23
1 Ixzar mliḥ Bulus ɣar Jmaƹeṯ n lḥukkam n Ayṯ-Israʼil inna-asen: "Ay ayṯma, nec ggiɣ lwajib ak Arebbi, zi qbeȓ ḥetta nhara ḍḍamir inu mertaḥ."
2 Ikkar Anas arrayes n ȓefquha yumar yinni ibedden ak Bulus aṯ uwṯen ɣar uqemmum.
3 Ȓxeddnnit inna-as Bulus: "Ac yuweṯ Arebbi, cek am ȓḥiḍ ircan maca ijeyyer! Ṯeqqimeḏ cek ḏinni axafi ṯḥekmeḏ ƹlaḥsab Ccariƹa, walakin ȓexxu txalafeḏ Ccariƹa wami ṯen ṯumareḏ aḏayi uwṯen."
4 Nnan-as i Bulus yinni iḥḍaren ḏinni: "Ma tukkareḏ cek arrayes n ȓefquha n Arebbi?!"
5 Inna-asen Bulus: "Ay ayṯma, qa nec tuɣa war ssineɣ netta ḏ arrayes n ȓefquha minzi lkitab iqqar: Arrayes n ccaƹb, war ḏayes qqar bu ȓƹib."
6 Wami issen Bulus belli ca zzaysen zi ȓḥizeb n iṣadduqiyen ca nneɣnit zi ȓḥizeb n ifarrisiyen, iƹeyyeḍ ḏi Jmaƹeṯ nni n lḥukkam inna-asen: "Ay ayṯma, nec ḏ afarrisi mmis n ifarrisiyen! Aqa tḥakamem-ayi wami nec ɣari lʼamal belli iwḏan aḏ d kkaren zi ȓmewṯ ḏi lqiyama."
7 Wami inna manaya iwqeƹ ij n lxilaf jar ifarrisiyen ḏ iṣadduqiyen, Jmaƹeṯ nni n lḥukkam mesfraqen s ṯnayen iḏsen.
8 (Minzi iṣadduqiyen qqaren war ḏinni bu lqiyama niɣ ḏ lmalaʼikaṯ niɣ ḏ arruḥaṯ, walakin ifarrisiyen qqaren marra manaya iǧa.)
9 Iwqeƹ sdaƹ imɣar, kkaren ȓebƹaḍ zeg imseȓmaḏen n Ccariƹa niṯni ḏ ifarrisiyen temnaqaren s jjehḏ qqaren: "War ntif bu can lɣaleṭ ḏi bnaḏem-a, imken issiweȓ akiḏes can jjen niɣ ḏ can lmalaʼika."
10 Wami bḏan tmenɣan s jjehḏ ƹlaḥsab lxilaf nni, iggweḏ arrayes n ȓƹaskar aḏ wezzƹen Bulus. Yumar ȓƹaskar nnes aḏ hwan aḏ d xeḍfen Bulus zi ȓwesṭ nsen, aṯ siȓin ɣar lqecla.
11 Ǧiȓeṯ nni ibedd-d Siḏiṯneɣ ɣar Bulus inna-as: "Egg zƹameṯ! Mammec zzayi ṯcehḏeḏ ḏi ṯendint n Lquds, labud ƹaweḏ azzayi ṯcehḏeḏ ḏi ṯendint n Ruma."
Ayṯ-Israʼil tciṭinen bac aḏ nɣen Arrasul Bulus
12 Wami d iṣbeḥ ȓḥaȓ ciṭnen Ayṯ-Israʼil, ƹahḏen Arebbi ḥarrmen ixef nsen war tetten ca war sessen ca aȓ ɣa nɣen Bulus.
13 Ktar zi arbeƹin iḏsen ig iciṭnen ḏi manaya.
14 Ruḥen ɣar arruyas n ȓefquha ḏ imeqqranen n Ayṯ-Israʼil nnan-asen: "Neccin nƹaheḏ Arebbi nḥarrem ixef nneɣ war ntett walu aȓ ɣa nneɣ Bulus.
15 Ȓexxu Jmaƹeṯ n lḥukkam ḏ kenniw ttareṯ zi arrayes n ȓƹaskar n arrumanus bac aɣarwem d issekk Bulus. Ggeṯ ixef nwem ṯexsem akis ṯeggem lʼistijwab mliḥ. Neccin aqaneɣ mujud bac aṯ nneɣ qbeȓ iy d ɣa yaweḍ."
16 Mmis n učmas n Bulus yarra-d ȓexbar x min ciṭnen yiwḏan nni, iruḥ ɣar lqecla yuḏef ḏinni iƹaweḏ-as i Bulus manayenni.
17 Iȓaɣa-d Bulus x yij n uƹaskari ḏ ameqqran n arrumanus inna-as: "Awi aḥenjir-a ɣar arrayes nwem n ȓƹaskar aqa ɣares can wawaȓ aḏas ṯ yini."
18 Yuwi-ṯ ɣar arrayes n ȓƹaskar nni inna-as: "Iȓaɣa-d xafi Bulus ameḥbus nni ittar zzayi aḏac d awiɣ aḥenjir-a aqa ɣares can wawaȓ aḏac ṯ yini."
19 Arrayes nni n ȓƹaskar iṭṭef aḥenjir nni ḏeg ufus, yuwi-ṯ ɣar uɣezḏis waḥḏes inna-as: "Min texseḏ aḏayi t ṯiniḏ?"
20 Inna-as uḥenjir nni: "Iʼisraʼiliyen ttafqen jarasen bac azzayek ttaren aḏ d tessekkeḏ ṯiwecca Bulus ɣar Jmaƹeṯ n lḥukkam nsen. Ggin ixef nsen axmi xsen aḏas ggen lʼistijwab mliḥ.
21 War tijja ca ac sqenƹen qa ḏinni ktar zi arbeƹin n iryazen wejjḏen i Bulus, ggin ȓƹaheḏ ak Arebbi ḥarrmen ixef nsen war tetten ca war sessen ca aȓ ṯ ɣa nɣen. Niṯni aqa wejḏen, ɣir trajan aḏ twafqeḏ x ṭṭaleb nsen."
22 Issekk arrayes-a n ȓƹaskar aḥenjir nni inna-as: "War tƹawaḏ ca i ḥadd belli cek ṯenniḏ-ayi i nec ȓexbar-a."
Tawin Arrasul Bulus ɣar lwali Filiks
23 Ȓxeddnnit iȓaɣa-d arrayes nni n ȓƹaskar i ṯnayen n imeqqranen nnes inna-asen: "Swejḏeṯ miyytayen n ȓƹaskar ḏ sebƹin n yinni iy inyin x yisan ḏ miyytayen zeg yinni ikessin ikeccuḍen ɣarsen ṯicceṭ n wuzzeȓ, aḏ traḥem ɣar Qayṣariya ɣar tesƹa n ǧiȓeṯ.
24 Swejḏeṯ i Bulus min xef ɣa iney bac aṯ tsiwḍem ḏi lʼaman u ḍman ɣar lwali Filiks."
25 Yura ij n ṯebrat i Lwali Filiks inna-as ḏayes:
26 "A si lwali Filiks, nec Kludyus Lisyas tseǧameɣ xak.
27 Aryaz-a ṭṭfen-ṯ Ayṯ-Israʼil tuɣa ƹȓayen aṯ nɣen. Wami d arriɣ ȓexbar netta ɣares ljinsiya n arrumanus, ruḥeɣ senjmeɣ-ṯ-iḏ nec ḏ ȓƹaskar inu.
28 Rezzuɣ aḏ ssneɣ nec ttuhmaṯ iy xas ggin, uwiɣ-ṯ ɣar Jmaƹeṯ n lḥukkam nsen.
29 Ufiɣ ttuhmaṯ nni niṯenti ḏ can ṯmesȓayin x Ccariƹa nsen waha. War xas ufiɣ bu can ttuhma isḏaheǧ xas ȓmewṯ niɣ ȓeḥbes.
30 Wami d arriɣ ȓexbar belli ciṭnen xas, ssekkeɣ-ṯ-iḏ ɣarek ḏeɣya. Umareɣ yinni xas iy teggen ttuhmaṯ aḏac inin min ɣarsen ḍed nnes."
31-33 Ssenni nefḏen ȓƹaskar ƹlaḥsab min zi ṯen yumar. Uwin Bulus s ǧiȓeṯ ɣar ṯendint n Antipatris. Ṯiwecca nnes ḏewȓen-d ȓebƹaḍ n ȓƹaskar ɣar lqecla nsen, inneɣni iy inyin x yisan kemȓen x ubriḏ nsen ak Bulus uwḍen ɣar Qayṣariya. Kellfen ḏinni lwali x Bulus sellmen-as ṯabrat nni.
34-35 Wami t iɣra lwali inna-as i Bulus man lʼiqlim manis twaḥsabeḏ cek? Wami ḏas inna Bulus zi lʼiqlim n Kilikya inna-as lwali: "Aḏ iȓiɣ ḏi ljelsa nnec xmi d ɣa awḍen yinni iy xak ɣa iqeddmen ttuhma." Ssenni yumar axas ƹesssen ḏi ȓeqṣar n Hirudus.