Bulus ḏ Barnaba tbeccaren ḏi ṯendint n Ikunya
14
1 Ḏi ṯendint n Ikunya uḏfen Bulus ḏ Barnaba marra ɣar ṯemziḏa n Ayṯ-Israʼil u s ttebcir nsen umnen aṭṭas n iʼisraʼiliyen ḏ iyunaniyen.
2 Walakin iʼisraʼiliyen iy yugin aḏ amnen samaren yinni war iǧin zi Ayṯ-Israʼil x ayṯmaṯneɣ, ƹemmaren-asen azeǧif.
3 Bulus ḏ Barnaba qqimen ḏinni aṭṭas n ȓweqṯ tbeccaren s Siḏiṯneɣ s yij n zƹameṯ. Igga Siḏiṯneɣ lmuƹjizaṯ ḏ lburhanaṯ x ifassen n Bulus ḏ Barnaba bac aḏ isbeyyen belli awaȓen nni iy tbeccaren x arḍa n Siḏiṯneɣ ḏ ṣṣaḥ.
4 Mesfraqen ayṯbab n ṯendint-a n Ikunya x ṯnayen. Ȓebƹaḍ zzaysen aqaṯen ak iʼisraʼiliyen, ȓebƹaḍ nneɣnit aqaṯen ak arrusul.
5 Iʼisraʼiliyen ḏ yinni war iǧin zi Ayṯ-Israʼil tafqen ak arruyas nsen aḏ ƹedden x arrusul, aṯen rejmen s uzru.
6-7 Arrin-d ȓexbar arrusul nni, rewȓen ɣar ṯendint n Listra ḏ ṯendint n Dirba ḏ marra jwayeh nni iy ḏasent yuḏsen tbeccaren ḏinni ḏi lwilaya n Likawniya.
Rejjmen arrasul Bulus s uzru ḏi ṯendint n Listra
8 Ḏi Listra ḏinni ij n uryaz ḏ anecruf mmuṯen-as iḍaren, zeg wami d ixȓeq war yuyur qaƹ.
9 Itsȓa i wawaȓ n Bulus. Ixzar ḏayes Bulus mliḥ, itwaȓa ḏayes lʼiman iy zi ɣa igenfa.
10 Inna-as s yij n ṯmijja ṯejheḏ: "Kkar, bedd nican x iḍaren nnec!" Inexḍef, ibḏa iggur.
11 Wami ẓrin ȓɣaci nni min igga Bulus, ƹeyyḍen nnan s luɣa n Liqunya: Aqa arebbiṯen ḏewȓen ḏ iwḏan hwan-d ɣarneɣ!
12 Semman-as i Barnaba <Zafas>, semman-as i Bulus <Hirmis> a liʼanna Bulus ig itbeccaren aṭṭas.
13 Yusa-d ȓemqeddem n lʼaṣnam Zafas ig itiȓin ḏi zzawyiṯ zzaṯ i ṯendint, yuwi-d iyenduzen yuwi-d ṯiqebbiḍin n nwar ɣar ṯewwura n ṯendint, ixes netta ḏ ccaƹb aḏasen qeddmen dbiḥeṯ i Barnaba ḏ Bulus.
14 Arrusul, iƹni Barnaba ḏ Bulus, wami sȓin manayenni kkaren cerrgen arruḍ nsen. Uḏfen ḏi ȓwesṭ n yiwḏan nni, ƹeyyḍen nnan-asen:
15 "Ay iryazen, mayemmi teggem manaya? Qa neccin ḏ iwḏan waha am kenniw am neccin kif-kif. Netbeccar-ikenniw bac aḏ tbeƹƹḏem i ṯmesȓayin-a war ineffƹen ca, aḏ tḏewȓem ɣar Arebbi iddaren iy d ixeȓqen ajenna ḏ ṯmurṯ ḏ ȓebḥar ḏ marra min ḏaysen.
16 Ḏi zman iƹḏun, Arebbi ijja marra ȓegnus aḏ ḏfaren ibriḏen iy xsen.
17 Walakin Arebbi isbeyyan-d ixef nnes s min ixeddem, iƹni itegg ȓxir iticc-awem anẓar zeg ujenna ḏ ṯfeǧaḥṯ ḏi ȓweqṯ nnes. Iteccar uȓawen nwem s ȓefraḥeṯ."
18 S wawaȓen-a Bulus ḏ Barnaba sbedden-ṯen, walakin waxxa amenni iqseḥ s waṭṭas ƹȓayen ȓɣaci nni qeddmen-asen dbiḥeṯ.
19 Menbaƹḏ usin-d can iʼisraʼiliyen zi Wanṭakya ḏ Ikunya samaren ȓɣaci nni, kkaren rejmen Bulus s uzru jarren-ṯ barra i ṯendint, tɣiȓ-asen immuṯ.
20 Walakin wami xas munen imeḥḍaren, ikkar-d iddar uca yuḏef ɣar ṯendint. Ṯiwecca nnes iffeɣ ak Barnaba iruḥ ɣar ṯendint n Dirba.
Teƹqaben-d ɣar ṯendint n Wanṭakya ḏi Surya
21 Beccaren ḏi ṯendint nni, arrin aṭṭas n yiwḏan ḏ imeḥḍaren. Ssenni ḏewȓen ɣar ṯneddamb n Listra ḏ Ikunya ḏ Wanṭakya.
22 Ggin uȓ ḏeg imeḥḍaren nni, cejjƹen-ṯen bac aḏ siɣin ḏi lʼiman nsen. Qqaren-asen: Labud axaneɣ ṯekk aṭṭas n tamara bac neccin ȓmuminin a naḏef ḏi ȓmulk n Arebbi.
23 Bulus ḏ Barnaba ixḍaren imeqqranen ḏi mkuȓ jmaƹeṯ n ȓmuminin. Ẓẓuǧen, ẓummen jjin-ṯen ḏeg ufus n Siḏi Arebbi iy zi umnen.
24 Ssenni ƹḏun x jwayeh n Bisidya, uwḍen ɣar jwayeh n Pamfilya.
25 Wami beccaren s wawaȓ n Arebbi ḏi ṯendint n Barja, ƹḏun ɣar ṯendint n Waṭalya.
26 Wami kemmȓen ȓxeḏmeṯ nni, ƹeqben ssenni ḏeg uɣarrabu ɣar Wanṭakya manis d usin qbeȓ, zi manis twakellfen s ȓxeḏmeṯ nni s arḍa n Arebbi.
27 Wami uwḍen, smunen jmaƹeṯ n ȓmuminin ƹawḏen-asen marra min igga Arebbi x ufus nsen ḏ mammec irzem-asen ṯawwarṯ n lʼiman i yinni war iǧin zi Ayṯ-Israʼil.
28 Seƹḏun aṭṭas n ȓweqṯ ḏinni ak imeḥḍaren.