Lƹalaqa jar imasiḥiyen ḏ Ccariƹa n Musa
15
1 Usin-d can iryazen zi Yahuḏiya seȓmaḏen ayṯmaṯneɣ ḏeg Wanṭakya nnan-asen: "War ṯzemmarem ca aḏ tnejmem illa meȓa ṯṭehharem ƹlaḥsab Ccariƹa n Musa."
2-3 Ruḥen Bulus ḏ Barnaba temnaqaren ak yinni iy d yusin zi Yahuḏiya, iwqeƹ ij n lxilaf ḏ ameqqran jarasen. Kkaren jmaƹeṯ nni n ȓmuminin ḏeg Wanṭakya ixḍaren Bulus ḏ Barnaba bac aḏ raḥen akeḏ ȓebƹaḍ n ȓmuminin nni ɣar Lquds bac aḏ sseqsan arrusul ḏ imeqqranen n jmaƹeṯ n ȓmuminin x lxilaf-a. Wami ssekken Bulus ḏ Barnaba ɣar Lquds, ruḥen niṯni u ḏeg ubriḏ nsen ƹḏun x Finiqya ḏ Samarya. Xebbaren ayṯmaṯneɣ ḏinni x mammec umnen uȓa ḏ yinni war iǧin zi Ayṯ-Israʼil, ȓexbar nni isfareḥ-iṯen aṭṭas marra.
4 Wami uwḍen ɣar Lquds, reḥḥben zzaysen jmaƹeṯ n ȓmuminin ḏ imeqqranen n jmaƹeṯ-a ḏ arrusul. Bulus ḏ Barnaba ƹawḏen-asen i niṯni marra min igga Arebbi x ufus nsen.
5 Kkaren ȓebƹaḍ n ȓmuminin zi ȓḥizeb n ifarrisiyen, nnan: Labud aḏ ṭehharen yinni war iǧin zi Ayṯ-Israʼil, aṯen ṯweṣṣam aḏ ṭaƹen i Ccariƹa n Musa.
6 Munen arrusul ḏ imeqqranen n jmaƹeṯ n ȓmuminin bac aḏ xzaren ḏi lxilaf-a.
7 Wami mnaqacen aṭṭas, ikkar Buṭrus ibedd inna-asen: "Ay ayṯma, aqa ṯessnem belli aṭṭas zeg wami iy ḏayi ixḍar Arebbi zzaywem bac yinni war iǧin zi Ayṯ-Israʼil aḏ sȓen zeg uqemmum inu awaȓ n Lʼinjil, aḏ amnen.
8 Arebbi issen uȓawen nneɣ, iseḍhar-d netta belli iqbeȓ-iṯen wami ḏasen yuca Arruḥ iqeddsen mammec ḏaneɣ ṯ yuca i neccin.
9 War iggi bu s wuḏemawen jaraneɣ, isireḏ-asen uȓawen nsen wami umnen.
10 Ȓexxu mayemmi kenniw ṯzaƹmem aḏ teẓrem Arebbi min ɣa igg, teggem dqeȓ n ṯzayȓuta x yirawen n imeḥḍaren? Dqeȓ nni tuɣa war nzemmar aṯ neysi lla neccin, lla ȓejḏuḏ nneɣ.
11 Innama ntamen belli neccin nnejjem s arḍa n Siḏiṯneɣ Ƹisa mammec nejjmen uȓa ḏ yinni war iǧin zi Ayṯ-Israʼil."
12 Sqaren marra jmaƹeṯ nni, tesȓan i Barnaba ḏ Bulus. Niṯni ssawaȓen x lmuƹjizaṯ ḏ lburhanaṯ igga Arebbi x ufus nsen jar yinni war iǧin zi Ayṯ-Israʼil.
13 Wami kemmȓen awaȓ nsen, indeq-d Yaƹqub inna-asen: "Ay ayṯma, ṣennṭeṯ ɣari!
14 Ixbar Simƹan mammec ifqeḏ Arebbi zeg umezwaru yinni war iǧin zi Ayṯ-Israʼil, aḏ ixḍar Arebbi ca zzaysen aḏ iȓin ḏ ccaƹb nnes.
15 Manaya itas-d ak min nnan lʼanbiya zi zman, mammec iqqar Lkitab:
16 Menbaƹd i manaya aḏ d ḏewȓeɣ,
aḏ sbeddeɣ ƹaweḏ aqiḍun n Dawud iy iwḍan,
aḏ sgaƹƹḏeɣ ƹaweḏ min inheḏmen aṯ ƹeḏȓeɣ.
17-18 Bac aḏ rzun x Siḏi Arebbi yinni iqqimen,
axas rzun marra yinni war iǧin zi Ayṯ-Israʼil iy iysin isem inu.
Ammu iqqar Siḏi Arebbi
ṯimesȓayin-a iy ǧant zi zman,
ȓexxu isfehhem-iṯent-id."
19 Inna-asen Yaƹqub: "X manaya twaȓiɣ war nseqsaḥ ca x yinni war iǧin zi Ayṯ-Israʼil ig itamnen ȓexxu zi Arebbi.
20 Walakin aḏasen nari ṯabrat ḥima war tqarriben aȓ lmakla iy t qeddmen i lʼaṣnam, ḏ lfasad, ḏ min ijeyyfen, ḏ iḏammen.
21 Liʼanna zi zman tḥeddaṯen iwḏan s Ccariƹa n Musa ḏi mkuȓ ṯendint, qqaren-t mkuȓ ssebṯ ḏi ṯemziḏawin n Ayṯ-Israʼil."
Ṯabrat i ȓmuminin iy war iǧin ḏ iʼisraʼiliyen
22 X manaya arrusul ḏ imeqqranen n jmaƹeṯ n ȓmuminin ḏ marra jmaƹeṯ n ȓmuminin ggin aḏ ixḍaren can n iryazen zzaysen, aṯen ssekken ɣar Wanṭakya ak Bulus ḏ Barnaba. Ixḍaren Sila ḏ Yahuḏa umi qqaren Barsaba, niṯni ɣarsen ij n umcan ḏ ameqqran jar ȓmuminin.
23 Ssekken akiḏsen ṯabrat-a nnan-asen:
"Ay ayṯmaṯneɣ war iǧin ca zi Ayṯ-Israʼil ig izeddɣen ḏi ṯendint n Wanṭakya ḏ Surya ḏ lʼiqlim n Kilikya, netseǧam xawem arrusul ḏ imeqqranen n jmaƹeṯ n ȓmuminin.
24 Netsȓa belli can yiwḏan zzayneɣ usin-d ɣarwem mebȓa lʼiḏen nneɣ, u niṯni seddƹen-kenniw, siḏfen ḏaywem ccekk s wawaȓ nsen.
25 Neccin marra iḏneɣ ntafeq, nixḍar can n iryazen aṯen d nessekk ɣarwem akeḏ imƹizzen nneɣ Barnaba ḏ Bulus.
26 Iryazen-a ɣamaren s ṯuḏarṯ nsen x yisem n Siḏiṯneɣ Ƹisa Lmasiḥ.
27 Nessekk-awem-d Yahuḏa ḏ Sila bac aḏawem inin s uqemmum nsen min ḏawem d nura ḏi ṯebrat-a.
28 Neccin ḏ Arruḥ iqeddsen netwaȓa mliḥ meȓa war xawem ntegg dqeȓ aṭṭas illa min iǧan labud.
29 Iƹni aḏ tbeƹƹḏem x lmakla itwaqeddmen i lʼaṣnam, ḏ iḏammen, ḏ min ijeyyfen, ḏ lfasad. Meȓa ṯbeƹƹḏem x ṯemsȓayin-a aḏ teggem mliḥ.
Akenniw iƹawen Arebbi."
30 Yina itwassekken uwḍen ɣar Wanṭakya, smunen jmaƹeṯ n ȓmuminin ucin-asen ṯabrat nni.
31 Wami t ɣrin jmaƹeṯ nni farḥen aṭṭas liʼanna ṯcejjeƹ-iṯen.
32 Yahuḏa ḏ Sila niṯni ḏ l'anbiya, cejjƹen ȓmuminin s waṭṭas n wawaȓen, ggin ḏaysen uȓ.
33 Qqimen dinni can n ȓweqṯ, menbaƹd ssekken-ṯen ȓmuminin nni ḏi ȓehna ɣar yinni iy ṯen d issekken.
34 {Walakin Sila igga aḏ iqqim ḏinni.}
35 Bulus ḏ Barnaba qqimen ḏi Wanṭakya, seȓmaḏen tbeccaren s wawaȓ n Siḏi Arebbi, niṯni ḏ waṭṭas n yiwḏan.
Lxilaf jar arrasul Bulus ḏ Barnaba
36 Ṯeƹḏu can ȓweqṯ, inna-as Bulus i Barnaba: Yallah, a neḏweȓ ɣar ayṯmaṯneɣ ḏi mkuȓ ṯendint mani nbeccar s wawaȓ n Siḏi Arebbi, a nexzar mammec ǧan.
37 Barnaba ixes aḏ yawi akiḏsen Yuḥanna wenni umi qqaren Marqus.
38 Bulus war ixes ca aṯ awin akiḏsen, minzi Marqus tuɣa ismeḥ ḏaysen ḏi Pamfilya war kisen iqqim ca ḏi ȓxeḏmeṯ nni.
39 War tifqen qaƹ ḏi ṯmesȓayṯ nni, kuȓ ijjen manis ikka. Barnaba isafer ḏeg uɣarrabu akeḏ Marqus ɣar Qubruṣ.
40 Bulus netta ixḍar Sila ffɣen, kellfen-ṯen ȓmuminin s ȓxeḏmeṯ nni s arḍa n Siḏiṯneɣ.
41 Iruḥ ɣar Surya ḏ lʼiqlim n Kilikya, itegg uȓ ḏi ṯjumaƹ n ȓmuminin.