Arrasul Bulus itsafar ɣar ṯendint n Lquds
21
1 Wami xasen d nuyur, nsafer ḏeg uɣarrabu nruḥ nican ɣar ṯeyzirṯ n Kus. Ṯiwecca nnes nuweḍ ɣar ṯeyzirṯ n Rudus. Ssenni nruḥ ɣar ṯendint n Batara.
2 Nufa ḏinni ij uɣarrabu itraḥ ɣar jwayeh n Finiqya, nenya ḏayes nuyur.
3 Ṯeḍhar-aneɣ-d ṯeyzirṯ n Qubruṣ x uẓeȓmaḍ nneɣ. Neƹḏu-t, nruḥ ɣar Surya neḍra ḏi ṯendint n Ṣur minzi aɣarrabu itxeṣṣa aḏ isers sseȓƹaṯ ḏinni.
4 Wami nerzu x imeḥḍaren, nufi-ṯen ḏinni neqqim akiḏsen sebƹiyyam. Ƹlaḥsab min ƹeȓmen niṯni zi Arruḥ, qqaren-as i Bulus war tgaƹƹaḏ ca ɣar ṯendint n Lquds.
5 Wami ṯeqḍa ȓweqṯ nneɣ ḏinni nekkar neffeɣ bac a nsiɣi x usafar nneɣ. Marra imeḥḍaren ruḥen akiḏneɣ ɣar barra n ṯendint ak ṯemɣarin nsen ḏ ṯarwa nsen, nerkeƹ x ifadden nneɣ x yijḏi n ȓebḥar neẓẓuǧ.
6 Wami nemsafaḍ xasen nenya ḏeg uɣarrabu, niṯni rewwḥen ɣar ṯuḏrin nsen.
7 Ssenni nsiɣi x usafar nneɣ ḏi ȓebḥar zi ṯendint nni n Ṣur nexḍeȓ ɣar ṯendint n Baṭlaymus. Nseǧem x ayṯmaṯneɣ ḏinni, neqqim akiḏsen ij n nhar.
8 Ṯiwecca nnes nruḥ ɣar ṯendint n Qayṣariya nuḏef neqqim ḏi ṯeddarṯ n lmubcir Filippas. Netta ḏ ijjen zi sebƹa n ṣṣaḥaba n arrusul n Lquds.
9 Ɣares netta arbeƹa n ṯḥenjirin ḏ ṯiƹzriyin ssawaȓent s min ƹeǧment zi Arebbi.
10 Wami neqqim akiḏsen can wussan, yusa-d ɣarneɣ ij n nnabi zi Yahuḏiya qqaren-as Ɣabus.
11 Iqarreb-d ɣarneɣ iysi aḥezzam n Bulus, icedd iḍaren ḏ ifassen i yixef nnes inna: "Iqqar Arruḥ iqeddsen: Ammu iʼisraʼiliyen n Lquds aḏ cedden bab n uḥezzam-a, aṯ sellmen i yinni war iǧin zi Ayṯ-Israʼil."
12 Wami nesȓa manaya, neccin ḏ yiwḏan nni nḥeccem Bulus bac war itriḥ ca ɣar ṯendint n Lquds.
13 Inna-aneɣ: "Min kenniw yuɣin? Maɣar iy ḏayi ṯeḥfarem ḏeg wuȓ s imeṭṭawen nwem? Nec aqayi mujud maci aḏayi cedden waha. Lla, aqayi mujud aḏ mmṯeɣ nec ḏi Lquds x yisem n Siḏiṯneɣ Ƹisa!"
14 Wami nufa war ṯ nseqniƹ ca, nesqar neccin nenna: Min ixes Siḏi Arebbi aṯ igg, aṯ igg!
15 Menbaƹd ȓxeddnnit, nsewjeḏ ixef nneɣ ngaƹƹeḏ ɣar ṯendint n Lquds.
16 Uwin-aneɣ can n imeḥḍaren zi Qayṣariya bac a nnewjew ɣar yij n bnaḏem qqaren-as Mnasun mmis n ṯendint n Qubruṣ. Netta zeg imeḥḍaren imezwura.
Arrasul Bulus itemseȓqa akeḏ arrasul Yaƹqub
17 Wami nuweḍ ɣar Lquds, reḥḥben zzayneɣ aymaṯneɣ s ȓefraḥeṯ.
18 Ṯiwecca nnes yuḏef akiḏneɣ Bulus ɣar arrasul Yaƹqub, ḥḍaren ḏinni marra imeqqranen n jmaƹeṯ n ȓmuminin.
19 Iseǧem xasen Bulus, iƹaweḏ-asen ṯa s ṯa min igga Arebbi x ufus nnes jar yinni war iǧin zi Ayṯ-Israʼil.
20 Wami sȓin i manayenni, ḥemḏen Arebbi nnan-as i Bulus: "Ay umaṯneɣ, cuf mecḥaȓ n uȓufaṯ n iʼisraʼiliyen iy yumnen. U marra iḏsen rezzun aḏ ggen lwajib ƹlaḥasab Ccariƹa nneɣ.
21 Itwanna-yasen zaƹma qa cek ṯseȓmaḏeḏ marra iʼisraʼiliyen iy zeddɣen ḏi lxarij aḏ semḥen ḏi Musa, ṯeqqareḏ-asen war tṭehhareṯ ca i ṯarwa nwem, war ḏeffareṯ ca lƹadaṯ nneɣ.
22 Mebȓa ccekk aḏ sȓen qa cek ṯusiḏ-d. Iwa, mammec ɣa negg?
23 Iḏen, min ḏac ɣa nini egg-iṯ. Ɣarneɣ arbeƹa n iryazen ggin ȓƹaheḏ ak Siḏi Arebbi.
24 Awi yina xeǧes xasen axmi ɣa ṯeggem marra kenniw ȓuḍu nni aṣebḥana bac niṯni aḏ ḥeffen aḏ ḏewȓen ḏ iqeccura. Ammu aḏ ssnen marra min xak itwannan war iǧi bu ḏ ṣṣaḥ. Lƹaks, cek s yixef nnec ṯḏeffareḏ Ccariƹa nneɣ.
25 Walakin ƹlaḥsab ȓmuminin war iǧin zi Ayṯ-Israʼil, nura-yasen ṯabrat numar-iṯen war tqarriben ɣar lmakla itqeddamen i lʼaṣnam, ḏ iḏammen, ḏ min ijeyyfen, ḏ lfasad."
26 Ṯiwecca nnes yuwi Bulus iryazen nni, igga ȓuḍu nni aṣebḥan akiḏsen. Yuḏef ɣar ṯemziḏa ṯameqqrant n Ayṯ-Israʼil bac aḏ iƹȓem ȓfuqaha x ȓweqṯ iy ḏi ɣa kemmȓen nhuraṯ nni n uṣeffi nsen, iƹni ȓweqṯ iy ɣa qeddmen ȓfuqaha dbiḥaṯ i arbeƹa nni.
Teṭṭfen Arrasul Bulus ḏi ṯemziḏa ṯameqqrant
27 Wami ƹȓayen aḏ kemmȓen sebƹa nni n nhuraṯ n ȓuḍu, can iʼisraʼiliyen zi lʼiqlim n Asya ẓrin Bulus ḏi ṯemziḏa ṯameqqrant samaren xas marra ȓɣaci mzaḥamen xas.
28 Snekkaren ṯɣuyyiṯ qqaren: "Ay iryazen n Ayṯ-Israʼil! Aqa aryaz-a iseȓmaḏen iwḏan marra ḏi mkuȓ amcan bac aḏ ƹarrḍen ccaƹb nneɣ ḏ Ccariƹa nneɣ ḏ umcan-a! Ƹaweḏ isiḏef-d iyunaniyen ɣar ṯemziḏa ṯameqqrant, isexnaz amcan-a muqeddes."
29 Nnan manayenni minzi tuɣa ẓrin akis ḏi ṯendint ij n bnaḏem qqaren-as Trufimu zi Ayṯ-Ufasus, itɣiȓ-asen belli Bulus isiḏef-iṯ ɣar ṯemziḏa ṯameqqrant.
30 Ṯekkar ȓfawḍa ḏi ṯendint marra. Kkaren uzzȓen ɣar Bulus ṭṭfen-ṯ, jarren-ṯ barra i ṯemziḏa ṯameqqrant ȓxeddnnit bellƹen ṯiwwura.
31 Wami rezzun aṯ nɣen, yuweḍ ȓexbar ɣar arrayes n ȓƹaskar n arrumanus belli ṯekkar ij n ȓfawḍa ḏi Lquds marra.
32 Iruḥ netta ḏeɣya yuwi kis ȓƹaskar uȓa ḏ imeqqranen nsen yuzzeȓ ɣarsen. Iʼisraʼiliyen wami ẓrin arrayes nni ḏ ȓƹaskar nnes, bedden war qqimen ca ƹaḏ ccaṯen Bulus.
33 Iqarreb ɣar Bulus arrayes nni iṭṭef-iṯ, yumar aṯ cedden s ṯnayen n snaseȓ. Isseqsa xas inna-asen: Min iƹna wa ḏ min igga?
34 Ȓɣaci nni snekkaren ṯɣuyyiṯ, kuȓ ijjen min iqqar. Wami arrayes nni war ifhim ca nican man ssabab n sdaƹ iy ḏinni, yumar aṯ siȓin ɣar lqecla.
35 Wami yuweḍ Bulus ɣar druj, rbun-ṯ ȓƹaskar siȓin-ṯ ƹlaḥsab amenɣi nni n ȓɣaci.
36 Minzi ḏeffaren-ṯ snekkaren ṯɣuyyiṯ qqaren ysim-ṯ xaneɣ wanita!
Arrasul Bulus itḏafaƹ x yixef nnes
37 Wami ƹȓayen aḏ siḏfen Bulus ɣar lqecla, inna-as i arrayes n ȓƹaskar: "Smeḥ-ayi ac iniɣ ij n wawaȓ."
Inna-as arrayes nni i Bulus: "Mammec, cek ṯessawaȓeḏ ṯayunaniṯ?
38 Ma war iǧi bu ḏ cek ḏ amiṣri nni iy iggin lfitna ḏi ȓiyyamaṯ nni wami ṯsuyureḏ arbeƹa aȓef n lʼirhabiyen ɣar ȓexȓa?"
39 Inna-as Bulus: "Lla, nec ḏ aʼisraʼili, ljinsiya inu zi ṯendint maƹrufa n Ṭarsus ḏi lʼiqlim n Kilikya. Tettareɣ zzayec aḏayi ṯsemḥeḏ aḏ ssiwȓeɣ ak yiwḏan-a."
40 Wami iy ṯ ijja arrayes n ȓƹaskar aḏ issiweȓ, ibedd Bulus x druj iceyyar-asen s ifassen nnes. Niṯni sqaren, issiweȓ akiḏsen s luɣa lƹibriya inna-asen: