Tḥakamen x Arrasul Bulus zzaṯ i lwali Filiks
24
1 Menbƹad i xemsiyyam ihwa-d ɣar Qayṣaria arrayes n ȓefquha Anas akis ȓebƹaḍ n imeqqranen n Ayṯ-Israʼil ḏ ij n lmuḥami qqaren-as Tartulus, tahamen Bulus ɣar lwali.
2-3 Ȓaɣan-d x Bulus, ibḏa Tartulus itaham-iṯ iqqar: "A si lwali Filiks, ḏi ssabab nnec neccin netƹic ḏeg yij n ȓehna ḏ ameqqran, u s lbarnamaj nnec ṯṣeȓḥeḏ mliḥ ṯuḏarṯ nneɣ ḏi ṯmurṯ-a. Neccin nqebbeȓ manaya, ncekkar-icek aṭṭas ḏi kuȓ ȓweqṯ ḏ kuȓ amcan.
4 Walakin war xseɣ ca ac sƹeṭṭaȓeɣ aṭṭas, tettareɣ zzayek ƹlaḥsab ȓxaḍar nnec aɣarneɣ ṯesȓeḏ cwayt.
5 Aryaz-a wanita nufi-ṯ itxarwaḍ itegg lfitna jar marra iʼisraʼiliyen iy ǧan ḏi marra ddunect. Netta ḏ ij n arrayes n lbidƹa n nnaṣara.
6 U irezzu aḏ isexnez ḥetta ṯamziḏa ṯameqqrant n Ayṯ-Israʼil. Neccin neṭṭef-iṯ {nxes axas neḥkem ƹlaḥsab Ccariƹa nneɣ.
7 Maca yusa-d arrayes n ȓƹaskar Lisyas ikkes-aneɣ-ṯ zeg ifassen nneɣ s lquwwa.
8 Yumar yinni iteggen ttuhmaṯ bac aɣarek d asen.} Axmi ḏas ɣa ṯeggeḏ lʼistijwab cek s yixef nnec aḏ tessneḏ minxef ṯ ntaham neccin."
9 Tafqen iʼisraʼiliyen x ttuhmaṯ nni, qqaren manayenni iggi-ṯ ḏ ṣṣaḥ.
Arrasul Bulus itḏafaƹ x yixef nnes
10 Iceyyar-as lwali i Bulus bac aḏ issiweȓ. Indeq-d Bulus inna-as: "Nec ssneɣ cek mecḥaȓ zeg wami ṯḥekkmeḏ x ṯmurṯ-a. X manaya farrḥeɣ bac aḏ ḏafƹeɣ x yixef inu.
11 Ṯzemmareḏ aḏ tesseqsiḏ belli nec ṯenƹac ȓyewm zeg wami gaƹƹḏeɣ ɣar Lquds, maci ktar, aḏ ƹebḏeɣ Arebbi.
12 War ḏayi ufin ca tmenɣiɣ ak ḥadd ḏi ṯemziḏa ṯameqqrant, niɣ tsamareɣ ȓɣaci ȓa ḏi ṯemziḏawin uȓa ḏi ṯendint.
13 War ɣarsen bu ddalil x ttuhmaṯ-a iy xafi tqeddamen ȓexxu.
14 Walakin qqareɣ-ac tafaqeɣ zzaṯek nec ƹebbḏeɣ Arebbi n ȓejḏuḏ nneɣ ƹlaḥsab abriḏ-a iy ḥessben niṯni zaƹma ḏ lbidƹa. Tamneɣ s marra min itafaqen akeḏ Ccariƹa ḏ min yurin ḏi Lkutub n lʼanbiya.
15 Ɣari lʼamal zi Arebbi mamc ɣarsen iǧa ɣar iryazen-a, iƹni aḏ d kkaren zi ȓmewṯ ṣsaliḥin ḏ ḍḍalimin.
16 Falihaḏa teggeɣ marra jjehḏ inu aḏ ƹiceɣ s yij n ḍḍamir mertaḥ zzaṯ i Arebbi ḏ yiwḏan.
17 Menbaƹd i waṭṭas n iseggwusa ƹeqbeɣ-d ɣar ṯendint n Lquds uwiɣ-d can n ṣṣaḏaqa i lʼumma inu, qeddmeɣ dbiḥaṯ.
18 Wami ḏayi ufin ḏi ṯemziḏa ṯameqqrant tuɣa ggiɣ ȓuḍu. War ḏinni bu akiḏi ȓɣaci, war teggeɣ bu sdaƹ. Walakin ḏinni can n iʼisraʼiliyen zi lʼiqlim n Asya,
19 itxeṣṣa niṯni aɣarek d asen ḏanita bac aḏ inin ttuhmaṯ iy ɣarsen ḍed inu.
20 Niɣ aḏac inin yina iy ḏa ibedden man ljarima iy xafi ufin wami beddeɣ ḏi Jmaƹeṯ nsen n lḥukkam.
21 Wac imken x wawaȓ nni iy nniɣ s uȓaɣi jarasen wami beddeɣ ḏinni? Nniɣ-asen qa kenniw ṯḥakamem xafi nhara minzi tamneɣ belli iwḏan aḏ d karren zi ȓmewṯ ḏi lqiyama."
Iqqim Arrasul Bulus ḏi ȓeḥbes n Qayṣariya
22 Filiks netta itsȓa mliḥ x ubriḏ-a n Ƹisa, walakin iʼejjel lḥukem nnes inna-asen: "Xmi d ɣa yas arrayes n ȓƹaskar Lisyas uca aḏ ḥekmeɣ x manaya."
23 Yumar ij n umeqqran n ȓƹaskar inna-as: "Ƹess x Bulus ḏi ȓeḥbes, maca uc-as cwayt n lḥurriya ejj imeddukaȓ nnes aɣares d asen bac aḏayes thillan."
24 Ƹḏun can wussan, yusa-d Filiks akiḏes ṯamɣarṯ nnes Drusila, nettaṯ ḏ ṯaʼisraʼiliṯ. Iȓaɣa-d x Bulus iṣenneṭ-as xmi issawaȓ x lʼiman zi Ƹisa Lmasiḥ.
25 Wami issiweȓ Bulus x min iǧan nican, ḏ mammec ɣa iḥkem bnaḏem x yixef nnes, ḏ Yewm Lḥisab ḏ Lƹiqab iy d ɣa yasen, inexȓeƹ Filiks inna-as: "Ṣafi ȓexxu, ƹqeb. Xmi ɣari ɣa ṯiȓi lfurṣa axak d ȓaɣiɣ."
26 Netta ƹaweḏ Filiks irezzu zi Bulus arrecweṯ. S manaya itȓaɣa-d xas aṭṭas n ṯwaȓaṯin issawaȓ akiḏes.
27 Ƹḏun ṯnayen iseggwusa, iḏweȓ-d Burkyus Fastus ḏeg umcan n lwali Filiks. Walakin Filiks igga-asen ȓxaḍar i iʼisraʼiliyen, ijja Bulus ḏi ȓeḥbes.