22
1 "Ay ayṯma ay imɣaren, ṣennṭeṯ-ayi mliḥ ȓexxu bac aḏ ḏafƹeɣ x yixef inu!"
2 Wami sȓin i Bulus issawaȓ s luɣa lƹibriya qeḍƹen ȓḥess. Inna-asen:
3 "Nec ḏ aʼisraʼili xeȓqeɣ ḏi ṯendint n Ṭarsus ḏi lʼiqlim n Kilikya, walakin ymiɣ ḏanita ḏi ṯendint-a. Ɣriɣ ɣar iḍaren n lʼustad Gamlil twarebbiɣ s Ccariƹa n ȓejḏuḏ nneɣ mammec ḏaneɣ ṯweṣṣa ṯa s ṯa. Rezzuɣ aḏ ggeɣ lwajib s wuȓ inu ak Arebbi am ṯrezzum aḏ teggem kenniw marra nhara.
4 Ƹeddbeɣ iwḏan ḥetta wami mmuṯen yinni iḏfaren abriḏ-a. Ṭṭfeɣ iryazen ḏ ṯemɣarin ggiɣ-ṯen ḏi ȓeḥbes.
5 Arrayes n ȓefquha ḏ marra Jmaƹeṯ n imeqqranen n Ayṯ-Israʼil niṯni ḏ ȓechuḏ x manayenni. Ucin-ayi arruxṣaṯ aṯen siwḍeɣ ɣar ayṯmaṯsen ḏi Dimaceq. Ruḥeɣ ḏinni aḏ ṭṭfeɣ iwḏan n ubriḏ-a aṯen awiɣ ɣar Lquds bac aḏ twaƹeqqben.
6 Ggureɣ ḏinni qarrbeɣ ɣar Dimaceq ƹȓayen ḏ azyen n nhar. Ƹlaɣafla inneḍ-ayi-d ij n nnur itceƹciƹ zeg ujenna.
7 Wḍiɣ ɣar ṯmurṯ sȓiɣ ij n ṯmijja ṯeqqar-ayi: A Cawul a Cawul, mayemmi ḏayi tƹeddabeḏ?
8 Nniɣ-as nec: Min teƹniḏ cek, a Siḏi? Yarra-d xafi: Nec ḏ Ƹisa zi Nnaṣira, wenni iy tƹeddabeḏ.
9 Yinni kiḏi iǧan ẓrin nnur nni walakin war fhimen bu i ṯmijja n wenni iy kiḏi issawaȓen.
10 Nniɣ-as nec: Min ɣa ggeɣ, a Siḏi? Inna-ayi Siḏiṯneɣ: Kkar aḏef ɣar Dimaceq, aḏac itwanna ḏinni marra min yurin aḏ teggeḏ.
11 Nnur nni ijheḏ minzi itseqsiq, war zemmareɣ aḏ ẓreɣ walu. Ṭṭfen-ayi yinni kiḏi iǧan zeg ufus inu, siwḍen-ayi ɣar Dimaceq.
12-13 Yusa-d ɣari ḏinni ijjen qqaren-as Anas. Ḏayes ddin netta, itṭaƹa s Ccariƹa. Ssawaȓen xas mliḥ marra iʼisraʼiliyen iy zeddɣen ḏi Dimaceq. Ibedd-d zzaṯi inna-ayi: Ay uma Cawul, twaȓa! Ȓxeddnnit genfiɣ twaȓiɣ ẓriɣ-ṯ netta.
14 Inna-ayi: Arebbi n ȓejḏuḏ nneɣ ixḍar-icek netta bac aḏ tessneḏ min ixes, aḏ twaȓiḏ s ṯiṭṭawin nnec axeddam nnes ṣṣaliḥ aḏ tṣennṭeḏ i ṣṣut zeg uqemmum nnes.
15 Cek aḏ tiȓiḏ ḏ ccaheḏ xas ɣar marra iwḏan s min ṯeẓriḏ ḏ min ṯesȓiḏ.
16 Y ȓexxu min trajiḏ? Kkar aḏ twaṭehhareḏ s waman, sireḏ zi ȓmuƹṣiyaṯ nnec xmi ɣa ṯȓaɣiḏ x yisem nnes.
17 Wami ḏewȓeɣ ɣar ṯendint n Lquds tẓaǧiɣ ḏi ṯemziḏa ṯameqqrant, ihwa-d xafi ij n lwaḥi.
18 Ẓriɣ Siḏiṯneɣ netta iqqar-ayi: Kkar ffeɣ ḏeɣya zi Lquds minzi war qebbȓen ca chaḏeṯ nnec xafi.
19 Nniɣ-as: A Siḏi, niṯni ssnen belli tuɣa traḥeɣ zi ṯemziḏa ɣar ṯemziḏa tḥebbaseɣ ccaṯeɣ yinni zzayek itamnen.
20 Ḥḍareɣ wami twasizzȓen iḏammen n Stifana wenni xak icehhḏen. Wafqeɣ nec x ȓmewṯ nnes, ḥḍiɣ-asen uȓa ḏ arruḍ i yinni ṯ inɣin.
21 Inna-ayi Siḏi: Ruḥ, ac ssekkeɣ ɣar imucan ggwjen aṭṭas, ɣar yinni war iǧin zi Ayṯ-Israʼil."
22 Sȓin mliḥ i Bulus aȓ wami inna awaȓ-a aneggaru. Ȓxeddnnit snekkaren xas ṯɣuyyiṯ nnan: Mḥaṯ aryaz-a zi ddunect, war isḏiheǧ ca aḏ iddar!
23 Snekkaren ṯɣuyyiṯ, neṭṭaren izeǧuba nsen, zzuzzaren ṯaƹejjact ɣar ujenna.
24 Ikkar arrayes n ȓƹaskar yumar aḏ siḏfen Bulus ɣar lqecla, aṯ uwṯen s usɣun aḏas ggen lʼistijwab bac aḏ ssnen mayemmi xas snekkaren ṯɣuyyiṯ qaƹ ammu.
25 Wami ṯ cedden bac aṯ uwṯen, inna-as Bulus i umeqqran n ȓƹaskar iy ḏinni ibedden: "Ma qanuni aḏ tuwṯem s usɣun ij n bnaḏem ɣares ljinsiya n arrumanus meȓa war xas ṯḥekkimem ca?"
26 Wami isȓa umeqqran nni n ȓƹaskar manayenni, iruḥ ɣar arrayes n ȓƹaskar inna-as: "Min teggeḏ cek ammu? Qa aryaz nni wenni ɣares ljinsiya n arrumanus!"
27 Yusa-d arrayes nni inna-as: "In-ayi, cek ma ɣarek ljinsiya n arrumanus?"
Yarra xas Bulus: "Wah."
28 Inna-as arrayes nni: "Qa nec sɣiɣ ljinsiya inu s waṭṭas n tmenyaṯ."
Inna-as Bulus: "Nec xeȓqeɣ-d s ljinsiya-ya."
29 Ȓxeddnnit beƹƹḏen xas ḏeɣya yinni ixsen as ggen lʼistijwab. Iggweḏ waxxa ḏ arrayes nni wami issen belli icedd ijjen ɣares ljinsiya n arrumanus.
Arrasul Bulus zzaṯ i Jmaƹeṯ n lḥukkam n Ayṯ-Israʼil
30 Irezzu arrayes n ȓƹaskar nni aḏ issen mayemmi tahamen Ayṯ-Israʼil Bulus. Ṯiwecca nnes yumar arruyas n ȓefquha ḏ marra Jmaƹeṯ n lḥukkam n Ayṯ-Israʼil aḏ munen. Ȓxeddnnit isufeɣ-d Bulus yuwi-ṯ-iḏ ɣarsen bac aṯ isbedd zzaṯsen.