Ȓmuminin ssekkan Barnaba ḏ Cawul aḏ beccaren
13
1 Ḏi jmaƹeṯ n ȓmuminin n ṯendint n Wanṭakya ḏinni lʼanbiya ḏ lmuƹallimin. Niṯni Barnaba, ḏ Simƹan umi qqaren Abercan, ḏ Luqyus zi Lqurina, ḏ Manahen wenni irebban zi ṯemzi ak uzeǧiḏ Hirudus, ḏ Cawul.
2 Wami ƹebbḏen Siḏi Arebbi tẓumman, inna-asen Arruḥ iqeddsen: Ƹezȓem-ayi-d Barnaba ḏ Cawul i ȓxeḏmeṯ umi ṯen ixḍareɣ.
3 Wami ẓummen ẓẓuǧen, ȓxeddnnit sersen xasen ifassen nsen ssekken-ṯen.
4 Issekk-iṯen Arruḥ iqeddsen ruḥen ɣar ṯendint n Slukya. Ssenni safaren ḏeg uɣarrabu ɣar ṯeyzirṯ n Qubruṣ.
5 Wami uwḍen ɣar ṯendint n Salamis bḏan tbeccaren ḏi ṯemziḏawin n Ayṯ-Israʼil s wawaȓ n Arebbi. Itƹawan-iṯen Yuḥanna.
6 Gguren ḏi ṯeyzirṯ nni amen-tekmeȓ aȓ wami uwḍen ɣar ṯendint n Bafus. Ufin ḏinni ij useḥḥar ḏ aʼisraʼili yarra ixef nnes ḏ nnabi qqaren-as Benyacuƹ.
7 Aqaṯ mliḥ akeḏ lƹamil wenni umi qqaren Sarjyus Bulus. Lƹamil nni ḏ ij n uryaz ḏ amiɣis, iȓaɣa-d i Barnaba ḏ Cawul ixes aḏas sȓemḏen awaȓ n Arebbi.
8 Walakin iƹarreḍ-asen useḥḥar nni Benyacuƹ (wenni umi qqaren s ṯyunaniṯ Alimas). Irezzu aḏ isbeƹƹeḏ lƹamil nni x lʼiman.
9 Ikkar Cawul iƹni Bulus iccur s Arruḥ iqeddsen ixzar ḏayes mliḥ ḏeg useḥḥar nni,
10 inna-as: "Cek ḏ mmis n Ibȓis. Cek ḏ ȓaƹḏu n marra min iǧan nican. Cek ṯeccureḏ s lḥila ḏ ṯeḥraymect! Ma ƹaḏ aqac tƹewwajeḏ ibriḏen iǧan nican n Siḏi Arebbi?
11 Ssa aȓ ṯsawent Siḏi Arebbi aqaṯ ḍeḏ nnec, aḏ tḏarɣȓeḏ war ṯẓerreḏ ṯfawṯ n ṯfuct aȓ yij n lmudda." Ȓxeddnnit ṯekka-as-d ṯecbabṯ i useḥḥar nni x ṯiṭṭawin itwaȓa ṯaǧest, iqqim itenneḍ irezzu uw ṯ ɣa ijarren s ufus.
12 Wami iẓra manayenni lƹamil yumen, iḏhec zi ṯɣuri n Siḏiṯneɣ.
Bulus ḏ Barnaba tbeccaren ḏi Wanṭakya ḏ Bisidya
13 Inya Bulus ḏ imeddukaȓ nnes ḏeg uɣarrabu, ruḥen zi ṯendint nni n Bafus ɣar ṯendint n Barja ḏi Pamfilya. Ismeḥ ḏaysen ḏinni Yuḥanna iḏweȓ-d ɣar Lquds.
14 Niṯni ffɣen zi ṯendint n Barja ruḥen ɣar ṯendint n Wanṭakya ḏi jwayeh n Bisidya. Uḏfen qqimen ḏi ṯemziḏa n Ayṯ-Israʼil ḏi nhar n ssebṯ.
15 Menbaƹd i ṯɣuri zi Lkutub n Ccariƹa n Musa ḏ lʼanbiya, ssekken arruyas n ṯemziḏa ɣar Barnaba ḏ Cawul nnan-asen: "Ay ayṯma, meȓa ɣarwem can wawaȓ iy zi ɣa ṯcejjƹem ccaƹb-a, siwȓem."
16 Ikkar iceyyar-asen Bulus s ufus inna-asen: "Ay iryazen n Ayṯ-Israʼil ḏ yinni iteggwḏen Arebbi, ṣennṭeṯ.
17 Fa Arebbi iǧan x ccaƹb-a n Ayṯ-Israʼil ixḍar ȓejḏuḏ nneɣ, irni lƹadad nsen wami niṯni zeddɣen ḏi Miṣra. Isufeɣ-iṯen ssenni s jjehḏ nnes.
18 Ṯumma iṣbar akiḏsen ḏeg uƹeṣṣay nsen can arbeƹin sna ḏi ṣṣaḥra.
19 Ṯumma iqḍa x sebƹa n ȓegnus ḏi ṯmurṯ n Kanƹan, iswarṯ ṯamurṯ nni i ȓejḏuḏ nneɣ.
20 Marra manayenni ikka xasen can arbeƹmiyya u xemsin sna. Ṯumma igga xasen ȓquḍaṯ aȓ ȓweqṯ nni n nnabi Ṣamwil.
21 Ṯumma ttaren-as i Arebbi aɣarsen yiȓi uzeǧiḏ nsen, yuca-asen Cawul mmis n Qis zi Ayṯ-Benyamin, iḥkem xasen arbeƹin iseggwusa.
22 Ṯumma ikkes-iṯ Arebbi, yarra Dawud ḏ azeǧiḏ xasen. Icheḏ xas inna: Ufiɣ Dawud mmis n Yassa ḏ ij uryaz iqbeȓ netta ȓxaḍar inu, aḏ igg marra min xseɣ.
23 Ṯumma zi ddurriṯ n Dawud, Arebbi issekk-d Ƹisa ɣar Ayṯ-Israʼil, iƹni wenni iy ṯen ɣa isenjmen, mammec ṯen iwƹeḏ zi qbeȓ.
24 Qbeȓ ma ɣarsen iraḥ Ƹisa, tuɣa ḏinni Yaḥya itbeccar marra ccaƹb n Ayṯ-Israʼil aḏ tuben aḏ ṭehharen s waman.
25 Wami Yaḥya ƹȓayen aḏ ikemmeȓ ȓxeḏmeṯ nnes inna-asen: Min ḏayi tarrim kenniw? Qa nec war ǧiɣ ca ḏ wenni iy trajam! Lla, maca aḏ d yas ijjen menbaƹd i nec, war sḏihiǧeɣ aḏas serxuɣ uȓa ḏ ifiȓan n ṯsiȓa iqqen ḏeg iḍaren nnes."
26 Inna-asen Bulus: "Ay ayṯma, a ṯarwa n Brahim ḏ yinni iteggwḏen Arebbi! Ḏ neccin umi d issekk Arebbi awaȓ-a iy zi ɣa nenjem.
27 Qa imezḏaɣ n Lquds ḏ arruyas nsen war ƹqiȓen ca Ƹisa-ya, war fhimen ca awaȓen n lʼanbiya iy qqaren ḏi lkutub ḏi ṯemziḏawin zi ssebṯ aȓ ssebṯ. Wami ḥekmen x Ƹisa s ȓmewṯ ffɣen-d wawaȓen iy nnan lʼanbiya.
28 Waxxa war ufin uȓa ḏ ij n ssabab iy zi ɣa xas ḥekmen s ȓmewṯ, ttaren-as i Bilaṭus aṯ ineɣ.
29 Wami ggin marra min tuɣa xas urin lʼanbiya, sehwan-ṯ-iḏ zi ṯeḥnact sersen-ṯ ḏeg unḍeȓ.
30 Maca Arebbi isekkar-iṯ-iḏ zi ȓmewṯ.
31 Ṯumma iḍehhar-d Ƹisa ḏeg waṭṭas n nhuraṯ i yinni tuɣa kiḏes igaƹƹḏen zi Ljalil ɣar Lquds. Ȓexxu yina ḏ ȓechuḏ ɣar ccaƹb.
32-33 Fa neccin netbeccar i kenniw s manaya. Iƹni Arebbi wami d isekkar Ƹisa zi ȓmewṯ ikemmeȓ min iwƹeḏ i ȓejḏuḏ nneɣ, ikemmeȓ-iṯ akiḏneɣ neccin iǧan ḏ ṯarwa nsen. Yura ḏi lkitab n Zzabur izȓi wis ṯnayen:
Cek ḏ mmi, nec nhara jjiɣ-cek-d.
34 Fa Arebbi isekkar-d Ƹisa zi ȓmewṯ iƹni ƹemmarṣ aḏ ikiccew. Amenni iqqar ḏi Lkitab: Aḏawem uceɣ lbaraka iṣfan, lbaraka ḏ ṣṣaḥ iy zi weƹḏeɣ nnabi Dawud.
35 Iqqar ƹaweḏ ḏi Lkitab: War tejjiḏ ca axeddam nnec iṣfan aḏ ikiccew.
36 Liʼanna Dawud wami ikemmeȓ min ixes Arebbi ḏi zman nnes immuṯ, itwanḍeȓ ṭṭarf i ȓejḏuḏ nnes, ikiccew.
37 Walakin wenni d isekkar Arebbi zi ȓmewṯ, netta war ikiccew ca.
38-39 Iḏen ay ayṯma, rzuɣ aḏ tessnem ttebcir iy kiḏwem itwaggen, iƹni s Ƹisa-ya aḏ twaɣfarent ȓmuƹṣiyaṯ nwem. Marra wenni zzayes ɣa yamnen as twaɣfarent marra ȓmuƹṣiyaṯ nnes, ȓmuƹṣiyaṯ-a war zemmarent aḏas twaɣfarent s Ccariƹa n Musa.
40 Iwa ḥḍaṯ ixef nwem ḥima war ḏawem itewqiƹ ca min urin lʼanbiya:
41 Xzareṯ a yinni itbuṣaren, tƹejjbeṯ fnaṯ.
Ḏi ȓiyyam nwem aḏ ggeɣ ṯimesȓayin
waxxa ixebbar-ikenniw zzaysent ca ḥadd,
ataf war timnem ca."
42 Wami kkaren Bulus ḏ Barnaba ḥima aḏ d ffɣen zi ṯemziḏa nni n Ayṯ-Israʼil, ttaren zzaysen yiwḏan nni ḥima aḏasen ḥeddṯen s manaya nhar n ssebt iy d ɣa yasen.
43 Wami d teffɣen zi ṯemziḏa, ḏfaren-ṯen aṭṭas n Ayṯ-Israʼil ḏ yinni iseȓmen ḏi ddin n Ayṯ-Israʼil iy teggwḏen Arebbi. Bulus ḏ Barnaba ssiwȓen akiḏsen cejjƹen-ṯen ḥima aḏ siɣin ḏi arḍa n Arebbi.
44 Ḏi ssebṯ iy d yusin, munen ƹȓayen marra ayṯbab n ṯendint ḥima aḏ ṣennṭen i wawaȓ n Siḏi Arebbi.
45 Wami ufin Ayṯ-Israʼil ȓɣaci nni, ḥesḏen aṭṭas arrusul bḏan tƹarraḍen i wawaȓ n Bulus, tukkaren-ṯ.
46 Bulus ḏ Barnaba nnan-asen s yij n zƹameṯ: "Tuɣa itxeṣṣa aḏawem nessiweȓ i kenniw ḏ imezwura s wawaȓ n Arebbi. Wami ṯugim, ṯḥekmem x yixef nwem belli war ṯesḏiheǧem ṯuḏarṯ n ȓebda, aqa ȓexxu neccin a nraḥ ɣar yinni war iǧin ca zi Ayṯ-Israʼil.
47 Liʼanna Siḏi Arebbi iweṣṣa-yaneɣ inna:
Arriɣ cek ḏ ṯfawṯ i marra ȓegnus,
ḥima iwḏan aḏ nejmen ḥetta aȓ ṭṭarf n ddunect."
48 Wami sȓin yinni war iǧin zi Ayṯ-Israʼil min inna Bulus, farḥen ḥemmḏen awaȓ n Siḏi Arebbi. Umnen marra yinni ixḍar Arebbi i ṯuḏarṯ n ȓebda.
49 Intacar wawaȓ n Siḏi Arebbi ḏi ṯmurṯ nni marra.
50 Maca Ayṯ-Israʼil samaren ṯimɣarin iy ḏaysent ddin ɣarsent lmartaba, ḏ imeqqranen n ṯendint. Teggen ssabab i yiwḏan ḥima aḏ ƹeddben Bulus ḏ Barnaba, uzzȓen xasen zi jjihet nni.
51 Kkaren Bulus ḏ Barnaba mesḥen ṯaƹejjact zeg iḍaren nsen am yij n chaḏeṯ xasen, ruḥen ɣar ṯendint n Ikunya.
52 Imeḥḍaren n ḏinni ccuren s ȓefraḥeṯ ḏ Arruḥ iqeddsen.