Itmun Timuṯawus ak Arrasul Bulus ḏ Sila
16
1 Yuweḍ Bulus ɣar ṯendint n Dirba ḏ ṯendint n Listra, yufa ḏinni ij umeḥḍar qqaren-as Timuṯawus. Yemmas nettaṯ ḏ ṯaʼisraʼiliṯ ḏ ȓmumina, babas netta ḏ ayunani.
2 Ayṯmaṯneɣ iǧan ḏi ṯendint n Ikunya ḏ Listra ssiwȓen mliḥ x Timuṯawus.
3 Iṭehhar-iṯ Bulus wami ixes aṯ yawi akiḏes. Igga-yas amenni ƹlaḥsab iʼisraʼiliyen iǧan ḏeg imucan nni, niṯni marra ssnen belli babas ḏ ayunani.
4 Xmi iggur Bulus ḏ imeddukaȓ nnes zeg ubilaj ɣar unneɣni iqqar-asen ȓuṣiyaṯ nni ṯinni iy ggin arrusul ḏ imeqqranen n jmaƹeṯ n ȓmuminin ḏi Lqudsa ḥima aṯent ḏfaren yiwḏan.
5 Amenni ṯijumaƹ n ȓmuminin tejhiḏent ḏi lʼiman, kuȓ nhar itwarni lƹadad nsent.
Lwaḥi iy d ihwan zi Arebbi i Bulus ḏi ṯendint n Tarwas
6 Bulus ḏ imeddukaȓ nnes kkin x jwayeh n Farijya ḏ Galaṭya liʼanna Arruḥ iqeddsen war ṯen ijji ca aḏ beccaren s wawaȓ n Arebbi ḏi lʼiqlim n Asya.
7 Wami uwḍen ɣar lḥudud ak Misya, qeǧben aḏ aḏfen lʼiqlim n Biṯinya maca war ṯen ijji ca Arruḥ n Ƹisa.
8 S manaya semḥen ḏi Misya hwan ɣar ṯendint n Tarwas.
9 Ǧiȓeṯ nni ihwa-d ij n lwaḥi x Bulus iẓra ij n uṯarras zi lʼiqlim n Masidunya ibedd itettar zzayes, iqqar-as zwa-d ɣarneɣ ɣar Masidunya ƹawen-aneɣ.
10 Wami ṣafi iẓra lwaḥi nni Bulus, nekkar nsewjeḏ ḥima a nsafer ȓxeddnnit ɣar lʼiqlim n Masidunya. Nefhem belli Arebbi itȓaɣa-d xaneɣ aḏasen nbeccar ḏinni.
Arrasul Bulus ḏ Sila tbeccaren ḏi ṯendint n Filippi
11 Ssenni nsafer ḏeg uɣarrabu zi ṯendint n Tarwas, nruḥ nican ɣar ṯendint n Samutrakya. Ṯiwecca nnes nruḥ ɣar ṯendint n Niyabulis.
12 Ssenni nruḥ ɣar Filippi, nettaṯ ḏ ij n ṯendint iǧan ḏi lwilaya ṯamezwarut n lʼiqlim n Masidunya, staƹmaren-teṯ irumaniyen. Neqqim ḏinni ḏi ṯendint nni ȓebƹaḍ n wussan.
13 Ḏi nhar n ssebṯ n lƹibada neffeɣ zi ṯewwarṯ n ṯendint nruḥ ɣar ṭṭarf n yiɣzar, tɣiȓ-aneɣ a naf ḏinni ij n umcan n ṯẓaǧiṯ. Neqqim nessawaȓ akeḏ ṯemɣarin nni iy nufa ḏinni imunen.
14 Akisent ḏinni ij n ṯemɣarṯ ṯesȓa-yaneɣ qqaren-as Lidya. Nettaṯ zi ṯendint n Ṯiyatra ṯeznuza ṯcuqqet nni iy iɣȓan llun nnes ḏ lila,b ṯƹebbeḏ Arebbi. Irzem-as Siḏi Arebbi uȓ nnes bac aḏ tṣenneṭ i wawaȓ n Bulus.
15 Wami ṯṭehhar s waman nettaṯ ḏ ȓeḥbab nnes, ṯettar zzayneɣ ṯenna-aneɣ: "Araḥem-d ɣar ṯeddarṯ inu qqimeṯ akiḏi meȓa ṯḥesbem-ayi umneɣ zi Siḏi Arebbi." Ṯḥeccem-aneɣ nettaṯ aȓ wami neqbeȓ.
Arrasul Bulus ḏ Sila twaḥebbsen ḏi ṯendint n Filippi
16 Ij n nhar wami nruḥ ɣaȓ umcan nni mani tẓaǧan yiwḏan, ṯemseȓqa akiḏneɣ ij n ṯismeɣṯ ḏ ṯakehhant tawi-d s ssiḥer nnes aṭṭas n tmenyaṯ i ayṯbab nnes.
17 Tbaƹ-aneɣ-d neccin ḏ Bulus tƹeyyaḍ ṯeqqar qa iryazen-a ƹebbḏen Arebbi yuƹȓan, tbeccaren-kenniw s ubriḏ iy zi ɣa ṯnejmem!
18 Ṯegga manayenni aṭṭas n nhuraṯ. Bulus war ḏas iƹjib bu ȓḥaȓ, ineqȓeb ɣares inna-as i jjen nni iy ḏayes: "Nec umareɣ-cek s yisem n Ƹisa Lmasiḥ azzayes ṯeffɣeḏ." Ȓxeddnnit iffeɣ jjen nni zzayes ḏinni.
19 Wami ayṯbab n ṯismeɣṯ nni ufin belli lʼimkaniya n lmanda nsen ṣafi ṯneqḍeƹ xasen, kkaren ṭṭfen Bulus ḏ Sila jarren-ṯen ɣar ssaḥa ɣar lḥukkam.
20 Qeddmen-ṯen ɣar lḥukkam nnan-asen: "Iryazen-a niṯni ḏ iʼisraʼiliyen teggen-aneɣ ȓfawḍa ḏi ṯendint.
21 Seȓmaḏen lƹadaṯ war nzemmar aṯent neqbeȓ war nzemmar azzaysent nexḏem, minzi neccin ḏ irumaniyen."
22 Ȓxeddnnit munen ȓɣaci hejmen x Bulus ḏ Sila. Lḥukkam nni cerrgen-asen arruḍ umaren bac aḏasen ucen aƹmuḏ.
23 Uwṯin-ṯen aṭṭas s uƹmuḏ ggin-ṯen ḏi ȓeḥbes. Nnan-as i lḥaris n ȓeḥbes ƹess xasen mliḥ.
24 Wami isȓa awaȓ-a, iruḥ netta iggi-ṯen ɣar ḏaxeȓ qaƹ n ȓeḥbes icedd-asen iḍaren nsen ɣar ikeccuḍen iḏeqȓen.
25 Ɣar uzyen n ǧiȓeṯ Bulus ḏ Sila tẓaǧan tɣennajen izȓan i Arebbi, tesȓan-asen imeḥbas.
26 Ƹlaɣafla iwqeƹ ij n zzinzal ḏ ameqqran aȓ wami nhezzen uȓa ḏ dsasaṯ n ȓeḥbes. Rezment ṯewwura nnes marra, ƹaweḏ nufsȓent-asen snaseȓ i imeḥbas marra.
27 Wami d ifaq lḥaris n ȓeḥbes zeg yiḍeṣ yufa ṯiwwura n ȓeḥbes rezment tɣiȓ-as imeḥbas nni rewȓen, ijbeḏ-d ssif ḥima aḏ ineɣ ixef nnes.
28 Iȓaɣa-yas-d Bulus s jheḏ inna-as: "Lla! Ɣarek aḏ tḍarreḏ ixef nnec, neccin ƹaḏ aqaneɣ ḏa marra iḏneɣ!"
29 Inna lḥaris n ȓeḥbes ceƹƹȓem ȓefnaraṯ. Iruḥ itazzeȓ ɣar Bulus ḏ Sila isejjeḏ-asen ɣar iḍaren nsen amenni iterjiji.
30 Isufeɣ-iṯen-d inna-asen: "A siyaḏi, min ɣa ggeɣ bac aḏ nejmeɣ?"
31 Nnan-as: "Amen zi Siḏiṯneɣ Ƹisa aḏ tnejmeḏ cek ḏ ȓeḥbab nnec."
32 Beccaren-ṯ netta ḏ marra ȓeḥbab nnes s wawaȓ n Siḏiṯneɣ.
33 Ḏi ṯsaƹat nni s ǧiȓeṯ, yuwi-ṯen lḥaris n ȓeḥbes imseḥ-asen ijarriḥen. Ṣafi ȓxeddnnit iṭehhar s waman netta ḏ ȓeḥbab nnes marra.
34 Yuwi-ṯen ɣar ṯeddarṯ nnes yuca-asen aḏ ccen. Ifareḥ netta ḏ marra ȓeḥbab nnes wami umnen zi Arebbi.
35 Wami d iṣbeḥ ȓḥaȓ, lḥukkam ssekken imxazniyen aḏas inin i lḥaris n ȓeḥbes: Ḍȓeq-asen i iryazen-a!
36 Lḥaris ixebbar Bulus s wawaȓ-a inna-as qa umaren lḥukkam kenniw aḏ twaḍeȓqem. Ffɣeṯ, ruḥeṯ ḏi ȓehna!
37 Inna-asen Bulus i imxazniyen nni: "Uwṯin-aneɣ zzaṯ i yiwḏan bȓa ȓqanun ssenni nḍaren-aneɣ ḏi ȓeḥbes, walakin neccin ɣarneɣ ljinsiya n Ruma. Ȓexxu niṯni, ma rezzun aḏaneɣ sufɣen amenni waha bȓa ma aḏ d yarr ȓexbar ḥadd? Lla, itxeṣṣa aḏ d asen lḥukkam nni s yixef nsen aḏaneɣ sufɣen!"
38 Imxazniyen nni ruḥen ƹawḏen-asen awaȓ-a i lḥukkam, niṯni nxeȓƹen wami ssnen belli Bulus ḏ Sila ḏ irumaniyen.
39 Usin-d ɣarsen tettaren zzaysen lmusamaḥa, sufɣen-ṯen zi ȓeḥbes ttaren zzaysen aḏ ffɣen zi ṯendint.
40 Wami ffɣen zi ȓeḥbes ruḥen ɣar ṯeddarṯ n Lidya. Ẓrin ḏinni ayṯmaṯsen cejjƹen-ṯen, ssenni uyuren.