȓƹiḏ n Ṯefḍirṯ iy ḏi iwqeƹ manaya.
4 Iṭṭef-iṯ iggi-ṯ ḏi ȓeḥbes, isellem-iṯ i arbeƹa n lfirqaṯ n ȓƹaskar aṯ ḥḍan, ḏi mkuȓ lfirqa ḏayes arbeƹa. Inwa axas iḥkem zzaṯ i ccaƹb menbaƹd i Ȓƹiḏ Ameqqran.
5 Tƹessasen x Buṭrus ḏi ȓeḥbes, jmaƹeṯ n ȓmuminin niṯni tettaren xas i Arebbi.
Arrasul Buṭrus inejjem zi ȓeḥbes
6 Ǧireṯ nni ḏi d ɣa iṣebbeḥ Hirudus aḏ iḥkem x Buṭrus zzaṯ i ccaƹb, Buṭrus iṭṭeṣ jar ṯnayen n ȓƹaskar icedd s ṯnayen n snaseȓ. Ȓƹaskar ɣar ṯewwarṯ tƹessasen x ȓeḥbes.
7 Ȓxeddnnit ṯeḍhar-d ḏinni ij n lmalaʼika n Siḏi Arebbi, itceƹciƹ ij n nnur ḏi ȓeḥbes. Lmalaʼika nni ṯuwṯa Buṭrus ɣar uɣezḏis, ṯesfaq-iṯ-iḏ ṯenna-as: "Kkar ḏeɣya!" U snaseȓ nni twakksent zeg ifassen nnes.
8 Ṯenna-as lmalaʼika nni: "Ḥezzem, qqen ṯisiȓa nnec." Igga Buṭrus min ḏas ṯenna. Ṯenna-as: "Egg azeǧab nnec, ḏfar-ayi-d."
9 Ikkar iffeɣ iḏfar-it, netta war issin min tegg lmalaʼika nni ma ḏ ṣṣaḥ niɣ lla, itɣir-as qa yuḥa-yas-d Arebbi.
10 Ƹḏun x uƹessas amezwaru ḏ wenni wis ṯnayen. Uwḍen ɣar ṯewwarṯ n ȓeḥḏiḏ ig itawin ɣar ṯendint, ṯerzem waḥḏes ffɣen. Wami gguren ḏeg yij n zzenqeṯ, ȓxeddnnit ṯesmeḥ ḏayes lmalaʼika nni.
11 Ḏinni iy d yarra Buṭrus ȓbaȓ nnes inna: "Ȓexxu ssneɣ manaya ḏ lḥaqiqa qa Siḏi Arebbi issekk-ayi-d lmalaʼika nnes, isenjem-ayi-d zeg ifassen n Hirudus ḏ marra min rezzun aḏ ggen Ayṯ-Israʼil."
12 Wami ifṭen ḏi manaya, ȓxeddnnit iruḥ ɣar ṯeddarṯ n Maryam, yemmas n Yuḥanna umi qqaren Marqus. Tmunen ḏinni aṭṭas n yiwḏan tẓaǧan.
13 Buṭrus isqerqub ḏi ṯewwarṯ n barra, ij n ṯxeddant ṯruḥ aḏ terzem, qqaren-as Ruda.
14 Wami ṯeƹqeȓ awaȓ n Buṭrus ṯfareḥ aṭṭas. Qbeȓ ma aḏ terzem ṯawwarṯ, ṯeƹqeb-d tazzeȓ ṯexbar-iṯen belli Buṭrus aqaṯ ɣar ṯewwarṯ isqerqub.
15 Nnan-as: "Ma ṯbuhȓiḏ ma?" Maca nettaṯ metʼakkeda belli min ṯenna nican. Nnan-as: "Imken wanita ḏ buḥbeȓ n Buṭrus."
16 Iqqim Buṭrus isqerqub ḏi ṯewwarṯ. Wami ḏas rezmen, ufin-ṯ netta tƹejjben.
17 Iqqar-asen s ufus stukaṯ, iƹaweḏ-asen mammec iy ṯ isufeɣ Siḏi Arebbi zi ȓeḥbes. Inna-asen: "Xebbarem Yaƹqub ḏ ayṯmaṯneɣ s min iweqƹen." Iffeɣ iruḥ ɣar yij umcan nneɣnit.
18 Wami iṣbeḥ ȓḥaȓ iwqeƹ ij n ȓharaj imɣar jar ȓƹaskar ƹlaḥsab manis ikka Buṭrus.
19 Hirudus issekk axas rzun, war ṯ yufi ca. Wami ḏasen igga lʼistijwab i iƹessasen, yumar xasen aṯen nɣen.
Ȓmewṯ n uzeǧiḏ Hirudus
Ssenni iruḥ uzeǧiḏ Hirudus zi Yahuḏiya ɣar Qayṣariya iqqim ḏinni.
20 Tuɣa iɣḍeb x imezḏaɣ n ṯendint n Ṣur ḏ ṯendint n Ṣayda. Imezḏaɣ nni mcawaren mesfehamen ak Blastus netta ḏ naʼib n Hirudus, rezzun aḏ meṣȓaḥen ak uzeǧiḏ liʼanna lmakla nsen tekk-d zi ṯmurṯ n uzeǧiḏ.
21 Ḏeg yijjen n ȓmunasaba, ikkar Hirudus igga arruḍ n uzeǧiḏ, iqqim x lƹarc istxeṭṭib x imezḏaɣ n ṯmurṯ nni.
22 Niṯni ƹeyyḍen s jjehḏ qqaren: "Ṯmijja nnec am yijjen n arebbi, maci n bnaḏem!"
23 Ȓxeddnnit ij n lmalaʼika n Siḏi Arebbi ṯsehȓec Hirudus wami war iḥmiḏ ca Arebbi. Ɣeẓẓen-ṯ imiɣziwena immuṯ netta.
24 Maca awaȓ n Arebbi itentacer netta irenni.
25 Barnaba ḏ Cawul ḏewȓen-d zi Lquds wami kemmȓen ȓxeḏmeṯ nsen, uwin akiḏsen Yuḥanna umi qqaren Marqus.