Arrasul Bulus aqaṯ ḏi Lyunan ḏ lʼiqlim n Masidunya
20
1 Ṯkemmeȓ ȓfawḍa nni, menbaƹd iȓaɣa-d Bulus x imeḥḍaren icejjeƹ-iṯen. Ssenni imsafaḍ xasen, iruḥ netta isafer ɣar lʼiqlim n Masidunya.
2 Itcejjaƹ imeḥḍaren ḏinni s waṭṭas n wawaȓen. Wami iƹḏu ḏi jwayeh nni, yuweḍ ɣar Lyunan
3 ikka ḏinni ṯeȓt-chur. Wami ƹȓayen aḏ isafer Bulus ḏeg uɣarrabu ɣar Surya, ciṭnen iʼisraʼiliyen bac aṯ nɣen. X manaya igga aḏ iƹqeb x ubriḏ n Masidunya.
4 Isafer akis Subatrus mmis n Biru zi ṯendint n Birya, ḏ Aristarxus ḏ Sakundus niṯni zi ṯendint n Salunik, ḏ Ɣayus zi ṯendint n Dirba, ḏ Timuṯawus ḏ Tikikus ḏ Trufimu niṯni zi lʼiqlim n Asya.
5 Yina izwaren-aneɣ trajan-aneɣ ḏi ṯendint n Tarwas.
6 Wami iƹḏu Ȓƹiḏ n Ṯefḍirṯ, nsafer ḏeg uɣarrabu zi ṯendint n Filippi. Menbaƹd i xemsiyyam neḏfar-iṯen ɣar ṯendint n Tarwas, neqqim ḏin sebƹiyyam.
Arrasul Bulus isekkar-d ij uḥenjir zi ȓmewṯ
7 Ḏeg wass amezwaru n simanaa nmun ḥima a necc aɣrum, issiweȓ Bulus akeḏ yiwḏan. Iqqim issawaȓ aȓ uzyen n ǧiȓeṯ minzi ṯiwecca nnes inwa aḏ isafer.
8 Ḏinni aṭṭas n ȓeqnaḏeȓ ḏi ṯɣurfat nni mani nmun.
9 Ḏinni ij uḥenjir qqaren-as Yutikus iqqim netta x ṯenharṯ n ṯburjat. Iȓha Bulus itemharwaḍ, aḥenjir nni iṭṭef-iṯ yiḍeṣ. Iɣelleb xas yiḍeṣ iwḍa zi ṭṭebqa wis ṯȓaṯa,b ṣafi ufin-ṯ immuṯ.
10 Ihwa-d Bulus, iwḍa xas iysi-iṯ-iḏ ɣares. Inna-asen: War teggwḏem ca, aqa ḏayes buḥbeȓ nnes iḏweȓ-d.
11 Igaƹƹeḏ Bulus, irza aɣrum icca. Issiweȓ aṭṭas aȓ wami ḏ ȓefjar ikkar iffeɣ.
12 Iwḏan nni twacejjƹen aṭṭas wami aḥenjir nni srewwḥen-ṯ iddar.
Arrasul Bulus itsafar zi Tarwas ɣar Militus
13 Itafeq Bulus akiḏneɣ bac neccin a nsafer ɣar ṯendint n Wassus ḏeg uɣarrabu netta aḏ d yas x iḍaren, menbaƹd a nemseȓqa ḏinni aṯ nesney akiḏneɣ ssenni.
14 Wami xaneɣ d iḥreṯ ḏi ṯendint n Wassus, nesney-iṯ ḏeg uɣarrabu nruḥ ɣar ṯendint n Mitilini.
15 Ssenni nsafer ḏeg uɣarrabu, ṯiwecca nnes nuweḍ ɣar ṯeyzirṯ n Kiyus. Wis ṯeȓṯiyyam nuweḍ zzaṯ i ṯeyzirṯ n Samus. Wis arbeƹiyyam nuweḍ ɣar ṯendint n Militus.
Arrasul Bulus itemsafaḍ x imeqqranen n Ufasus
16-17 Zi ṯendint nni n Militus issekk Bulus ɣar ṯendint n Ufasus iȓaɣa-d x imeqqranen n jmaƹeṯ n ȓmuminin aɣares d asen. Tuɣa igga Bulus aḏ ikk x ȓebḥar x uɣezḏis n ṯendint n Ufasus ig iǧan ḏi lʼiqlim n Asya bac war ḏinni itƹeṭṭaȓ ca. Itqeǧiq bac imken aḏ yaweḍ ḏeɣya ɣar ṯendint n Lquds ḏi Ȓƹiḏ n nhar wis xemsin.c
18 Wami ɣares d usin imeqqanen nni inna-asen: "Ṯessnem mammec tƹiceɣ marra ȓweqṯ iy tuɣa kiwem qqimeɣ, zi nhar amezwaru iy d uḏfeɣ ɣar Asya.
19 Xeddmeɣ i Siḏi Arebbi bȓa ttakebbur, u s imeṭṭawen inu kkint xafi ȓemḥayen wami ḏayi ciṭnen iʼisraʼiliyen.
20 War zzaywem snuffareɣ walu, nec txebbareɣ-kenniw s marra min ḏawem ɣa inefƹen. Seȓmaḏeɣ-awem-ṯ zzaṯ i yiwḏan u zi ṯeddarṯ ɣar ṯeddarṯ.
21 Ƹeǧmeɣ i iʼisraʼiliyen ḏ iyunaniyen aḏ tuben ɣar Arebbi aḏ amnen s Siḏiṯneɣ Ƹisa.
22 Nec nhara ggureɣ ɣar ṯendint n Lquds ḏ Arruḥ iy ḏayi itawin ḏinni, war ssineɣ min ḏayi ɣa iweqƹen.
23 Innama ḏi mkuȓ ṯendint Arruḥ iqeddsen iƹeǧem-ayi-d qa itraja-ayi ȓeḥbes ḏ tamara.
24 Walakin nec war ticceɣ bu lhimma i ṯuḏarṯ inu. Maca lla, aḏ kemmȓeɣ minxef d usiɣ ḏ ȓxeḏmeṯ iy zi ḏayi ikellef Siḏiṯneɣ Ƹisa, iƹni aḏ cehḏeɣ s L'injil n arḍa n Arebbi.
25 Ȓexxu i kenniw umi beccareɣ s ȓmulk n Arebbi ssneɣ nec belli uȓa ḏ ijjen zzaywem war iẓerr ca aɣembub inu ƹaḏ ktar.
26 X manaya qqareɣ-awem belli nhara nec tberriɣ ixef inu zeg iḏammen nwem marra.
27 Liʼanna war snuffareɣ zzaywem walu zi marra min inewwa Arebbi aṯ igg.
28 Ḥḍaṯ ixef nwem. Ḥḍaṯ ṯḥimerṯ nwem, ṯenni iy zi kenniw ikellef Arruḥ iqeddsen. Rewseṯ jmaƹeṯ n ȓmuminin n Arebbi qa netta iseɣ-it s iḏammen nnes.
29 Cuf, ssneɣ xmi ɣa uyureɣ nec aḏ d aḏfen jarawem can n wuccanen yuƹaren war reḥḥmen ca ṯḥimerṯ.
30 Ƹaweḏ zzaywem aḏ d ḍharen can iṯarrasen aḏ sƹewwjen lḥaqiqa ḥima aḏ jarren imeḥḍaren ɣarsen.
31 Iwa iȓiṯ ƹlabal! War tettum ca nec ṯeȓt-snin iy kiwem kkiɣ, qqimeɣ tweṣṣiɣ mkuȓ ijjen zzaywem s ǧiȓeṯ ḏ wass s imeṭṭawen inu.
32 Ay ayṯma, ȓexxu axawem weddiɣ, iȓiṯ ag Arebbi ḏ wawaȓen n arḍa nnes. Niṯni ḏaysen ṯizemmar aḏawem ucen jjehḏ aḏawem ucen ȓwarṯ ak marra ȓmuminin ṣaliḥin.
33 Nec ƹemmars war ḍmiƹeɣ i yixef inu can n dheb niɣ ḏ nnuqarṯ niɣ ḏ arruḍ n ca ḥadd.
34 Kenniw ṯessnem nec xeḏmeɣ s ifassen inu bac aɣari yiȓi min ḥḏajeɣ ḏ min ḥḏajen yinni akiḏi.
35 S marra manaya seḍhareɣ-awem-d mammec itxeṣṣa-yaneɣ a nexḏem mliḥ bac a nƹawen yinni iḥḏajen. A nfekkar ḏeg wawaȓ n Siḏiṯneɣ Ƹisa iy inna: Ssaƹḏ n wenni iticcen ktar zeg wenni iqebbȓen."