Arrasul Bulus itḥeddaṯ ḏi ṯendint n Ufasus
19
1 Wami iǧa Apulus ḏi ṯendint n Kurinṯ ḏi lʼiqlim n Uxaya, Bulus ikka x ubriḏ iḏurar yuweḍ ɣar ṯendint n Ufasus. Yufa ḏinni can imeḥḍaren,
2 inna-asen: "Ma ihwa-d xawem Arruḥ iqeddsen wami ṯumnem?"
Nnan-as: "Lla, war xas nesȓi qaƹ neccin x Arruḥ iqeddsen."
3 Inna-asen: "Mammec ṯeggim wami ṯṭehharem s waman?"
Nnan-as: "Nṭehhar s waman ƹlaḥsab mamc ixeddem nnabi Yaḥya."
4 Inna-asen Bulus: "Yaḥya itṭehhar iwḏan s waman i yinni ituben, iqqar-asen amneṯ zeg wenni iy d ɣa yasen menbaƹd i nec, iƹni zi Ƹisa."
5 Sȓin i manaya uca twaṭehharen s waman s yisem n Siḏiṯneɣ Ƹisa.
6 Wami xasen isers Bulus ifassen nnes, ihwa-d xasen Arruḥ iqeddsen. Bḏan ssawaȓen s luɣaṯ war iǧin bu nsen, ssawaȓen s minzi ƹeȓmen zi Arebbi.
7 Iryazen nni niṯni can ṯenƹac iḏsen.
8 Yuḏef Bulus ɣar ṯemziḏa n Ayṯ-Israʼil, issawaȓ ḏinni s zƹameṯ can n ṯeȓt-chur. Itmenaqac akiḏsen bac aṯen iseqneƹ x ȓmulk n Arebbi.
9 Ȓebƹaḍ zzaysen ggin akis ṯaɣennant ugin aḏ amnen, tukkaren ḏi ṯɣuri n Siḏiṯneɣ zzaṯ i yiwḏan. Ssenni iffeɣ-d Bulus zi ṯemziḏa nni, yuwi akiḏes imeḥḍaren nnes iseȓmaḏ-iṯen kuȓ nhar ḏi lmarkez n Tirannus.
10 Iqqim Bulus itegg manayenni ƹamayen. Marra imezḏaɣ n lʼiqlim n Asya sȓin i wawaȓ n Siḏi Arebbi, Ayṯ-Israʼil ḏ iyunaniyen s ṯnayen iḏsen.
Ṯarwa n ȓefqih Skiba
11 Arebbi itegg lmuƹjizaṯ ḏ ṯimeqqranin x ufus n Bulus.
12 Iwḏan kessin ȓezyuf ḏ ṯbantiwin iy iȓeqqfen Bulus srusan-ṯent x imehȓac. Ȓxeddnnit ȓehȓacaṯ nni tgenfan, teffɣen zzaysen jnun nni iƹeffanen iy ḏaysen.
13 Ḏinni can iʼisraʼiliyen niṯni ḏ iseḥḥaren traḥen zeg umcan ɣar unneɣnit. Tjarraben aḏ sxeḏmen isem n Siḏiṯneɣ Ƹisa bac aḏ sufɣen jnun iƹeffanen zeg yiwḏan. Nnan-asen qa umareɣ-kenniw s yisem n Ƹisa iy zi itḥeddaṯ Bulus, ffɣeṯ!
14 Ammu iy teggen ij n sebƹa n ṯarwa n yij n uʼisraʼili qqaren-as Skiba, netta zi arruyas n ȓfuqaha.
15 Ij n nhar indeq-d jjen nni aƹeffan inna-asen qa nec ssneɣ Ƹisa, ssneɣ min iƹna Bulus, y kenniw min ṯeƹnam?
16 Ȓxeddnnit inḍew xasen uryaz nni iy ḏi iǧa jjen aƹeffan iɣeȓb-iṯen marra, ijheḏ xasen. Rewȓen zi ṯeddarṯ nni jarrḥen ḏ iƹaryanen.
17 Arrin-asen-d ȓexbar marra imezḏaɣ n Ufasus, iƹni Ayṯ-Israʼil ḏ iyunaniyen s ṯnayen iḏsen. Ṯeȓqef-iṯen ṯiggwḏi, itwasemɣar isem n Siḏiṯneɣ Ƹisa aṭṭas.
18 Usin-d aṭṭas zeg yinni iy yumnen ȓexxu, ƹtarfen s ȓexḏayem nsen tuɣa teggen ṯiƹeffanin.
19 Aṭṭas n yiwḏan iy tuɣa iteggen sḥur uwin-d lkutub nsen sḥarrqen-ṯen ɣar barra zzaṯ i kuȓci. Ḥesben ttaman n lkutub nni, ufin xemsin aȓef dinar.
20 Amenni awaȓ n Siḏi Arebbi itentacer irenni ɣares jjehḏ aṭṭas.
Tewqiƹ yij n ȓfawḍa ḏi ṯendint n Ufasus
21 Menbaƹd i manaya, iƹewweȓ Bulus aḏ isafer ɣar Lquds, aḏ ikk x lʼiqlim n Masidunya ḏ lʼiqlim n Uxaya. Inna: Xmi ḏin ɣa awḍeɣ, itxeṣṣa-ayi ƹaweḏ aḏ raḥeɣ ɣar ṯendint n Ruma!
22 Issekk ɣar Masidunya ṯnayen zeg yinni iy ṯ itƹawanen yinni umi qqaren Timuṯawus ḏ Arisṭus, netta Bulus iqqim can ȓweqṯ ḏi lʼiqlim n Asya.
23 Ḏi ȓweqṯ nni ṯewqeƹ ij n ȓfawḍa ṯemɣar ḏi ssabab n ubriḏ n Siḏiṯneɣ.
24 Ḏinni ij uryaz qqaren-as Dimitriyus. Netta iccaṯ nnuqarṯ, itṣenaƹ munikuṯ s nnuqarṯ temcabbahen ḏi zzawyiṯ n lʼaṣnam umi qqaren Ṯarṭamist. Dimitriyus-a iserbaḥ aṭṭas yina itṣenaƹen munikuṯ-a.
25 Iȓaɣa-d x yinni ixeddmen ḏi manayenni ḏ yinni itṣenaƹen ṯimesȓayin nneɣnit amenni. Inna-asen: "Ay iryazen, ṯessnem belli nrebbeḥ aṭṭas n tmenyaṯ ḏi ṣṣenƹaṯ-a.
26 Aqa twaȓam tesȓam belli Bulus-a wanita isqenneƹ aṭṭas n yiwḏan ḏi ṯendint-a n Ufasus ƹȓayen uȓa ḏi marra lʼiqlim n Asya, isufuɣ-iṯen zeg ubriḏ nneɣ. Iqqar-aneɣ qa l'aṣnam-a itwaṣenƹen s ifassen war ǧin bu ḏ arebbiṯen.
27 Xaṭar manaya x ṣṣenƹaṯ nneɣ ataf war ɣares bu lqima. Xaṭar ƹaweḏ uȓa x zzawyiṯ ṯameqqrant n arebbi nneɣ Ṯarṭamist ataf aḏ tneqḍeƹ. Imken war ḏayes tɣimi lƹaḍama nnes qaƹ nettaṯ iy ƹebbḏen imezḏaɣ n lʼiqlim-a n Asya marra, ḏ ddunect amen-tekmeȓ."
28 Wami sȓin i wawaȓ-a, ɣeḍben aṭṭas snekkaren ṯɣuyyiṯ qqaren Ṯarṭamist n Ayṯ-Ufasus mecḥar ṯemɣar!
29 Ṯewqeƹ ij n ȓfawḍa ḏ ṯameqqrant ḏi ṯendint nni amen-ṯekmeȓ. Munen yiwḏan-a uzzȓen ɣar furbu jarren akiḏsen ij n ṯnayen n imeddukaȓ n Bulus iy tsafaren akiḏes, ijjen qqaren-as Ɣayus ijjen qqaren-as Aristarxus, niṯni zi Ayṯ-Masidunya.
30 Irezzu Bulus aḏ iḥḍar zzaṯ i ȓɣaci nni, war ṯ jjin ca imeḥḍaren nnes.
31 Ḥetta can imxazniyen ḏ imeqqranen zi lʼiqlim nni n Asya iy ǧan ḏ imeddukaȓ n Bulus ssekken ɣares ttaren zzayes nnan-as war ḥeṭṭar ca ḏinni ḏi furbu nni.
32 Mxarwaḍen marra iwḏan iy ḏinni imunen, snekkaren ṯɣuyyiṯ kuȓ ijjen min iqqar. Azyen ameqqran war issin mixef ḏin imun.
33 Ḏinni jar ȓɣaci nni ij n bnaḏem qqaren-as Iskander. Ƹanen-ṯ iʼisraʼiliyen ɣar zzaṯ, ȓaɣan-as-d ȓebƹaḍ aḏ issiweȓ. Itceyyar-asen i ȓɣaci nni s ifassen irezzu aṯen isbedd bac aḏ iḏafeƹ s yij n wawar.
34 Wami ẓrin ȓɣaci nni netta ḏ aʼisraʼili, munen marra iḏsen sɣuyiwen can ṯnayen n ṯsaƹaṯin qqaren Ṯarṭamist n Ayṯ-Ufasus mecḥar ṯemɣar!
35 Yusa-d naʼib n ȓḥakem n ṯendint ihedden ȓɣaci nni inna-asen: "Ay iryazen n Ufasus, ma ḏinni ca ḥadd iy war issinen belli ṯandint-a n Ufasus ḏ nettaṯ iy iḥeṭṭan zzawyiṯ n Ṯarṭamist ṯameqqrant ḏ uzru nnes amqeddes iy d iwḍan zeg ujenna?
36 Manaya war ḏayes bu ccekk. Iḏen itxeṣṣa kenniw aḏ theddnem, war xeddmeṯ ca bȓa ȓaƹqeȓ.
37 Ṯuwim-d ḏa iryazen-a, war xewwnen ca zzawyaṯ war ssiwȓen bu ȓƹib ḏi arebbi nneɣ.
38 Meȓa ixes Dimitriyus ḏ yinni iy kis itṣenaƹen aḏ ceṯcan x can yijjen, lmaḥkama mujud u lƹamil mujud. Aḏ raḥen aḏ ceṯcan s ȓqanun.
39 Meȓa ɣarwem ca uceṯci nneɣnit, axas ḥekmen ḏi lmajlis n ṯendint.
40 Ȓexxu aqaneɣ ḏi lxaṭar a netwaḥkem marra iḏneɣ x ȓfawḍa iweqƹen nhara liʼanna war ɣarneɣ bu can n ssabab x sdaƹ-a."
41 Wami inna awaȓ-a issekk aḏ rewwḥen yinni imunen.