Twaƹeddaben Bulus ḏ Sila ḏi ṯendint n Salunik
17
1 Ƹḏun x ṯendint n Umfibulis ḏ ṯendint n Ubulunya, uwḍen ɣar ṯendint n Salunik mani ṯeǧa ḏinni ij n ṯemziḏa n Ayṯ-Israʼil.
2 Yuḏef Bulus ɣar ṯemziḏa nni am itegg ȓebda. Ḏi ṯȓaṯa n simanaṯ mkuȓ ssebṯ n lƹibada itemnaqac akiḏsen iqqar min yurin ḏi Lkitab.
3 Isefham-iṯen isbeyyan-asen mammec wa labud Lmasiḥ aḏ itwaƹeddeb aḏ d ikkar zi ȓmewṯ. Inna-asen qa Ƹisa-ya iy zi kenniw tbeccareɣ netta s yixef nnes ḏ Lmasiḥ.
4 Qtanƹen ȓebƹaḍ zzaysen munen akeḏ Bulus ḏ Sila. Akisen xarebbi n iyunaniyen iy iteggwḏen Arebbi. Akisen ƹaweḏ aṭṭas n ṯemɣarin iy ɣar ṯeǧa lmartaba.
5 Walakin iʼisraʼiliyen nneɣnit ḥesḏen-ṯen, kkaren smunen-d zi ssuq ij n lmejmuƹ n ikruccaren iƹeffanen bac aḏ ggen sdaƹ, snekkaren ȓfawḍa ḏi ṯendint. Hejmen x ṯeddarṯ n yijjen umi qqaren Yasin rezzun x Bulus ḏ Sila aṯen sellmen i ȓɣaci.
6 Wami war ṯen ufin ca, jarren Yasin ḏ ȓebƹaḍ n ayṯmaṯneɣ ɣar lḥukkam n ṯendint. Snekkaren ṯɣuyyiṯ qqaren: "Iryazen nni iy ggin lfitna ḏi marra ddunect, ȓexxu aqaṯen ḏa
7 ḏ inewjiwen ɣar Yasin, wanita. Marra iḏsen ƹeṣṣan ȓqanun n lmalik Qayṣar qqaren qa ḏinni ij n uzeǧiḏ nneɣni qqaren-as Ƹisa."
8 Wami ccaƹb ḏ lḥukkam n ṯendint sȓin i manaya, ikkar ij n sdaƹ ḏ ameqqran.
9 Ṭṭfen lkafala zi Yasin ḏ inneɣnit, ḍeȓqen-asen.
Arrasul Bulus ḏ Sila ḏi ṯendint n Birya
10 Ȓxeddnnit s ǧiȓeṯ nni ayṯmaṯneɣ ssekken Bulus ḏ Sila ɣar ṯendint umi qqaren Birya. Wami uwḍen, uḏfen ɣar ṯemziḏa n Ayṯ-Israʼil.
11 Ayṯ-Birya niṯni ḥsen zeg Ayṯ-Salunik, qebbȓen ḏeɣya s ȓefraḥeṯ min ḏasen xebbaren. Qqaren ḏi Lkitab kuȓ nhar bac aḏ ssnen min seȓmaḏen Bulus ḏ Sila ma ḏ ṣṣaḥ niɣ lla.
12 Umnen aṭṭas zzaysen. Umnent xarebbi n ṯemɣarin ṯiyunaniyin ɣarsent lmartaba, umnen ƹaweḏ aṭṭas n iyunaniyen.
13 Iʼisraʼiliyen nni ḏi ṯendint n Salunik arrin-d ȓexbar belli Bulus itbeccar s wawaȓ n Arebbi ḏi ṯendint n Birya. Usin-d ɣar Birya bḏan teggen ixarwiḍen ḏinni shajen ȓɣaci.
14 Ȓxeddnnit ayṯmaṯneɣ ssekken Bulus ɣar ȓebḥar, iqqim Sila ḏ Timuṯawus ḏi ṯendint n Birya.
15 Iryazen iy ruḥen ak Bulus siwḍen-ṯ ɣar ṯendint n Utina ssenni ḏewȓen-d. Iweṣṣa-ṯen Bulus inna-asen: Inim-asen i Sila ḏ Timuṯawus asem-d ɣari ḏeɣya.
Arrasul Bulus itbeccar ḏi ṯendint n Utina
16 Bulus wami itraja Sila ḏ Timuṯawus ḏi ṯendint nni n Utina itwaȓa ṯandint nni ṯƹemmar s lʼaṣnam war ḏas iƹjib bu ȓḥaȓ.
17 Itemnaqac ḏi ṯemziḏa akeḏ iʼisraʼiliyen ḏ inneɣnit iteggwḏen Arebbi, ƹaweḏ yinni iy keḏ itemseȓqa kuȓ nhar ḏi ssaḥa n ṯendint.
18 Can n lfalasifa umi qqaren ibikuriyen ḏ can lfalasifa nneɣnit umi qqaren iriwaqiyen bḏan temnaqacen akeḏ Bulus, nnan ȓebƹaḍ zzaysen min ixes aḏ yini wanita ig itpeȓpiȓen? Nnan yiwḏan nneɣnit imken itbeccar s arebbiṯen n dduwal. Nnan manaya ȓaḥeqqac Bulus itbeccar s Ƹisa ḏ lqiyama.
19 Uwin Bulus nedhen-ṯ ɣar lmajlis nsen umi qqaren Aryubagus nnan-as: "Nrezzu a nessen ṯɣuri-ya n jḏiḏ iy zi ṯseȓmaḏeḏ cek.
20 Ṯimesȓayin-a netƹejjeb ḏaysent, ƹemmarṣ war nesȓi ca neccin x min ṯeqqareḏ cek. Qa nxes a nessen ȓmaƹna nsent."
21 (Iwa marra imezḏaɣ n Utina ḏ ȓbarrani iy ḏayes izeḏɣen sƹeddun marra ȓweqṯ nsen ḏeg wawaȓ niɣ ḏ uṣenneṭ n can ȓḥajeṯ ḏ jḏiḏ.)
22 Ȓxeddnnit ibedd Bulus ḏi ȓwesṭ n lmajlis nni inna-asen: "Ay iryazen n Utina, aqa twaȓiɣ kenniw ṯceɣȓem ḏi ddin aṭṭas.
23 Axmi tsariɣ nec, xezzareɣ mliḥ ḏi zzawyaṯ nwem mani ṯƹebbḏem. Ẓriɣ ij n ȓmeḏbaḥ urin ḏayes, ṯira nni qqarent: Arebbi nni iy war nessin ca. Cuf, Arebbi nni iy ṯƹebbḏem kenniw war ṯ ṯessinem ca, qa aḏawem iniɣ nec min iƹna netta.
24 Ixȓeq-d ddunect ḏ marra min ḏayes, netta ḏ Siḏi Arebbi n ujenna ḏ ṯmurṯ. War izeddeɣ ḏi zzawyaṯ iy bnan yiwḏan s ifassen nsen.
25 War xas tsexxiren ifassen n bnaḏem, netta war iteḥḏiji walu. Ḏ netta iy d iticcen i marra iwḏan ṯuḏarṯ ḏ buḥbeȓ ḏ marra ṯimesȓayin nneɣnit.
26 Zeg yij n bnaḏem iy zi d ixȓeq marra ȓegnus bac aḏ zeḏɣen ḏi ṯmurṯ amen-tekmeȓ. Iḥedd-asen meȓmi iy ɣa ƹicen ḏ mani iy ɣa zeḏɣen.
27 Igga ammu Arebbi ḥima axas rzun yiwḏan, aɣares swizzḏen s ifassen nsen aṯ afen. Innama netta kuȓ ijjen zzayneɣ war xas iggwij ca.
28 Zzayes netta iy neddar, zzayes netta iy ntenhezza, zzayes netta iy neǧa. Mammec nnan uȓa ḏ ȓebƹaḍ n ccuƹaraʼ nwem qa neccin ḏ ṯarwa nnes.
29 Cuf, neccin meȓa ḏ ṯarwa n Arebbi, itxeṣṣa-yaneɣ war netfekkir ca belli wenni yuƹȓan qa netta am dheb niɣ am nnuqarṯ niɣ am uzru. Arebbi war iǧi bu am lʼaṣnam ig itṣenaƹ bnaḏem s lfikra nnes ḏ ṯzemmar nnes.
30 Manaya Arebbi war t yuwi ca ḏi zman n ȓeqfaȓeṯ, walakin ȓexxu yumar marra iwḏan ḏi mkuȓ amcan bac aḏ tuben.
31 Maɣar? Liʼanna Arebbi izemmem ij n nhar iy ḏi ɣa iḥaseb marra iwḏan s ȓḥaqq x ufus n bnaḏem nni ig ixḍar. Yuca ddalil i marra iwḏan x manaya wami ṯiḏ isekkar zi ȓmewṯ."
32 Wami tesȓan x yiwḏan aḏ d kkaren zi ȓmewṯ ḏi lqiyama ḍeḥcen ȓebƹaḍ iḏsen, walakin nnan-as inneɣnit qa nxes azzayek nṣenneṭ ṯwaȓa nneɣnit x manaya.
33 Ssenni iffeɣ Bulus zi ȓwesṭ nsen.
34 Ȓebƹaḍ zzaysen umnen munen ak Bulus. Zzaysen Diyunisyus zi lmajlis n Aryubagus ḏ yij n ṯemɣarṯ qqaren-as Damaris ḏ inneɣni akiḏsen.