Arrasul Bulus ḏi ṯendint n Kurinṯ
18
1 Ssenni iffeɣ Bulus zi ṯendint n Utina iruḥ ɣar ṯendint n Kurinṯ.
2-3 Yufa ḏinni ij n uʼisraʼili mmis n lʼiqlim n Bunṭus qqaren-as Akilas. Netta tuɣa yusa-d ḏeg wussan nni zi ṯmurṯ n Iṭalya netta ḏ ṯemɣarṯ nnes umi qqaren Briskila. Liʼanna lmalik Kludyus tuɣa yumar x marra Ayṯ-Israʼil yuzzeȓ xasen zi Ruma. Iruḥ Bulus ɣar Wakilas ḏ Briskila aṯen iẓer. Iqqim netta akiḏsen ixeddem minzi ȓxeḏmeṯ nsen ḏ icten iƹni teggen iqiḍan.
4 Mkuȓ nhar n ssebṯ n lƹibada itemnaqac ak Ayṯ-Israʼil ḏ iyunaniyen ḏi ṯemziḏa bac aṯen iseqneƹ.
5 Wami d xeḍȓen Sila ḏ Timuṯawus zi lʼiqlim n Masidunya, ibḏa Bulus ixeddem ɣir ḏi ttebcir waha, icehheḏ i Ayṯ-Israʼil belli Ƹisa netta ḏ Lmasiḥ.
6 Wami bḏan tƹarraḍen-as tbuṣaren xas, imseḥ arruḍ nnes am yij n chaḏeṯ xasen inna-asen: "Iḏammen nwem x yirawen nwem, aqa nec tberriɣ azeǧif inu. Ssa aȓ ṯsawent aḏ raḥeɣ ɣar yinni war iǧin ḏ Ayṯ-Israʼil."
7 Iffeɣ-d ssenni iruḥ ɣar ṯeddarṯ n yij uryaz iƹebbḏen Arebbi qqaren-as Titus Yustus, ṯaddarṯ nnes aqat ṭṭarf i ṯemziḏa n Ayṯ-Israʼil.
8 Ȓefqih n ṯemziḏa nni qqaren-as Krisbus, yumen netta ḏ marra ȓeḥbab nnes s Siḏiṯneɣ. Xarebbi n yiwḏan zi ṯendint n Kurinṯ wami sȓin i wawaȓ n Bulus, umnen ṭehharen s waman.
9 Ij n ǧiȓeṯ yuḥa-yas-d Siḏi Arebbi i Bulus inna-as: "War teggweḏ ca, siweȓ war stuka ca.
10 Nec aqayi akiḏec, war c itḍarri ḥadd zeg yinni xak d ɣa ihejmen minzi ḏi ṯendint-a ɣari aṭṭas n ccaƹb inu."
11 Iqqim ḏinni Bulus ƹam u sett-chur iseȓmaḏ i yiwḏan awaȓ n Arebbi.
12 Walakin ḏi ȓweqṯ n Galyun lƹamil n lʼiqlim n Uxaya, munen iʼisraʼiliyen hejmen x Bulus uwin-ṯ ɣar lmaḥkama.
13 Nnan aryaz-a isqenneƹ iwḏan bac aḏ ƹebḏen Arebbi ḍed i ȓqanun nneɣ.
14 Ƹȓayen aḏ issiweȓ Bulus wami inna lƹamil Galyun i iʼisraʼiliyen nni: "Maƹlik zzayes ṯceṯcam x can ccerr niɣ x can ljarima ḏ ṯaƹeffant, ataf ɣarwem ȓḥaqq aɣarwem ṣennṭeɣ.
15 Walakin manaya ḏ lxilaf jarawem kenniw ḏeg wawaȓen ḏ yisemawen ḏ ccariƹa nwem. Ḥellem-ṯ kenniw jarawem, nec war xseɣ aḏ iȓiɣ ḏ ȓqaḍi x ṯmesȓayin-a."
16 Ssenni yuzzeȓ-d xasen zi lmaḥkama.
17 Kkaren marra iḏsen ṭṭfen Sustanis ȓefqih n ṯemziḏa n Ayṯ-Israʼil uwṯin-ṯ zzaṯ i lmaḥkama. Galyun netta war ṯ icqi manayenni qaƹ.
Iteƹqab Arrasul Bulus ɣar Wanṭakya
18 Iqqim ƹaḏ Bulus aṭṭas n wussan ḏi Kurinṯ. Ssenni imsafaḍ x ayṯmas ḏinni, isafer ḏeg uɣarrabu ɣar Surya akis Briskila ḏ Wakilas. Tuɣa iḥeff Bulus acewwaf nnes ḏi ȓemwiyi umi qqaren Kanɣarya, minzi tuɣa xas ȓƹaheḏ iy igga ak Siḏi Arebbi.
19 Uwḍen ɣar ṯendint n Ufasus, ijja Bulus ḏinni Briskila ḏ Wakilas yuḏef netta ɣar ṯemziḏa bac aḏ imnaqac ak iʼisraʼiliyen.
20 Ttaren zzayes iʼisraʼiliyen-a aḏ iqqim ƹaḏ ktar maca yugi.
21 Wami xasen imsafaḍ inna-asen meȓa ixes Arebbi qa aḏ d ƹeqbeɣ. Ssenni isafer ḏeg uɣarrabu zi ṯendint nni n Ufasus.
22 Wami yuweḍ ɣar ṯendint n Qayṣariya, igaƹƹeḏ ɣar Lquds iseǧem x jmaƹeṯ n ȓmuminin, ssenni iruḥ ɣar ṯendint n Wanṭakya.
23 Wami ḏayes ikka can ȓweqṯ, iffeɣ iƹḏu ḏi jwayeh n Galaṭya ḏ jwayeh n Farijya itegg uȓ ḏeg imeḥḍaren nni marra.
Apulus itbeccar ḏi ṯendint n Ufasus ḏ Uxaya
24 Ij n uʼisraʼili qqaren-as Apulus netta ixȓeq ḏi ṯendint n Iskandariya, yusa-d ɣar ṯendint n Ufasus. Netta ifsus ḏeg wawaȓ iɣra aṭṭas ḏi Lkitab.
25 Aryaz-a iȓmeḏ x ubriḏ n Siḏiṯneɣ, issawaȓ s jheḏ ḏ ameqqran u iseȓmaḏ nican x Ƹisa. Walakin issen ɣir x uṭehhar nni n waman ig ixḏem nnabi Yaḥya.
26 Ibḏa issawaȓ ḏi ṯemziḏa n Ayṯ-Israʼil s zƹameṯ. Sȓin-as Briskila ḏ Wakilas, uwin-ṯ akiḏsen ɣar ṯeddarṯ nsen sfehhmen-ṯ ḥsen ḏeg ubriḏ n Arebbi.
27 Wami irezzu Apulus aḏ isafer ɣar lʼiqlim n Uxaya, cejjƹen-ṯ ayṯmas urin-as ij n ṯebrat i imeḥḍaren nni ḏinni bac aḏ reḥben zzayes. Yuweḍ ɣar lʼiqlim nni iƹawen aṭṭas yinni yumnen s arḍa n Arebbi.
28 Liʼanna netta itemnaqac s jjehḏ ak iʼisraʼiliyen zzaṯ i yiwḏan, niṯni war zemmaren aṯ jawben nican wami ḏasen d isbeyyen awaȓen zi Lkitab belli netta Ƹisa ḏ Lmasiḥ.